Kalesewola 19

1Kɛŋa pou wↄle nɛ, me nyii yeesa ŋaale adido ŋgba balaŋ burum yeesa nɛ nyiaa, "Ɛ lese Wurubuarɛ yele. De Wurubuarɛ yɛna nyeelɛɛre. Ŋon te gyoorobiiri na doŋ pou yɛɛ ↄ wui. 2Nawolo nyi Wurubuarɛ ne di nombia ke gbɛɛ dↄↄ, te kaboena mↄ. Ↄ te bu futooli alo dinaa ŋon ↄ ba mo ↄ kafoŋ nombia wↄlɛɛ tɛɛle kei dↄↄ balaŋ nɛ fↄↄ. Te lee mena keŋ ↄ ba koe Wurubuarɛ tewulɛɛ dↄↄ, te Wurubuarɛ ne wↄŋ ↄ deŋele tↄ kom nɛ." 3Keŋte ba besewↄ fae yeesa adido botↄↄ bela nyiaa, "Ɛ lese Wurubuarɛ yele. Be ka too Babilↄn donↄↄ keŋ nɛ, boalaŋ keŋ nyↄↄse ta koro laŋ adido kekpaakekpaa." 4Botↄↄ te kegyiise saobanaara baŋ, na wonise banaara baŋ tisiwↄ buŋ te ba som Wurubuarɛ ŋon ↄ kyaa ↄ gyooro gbeli dↄↄ nɛ te be sɛɛwↄ nyiaa, "Ɛ lese Wurubuarɛ yele. Amɛn." 5Keŋte yeesa ŋaale leewↄ gyooro gbeli keŋ gyaŋ nyiaa, "Ɛmɛɛ Wurubuarɛ tewulɛɛ pou, ɛ lese ↄ yele. Ɛmɛɛ baŋ pou ɛ ne yee Wurubuarɛ nɛ, ɛ lese ↄ yele. Balaŋ baŋ be dana yele na balaŋ yakaa nyibaŋ pou, ɛ lese Wurubuarɛ yele." 6Botↄↄ te me nyii yeesa ŋaale adido ŋgba balaŋ burum baale yeesa nɛ bela. Yeesa ŋenaŋ nkaŋ yɛɛ ŋgba boo dinaa daale wuu la yaa ↄga kefae nɛ nyiaa, "Ɛ lese Wurubuarɛ yele. Nawolo nyi de Gbeŋgyoo Wurubuarɛ ŋon ↄ yɛɛ doŋ pou nyee e nɛ, ŋon ne diina gyoori. 7Ɛ yela ke yɛɛ daa gyoŋ na dɛɛ nyaŋee na dɛɛ lese Wurubuarɛ yele. Nawolo nyi debaŋ te lii nyi Nambu ŋon ↄ ba mo ↄ wose fa kedeesa nɛ ka kpeo alo. Te alowↄle ŋon mↄ te desina ↄ wose see. 8Be ta mo akaralɛɛ keŋ ke dana kyeo te ka wolosɛɛ nideli nɛ, kegba fa alowↄle ŋon nyi waa do." (Akaralɛɛ keŋ seŋɛɛ fa Wurubuarɛ balaŋ nombia kpaakpaa ŋan bɛɛ yɛɛ nɛ.) 9Keŋte Wurubuarɛ kpilale ŋon yako maŋ nyiaa, "Ŋmarase nyiaa, 'Balaŋ baŋ bↄↄ baake wↄ Nambu ŋon alowↄle weenɛɛ tɛɛ nɛ, baŋ na nyeebam.' " Te ↄ besewↄ yako maŋ nyiaa, "Wurubuarɛ nↄↄwoya gbagba yɛna kɛŋa." 10Botↄↄ te me tisiwↄ buŋ ↄ nawↄↄtɛɛ nyi maa som e, te ↄ yako maŋ nyiaa, "Naa yɛɛ mena ya. Nawolo nyi maŋ mↄ yɛɛ Wurubuarɛ tobaale e, ŋgba ɛmɛɛ na n tebia baŋ pou de dana Kristo nombia ŋan ↄ ba lese wola daa man nideli nɛ. Mena dↄↄ Wurubuarɛ waageŋ te kaboena nyi dɛɛ som." Nawolo nyi anokoare keŋ Yesu ba lese wola daa nɛ, keŋ ne faa na ↄ balaŋ doŋ te bɛɛ tale kolosi ↄ nombia. 11Keŋte me naawↄ na adido ta toro, te me kɛɛ na dɛɛkyↄŋ wolom ŋolo seŋɛɛ laa, na ŋolo kyaa ↄ dↄↄ. Walaŋ ŋon ↄ kyaa ↄ dↄↄ nɛ yele yɛna nyi, "Walaŋ ŋon ↄ dana anokoare, te ↄ bee di dekara ya." Nawolo nyi ↄ ne di ↄ nombia na ke gbɛɛ, te ↄ ne yoo ↄ yoo mↄ na ke gbɛɛ. 12Na ↄ siabia yɛɛ ŋgba boalaŋ laakem nɛ, te ↄ wuuna gyooro kotↄtↄↄse burum. Ↄ dana yele daale keŋ bↄↄ ŋmarase gyakaa ↄ dↄↄ, keŋ ŋolo ba gyeŋ yele kenaŋ kpu na e ya. 13Ↄ doona kegba wurikyim daale keŋ bↄↄ mo ke do fatabo man. Ↄ yele keŋ bɛɛ baake e yɛna nyi, "Wurubuarɛ Nombii." 14Na Wurubuarɛ adido yoonↄↄtena kyaa dɛɛkyↄŋse woloma dↄↄ be silana e. Ba doona akaralɛɛ kegbase kpaakpaa nyiŋan, ŋan ayimɛɛ kamasɛ be doo ŋe man ya. 15Yoosila keŋ ke yɛɛ sia na wↄle te kɛɛ bee nideli nɛ tosɛɛ ↄ nↄↄman. Yoosila kenaŋ te waa mo yoo di tɛɛle kei balaŋ pou dↄↄ. Waa yɛɛ doŋ na waa di gyoori tɛɛle kei balaŋ pou dↄↄ, keŋ ↄ be gyae waa wii be waraŋase ya. Te waa yela Wurubuarɛ ŋon ↄ yɛɛ doŋ pou nyee e nɛ, ka mo ↄ baŋ kum keŋ wↄŋ ba deŋele nideli, ŋgba mena keŋ bɛɛ ŋmaase daŋbii lese ka loŋ nɛ. 16Te yele keŋ bↄↄ ŋmarase gyakaa ↄ kegba na ↄ yii dↄↄ yɛna nyiaa, "GYOONEŊ POU GYOO, NA GBEŊGYOONA POU GBEŊGYOO." 17Botↄↄ te me naa Wurubuarɛ kpilale ŋolo seŋɛɛ weese man. Keŋte ↄ fae yeesa keŋkeŋ baake gyebuse baŋ pou bee furufu adido nɛ nyiaa, "Ɛ kↄŋ kaa yilaa Wurubuarɛ Dekpatakpere ŋon gyaŋ, na ɛ ke di weenɛɛ ŋan ↄ be desina see ŋon nɛ. 18Ɛ kↄŋ kaa kyoŋii gyooneŋ na yoonↄↄtena kegyiise, na yoonↄↄtena baŋ bↄↄ yale yoo man nɛ naane. Ɛ kↄŋ kaa kyoŋii dɛɛkyↄŋse na baŋ be kyaa be dↄↄ nɛ, na balaŋ pou na gbeŋa na gyoorobia na balaŋ baŋ be dana yele na balaŋ yakaa nyibaŋ pou naane." 19Keŋte me naa wonembukum ŋon, na tɛɛle kei dↄↄ gyooneŋ na be yoonↄↄtena pou, na be te yilaa bɛɛ kↄŋ be kaa yoo na walaŋ ŋon ↄ kyaa dɛɛkyↄŋ wolom ŋon dↄↄ nɛ, na ↄ yoonↄↄtena. 20Mↄna be dii wonembukum ŋon, na dekara dekpeŋkpeŋgyↄↄre ŋon ↄ be yɛɛ gyakoloŋ nombia wonembukum ŋon yele man nɛ dↄↄ. Nawolo nyi gyakoloŋ nombia kɛŋa te ↄ moowↄ beo balaŋ baŋ bↄↄ do wↄ wonembukum ŋon nso, te bↄↄ som bane ŋon bↄↄ maa wonembukum ŋon dinↄↄ man nɛ. Keŋte be fuŋa wonembukum ŋonaŋ, na ↄbↄnsam dekara dekpeŋkpeŋgyↄↄre ŋon na be sia fonɛɛ do boalaŋ degyapaa keŋ kɛɛ kpaa ŋgba kpatakpela nɛ man. 21Yoosila keŋ doo walaŋ ŋon ↄ kyaa dɛɛkyↄŋ wolom ŋon dↄↄ nↄↄman nɛ, keŋte ↄ moowↄ koe balaŋ akaŋ baŋ pou, te gyebuse kaa wuuwↄ be naane dↄↄ te be dii ŋa ba kegyaebii.

will be added

X\