Kalesewola 17

1Kenaŋ wↄle te Wurubuarɛ kpilala nyetooro baŋ be dana nyefalɛɛ nyetooro ŋan nɛ, be man ŋolo kↄŋawↄ me gyaŋ kaa yako maŋ nyiaa, "Kↄŋ na maa wola neŋ mena keŋ maa wↄŋ futooli alo ŋon deŋele. Alo ŋonaŋ yɛna donↄↄ dinaa keŋ bↄↄ baŋ ke booneŋ burum nↄↄman nɛ." 2Tɛɛle kei dↄↄ gyooneŋ ta gyem tisi ↄ dↄↄ ke yɛɛ kafoŋ nombia na e. Ↄ ta mo ↄ kafoŋ nombia wↄlɛɛ tɛɛle kei dↄↄ balaŋ pou nyee, ŋgba mena keŋ soloŋ ne wↄlɛɛ soloŋ nyↄↄra nyeeya nɛ. 3Keŋte Wurubuarɛ feliŋ ŋon kaa gyoowↄ me man nideli, te Wurubuarɛ kpilale ŋon moo maŋ gyu depampaa dinaa daale man. Botↄↄ te me naa alo ŋolo na ↄ kyaa wonembukum yayam ŋolo dↄↄ. Ba te ŋmarase mmusuo yela ŋan ŋɛɛ tia Wurubuarɛ nɛ gyakaa ↄ dↄↄ pou. Wonembukum ŋonaŋ dana nyeeya nyetooro na woo kufu. 4Na alo ŋonaŋ doona kanyaŋ yayam na agoo abↄↄ. Te ↄ moo kↄba yayam abↄↄ na kegyaŋase kpookpoo kpaakpaa nyiŋan ŋan ŋɛɛ ŋalakee te ŋe dana koyadoŋ nɛ mia desina ↄ wose. Te ↄ dana kↄba yayam kuruwaa keŋ ↄ nombia nkaraŋkaraŋ na ↄ futooli nombia ŋan be wulu ke man nɛ ↄ nyiŋmaa man. 5Ba te ŋmarase yele daale keŋ walaŋ na walaŋ ba gyeŋ ka asɛɛ ya nɛ gyakaa ↄ tirinↄↄ dↄↄ nyiaa, "BABILↃN DONↃↃ DINAA, FUTOOLI ALA POU BE NAA, TƐƐLE KEI NOMBIA NKARAŊKARAŊ POU NYEE." 6Keŋte me naawↄ na, alo ŋon te nyↄↄ Wurubuarɛ balaŋ fatabo baa dɛɛse ŋgba soloŋ te ↄ nyↄↄwↄ nɛ. Balaŋ kɛwↄ yɛna baŋ bↄↄ koe wↄ, keŋ bↄↄ mo be konↄↄ pou sila Yesu nɛ dↄↄ. Ma kena alo ŋonaŋ nɛ, ma wose gbirisi maŋ nideli. 7Botↄↄ te Wurubuarɛ kpilale ŋon bↄↄse maŋ nyiaa, "Woŋ dↄↄ te n wose gbirisi neŋ? Yela maa lese alo ŋon na wonembukum ŋon ↄ dana nyeeya nyetooro na woo kufu, te alo ŋon kyaa ↄ dↄↄ nɛ nombia aweeseŋ ŋan man wola neŋ. 8Wonembukum ŋon n be naa nɛ nafↄ na ↄ kyaa, mↄna nɛnɛɛ dↄↄ ↄ be kyaa bela ya. Waa lee bↄↄ kyilimkyilim keŋ ke taŋ ↄto ya nɛ man kↄŋ, na ↄ kaa yeŋ leki. Nyi akpaa tɛɛle kei dↄↄ balaŋ baŋ pou ba te ŋmarase ba yela do Wurubuarɛ nyeedoŋ tↄne keŋ ke kyaa leenaŋ kewalaŋ keŋ Wurubuarɛ be yɛɛ tɛɛle kei ya nɛ de naa wonembukum ŋon na, gyakoloŋ gyae ke kyaŋ wↄ nideli. Nawolo nyi nafↄ na wonembukum kei kyaa, te nɛnɛɛ dↄↄ ↄ be kyaa ya. Mↄna waa bese kaa lese ↄ wose wola bela. 9Walaŋ ŋon ↄ dana nyansa te ↄ gyeŋ nombia nɛ, ŋon ne gyae la waa tale nyii nombia kɛŋa man nideli. Wonembukum ŋon nyeeya nyetooro ŋan seŋɛɛ fa bulasebia nyetooro, te bulasebia ŋenaŋ dↄↄ te alo ŋon ne kyaa. Bulasebia ŋenaŋ mↄ seŋɛɛ fa gyooneŋ nyetooro. 10Gyooneŋ kɛwↄ man banoŋ ta yekee. Loorote ŋon gyakaa ↄ ne di gyoori, te nyetoorote ŋon te kↄŋa ta ya. Akpaa nyetoorote ŋon de kↄŋ nɛ, waa di gyoori keŋ bo debaŋ kyomii na baa gegi e. 11Wonembukum ŋon ↄ be kyaa kaalaŋ te nɛnɛɛ ↄ be kyaa bela ya nɛ, ŋon yɛna gyoo gyanaarate ŋon te ↄ kpuɛ gyooneŋ nyetooro baŋ man. Te ŋon dↄↄ ↄ ne gyu baa ↄ kaa yeŋ leki. 12Woo kufu ŋan n be naa nɛ, ŋan mↄ seŋɛɛ fa gyooneŋ kufu, mↄna be te dii ta gyoori ya. Mↄ baa fa gyooneŋ kufu benaŋ na wonembukum ŋon doŋ, na baa di gyoori debaŋ dokoloŋ bo. 13Nombii dokoloŋ dↄↄ te gyooneŋ kufu benaŋ pou seŋɛɛ. Baa yɛɛ nↄↄdokoloŋ na baa mo be kegyiiri na be doŋ pou fa wonembukum ŋon, na waa mo di gyoori. 14Baa yoo na Nambu ŋon, mↄna Nambu ŋon na ↄ balaŋ baŋ ↄ be baake wↄ mo wↄ yɛɛ ↄ wui, te be silana e anokoare man nɛ baa di ↄ dↄↄ. Nawolo nyi ŋon yɛna gbeŋgyoona pou Gbeŋgyoo na gyooneŋ pou Gyoo." 15Botↄↄ te Wurubuarɛ kpilale ŋon yako maŋ bela nyiaa, "Booneŋ ŋan n be naa keŋ futooli alo ŋon kyaa ŋe gyaŋ nɛ, seŋɛɛ fa balaŋ kpookpoo baŋ be kyaa tɛɛle kei dↄↄ nɛ. 16Te wonembukum ŋon na woo kufu ŋan n be naa nɛ, baa kↄla futooli alo ŋon nombia. Baa wↄlɛɛ e nɛ kyekpakyekpakyekpa, na baa tina e yela diteŋteli. Baa tao e, na baa too akaŋ keŋ. 17Nawolo nyi Wurubuarɛ yele la te gyooneŋ kufu baŋ sɛɛwↄ, te be yɛɛ ŋon Wurubuarɛ kegyaebii. Mena dↄↄ te ba moo be doŋ pou fa wonembukum ŋon nyi waa di gyoori kelii debaŋ keŋ Wurubuarɛ nombia aŋmaraseŋ see ŋan gyae ke kↄŋ mena nɛ. 18Alo ŋon n be naa nɛ, ŋon yɛna donↄↄ dinaa keŋ ke gyoo ne di doŋ tɛɛle kei dↄↄ gyooneŋ pou dↄↄ nɛ."

will be added

X\