Kalesewola 14

1Kenaŋ wↄle ma besewↄ gɛɛse kɛɛ na, te me naa Nambu ŋon ↄ ba mo ↄ wose fa kedeesa nɛ seŋɛɛ Siyↄn bula keŋ dↄↄ. Na balaŋ kakpoŋse kufu bala akpeŋ kufu ala (144,000) seŋɛɛ Nambu ŋonaŋ gyaŋ. Ba te ŋmarase Nambu ŋon yele na ↄ kya Wurubuarɛ yele gyakaa mena balaŋ benaŋ tirinↄↄse dↄↄ. 2Keŋte me nyii woya ŋaale lee adido ŋgba boo wuu la waale ne lam nɛ, te ka besewↄ wii ŋgba ↄga fae la nɛ. Woya ŋan mↄↄ nyii nɛ, ŋe yɛɛ ŋgba baale ne gyↄↄ na adolɛɛse nɛ. 3Mena balaŋ kɛwↄ seŋawↄ Wurubuarɛ gyooro gbeli keŋ, na wonise banaara baŋ na kegyiise baŋ siaman kpee nↄↄneŋ wↄle. Te ŋolo te tale kasee nↄↄneŋ kenaŋ kpu na balaŋ kakpoŋse kufu bala akpeŋ kufu ala (144,000) baŋ Wurubuarɛ be tↄ ba nyeeman kom lɛɛ wↄ lee tɛɛle kei dↄↄ nɛ ya. 4Mena balaŋ kɛwↄ yɛna balaŋ baŋ bↄↄ tela ba wose nideli, keŋ ba te doo na ala yaa baala see korakora ya nɛ. Bee sila Nambu ŋon gyu yenaŋ kamasɛ keŋ ↄ ne gyu nɛ. Balaŋ kɛwↄ yɛna balaŋ baŋ Wurubuarɛ be tↄ ba nyee man kom lɛɛ wↄ lee tɛɛle kei dↄↄ nɛ. Be ta mo wↄ fa Wurubuarɛ na ↄ Nambu ŋon, ŋgba mena keŋ walaŋ na mo ↄ wↄↄman weenɛɛ gyaŋgba nyiŋan deesi fa Wurubuarɛ nɛ. 5Be te di dekara see korakora ya, te nombiikum kamasɛ mↄ be mataa na wↄ ya. 6Kenaŋ wↄle te ma besewↄ naa Wurubuarɛ kpilale ŋolo na ↄ ne furufu feliŋ man adido. Na ↄ dana Kristo nombia kpaakpaa ŋan ŋe kyaa kekpaakekpaa nɛ waa kolosi fa deise, na akpaŋalaŋse na tɛɛle kei dↄↄ balaŋ pou. 7Keŋte ↄ kolosiwↄ keŋkeŋ nyiaa, "Ɛ yee Wurubuarɛ na ɛ ka lese ↄ yele, nawolo nyi ↄ nombia kedi debaŋ keŋ te lii. Ɛ som Wurubuarɛ, nawolo nyi ŋon yɛɛna adido na ateta na ɛpo na loŋse pou." 8Botↄↄ te Wurubuarɛ kpilale balate ŋolo mↄ kↄŋawↄ kaa yako nyiaa, "Babilↄn donↄↄ dinaa keŋ te yɛlɛɛ. Ↄ te yale, nawolo nyi ↄ ta mo ↄ kafoŋ nombia kyaŋee tɛɛle kei dↄↄ balaŋ pou. Ↄ kafoŋ kei yɛɛ yaa ŋgba soloŋ doŋte te ↄ moowↄ fa tɛɛle kei dↄↄ balaŋ te be nyↄↄwↄ dɛɛse nɛ." 9Keŋte Wurubuarɛ kpilale batoorote ŋolo mↄ kaa yakowↄ keŋkeŋ nyiaa, "Akpaa ŋolo da som wonembukum ŋon, yaa bane ŋon bↄↄ maa ŋgba ŋon nɛ, yaa ↄ sɛɛ te ba do e nso ↄ nyiŋmaa man yaa ↄ tirinↄↄ dↄↄ nɛ, be gyae ke de fa e ya. 10Wurubuarɛ waa gyeŋ baŋ ↄtenate dↄↄ na waa wↄŋ ↄ deŋele nideli. Gyae ke yɛɛ ŋgba Wurubuarɛ gbagba moona soloŋ doŋte do leenↄↄ keŋ nawolo nyi ↄ ta gyeŋ baŋ nɛ man fa e. Mena walaŋ ŋonaŋ waa naa diyem nideli boalaŋ keŋ ne kpaa ŋgba ba moo kpatakpela bo do ke man nɛ Wurubuarɛ kpilala na Nambu ŋon siaman. 11Boalaŋ keŋ man mena walaŋ ŋonaŋ waa yeyɛɛ nɛ, ke nyↄↄse gyae ka gyeŋ gyu adido kekpaakekpaa. Te balaŋ baŋ bɛɛ som wonembukum ŋon, na bane ŋon bↄↄ maa ŋgba wonembukum ŋonaŋ nɛ, na baŋ pou bↄↄ do wↄ wonembukum ŋonaŋ nso nɛ, bↄↄ gyae baa fɛɛfo korakora ya. Baa naa diyem nideli nelim na ka weese." 12Mena dↄↄ kaboena nyi Wurubuarɛ balaŋ baŋ bee di Wurubuarɛ mmaraase dↄↄ, te be silana Yesu anokoare man nɛ, baa nyiŋ konↄↄ na baa seŋ keŋkeŋ gbɛɛ kamasɛ man. 13Keŋte me nyii woya ŋaale lee adido bela nyiaa, "Ŋmarase see nyiaa, 'Balaŋ baŋ pou baa yeŋ de Gbeŋgyoo yele man lee gyɛŋ wee kei ne gyu nɛ, baŋ na nyeebam.' " Keŋte Wurubuarɛ feliŋ ŋon mↄ sɛɛwↄ nyiaa, "Ayi, ke yɛɛ ampaŋ. Baa fɛɛfo lee be kaale pou man, nawolo nyi be nombia ŋan bↄↄ yɛɛ nɛ ne gyae la ke sila wↄ." 14Ma besewↄ gɛɛse kɛɛ na, te me naa ŋↄma wolomɛɛ ŋaale. Te me naa ŋolo kyaa ŋↄma ŋenaŋ dↄↄ ŋgba "Deniwalaŋ" nɛ. Ↄ wuuna gyooro kotↄtↄↄ ↄ nyee dↄↄ, te ↄ dana sakawa keŋ kɛɛ bee baŋbaŋ nɛ ↄ nyiŋmaa man. 15Keŋte Wurubuarɛ kpilale ŋolo mↄ leewↄ Wurubuarɛ ↄsom deni dinaa keŋ man adido kↄŋ, te ↄ kolosiwↄ keŋkeŋ yako walaŋ ŋon ↄ kyaa ŋↄma ŋan dↄↄ nɛ nyiaa, "Mo n sakawa keŋ na n ke kɛrɛɛ weenɛɛ ŋan. Nawolo nyi tɛɛle kei dↄↄ weenɛɛ ŋan te yɛɛ, te ŋa kekɛrɛɛ mↄ debaŋ te lii." 16Mena dↄↄ walaŋ ŋon ↄ kyaa ŋↄma ŋan dↄↄ nɛ, fuŋa ↄ sakawa keŋ kɛrɛɛ abↄↄ ŋan pou ŋↄↄ yɛɛ tɛɛle dↄↄ nɛ. 17Kenaŋ wↄle te Wurubuarɛ kpilale ŋolo mↄ besewↄ lee Wurubuarɛ ↄsom deni dinaa keŋ man adido bela. Na ŋon mↄ dana sakawa baŋbaŋ daale. 18Keŋte Wurubuarɛ kpilale ŋolo mↄ leewↄ botↄↄ keŋ bee deesi fa Wurubuarɛ nɛ man kↄŋ. Wurubuarɛ kpilale kei ne kɛɛ na kedeesa boalaŋ keŋ dↄↄ. Te ↄ fae yeesa keŋkeŋ yako walaŋ ŋon ↄ dana sakawa baŋbaŋ keŋ nyiaa, "Mo n sakawa keŋ na n ke kↄ gerepo saase ŋan pou ŋↄↄ yɛɛ tɛɛle kei dↄↄ nɛ lee ŋe woŋse ŋan man." 19Mena dↄↄ Wurubuarɛ kpilale ŋon mↄ fuŋa ↄ sakawa keŋ kↄ gerepo saase ŋan pou lee ŋe woŋse man, te ↄ fuŋa ŋa do bↄↄ dinaa keŋ man bɛɛ ŋmaase bia ŋan lese ŋa loŋ mo yɛɛ soloŋ nɛ. Mena bↄↄ kei seŋɛɛ fa Wurubuarɛ baŋ kum keŋ. 20Keŋte be sakatee gerepo bia ŋan botↄↄ ŋmaase ŋa lese ŋa loŋ donↄↄ keŋ nↄↄman. Te loŋ keŋ ba lee ŋe man nɛ bese fatabo te ŋe laŋawↄ ŋgba boo nɛ. Fatabo kenaŋ kelaŋ dↄↄloŋ man gyae ke yɛɛ ŋgba maelese sↄŋonoŋse ala nɛ (200), te ke siiliŋ mↄ gyae ke yɛɛ ŋgba nawↄↄtↄↄse anoŋ nɛ.

will be added

X\