Filemↄn 1

1Tↄne kei lee maŋ Pↄↄl ŋon me silana Yesu Kristo dↄↄ te bↄↄ kyaŋ maŋ tↄ deni nɛ, na de gyoo Kristobaale Timoti gyaŋ. Dɛɛ ŋmarase ke dee yelee nyaŋ de gyoo gyaagyi Filemↄn ŋon daa na neŋ ne yɛɛ tom dokoloŋ nɛ, 2na Kristotena baŋ bɛɛ kyaa gyaŋee n dekpaŋalaŋ man nɛ, na de gyoo Kristo alo Afia, na de gyoo Akipuse ŋon daa na e yɛɛ yoonↄↄtenawↄ Wurubuarɛ nombia ŋan keyako man nɛ. 3De kya Wurubuarɛ na de Gbeŋgyoo Yesu Kristo baa mo be bɛrɛɛ boele ŋon na baa fa ŋon wosefɛɛreŋ. 4Me dↄↄ Filemↄn debaŋ kamasɛ keŋ mɛɛ tↄↄse neŋ ma kefane man na, mɛɛ fa me Wurubuarɛ karaŋ lee n dↄↄ, 5nawolo nyi me nyii mena keŋ n ne gyae Wurubuarɛ balaŋ baŋ ↄ be baake wↄ te ↄ be desina wↄ see fa ↄ wose nɛ, na mena keŋ n be lɛɛ de Gbeŋgyoo Yesu di nɛ. 6Mɛɛ fane nyi Wurubuarɛ waa kyↄ neŋ na n ke nyiŋ tale kolosi Kristo nombia ŋan n be lɛɛ di nɛ nideli, na ke yela n ka gyeŋ abↄↄ kpaakpaa ŋan pou Wurubuarɛ be fa daa lee keŋ daa na Yesu yɛɛ dokoloŋ dↄↄ nɛ. 7Me dↄↄ, n balaŋ kegyae keŋ na do maŋ kakyeŋ te kɛɛ yɛɛ maŋ gyoŋ nideli, nawolo nyi kɛɛ do Wurubuarɛ balaŋ baŋ ↄ be baake wↄ te ↄ be desina wↄ see fa ↄ wose nɛ kakyeŋ nideli. 8Kristo dↄↄ nafↄ me dana gbɛɛ nyi maa ŋere neŋ nyi nya yɛɛ kpene keŋ kaboena nyi nya yɛɛ nɛ. 9Mↄna lee kegyae dↄↄ mↄↄ na ŋere neŋ ya, mɛɛ waase neŋ bo. Maŋ Pↄↄl ŋon ma seŋɛɛ Yesu nawↄↄ man te nɛnɛɛ me sɛɛ me doo deni man lee ŋon dↄↄ nɛ ne waase na neŋ nɛ. 10Me bu Onesimuse nombia yaa mɛɛ sola neŋ nɛ. Kristo dↄↄ ↄ ta bese me bu nawolo nyi me dↄↄ te ↄ tɛɛwↄ lɛɛ Kristo di debaŋ keŋ bↄↄ kyaŋ maŋ tↄ deni nɛ. 11Gyaŋgba keŋ na nafↄ ↄ be dana tↄnↄↄ daale fa neŋ ya, mↄna nɛnɛɛ dↄↄ ↄ dana tↄnↄↄ fa daa na neŋ pou. 12Nɛnɛɛ mɛɛ besena e baa nyi waa bese kↄŋ n gyaŋ. Ↄ yɛɛ walaŋ ŋon ↄ nombia doo me konↄↄ man nideli. 13Nafↄ me gyaewↄ nyi waa kyaa n nawↄↄ man me gyaŋ kɛbo, na waa kyↄ maŋ debaŋ keŋ me doo deni man lee nyeedoŋ nombia ŋan keyako dↄↄ nɛ. 14Mↄna mↄↄ ne gyae nyi maa ŋere neŋ nyi nya kyↄ maŋ ya, mɛɛ gyae bo nyi nya kyↄ maŋ lee nyaŋ gbagba n konↄↄ man. Mena dↄↄ nyi n te sɛɛ ya na mↄↄ gyae maa yɛɛ kolo ya. 15Mberem na Onesimuse wↄŋa ↄ wose bo lee n gyaŋ debaŋ kyomii na ke yela waa nyiŋ kaa bese n wui kekpaakekpaa. 16Nɛnɛɛ dↄↄ ↄ ta tekaa ↄ yɛɛ n gbeŋi e kaageŋ ya, ↄ kela gbeŋi. Ↄ yɛɛ de naabu gyaagyi e. Mɛɛ gyae ↄ nombia nideli te ma gyeŋ nyi nyaŋ ne gyae ↄ nombia nideli gba kela maŋ. Nawolo nyi ↄ yɛɛ n gbeŋi e te ↄ besewↄ ↄ yɛɛ n naabu e de Gbeŋgyoo Yesu dↄↄ. 17Mena dↄↄ nyi akpaa n gyeŋ nyi me yɛɛ n dↄↄ e na, lɛɛ e do ŋgba mena keŋ nyaŋ ke lɛɛ maŋ do nɛ. 18Nyi akpaa ↄ te yɛɛ neŋ nombiikum daale, yaa ↄ dana neŋ kolo kom na mo ke nyi maŋ danaana neŋ kom nɛ. 19Maŋ Pↄↄl gbagba moona me nyiŋmaa mɛɛ ŋmarase mena nombii kei nɛ. Maa tↄ neŋ kom keŋ ↄ dana neŋ nɛ, mↄna na wolee nyi nyaŋ gbagba koraŋ dana maŋ kom ya. Nawolo nyi maŋ yele la te n nyiŋa nyeedoŋ wↄle Kristo man. Kei na wolo baa nyi n dibiliŋ koraŋ yɛɛ me wui. 20Mena dↄↄ me dↄↄ kpaakpaa yɛɛ nombii kei fa maŋ lee de Gbeŋgyoo Wurubuarɛ yele man. Kristo dↄↄ yɛɛ ke fa maŋ, na n ke yela me wↄe ke fɛɛ maŋ. 21Mɛɛ lɛɛdi nyi me tↄne kei gyae ke yela n ke yɛɛ kpene keŋ mↄↄ yako neŋ nɛ, te ma gyeŋ nyi nyaŋ ke yɛɛ gba kela mena. 22Mɛɛ ŋmarase neŋ tↄne kei nɛ, mɛɛ gyae nyi n ke desina dekyae see maŋ nawolo nyi ma gyeŋ nyi Wurubuarɛ waa nyii ɛ kefane keŋ pou, na waa besena maŋ kↄŋ ɛ gyaŋ. 23Epafirase ŋon lee Kristo Yesu dↄↄ te bↄↄ kyaŋ daa na e tↄ deni nɛ, na do neŋ nↄↄ. 24Mena ke te Maake na Arisitakuse na Demase na Luka baŋ daa na wↄ ne yɛɛ tom dokoloŋ nɛ mↄ na do neŋ nↄↄ. 25De Gbeŋgyoo Yesu Kristo waa mo ↄ bɛrɛɛ boele ɛ popou na waa seŋ ɛ wↄle.

will be added

X\