Filipitena 1

1Tↄne kei lee maŋ Pↄↄl na Timoti baŋ de yɛɛ Yesu Kristo tewulɛɛwↄ nɛ gyaŋ. Dɛɛ ŋmarase ke dee yelee ɛmɛɛ Wurubuarɛ balaŋ baŋ pou ɛmɛɛ na Yesu Kristo be yɛɛ dokoloŋ, te ɛ kyaa Filipi donↄↄ man nɛ na Kristotena kegyiise na baŋ pou bɛɛ kyↄ wↄ nɛ. 2De kya Wurubuarɛ na de Gbeŋgyoo Yesu Kristo baa mo be bɛrɛɛ boele ŋon na baa fa ŋon wosefɛɛreŋ. 3Debaŋ kamasɛ keŋ me tↄↄse ŋon na, mɛɛ fane fa me Wurubuarɛ karaŋ lee ɛ dↄↄ. 4Mena mↄ te debaŋ kamasɛ keŋ mɛɛ fane fa ŋon na mɛɛ mo gyoŋ fane. 5Nawolo nyi lee debaŋ keŋ ɛ be lɛɛ Wurubuarɛ nombia ŋan di nɛ, te ɛ gyakaa ɛ ne kyↄ maŋ lee nombia ŋenaŋ kekolosi man kaa lii naŋ gyɛŋ. 6Te mɛɛ lɛɛ di nideli nyi Wurubuarɛ ŋon ↄ be fi tom kpaakpaa kei asɛɛ ɛ man nɛ, waa yɛɛ ke tↄↄle kelii wee keŋ Yesu Kristo waa bese kↄŋ nɛ. 7Mɛɛ gyae ŋon nideli lee me konↄↄ man. Mena dↄↄ ma gyeŋ nyi ke dei nyi maa gyueŋ ɛ wose man ŋgba mena keŋ mɛɛ gyueŋ nɛ. Nawolo nyi debaŋ keŋ bↄↄ kyaŋ maŋ tↄ deni, na debaŋ keŋ mee yoo lee Kristo nombia kpaakpaa ŋan dↄↄ, na debaŋ keŋ mɛɛ lese Kristo nombia kpaakpaa ŋenaŋ man wola balaŋ nyi ŋe yɛɛ ampaŋ nɛ, ɛ popou kyↄↄ maŋ lee tom keŋ Wurubuarɛ ba mo boele maŋ nɛ keyɛɛ man. 8Wurubuarɛ gbagba gyeŋ nyi ɛ nombia doo me loo man, te mɛɛ gyae ŋon nideli ŋgba mena keŋ Yesu Kristo ne gyae daa nɛ. 9Lee mena dↄↄ mɛɛ fane fa ŋon nyiaa, ɛ balaŋ kegyae keŋ dɛɛ bee kpu nideli na ɛ ke nyii Wurubuarɛ nombia ŋan man, na ɛ ka gyeŋ kpene keŋ kaboena nyi yaa yɛɛ lee ɛ kekyaabii man. 10Kei gyae ke yela ɛ ke tale gyeŋ kpene keŋ dei nɛ nideli, na ɛ ke kyaa keŋ nombiikum kamasɛ yaa ayimɛɛ kamasɛ be doo ɛ wose man ya, kelii wee keŋ Kristo waa bese kↄŋ. 11Mɛɛ fane mↄ nyi Yesu Kristo waa desina ŋon na ɛ ke tale yɛɛ abↄↄ ŋan ŋa tenɛɛ Wurubuarɛ siaman nɛ, na ke yela balaŋ ka mo obuo fa Wurubuarɛ na baa lese ↄ yele. 12Me tebia, mɛɛ gyae ɛ ka gyeŋ nyi nombia ŋan be tuŋ maŋ nɛ gba te yeli Wurubuarɛ nombia ŋan te yaasee. 13Lee mena dↄↄ yoonↄↄtena baŋ bɛɛ deke gyoo dɛɛ, na balaŋ akaŋ baŋ pou te nyii nyi keŋ mɛɛ som Kristo dↄↄ te be kyaŋa maŋ tↄ deni nɛ. 14Ba ke kyaŋ maŋ tↄ deni keŋ ta do me tebia Kristotena burum kakyeŋ ba kelɛɛdi man. Ka te yeli bɛɛ gyↄ be konↄↄ kolosi nyeekelɛɛ nombia ŋan keŋ bↄↄ ne yee kolo bela ya. 15Ma gyeŋ nyi sibii na daaworo dↄↄ te balaŋ baale dↄŋɛɛ bee kolosi Kristo nombia ŋan. Mↄna baale mↄ na, baŋ ne kolosi nombia ŋan bo lee be konↄↄ kpaakpaa man. 16Mena balaŋ wↄle nyibaŋ kɛwↄ dↄↄ, keŋ bɛɛ gyae maŋ dↄↄ te bee kolosi nyeekelɛɛ nombia ŋan. Nawolo nyi ba gyeŋ nyi Wurubuarɛ lese na maŋ, na maa nyiŋ lese wola balaŋ nyi ↄ nyeedoŋ nombia ŋan yɛɛ ampaŋ. 17Balaŋ gyaŋgba nyibaŋ baŋ dↄↄ, baŋ gbagba deeli dↄↄ te bee kolosi Kristo nombia ŋan. Bↄↄ na lese be konↄↄ man kolosi nyeekelɛɛ nombia ŋan ya, te ba gyeŋ nyi be yɛɛ mena na baa tale yela diyem keŋ mɛɛ naa nɛ, ka bo kpu debaŋ keŋ me doo deni man nɛ. 18Mↄna maŋ dↄↄ kei bee hia maŋ ya. Kpene keŋ ne hia maŋ yɛna nyi bee kolosi Kristo nombia ŋan. Nyi ba moo konↄↄ kpaakpaa bo kolosi ŋa o, be ta mo konↄↄ kpaakpaa kolosi ŋa ya o nɛ, gbɛɛ kamasɛ man na bee kolosi Kristo nombia ŋan. Kei dↄↄ te dana maŋ gyoŋ nɛ, te gyae ke yɛɛ maŋ gyoŋ menɛɛ kelii ↄto. 19Nawolo nyi ma gyeŋ nyi ɛ ne fane fa maŋ, te Yesu Kristo feliŋ ŋon mↄ ne kyↄ maŋ. Mena dↄↄ ma gyeŋ nyi kɛŋa pou gyae ke yela maa kaa nyiŋ ma wose. 20Mɛɛ gyae me konↄↄ man nideli te me loo mↄ gyakaa nyiaa, Wurubuarɛ be gyae waa yela desɛŋ ke kyaŋ maŋ lee gbɛɛ kamasɛ man ya. Waa yela maa gyↄ me konↄↄ kolosi ŋgba mena keŋ mɛɛ taŋ yɛɛ nɛ, na nyi me kyaa na me sia bo o, yaa ma yeŋae o nɛ, na maa nyiŋ lese Kristo yele lee ma kekyaabii man. 21Maŋ dↄↄ, akpaa me kyaa na me kyaa bo fa Kristo. Te akpaa ma yem mↄ na, ke yɛɛ tↄnↄↄ ke fa maŋ. 22Akpaa me sɛɛ me kyaa nyeedoŋ man na, ke yɛɛ gbɛɛ daale ke fa maŋ na maa nyiŋ yɛɛ tom kpaakpaa fa Wurubuarɛ. Mena dↄↄ mↄↄ gyeŋ keŋ maa lese ya. Nyi maa lese nyeedoŋ bo o, yaa maa lese yeŋ bo o, mↄↄ gyeŋ ya. 23Ma te dↄↄ abↄↄ ala kɛŋa nsana. Nafↄ ma kegyae yɛna nyi maa yeŋ lee tɛɛle kei dↄↄ na me kaa kyaa Kristo gyaŋ adido, nawolo nyi keŋ dei kela ma kekyaa tɛɛle kei dↄↄ. 24Mↄna lee ɛmɛɛ dↄↄ, dei nyi maa kyaa tɛɛle kei dↄↄ na maa nyiŋ kyↄ ŋon. 25Mɛɛ lɛɛ di nideli nyi daa na ŋon pou dɛɛ kyaa, na maa nyiŋ kyↄ ŋon na ɛ ka bee ɛ kelɛɛdi man na ɛ ke nyiŋ di gyoŋ lee ɛ Wurubuarɛ kelɛɛdi man. 26Kei gyae ke yela nyi akpaa ma bese kaa kyaa na ŋon na, lee maŋ dↄↄ gyoŋ keŋ ɛ ne dii lee Yesu Kristo dↄↄ nɛ, gyae ka bese gbaa. 27Nɛnɛɛ kpene keŋ be kaa ɛ ke yɛɛ yɛna nyiaa, ɛ yela ɛ kekyaabii ke kyaa na mena keŋ nyeekelɛɛ nombia ŋan nawolo nɛ. Akpaa ɛ yɛɛ mena nɛ, kenaŋ na nyi me kyaa ɛ gyaŋ yaa mↄↄ kyaa ɛ gyaŋ koraŋ ya na, maa nyii nyi ɛ dana Wurubuarɛ nombia ŋan keŋkeŋ, te ɛ seŋɛɛ na ɛ tebia nↄↄdokoloŋ na ɛ nombia ayɛɛsa pou man, te ɛ ta mo nↄↄdokoloŋ ɛ ne kyↄ balaŋ na baa lɛɛ Kristo nombia kpaakpaa ŋan di. 28Te maa nyii mↄ nyi ɛ bee yee balaŋ baŋ bɛɛ koro seŋ tia ŋon nɛ lee gbɛɛ kamasɛ man ya. Ɛ yɛɛ mena na gyae ka lese wola wↄ nyi Wurubuarɛ waa wↄlɛɛ wↄ, mↄna ɛmɛɛ dↄↄ Wurubuarɛ waa lɛɛ ɛ nyee. 29Nawolo nyi Wurubuarɛ te fa ŋon gbɛɛ nyi yaa lɛɛ Kristo di kaageŋ bo ya, mↄna ↄ faa ŋon gbɛɛ nyi lee ŋon Kristo dↄↄ yaa naa diyem mↄ. 30Ɛ naa diyem keŋ mↄↄ naa debaŋ keŋ me kyaa ɛ gyaŋ nɛ, te ɛ ne nyii mena keŋ me gyakaa mɛɛ naa diyem nɛ. Mena diyem kenaŋ ŋaale yaa ɛmɛɛ mↄ ne naa nɛ.

will be added

X\