Kalesewola 20

1Keŋte me naa Wurubuarɛ kpilale ŋolo te tisi lee adido ↄ ne kↄŋ. Ↄ dana safowaa keŋ bɛɛ mo toro bↄↄ kyilimkyilim keŋ ke taŋ ↄto ya nɛ, na agbaraagbaraa dinaa daale ↄ nyiŋmaa man. 2Botↄↄ te ↄ kyaŋa wonembukum dekpatakpere ŋon ↄ yɛɛ ŋgba laŋaŋ nɛ doŋ man. Ŋon yɛna beneŋ beneŋ dom ŋon bɛɛ baake e nyi yele wↄlɛɛre yaa ↄbↄnsam nɛ. Keŋte ↄ bake e see nyi waa doo botↄↄ kulutooneŋ kakpoŋ (1,000). 3Te Wurubuarɛ kpilale ŋon fuŋa e do bↄↄ keŋ ke taŋ ↄto ya nɛ man, te ↄ tↄↄ ke safowaa. Keŋte ↄ moo kolo tↄ ke nↄↄ, na ↄ ba tekaa nyiŋ gbɛɛ ta beo balaŋ tɛɛle kei dↄↄ bela ya, kelii kulutooneŋ kakpoŋ (1,000) ŋan ↄto. Kenaŋ wↄle na, baa bese lese e debaŋ kyomii daale bela. 4Kenaŋ wↄle te me naa gyooro gbelɛɛ ŋaale bela. Na balaŋ baŋ be kyakɛɛ ŋe dↄↄ nɛ, yɛna balaŋ baŋ bↄↄ fa wↄ doŋ nyi baa di balaŋ nombia nɛ. Keŋte ma besewↄ naa balaŋ baŋ bↄↄ kolosi Wurubuarɛ nombia ŋan, te bↄↄ di Yesu Kristo wose man adansɛɛ dↄↄ bↄↄ kɛrɛɛ ba nyeeya nɛ ba woya. Mena balaŋ kɛwↄ yɛna balaŋ baŋ be te buŋ som wonembukum ŋon ya, yaa bane ŋon bↄↄ maa wonembukum ŋon dinↄↄ man ya, te ba te sɛɛ mↄ nyi baa do wↄ wonembukum ŋon nso be tirinↄↄse dↄↄ yaa be nyiŋmaase dↄↄ ya nɛ. Mena balaŋ kɛwↄ foŋae lee yeŋ man, na baŋ na Kristo kedi gyoori kulutooneŋ kakpoŋ (1000). 5Kɛwↄ yɛna balaŋ gyaŋgbatena baŋ bↄↄ taŋgbɛɛ foŋ lee yeŋ man. Woya akaŋ baŋ dↄↄ, bↄↄ gyae baa foŋ ya kelii kulutooneŋ kakpoŋ (1000) ŋan ↄto pɛ. 6Balaŋ baŋ be kpuɛ balaŋ gyaŋgbatena baŋ bↄↄ taŋgbɛɛ foŋ lee yeŋ man nɛ, baŋ na nyeebam te Wurubuarɛ siaman na, ayimɛɛ kamasɛ be doo be man ya. Mena balaŋ kɛwↄ dↄↄ, yeŋ bolate keŋ be dana doŋ be dↄↄ bela ya. Baa bese Wurubuarɛ na Kristo saese, na baŋ na Kristo ke di gyoori kulutooneŋ kakpoŋ (1000). 7Kulutooneŋ kakpoŋ (1000) ŋan wↄle nɛ, baa lese ↄbↄnsam lee botↄↄ keŋ bↄↄ tↄ e do nɛ. 8Waa ta beo tɛɛle kei dↄↄ yenaŋ kamasɛ balaŋ pou, na waa yilaa wↄ fa yoo. Be yaanↄↄle yɛɛ ŋgba ɛpo nↄↄman aŋasa nɛ. Tɛɛlese kɛŋa te bɛɛ baake nyi Gↄge na Magↄge. 9Ŋon na ↄ balaŋ yaaseewↄ gyoo tɛɛle kei dↄↄ pou, te be kilisi Wurubuarɛ balaŋ na ↄ donↄↄ keŋ ↄ ne gyae ke nɛ. Mↄna boalaŋ leewↄ adido kↄŋ kaa kpa wↄ pou. 10Keŋte be fuŋa ↄbↄnsam ŋon ↄ ba beo wↄ nɛ do boalaŋ degyapaa keŋ kɛɛ kpaa ŋgba kpatakpela nɛ man. Botↄↄ keŋ bↄↄ wulaa fuŋ wonembukum ŋon na dekara dekpeŋkpeŋgyↄↄre ŋon do nɛ. Botↄↄ te baa naa diyem nelim na ka weese kekpaakekpaa. 11Keŋte me naa gyooro gbeli wolom dinaa dinaa daale, na walaŋ ŋon ↄ kyaa ke dↄↄ nɛ. Te adido na ateta pou ŋaalaawↄ ↄ siaman, keŋ ŋolo na ŋolo te naa ŋa bela ya. 12Te me naa balaŋ baŋ pou be dana yele na balaŋ yakaa nyibaŋ baŋ bↄↄ yekee nɛ, na ba seŋɛɛ gyooro gbeli keŋ siaman. Botↄↄ te be gyuusu tↄna ŋaale man. Keŋte ba besewↄ gyuusu tↄne keŋ bɛɛ baake ke nyi nyeedoŋ tↄne nɛ. Te be dii woya baŋ nombia, ŋgba mena keŋ bↄↄ ŋmarase ba wose man nombia do tↄna ŋan man nɛ. 13Botↄↄ te ɛpo lese balaŋ baŋ pou bↄↄ yem dↄↄ ke man nɛ debↄↄ, te yeŋ na woyadɛɛ mↄ lese woya baŋ be doo be nyiŋmaa man debↄↄ. Te be dii be man walaŋ kamasɛ nombia, ŋgba mena keŋ bↄↄ ŋmarase be nombia ayɛɛsa do tↄna ŋan man nɛ. 14Keŋte be fuŋa yeŋ na woyadɛɛ do boalaŋ degyapaa dinaa keŋ man. Boalaŋ degyapaa kei yɛna yeŋ bolate keŋ. 15Walaŋ kamasɛ ŋon ba te naa ↄ yele nyeedoŋ tↄne keŋ man ya nɛ, bee fuŋ ↄtenate bo do boalaŋ degyapaa keŋ man.

will be added

X\