Filipitena 3

1Me tebia, nombii keŋ be kaa maa yako ŋon yɛna nyi ɛ yela ke yɛɛ ŋon gyoŋ lee kpene keŋ de Gbeŋgyoo Yesu ne yɛɛ fa ŋon nɛ dↄↄ. Maŋ dↄↄ bɛɛ takaa maŋ nyi me ta bese mɛɛ ŋmarase ŋon nombia ŋan mↄↄ wulaa ŋmarase ŋon kaalaŋ nɛ ya. Nawolo nyi ma gyeŋ nyi nombia ŋenaŋ gyae ke kyↄ ŋon, na ɛ ke tale seŋ keŋkeŋ ɛ kelɛɛdi man. 2Ɛ kɛɛ ɛ wose man nideli na balaŋ baŋ be dana nombiakumɛɛ te bɛɛ gyae baa wↄlɛɛ ɛ kelɛɛdi, te bɛɛ ŋere balaŋ nyi baa kara be baala wose nɛ. 3Daa yɛna balaŋ baŋ bↄↄ kara de baala wose gbagba. Nawolo nyi daa ne tɛɛ bo Wurubuarɛ feliŋ ŋon dↄↄ som Wurubuarɛ. Lee Yesu Kristo mↄ dↄↄ dɛɛ gyↄ de konↄↄ. Mena dↄↄ bɛɛ tekaa hia nyi dɛɛ mo de sia gyakaa baala wose kekara keŋ bɛɛ mo nyiŋmaa kara nɛ nombia dↄↄ ya. 4Nafↄ maŋ yɛna walaŋ ŋon kaboena nyi maa wola ma wose lee mena abↄↄ kɛŋa dinↄↄ man. Akpaa nyi ŋolo dana kpene keŋ dↄↄ te waa tale mo ↄ wose lↄ mena abↄↄ kɛŋa dinↄↄ dↄↄ na, nafↄ ŋolo be kyaa me wↄle ya. 5Kpene keŋ dↄↄ te mɛɛ yako mena yɛna nyiaa, be ka lola maŋ weeya gyanaarate na te be kara maŋ me baala wose. Me yɛɛ Iserae bu gbagba e ŋon mↄↄ lee Gyekↄpo bu Bɛngyamɛn dekpaŋalaŋ man. Me naanaↄ yɛɛ Hiburutenawↄ mena dↄↄ maŋ gbagba mↄ me yɛɛ Hiburutena fatabo man walaŋ e. Nyi akpaa de kɛɛ Gyudatena mmaraase ŋan dↄↄ kedi na maa tale yako nyi me yɛɛ Farasii baale e, nawolo nyi me dii ba mmaraase ŋan pou dↄↄ nideli. 6Ma doo kakyeŋ Gyudatena ↄsom keŋ man nideli, te me naase Kristo silala baŋ diyem nideli. Akpaa nyi nafↄ kaboena bo nyi walaŋ waa di mmaraase ŋan dↄↄ pɛna Wurubuarɛ ke lɛɛ e do na, nafↄ maŋ dↄↄ nombiikum daale be doo ma wose man ya. 7Abↄↄ ŋan pou nafↄ ŋe dana tↄnↄↄ fa maŋ nɛ, nɛnɛɛ lee Kristo dↄↄ ŋↄↄ taŋ tↄnↄↄ fa maŋ bela ya. 8Na abↄↄ ŋenaŋ ŋaageŋ ya. Mↄna abↄↄ ŋan pou nafↄ gyaŋgba mɛɛ mo ma wose lↄ ŋe dↄↄ nɛ, nɛnɛɛ mo lee me Gbeŋgyoo Yesu Kristo kagyeŋ keŋ kela abↄↄ ŋenaŋ pou dↄↄ, me te fuŋ ŋe popou leki. Lee ŋon Kristo dↄↄ kpene kamasɛ te bↄ maŋ, te mɛɛ kɛɛ ŋa ŋgba dufuŋ dↄↄ abↄↄ nɛ, na maa nyiŋ bese Kristo wui kekpaa. 9Na daa na e ke yɛɛ dokoloŋ kekpaa na me nombia ke nyiŋ tenee Wurubuarɛ siaman. Kei te yɛɛ nyi lee tom keŋ maŋ gbagba be yɛɛ nɛ dↄↄ yaa keŋ mↄↄ di Wurubuarɛ mmaraase ŋan dↄↄ nɛ dↄↄ ya. Mↄna keŋ mↄↄ lɛɛ Kristo di dↄↄ te me nombia teneewↄ Wurubuarɛ siaman ya. 10Mɛɛ gyae nyi maa gyeŋ Kristo nideli, na maa naa doŋ keŋ Wurubuarɛ ba mo gyuusu e lee yeŋ man nɛ. Na maa kpu na e naa diyem keŋ ↄ be naa nɛ, na ke yɛɛ ŋgba daa na e yeŋa la nɛ. 11Mena dↄↄ me loo gyakaa nyi de kↄŋ mena na, wee daale Wurubuarɛ waa gyuusu maŋ lee yeŋ man. 12Na mɛɛ yako baa nyi me taŋ ke nyiŋ mena abↄↄ kɛŋa pou, yaa me gbɛɛneŋ tenɛɛ Wurubuarɛ siaman kekpaa ya. Mↄna mɛɛ yɛɛ kakyeŋ bo nyi maa nyiŋ kpene keŋ dↄↄ Yesu Kristo be baake maŋ nyi me kaa bese ↄ wui nɛ. 13Me tebia, na mɛɛ yako baa nyi me taŋ ke nyiŋ kpene keŋ mee yoo nyi maa nyiŋ nɛ ya. Mↄna nombii dokoloŋ keŋ mɛɛ yɛɛ yɛna nyiaa, mee wolee abↄↄ ŋan pou be kaa lam nɛ. Mↄↄ na tekaa tↄↄse ŋa bela ya. Mↄna kpene keŋ doo me siaman nɛ, ke dↄↄ te me loo gyakaa. 14Akpaa balaŋ na peree keyeu man na, bɛɛ yɛɛ kakyeŋ yeu kelii botↄↄ keŋ kaboena nyi baa lii nɛ pɛna baa nyiŋ kpene keŋ dↄↄ bɛɛ peree nɛ. Mena ke mↄ yaa me gyakaa mɛɛ yɛɛ kakyeŋ me kaa lii ↄto, na Wurubuarɛ ke nyiŋ fa maŋ kpene keŋ ↄ be yako see nyi waa mo tↄ maŋ kom nɛ. Kom keŋ Wurubuarɛ waa tↄ maŋ yɛna nyi, keŋ mↄↄ lɛɛ ↄ bu Yesu Kristo di dↄↄ waa yela maa nyiŋ gbɛɛ gyu ↄ gyoorobiiri keŋ man. 15Daa baŋ pou dↄↄ bee Wurubuarɛ ↄsom keŋ man nɛ, mena dinↄↄ kei te kaboena nyi de popou dee nyiŋ. Mↄna akpaa ɛ man baale dana agyueŋ kpoo daale na, Wurubuarɛ waa kyↄ ŋon na ɛ ke nyii me nombia kɛŋa man nideli. 16Kpene keŋ ne hia yɛna nyi, ɛ yela dɛɛ kyaa ŋgba mena keŋ Wurubuarɛ be wulaa yako nyi dɛɛ kyaa nɛ. 17Me tebia, ɛ popou ɛ kasee ma kekyaabii ŋgba mena keŋ baale ne yɛɛ nɛ. Ɛ see ɛ sia tɛɛle man, na ɛ ke kasee balaŋ baŋ ba kekyaabii yɛɛ ŋgba mena keŋ dↄↄ wola ŋon nɛ. 18Me te wulaa yako ŋon nombii kei. Te nɛnɛɛ mɛɛ mo siasaraŋ mɛɛ yako ŋon bela nyiaa, balaŋ baale ta besena ba wose Kristo kↄlala. Be nombia ŋan bɛɛ yɛɛ nɛ nawolo nyi baŋ gyaŋ na, Kristo yeŋ keŋ ↄ ba yem nɛ be dana tↄnↄↄ ya. 19Wurubuarɛ waa wↄlɛɛ mena balaŋ benaŋ kekpaakekpaa. Nawolo nyi be ta mo abↄↄ ŋan baŋ gbagba ne gyae nɛ besena be Wurubuarɛ. Kpene keŋ yɛɛ desɛŋ nombia ŋa nɛ, ŋan man te baŋ ne gyↄ be konↄↄ. Tɛɛle kei dↄↄ abↄↄ kegyae kaageŋ te baŋ na gyueŋ. 20Mↄna daa dↄↄ de dɛɛ yɛna Wurubuarɛ man adido. Botↄↄ te de loo gyakaa nideli nyi da nyeelɛɛre ŋon waa lee kↄŋ. Ŋon yɛna de Gbeŋgyoo Yesu Kristo. 21Debaŋ keŋ waa kↄŋ nɛ, ŋon ne gyae la waa mo doŋ keŋ ↄ dana ↄ ne gyee kpene kamasɛ nɛ kyɛɛkee da wosenaane kei keŋ gyae ka yeŋ nɛ, na waa besena ke na ka ke yɛɛ ŋgba ŋon gbagba ↄ wui gyoorobiiri wosenaane keŋ nɛ.

will be added

X\