Kalesewola 11

1Kɛŋa wↄle nɛ, te ŋolo faa maŋ gbutu keŋ ke yɛɛ ŋgba daŋ keŋ bɛɛ mo maa kolo nɛ. Keŋte ↄ yako maŋ nyiaa, "Koro gyu ke maa Wurubuarɛ ↄsom deni dinaa keŋ na Wurubuarɛ kedeesa boe keŋ, na n ke kala balaŋ baŋ pou bɛɛ som Wurubuarɛ botↄↄ nɛ. 2Mↄna na maa tɛɛle keŋ ke doo Wurubuarɛ ↄsom deni dinaa keŋ yenaase nɛ ya, nawolo nyi be ta mo botↄↄ fa balaŋ baŋ ba te yɛɛ Gyudatenawↄ ya nɛ. Baŋ ne gyae la baa di doŋ Gyerusalɛm donↄↄ keŋ dↄↄ gyaalaŋna sↄŋola na ala. 3Te maa kpila ma adansɛɛtena bala, na baa do lia abↄↄ kↄŋ kaa kolosi me nombia ŋan mↄↄ lese wola wↄ nɛ gyaalaŋna sↄŋola na ala." 4Adansɛɛtena bala baŋ yɛna oliifi daase ala na kanease daase ala ŋan seŋɛɛ Wurubuarɛ ŋon ↄ yɛɛ tɛɛle kei pou Gbeŋgyoo e nɛ siaman nɛ. 5Akpaa ŋolo de kↄŋ nyi ↄ kaa yɛɛ mena Wurubuarɛ akpeŋkpeŋgyↄↄra bala kɛwↄ nombiikum daale nɛ, boalaŋ na lee be nↄↄse man kaa ko be kↄlala benaŋ. Te walaŋ kamasɛ ŋon ↄ ne gyae nyi waa yɛɛ wↄ kolo kum daale na, mena gbɛɛ kenaŋ man te bɛɛ mo ko ↄtenate. 6Mena Wurubuarɛ akpeŋkpeŋgyↄↄra bala kɛwↄ dana doŋ, keŋ baa tale tↄ gbɛɛ nyi debaŋ kamasɛ keŋ baa kolosi Wurubuarɛ nombia na ↄga na ŋɛɛ ya. Be dana doŋ keŋ baa tale yela loŋse pou ka bese fatabo, te baa tale yela kayeyɛɛ kamasɛ mↄ ke yala tɛɛle kei dↄↄ debaŋ kamasɛ keŋ bɛɛ gyae. 7Akpaa Wurubuarɛ akpeŋkpeŋgyↄↄra bala baŋ de kolosi be nombia ŋan taŋ nɛ, wonembukum ŋon ↄ ne kyaa lee bↄↄ kyilimkyilim keŋ ka be taŋ ↄto ya man nɛ, waa kaa yokii na wↄ na waa di be dↄↄ na waa koe wↄ. 8Te baa tina ba woya yela donↄↄ dinaa keŋ abↄntere man. Mena donↄↄ kei man te be gyↄↄ be Gbeŋgyoo sakaa ↄpaŋdaŋ dↄↄ ko. Balaŋ ta do mena donↄↄ kenaŋ yele nyi Sodom yaa Igyipite. 9Balaŋ baa lee donↄↄse kpookpoo, na deise kpookpoo na tɛɛlese kpookpoo man kↄŋ kaa kɛɛ woya benaŋ weeya atooro na yaale. Mↄna balaŋ baa bɛɛ nyi be na wuu wↄ ya. 10Ba yeŋ gyae ke yɛɛ tɛɛle kei dↄↄ balaŋ gyoŋ. Baa di wee kenaŋ ŋgba ba wee dinaa daale nɛ, na baa kyɛɛ dↄŋa abↄↄ. Nawolo nyi Wurubuarɛ akpeŋkpeŋgyↄↄra bala kɛwↄ naase balaŋ diyem nideli tɛɛle kei dↄↄ. 11Mↄna weeya atooro na yaale kei wↄle nɛ, Wurubuarɛ yela ↄ weesɛɛ kaa gyoo be man te be foŋawↄ koro kyaa. Kei yela gyakoloŋ gyoo balaŋ baŋ pou bↄↄ naa wↄ nɛ nideli. 12Botↄↄ te Wurubuarɛ kpilala bala baŋ nyii woya ŋaale kolosiwↄ na wↄ keŋkeŋ lee adido nyiaa, "Ɛ gyeŋ kↄŋ adido kɛbo." Keŋte ba moowↄ ŋↄma man gyeŋ gyu adido, na be kↄlala baŋ seŋɛɛ bɛɛ kɛɛ wↄ. 13Mena debaŋ kenaŋ man nɛ, tɛɛle wosiwↄ nideli keŋ nyi donↄↄ dinaa keŋ kekpase kufu man dekpeŋ dokoloŋ yɛlɛɛwↄ. Tɛɛle kewosi kenaŋ mↄ koo balaŋ kakpoŋse nyetooro (7,000). Te gyakoloŋ gyoo balaŋ akaŋ baŋ be ta yem ya nɛ, te ba lese Wurubuarɛ ŋon ↄ kyaa adido nɛ yele. 14Kayeyɛɛ nombia ŋan alate kaalaŋa laa, te atoorote mↄ ne kↄŋ. 15Keŋte Wurubuarɛ kpilale nyetoorote ŋon wola ↄ kaberɛ. Ↄ kawola ke nɛ, te me nyii woya ŋaale lee adido keŋkeŋ nyiaa, "Nɛnɛɛ tɛɛle kei dↄↄ gyoori ta bese de Gbeŋgyoo Wurubuarɛ na ↄ bu nyeelɛɛre ŋon wui, te de Gbeŋgyoo Wurubuarɛ ne gyae la waa di gyoori kekpaakekpaa." 16Keŋte kegyiise sao banaara baŋ be kyaa be gyooro gbelɛɛ dↄↄ Wurubuarɛ siaman nɛ, korowↄ buŋii som Wurubuarɛ. 17Te be yakowↄ nyiaa, "De Gbeŋgyoo Wurubuarɛ doŋ pou Gbeŋgyoo, nyaŋ kyaa la kaalaŋ te nyaŋ sɛɛ la n kyaa. Dɛɛ do neŋ nↄↄ nawolo nyi n ta mo n doŋ keŋ ka dokoso be kyaa ya nɛ, n ne di gyoori tɛɛle kei dↄↄ. 18Balaŋ baŋ bↄↄ gyeŋ neŋ ya nɛ ta gyeŋ baŋ n dↄↄ, mↄna nɛnɛɛ te kaboena nyi nya lese n baŋ wola. Debaŋ te lii keŋ nyaŋ ke di balaŋ baŋ bↄↄ yekee nɛ nombia, na n ke tↄ n tewulɛɛ akpeŋkpeŋgyↄↄra na n balaŋ baŋ pou bɛɛ som neŋ nɛ kom. N ke tↄ balaŋ baŋ bee yee neŋ nɛ, na balaŋ baŋ be dana yele, na balaŋ yakaa nyibaŋ pou kom. Te debaŋ te lii keŋ nyaŋ ke wↄlɛɛ balaŋ baŋ pou bɛɛ wↄlɛɛ tɛɛle kei nɛ." 19Botↄↄ te be kyaŋa Wurubuarɛ ↄsom deni dinaa keŋ ke kyaa adido nɛ toro, te me naa Nↄↄkebakesee Adakaa keŋ. Keŋte ↄga ŋmaalewↄ te ↄ faewↄ, te tɛɛle wosiwↄ te akpeleŋkpeleŋbia dinaana yalawↄ.

will be added

X\