Kalesewola 2

1Keŋte ↄ besewↄ yako maŋ Gyↄn bela nyiaa, "Ŋmarase nombia kɛŋa yelee Kristotena baŋ be kyaa Efeso donↄↄ man nɛ be kegyia ŋon. Yako e nyiaa. Nnɛ yaa maŋ walaŋ ŋon me dana kyolobiise nyetooro me dunoluŋ nyiŋmaa man, te me dↄŋɛɛ nyeela nyetooro ŋan bↄↄ mo kↄba yayam yɛɛ ŋa te bɛɛ mo kanease gyakaa ŋe dↄↄ nɛ nsana nsana ne yako. 2'Ma gyeŋ ɛ nombia ayɛɛsa. Ɛ ne kyaŋ ɛ wose yɛɛ tom, te ɛ ne nyiŋ konↄↄ seŋ keŋkeŋ ɛ kayeyɛɛ man. Ma gyeŋ nyi ɛ bɛɛ mo ɛ wose do na balaŋ kumɛɛ ya. Ɛ ta gyoo balaŋ baŋ bɛɛ beo baake ba wose nyi be yɛɛ Kristo kpilalawↄ nɛ wose man kɛɛ, te ɛ naawↄ nyi be yɛɛ akɛrɛɛtenawↄ. 3Lee mena keŋ ɛ be lɛɛ maŋ di dↄↄ ɛ nyiŋa konↄↄ seŋ keŋkeŋ naa diyem, keŋ ɛ wose te yↄkↄse ŋon na ɛ ka lee me wↄle ya. 4Mↄna nombii dokoloŋ keŋ mↄↄ naa lee ɛ wose man keŋ be dei ya yɛna nyiaa, balaŋ kegyae keŋ doo ɛ man lee kewalaŋ keŋ ɛ be lɛɛ Kristo di nɛ, ta lee ɛ man. 5Mena dↄↄ ɛ tↄↄse botↄↄ keŋ nafↄ ɛ seŋɛɛ pɛte ɛ ba lee ɛ wↄle nɛ. Ɛ kyɛɛkee lee ɛ gbɛɛneŋ kumɛɛ man na ɛ ke kↄŋ Wurubuarɛ gyaŋ, na ɛ ke yɛɛ abↄↄ ŋan nafↄ ɛ ne yɛɛ kewalaŋ keŋ nɛ. Nyi akpaa ɛ te kyɛɛkee ɛ dinↄↄ ya nɛ, maa kↄŋ kaa gate daŋ keŋ dↄↄ ɛ kanea keŋ gyakaa nɛ lee ke daseŋae man. 6Mↄna nombii dokoloŋ keŋ ɛ ne yɛɛ te ke dei me gyaŋ yɛna nyi, ɛ ne kↄla Nikolaitena nombia ayɛɛsa ŋgba mena keŋ maŋ mↄ ne kↄla ŋa nɛ. 7Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene keŋ Wurubuarɛ feliŋ ŋon ne kolosi fa Kristotena baŋ nɛ. Ↄ kpa nyiaa, walaŋ kamasɛ ŋon ↄ sem keŋkeŋ te ↄ yoo di nombiakumɛɛ pou dↄↄ nɛ, maa fa ↄtenate gbɛɛ na waa di nyeedoŋ daŋ keŋ ka seŋɛɛ Wurubuarɛ gyaŋ botↄↄ keŋ bɛɛ baake nyi Paradiso nɛ bia.' " 8Keŋte ↄ besewↄ yako maŋ nyiaa, "Ŋmarase nombia kɛŋa yelee Kristotena baŋ be kyaa Simaena donↄↄ man nɛ be kegyia ŋon. Yako e nyiaa. 'Nnɛ yaa maŋ walaŋ ŋon maŋ yɛna gyaŋgbate na ↄtomante, te mↄↄ yem te mↄↄ bese foŋ lee yeŋ man nɛ ne yako. 9Ma gyeŋ nombia ŋan be yala ŋon na kayeyɛɛ keŋ ɛ na yeyɛɛ. Ma gyeŋ mↄ nyi ɛ yɛɛ ayematenawↄ, mↄna Wurubuarɛ gyaŋ na ɛ te yɛɛ ayematenawↄ ya. Ma gyeŋ nombiakumɛɛ ŋan balaŋ ne kolosi lee ɛ wose man. Mena balaŋ benaŋ ne baake ba wose nyi be yɛɛ Gyudatenawↄ, mↄna ke yɛɛ dekara ke. N kɛɛ na be yɛɛ ↄbↄnsam balaŋwↄ. 10Ɛ na yeli kayeyɛɛ keŋ gyae kaa kↄŋ ɛ dↄↄ nɛ ka do ŋon gyakoloŋ ya. Mɛɛ yako ŋon baa nyiaa, ↄbↄnsam waa yela baa kyaŋ ɛ man baale ketↄ deni na waa mo kɛɛse ŋon kɛɛ. Ɛ kena diyem menɛɛ weeya kufu. Nyi akpaa ke yɛɛ yeŋ ke koraŋ na, ɛ seŋ keŋkeŋ kelii ↄto. Akpaa ɛ yɛɛ mena na, maa mo nyeedoŋ kekpaa tↄ ŋon kom. 11Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene keŋ Wurubuarɛ feliŋ ŋon ne kolosi fa Kristotena baŋ nɛ. Ↄ kpa nyiaa, walaŋ kamasɛ ŋon ↄ sem keŋkeŋ te ↄ yoo di nombiakumɛɛ pou dↄↄ nɛ, ↄtenate be gyae waa tekaa yeŋ yeŋ bolate keŋ bela ya.' " 12Keŋte ↄ besewↄ yako maŋ bela nyiaa, "Ŋmarase nombia kɛŋa yelee Kristotena baŋ be kyaa Pɛgamum donↄↄ man nɛ be kegyia ŋon. Yako e nyiaa. 'Nnɛ yaa maŋ walaŋ ŋon me dana yoosila sia na wↄle keŋ kɛɛ bee nideli nɛ ne yako. 13Ma gyeŋ ɛ dekyae. Ma gyeŋ nyi ɛ kyae botↄↄ keŋ ↄbↄnsam ne di gyoori nɛ. Debaŋ keŋ Antipase ne kolosi ma wose man nombia anokoare man fa balaŋ botↄↄ te bↄↄ ko e koraŋ nɛ, ɛ seŋawↄ keŋkeŋ ɛ kelɛɛdi man keŋ ɛ ta lee me wↄle. 14Mↄna nombia bia ŋan mↄↄ naa lee ɛ wose man keŋ ŋↄↄ dei ya yɛna nyiaa, balaŋ baale doo ɛ man keŋ be silana Baalam kawola keŋ. Baalam ŋonaŋ wolana Balaki nyi waa beo Iseraetena na baa yɛɛ nombiakumɛɛ. Keŋte ↄ beo wↄ yela be dii weenɛɛ ŋan bↄↄ mo deesi fa bɛɛneŋ nɛ, te ↄ besewↄ yela be yɛɛ kafoŋ nombia kpu. 15Mena ke mↄ te balaŋ baale doo ɛ man keŋ be silana Nikolaitena kawola keŋ. 16Mena dↄↄ ɛ kyɛɛkee lee ɛ gbɛɛneŋ kumɛɛ man na ɛ ke kↄŋ Wurubuarɛ gyaŋ. Na mena ya nɛ be gyae ke di weeya ya maa kↄŋ ɛ gyaŋ, na maa mo yoosila keŋ doo me nↄↄman nɛ kaa yoo na mena balaŋ benaŋ. 17Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene Wurubuarɛ feliŋ ŋon ne kolosi fa Kristotena baŋ nɛ. Ↄ kpa nyiaa, walaŋ kamasɛ ŋon ↄ sem keŋkeŋ te ↄ yoo di nombiakumɛɛ pou dↄↄ nɛ, maa fa ↄtenate weenɛɛ ŋan weesɛɛ te bɛɛ baake ŋa nyi Maana nɛ ŋaale waa di. Maa bese fa ↄtenate boe wolom keŋ bↄↄ ŋmarase yele wↄle daale gyakaa ke dↄↄ nɛ kpu. Ŋolo be gyae waa gyeŋ yele keŋ gyakaa boe kenaŋ dↄↄ kpu na walaŋ ŋon waa nyiŋ ke nɛ ya.' " 18Keŋte ↄ besewↄ yako maŋ bela nyiaa, "Ŋmarase nombia kɛŋa yelee Kristotena baŋ be kyaa Tiatira donↄↄ man nɛ be kegyia ŋon. Yako e nyiaa, 'Nnɛ yaa maŋ Wurubuarɛ bu ŋon me sia ne ŋalakee ŋgba boalaŋ laakem nɛ, te me nawↄↄ mↄ ne ŋalakee ŋgba nyeele keŋ bↄↄ mo do boalaŋ man kyalase ke nɛ ne yako. 19Ma gyeŋ ɛ nombia ayɛɛsa. Ma gyeŋ ɛ balaŋ kegyae na ɛ kelɛɛdi na yↄ ↄsom na ɛ kɛɛ kyaŋ ɛ wose seŋ keŋkeŋ kayeyɛɛ man. Ma gyeŋ nyi nɛnɛɛ dↄↄ, ɛ ne yɛɛ nombia kpaakpaa kela debaŋ keŋ ɛ be taŋgbɛɛ lɛɛ maŋ di nɛ. 20Mↄna nombii dokoloŋ keŋ mↄↄ naa lee ɛ wose man keŋ be dei ya yɛna nyiaa, ɛ ne fa alo ŋon bɛɛ baake e nyi Gyesebɛli ŋon ↄ ne baake ↄ wose nyi ↄ yɛɛ Wurubuarɛ dekpeŋkpeŋgyↄↄre e nɛ gbɛɛ te ↄ ne yɛɛ ↄ kegyaebii. Nawolo nyi ↄ dana ↄ kawolakum keŋ ↄ na beo me tewulɛɛ, te ↄ ne yeli bɛɛ yɛɛ kafoŋ nombia te ↄ ne yeli bee di weenɛɛ ŋan bɛɛ mo deesi fa bɛɛneŋ nɛ. 21Ma te kɛɛ ↄ siaman kyare nyi nafↄ waa kyɛɛkee lee ↄ gbɛɛneŋ kumɛɛ ŋenaŋ man na waa kↄŋ Wurubuarɛ gyaŋ, mↄna ↄ bɛɛ gyae waa tina ↄ nombiakumɛɛ ŋenaŋ keyɛɛ yela ya. 22Lee mena dↄↄ maa gyↄ e do kawee, na waa doo dofoŋoŋ dↄↄ yeyɛɛ. Te akpaa balaŋ baŋ pou baŋ na e ne yɛɛ mena kafoŋ nombia ŋenaŋ te wↄŋ ba wose lee ↄ nombiakumɛɛ ŋenaŋ keyɛɛ man ya nɛ, maa yela baŋ mↄ kena diyem nideli ŋgba ŋon nɛ. 23Maa koe ↄ balaŋ baŋ pou be silana e nɛ. Me yɛɛ mena nɛ, Kristotena baŋ pou baa gyeŋ nyi maŋ yɛna walaŋ ŋon ↄ gyeŋ balaŋ konↄↄse na ba agyueŋse man nombia pou. Nombia ŋan walaŋ kamasɛ ne yɛɛ nɛ te maa kɛɛ na maa tↄ e kom. 24Nɛnɛɛ ɛmɛɛ balaŋ akaŋ baŋ ɛ kyaa Tiatira donↄↄ man te ɛ be bɛɛ ɛ te sila Gyesebɛli kawolakum keŋ ya, te ɛ be bɛɛ ɛ te kasee kpene keŋ baŋ be silana alo ŋonaŋ nɛ ne baake nyi ↄbↄnsam nombia aweeseŋ ŋan ya nɛ, mↄↄ gyae maa mo kasolↄ daale lↄ ɛ dↄↄ bela ya. 25Mↄna ɛ kyaŋ nombia ŋan ɛ dana nɛ man keŋkeŋ kelii debaŋ keŋ maa bese kↄŋ. 26Walaŋ kamasɛ ŋon ↄ sem keŋkeŋ te ↄ yoo di ↄbↄnsam dↄↄ te ↄ yɛɛ ma kegyaebii kelii ↄto nɛ, maa fa e doŋ na waa di tɛɛlese pou dↄↄ, ŋgba mena keŋ me kya be fa maŋ doŋ nɛ. Maa fa e doŋ na waa di tɛɛle kei balaŋ pou dↄↄ, keŋ ↄ be gyae waa wii be waraŋase ya. Waa yɛlɛɛ wↄ bogobogobogo ŋgba mena keŋ bɛɛ yɛlɛɛ saabuse nɛ. 28Na maa bese fa ↄtenate nebo kyolobii ŋon kpu. 29Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii kpene keŋ Wurubuarɛ feliŋ ŋon ne kolosi fa Kristotena baŋ nɛ.' "

will be added

X\