Kalesewola 3

1Keŋte ↄ besewↄ yako maŋ bela nyiaa, "Ŋmarase nombia kɛŋa yelee Kristotena baŋ be kyaa Saadise donↄↄ man nɛ be kegyia ŋon. Yako e nyiaa. Nnɛ yaa maŋ walaŋ ŋon me dana Wurubuarɛ feliŋse nyetooro, na kyolobiise nyetooro ŋan me nyiŋmaa man nɛ ne yako. 'Ma gyeŋ ɛ nombia ayɛɛsa. Ɛ te lɛɛ yele nyi ɛ dana nyeedoŋ, mↄ n kɛɛ na ɛ ta yekee te ɛ dↄŋ. 2Mena dↄↄ ɛ koro na ɛ ka do ɛ kelɛɛdi kyomii keŋ be kaa te kɛɛ gyae ke ka yeŋ nɛ doŋ. Nawolo nyi ma te naa nyi ɛ nombia ayɛɛsa bɛɛ tekaa gyoo me Wurubuarɛ sia ya. 3Mena dↄↄ ɛ tↄↄse nombia ŋan bↄↄ wola ŋon na ŋan ɛ be nyii te ɛ be lɛɛ di nɛ, na ɛ ke kyaŋ ŋa nideli. Na ɛ ke kyɛɛkee ɛ dinↄↄ lee ɛ gbɛɛneŋ kumɛɛ man kↄŋ Wurubuarɛ gyaŋ. Nyi akpaa ɛ te kyɛɛkee ɛ dinↄↄ ya nɛ, maa kↄŋ kaa futaa ŋon ŋgba mena keŋ ŋmɛɛlate ne kaa futaa walaŋ nɛ. Nawolo nyi ɛ be gyae ɛ ka gyeŋ debaŋ keŋ maa mo kↄŋ ya. 4Mↄna ɛ dana balaŋ kyomii baale Saadise donↄↄ man botↄↄ, keŋ baŋ te yɛɛ nombiakumɛɛ mo ayimɛɛ kpatee ba wose ya. Mena balaŋ benaŋ baa do kegbase wolomɛɛ pareparepare sila maŋ, nawolo nyi be kaboena nyi baa sila maŋ. 5Walaŋ ŋon ↄ sem keŋkeŋ te ↄ yoo di nombiakumɛɛ pou dↄↄ nɛ, maa do ↄtenate kegba wolom ŋgba mena balaŋ benaŋ nɛ. Mↄↄ gyae maa lese ↄtenate yele lee nyeedoŋ tↄne keŋ man ya. Maa di ↄtenate wose man adansɛɛ fa me kya na ↄ kpilala baŋ pou nyi ↄ yɛɛ me walaŋ e. 6Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene keŋ Wurubuarɛ feliŋ ŋon ne kolosi fa Kristotena baŋ nɛ.' " 7Keŋte ↄ besewↄ yako maŋ bela nyiaa, "Ŋmarase nombia kɛŋa yelee Kristotena baŋ be kyaa Filadefia donↄↄ man nɛ be kegyia ŋon. Yako e nyiaa. Nnɛ yaa maŋ walaŋ ŋon ayimɛɛ be doo ma wose man ya, te mee di anokoare nɛ ne yako. Maŋ danaana gyoo Defidi gyoorobiiri safowaa keŋ. Akpaa me kyaŋ ke tↄ na, ŋolo be tale toro ke ya. Te akpaa ma toro ke na, ŋolo mↄ be kyaa waa tale kyaŋ ke tↄ ya. 8'Kɛɛ, ma gyeŋ ɛ nombia ayɛɛsa pou. Ma gyeŋ nyi ɛ be dana doŋ nideli ya, mↄna ɛ dana me nombia ŋan man keŋkeŋ keŋ ɛ ta lee me wↄle ya. Mena dↄↄ me ta toro denanↄↄ see ŋon keŋ ŋolo be kyaa waa tale tↄ ke ya. 9Mɛɛ gyae ɛ ka gyeŋ nyi mena ↄbↄnsam tewulɛɛ baŋ bɛɛ beo baake ba wose nyi be yɛɛ Gyudatenawↄ, mↄna ba te yɛɛ Gyudatenawↄ ya nɛ, maa yela mena balaŋ benaŋ pou kaa buŋii ɛ nawↄↄtɛɛ, na be popou kena nyi mɛɛ gyae ɛ nombia nideli. 10Lee mena keŋ ɛ be di me nombia dↄↄ te ɛ be nyiŋ konↄↄ seŋ keŋkeŋ ɛ kayeyɛɛ man dↄↄ, maa lese ŋon lee kayeyɛɛ dinaa keŋ gyae ke kↄŋ kaa kɛɛse tɛɛle kei dↄↄ balaŋ pou kɛɛ nɛ man. 11Kɛɛ, be gyae kedi weeya ya, maa kↄŋ. Mena dↄↄ ɛ kyaŋ anokoare kawola keŋ ɛ gyeŋ nɛ man keŋkeŋ, na ŋolo be nyiŋ lɛo gyooro kotↄtↄↄ keŋ mↄↄ yako nyi maa fa ŋon nɛ lee ɛ nyiŋmaa man ya. 12Walaŋ kamasɛ ŋon ↄ sem keŋkeŋ te ↄ yoo di ↄbↄnsam na nombiakumɛɛ pou dↄↄ nɛ, maa mo e yɛɛ ŋgba dekparadaŋ nɛ me kya Wurubuarɛ ↄsom deni dinaa keŋ man. Mena walaŋ ŋonaŋ be gyae waa tuu lee botↄↄ korakora ya. Maa ŋmarase me kya Wurubuarɛ yele, na me kya Wurubuarɛ donↄↄ Gyerusalɛm wↄle keŋ yele gyakaa ↄ dↄↄ. Mena Gyerusalɛm wↄle kei gyae ke tisi bo lee me kya Wurubuarɛ gyaŋ adido kↄŋ. Na maa bese ŋmarase maŋ gbagba mↄ yele wↄle gyakaa ↄtenate dↄↄ. 13Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene keŋ Wurubuarɛ feliŋ ŋon ne kolosi fa Kristotena baŋ nɛ.' " 14Keŋte ↄ besewↄ yako maŋ bela nyiaa, "Ŋmarase nombia kɛŋa yelee Kristotena baŋ be kyaa Laodisia donↄↄ man nɛ be kegyia ŋon. Yako e nyiaa. Nnɛ yaa maŋ Yesu ŋon Wurubuarɛ nombia ŋan pou be tɛɛ me dↄↄ kↄŋ mena, te mɛɛ mo me konↄↄ pou kolosi Wurubuarɛ nombia ŋan anokoare man, te maŋ yɛna abↄↄ ŋan pou Wurubuarɛ be yɛɛ nɛ nyee nɛ ne yako. 15Ma gyeŋ ɛ nombia ayɛɛsa pou nyi ɛ be laŋɛɛ ya, te ɛ be fɛɛ mↄ ya. Ma kegyaebii yɛna nyi nafↄ yaa laŋe yaa ɛ fɛɛ. 16Mↄna keŋ ɛ be laŋɛɛ ya, te ɛ be fɛɛ mↄ ya, te ɛ yɛɛ bo mↄlaa nɛ dↄↄ, mɛɛ gyae maa buusu ŋon lee me nↄↄman leki. 17Ɛmɛɛ kpa ɛ te nyiŋ ɛ wose keŋ abↄↄ pou te dee fa ŋon, mena dↄↄ kolo bee hia ŋon bela ya. Mↄ n kɛɛ na ɛ dↄŋ kyekpakyekpakyekpa, te ɛ yɛɛ ayematenawↄ. Ɛ sia te yɛlɛɛ te ɛ dↄŋ diteŋteli, te ɛ nombia mↄ dana waraŋase. 18Mena dↄↄ mɛɛ yako ŋon baa nyiaa, ɛ kↄŋ kaa lɛɛ kↄba yayam kpaakpaate keŋ bↄↄ mo ke do boalaŋ man kyalase ke nɛ me gyaŋ. Keŋ ne gyae la ke yela ɛ ke nyiŋ ɛ wose nideli. Ɛ kↄŋ kaa lɛɛ kegbase wolomɛɛ me gyaŋ na ɛ ka mo wuu ɛ wose diteŋteli na ɛ desɛŋ keŋ. Ɛ kↄŋ kaa lɛɛ sia tee me gyaŋ do ɛ sia, na ɛ ke nyiŋ naa nideli. 19Mɛɛ gyae ɛ ka gyeŋ nyi balaŋ baŋ pou mɛɛ gyae be nombia nɛ baŋ te mɛɛ kale na, na ma te wↄŋ ba deŋele. Mena dↄↄ ɛ yase ɛ sia kyɛɛkee lee ɛ gbɛɛneŋ kumɛɛ man, na ɛ ke kↄŋ Wurubuarɛ gyaŋ. 20Ɛ tei maŋ. Ma seŋɛɛ denanↄↄ man mɛɛ gyↄ disim keŋ. Nyi akpaa ŋolo de nyii ma woya te ↄ toro maŋ disim keŋ nɛ, maa gyoo ↄtenate gyaŋ na daa na e ka do nyiŋmaa di. 21Walaŋ kamasɛ ŋon ↄ sem keŋkeŋ te ↄ yoo di ↄbↄnsam na nombiakumɛɛ pou dↄↄ nɛ, maa fa ↄtenate gbɛɛ na waa kyaa me gyaŋ me gyooro gbeli keŋ dↄↄ. Ŋgba mena keŋ maŋ mↄ ba sem keŋkeŋ yoo di ↄbↄnsam na nombiakumɛɛ pou dↄↄ, te mↄↄ gyu ke kyaa me kya gyaŋ ↄ gyooro gbeli keŋ dↄↄ nɛ. 22Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene keŋ Wurubuarɛ feliŋ ŋon ne kolosi fa Kristotena baŋ nɛ."

will be added

X\