Kalesewola 10

1Kei wↄle nɛ, ma besewↄ naa Wurubuarɛ kpilale doŋte ŋolo bela na ↄ ta lee adido ↄ ne kↄŋ. Na debuŋta te kilisi ↄ wose gyaŋee ŋgba kegba te ↄ doona nɛ, te kolo mↄ te kilisi ↄ nyee gyaŋee ŋgba okyimaale nɛ. Ↄ siagbɛɛ ne ŋalakee ŋgba weese nɛ, te ↄ nawↄↄ mↄ yɛɛ ŋgba daakpeese na boalaŋ seŋɛɛ la ne kpaa nɛ. 2Na ↄ dana tↄnebii daale keŋ bↄↄ gyuusu ke nɛ ↄ nyiŋmaa man. Keŋte ↄ moo ↄ dunoluŋ nae gyakaa ɛpo dↄↄ, na ↄ demena nae mↄ seŋɛɛ tɛɛle dↄↄ. 3Keŋte ↄ fae yeesa keŋkeŋ ŋgba dinaate muusu la nɛ. Ↄ ke fae yeesa keŋ nɛ, te ↄga faewↄ betabonyetooro. 4Ↄga ke fae betabonyetooro keŋ nɛ, nafↄ me gyaewↄ nyi maa ŋmarase kpene keŋ mↄↄ nyii lee ↄga kefae keŋ man nɛ see. Mↄna me nyii woya ŋaale lee adido keŋ ne yako maŋ nyiaa, "Kyaŋ nombia ŋan n be nyii nɛ do n nyee man. Na ŋmarase ŋa see ya." 5Botↄↄ te Wurubuarɛ kpilale ŋon mↄↄ naa ↄ seŋɛɛ keŋ ↄ nae daale gyakaa ɛpo dↄↄ, te ↄ nae daale mↄ seŋɛɛ tɛɛle dↄↄ nɛ gyinaa ↄ dunoluŋ nyiŋmaa adido. 6Keŋte ↄ kaŋa Wurubuarɛ ŋon ↄ kyaa kekpaakekpaa, te ↄ be yɛɛ adido na abↄↄ ŋan pou ŋe kyaa botↄↄ, na ateta na abↄↄ ŋan pou ŋe kyaa kɛbo, na ɛpo na abↄↄ ŋan pou ŋe doo ke man nɛ ntam. Ntam keŋ ↄ be kam nɛ yɛna nyiaa, "Wurubuarɛ be gyae waa dↄↄ wↄle lee kpene keŋ ↄ ne gyae nyi waa yɛɛ nɛ man ya. 7Mↄna debaŋ keŋ Wurubuarɛ kpilale nyetoorote ŋon waa wola ↄ kaberɛ keŋ nɛ, debaŋ kenaŋ te nombia aweeseŋ ŋan Wurubuarɛ be yako fa ↄ tewulɛɛ baŋ be yɛɛ wa akpeŋkpeŋgyↄↄrawↄ nɛ, gyae ke kↄŋ mena." 8Botↄↄ te woya ŋan mↄↄ nyii lee adido kaalaŋ nɛ besewↄ kolosi fa maŋ bela nyiaa, "Ta gyu ke lɛɛ tↄnebii keŋ bↄↄ gyuusu ke nɛ lee Wurubuarɛ kpilale ŋon ↄ seŋɛɛ te ↄ nae daale gyakaa ɛpo dↄↄ, te ↄ nae daale mↄ seŋɛɛ tɛɛle man nɛ nyiŋmaa man." 9Mena dↄↄ me gyuuwↄ Wurubuarɛ kpilale ŋon gyaŋ nyi waa mo tↄnebii keŋ fa maŋ. Keŋte ↄ yako maŋ nyiaa, "Lɛɛ ke na n ke tao ke. N ne tao ke nɛ, ke gyae ke yɛɛ neŋ gyoŋ n nↄↄman ŋgba teebↄↄ nɛ. Mↄna akpaa n lila ke na, ke gyae ke yɛɛ ŋaŋ n tↄↄman." 10Botↄↄ te me lɛɛ tↄnebii keŋ lee Wurubuarɛ kpilale ŋon nyiŋmaa man te ma moo ke tao. Me kɛɛ tao ke nɛ, na ke dana gyoŋ ŋgba teebↄↄ nɛ me nↄↄman. Mↄna ma ke tao ke mo lila nɛ, me tↄↄman pou yɛɛ maŋ ŋaŋ bo. 11Ma ke tao ke taŋ nɛ te me nyii woya ŋaale yako maŋ nyiaa, "Kaboena nyi nya bese gyↄ Wurubuarɛ nombia ŋan ↄ be yako neŋ nɛ dekpeŋkpeŋ fa balaŋ burum, na tɛɛlese na deise na gyooneŋ ŋgba mena keŋ Wurubuarɛ ba lese wola neŋ nɛ."

will be added

X\