1 Botↄↄ te me naa wonembukum ŋolo na ↄ ta lee ɛpo man ↄ ne kↄŋ. Na ↄ dana woo kufu na nyeeya nyetooro, te gyooro kotↄtↄↄse wuɛ woo ŋan pou dↄↄ. Te be ŋmarase mmusuo nombia ŋaale gyakaa nyee kamasɛ dↄↄ. 2 Wonembukum ŋon mↄↄ naa nɛ yɛɛ ŋgba mokↄↄte nɛ. Ↄ dana gelase ŋgba ↄsakuru nɛ, te ↄ nↄↄ mↄ yɛɛ ŋgba dinaate nɛ. Keŋte wonembukum gyaŋgbate ŋon moo ↄ doŋ na ↄ gyoorobiiri na ↄ kegyiiri ŋan pou ↄ dana nɛ fa wonembukum kei. 3 Gyam dinaa daale kyaawↄ kyaa wonembukum ŋon nyee keŋ daale dↄↄ keŋ nafↄ ke gyae ke tale ko e, mↄna gyam kenaŋ ta yem. Wonembukum ŋonaŋ nombia dana gyakoloŋ, mena dↄↄ tɛɛle kei dↄↄ balaŋ pou sila e. 4 Balaŋ burum som wonembukum dekpatakpere ŋon, nawolo nyi na ↄ ta mo ↄ doŋ fa wonembukum kei. Ba som wonembukum kei te be kɛlɛɛ e nyiaa, "Amↄte kyaa la ŋgba wonembukum kei nɛ, te amↄte mↄ ne gyae la waa tale yoo na e?" 5 Keŋte be feefuwↄ do wonembukum ŋon nyi waa yɛɛ kegyira nombia, na waa kolosi mmusuo nombia tia Wurubuarɛ. Te be faa e doŋ nyi waa mo di tɛɛle kei dↄↄ gyaalaŋna sↄŋola na ala. 6 Te wonembukum ŋon gyuusu ↄ nↄↄ kolosi mmusuo nombia tia Wurubuarɛ wↄlɛɛ ↄ yele, na ↄ deni dinaa keŋ na baŋ pou be kyaa Wurubuarɛ man nɛ. 7 Keŋte ba besewↄ fa e doŋ nyi waa mo yoo na Wurubuarɛ balaŋ baŋ na waa di be dↄↄ. Te be faa e doŋ bela nyi waa mo di akpaŋalaŋse, na tɛɛle kei dↄↄ balaŋ na deise na loŋtoro kamasɛ balaŋ dↄↄ. 8 Tɛɛle kei dↄↄ balaŋ burum baa som wonembukum kei. Mena balaŋ kɛwↄ yɛna balaŋ baŋ ba te ŋmarase ba yela do nyeedoŋ tↄne keŋ man ya nɛ. Nyeedoŋ tↄne kenaŋ yɛɛ Nambu ŋon ↄ ba mo ↄ wose fa kedeesa leenaŋ tɛɛle kei kewalaŋ nɛ wui. 9 Walaŋ ŋon ↄ dana deŋele anenyiiŋ dei nɛ, waa see deŋele na waa tei. 10 Akpaa yɛɛ nyi baa kyaŋ ŋolo yoo man na, yoo man te baa taŋ kyaŋ e. Te akpaa yɛɛ nyi ŋolo waa yeŋ sila nↄↄman na, sila nↄↄman te waa taŋ yeŋ. "Kei nawolo baa nyi, kaboena nyi Wurubuarɛ balaŋ baa nyiŋ konↄↄ na baa seŋ keŋkeŋ ba kelɛɛdi man." 11 Botↄↄ te ma besewↄ naa wonembukum ŋolo te bɛɛ lee tɛɛle man bela. Na ↄ dana woo ala ŋgba nam nɛ, mↄna ↄ kekolosi yɛɛ ŋgba wonembukum dekpatakpere ŋon nɛ. 12 Doŋ keŋ wonembukum gyaŋgbate ŋon dana nɛ, keŋ te balate kei mↄ dana ↄ ne yɛɛ ↄ tom ↄ dↄↄ ŋon yele man. Te ↄ yela tɛɛle kei dↄↄ balaŋ pou som wonembukum gyaŋgbate ŋon ↄ dana gyaŋtare dinaa ↄ nyeeman nɛ. 13 Wonembukum kei mↄ yɛɛ gyakoloŋ nombia dinaana. Ↄ yela boalaŋ gba koraŋ leewↄ adido kↄŋ kaa yala tɛɛle man te balaŋ pou naawↄ. 14 Lee gyakoloŋ nombia ŋan ↄ be yɛɛ wonembukum gyaŋgbate ŋon yele man nɛ dↄↄ, ↄ talewↄ beo tɛɛle kei dↄↄ balaŋ pou. Te ↄ ŋere wↄ te be maa bane ŋgba wonembukum gyaŋgbate ŋon, bↄↄ mo yoosila gooli e ↄ nyeeman yeŋ yeŋ te ↄ ta yem ya nɛ. 15 Be faa wonembukum balate kei doŋ nyi waa fa bane ŋon bↄↄ maa ŋgba wonembukum gyaŋgbate ŋon nɛ nyeedoŋ na waa tale kolosi, na waa yela baa koe baŋ pou bↄↄ bɛɛ nyi bↄↄ som bane ŋonaŋ ya nɛ. 16 Te mena wonembukum kei besewↄ ŋere walaŋ kamasɛ, balaŋ baŋ be dana yele na balaŋ yakaa nyibaŋ, na baŋ be dana kↄba na ayematena na gyoorobia na gbeŋa pou yela ba doo wↄ nso be dunoluŋ nyiŋmaase man na be tirinↄↄse dↄↄ. 17 Walaŋ kamasɛ ŋon ↄ be dana wonembukum gyaŋgbate ŋon nso keŋ ya nɛ, ↄtenate be dana gbɛɛ nyi waa yↄↄ kolo yaa waa lɛɛ kolo ya. Nso kei yɛna wonembukum ŋon yele, yaa ↄ yele keŋ nↄmba. 18 Walaŋ ŋon Wurubuarɛ be fa e nyansa nɛ, ŋon waageŋ ne gyae la waa tale nyii nombii kei man. Walaŋ ŋon ↄ dana agyueŋ nɛ, ŋon ne gyae la waa tale gyeŋ wonembukum ŋon nↄmba kei yaanↄↄle, nawolo nyi nↄmba kei yɛɛ deniwalaŋ ŋolo yele ke. Nↄmba kenaŋ yɛna sↄŋonoŋse looro na sↄŋotooro na looro (666).
