Mateo 9

1Yesu gyoowↄ degbele man te ↄ toŋa boo keŋ gyu ŋon gbagba ↄ donↄↄ man. 2Keŋte balaŋ baale seele yenaŋ dayeŋasate ŋolo ↄ dofoŋoŋ dↄↄ kↄŋ Yesu gyaŋ. Yesu kena mena keŋ balaŋ baŋ be lɛɛ e di nɛ, ↄ yako kaweete ŋon nyiaa, "Me bu, nyiŋ konↄↄ. Me ta mo n nombiakumɛɛ kyɛɛ neŋ." 3Botↄↄ te Wurubuarɛ mmaraa wolala baŋ be kyaa botↄↄ nɛ ŋorokoteewↄ nyiaa, "Balee kei ne kolosi mmusuo nombia." 4Na Yesu gyeŋ kpene keŋ bɛɛ gyueŋ ba nyeeya man nɛ te ↄ bↄↄse wↄ nyiaa, "Weera dↄↄ te ɛ na gyueŋ nombiakumɛɛ ɛ nyeeya man? 5Nombia kɛŋa man woŋti woɛla na keyako? 'Me ta mo n dukum kyɛɛ neŋ, yaa koro seŋ na n ke ta?' 6Mↄna mɛɛ gyae ɛ ka gyeŋ nyi, maŋ Deniwalaŋ Bu dana doŋ tɛɛle kei dↄↄ nyi maa mo dukum kyɛɛ." Mena dↄↄ ↄ yako kaweete ŋon nyiaa, "Koro seŋ, gate n dofoŋoŋ na n ke ta gyu n dɛɛ." 7Keŋte balee ŋon korowↄ seŋ te ↄ laŋa ↄ dɛɛ. 8Balaŋ dikpii keŋ kena nombia kɛŋa nɛ, doo be nↄↄ te ba lese Wurubuarɛ ŋon ↄ ba mo mena doŋ kei fa balaŋ nɛ yele. 9Yesu ka lee botↄↄ ↄ ne lam nɛ, ↄ naa balee ŋon bɛɛ baake e nyi Mateo nɛ, na ↄ kyaa ↄ lempoo dɛɛlɛe man. Te Yesu yako e nyiaa, "Koro sila maŋ" Keŋte Mateo korowↄ sila e. 10Wee daale Yesu ke kyaa Mateo dɛɛ ↄ ne dii nɛ, lempoolɛɛra na nombiakumɛɛyɛɛra burum kↄŋawↄ kaa di bom na Yesu na ↄ kaseela baŋ. 11Farasiitena baŋ kena mena nɛ be bↄↄse Yesu kaseela baŋ nyiaa, "Weera dↄↄ te ɛ Gbeŋgyoo ŋon ne dii bom na lempoolɛɛra na nombiakumɛɛyɛɛra?" 12Yesu ke nyii nombia kɛŋa nɛ ↄ yako wↄ nyiaa, "Kaweesetena te kaboena nyi baa kyↄ wↄ kawee. Balaŋ baŋ bↄↄ na wee ya nɛ dↄↄ, bↄↄ ne hia kawee kekyↄ ya. 13Mↄna ɛ gyu na ɛ kaa gyueŋ kpene keŋ Wurubuarɛ nombii aŋmaraseŋ see kei na wolo nɛ man. Be ŋmarasewↄ nyiaa, Wurubuarɛ kpa, 'Na kedeesa te maŋ Wurubuarɛ ne gyae lee ɛ gyaŋ ya. Keŋ mɛɛ gyae yɛna nyi yaa wii dↄŋa waraŋase.' Ma te kↄŋ nyi me kaa baake balaŋ baŋ be gbɛɛneŋ wulaa tenɛɛ Wurubuarɛ siaman nɛ ya, mↄna me kↄŋae me kaa baake nombiakumɛɛyɛɛra." 14Wee daale nɛ, Gyↄn Wurubuarɛ loŋsↄↄre ŋon kaseela kↄŋawↄ kaa bↄↄse Yesu nyiaa, "Weera dↄↄ te daa na Farasiitena ne bake de nↄↄ, te n kaseela baŋ dↄↄ baŋ bɛɛ bake be nↄↄ ya?" 15Keŋte Yesu tiranↄↄ fa wↄ nyiaa, "Sena te balaŋ baŋ be kyaa alowↄletɛɛ nɛ baa wii walaŋsa keŋ alowↄle baale kyaa be gyaŋ? Mↄna debaŋ daale gyae kekↄŋ keŋ baa mo alowↄle baale ŋon lee be gyaŋ. Mena debaŋ kenaŋ man na baa bake be nↄↄ. 16Ŋolo bɛɛ kara kanyaŋ wↄle mo taa kakyeŋgbelaa keŋ ba yem nɛ ya. Akpaa ↄ yɛɛ mena na, kanyaŋ wↄle keŋ gyae ke wↄŋee bene keŋ tirii na bↄↄ keŋ ke wolose kpu. 17Mena mↄ te ŋolo bɛɛ mo soloŋ wↄle do wonembu tↄne ogele bene man ya. Ↄ yɛɛ mena na, soloŋ wↄle keŋ gyae ke yela wonembu tↄne ogele keŋ ke bɛɛ, na soloŋ keŋ ke leki na wonembu tↄne ogele keŋ ke wↄlɛɛ. Mena dↄↄ kaboena bo nyi baa mo soloŋ wↄle do wonembu tↄne ogele wↄle man, na ŋe popou be nyiŋ wↄlɛɛ ya." 18Yesu kɛɛ kolosi nombia kɛŋa fa wↄ nɛ, Gyudatena ↄsom kegyia ŋolo kaa buŋawↄ ↄ nawↄↄ tɛɛ sola e nyiaa, "Me bu alebu ta yem debokeiman. Mↄna kↄŋ na n kaa mo n nyiŋmaa gyakaa ↄ dↄↄ, na waa nyiŋ nyeedoŋ." 19Mena dↄↄ Yesu korowↄ sila e, te ↄ kaseela baŋ mↄ sila e gyu. 20Botↄↄ na te alo ŋolo ŋon fatabo ne gyↄ e kulutooneŋ kufu ala nɛ, moowↄ Yesu wↄle te ↄ moo ↄ nyiŋmaa tina Yesu kegba nↄↄbii. 21Nawolo nyi alo ŋon yakowↄ ↄ nyeeman nyiaa, "Akpaa me nyiŋ tina ↄ kegba koraŋ na, me kawee gyae ke taŋ." 22Keŋte Yesu gɛɛsewↄ kɛɛ te ↄ naa alo ŋon te ↄ yako e nyiaa, "Me bu yela n wↄe ke fɛɛ neŋ. N kelɛɛ maŋ di dↄↄ te n nyiŋa kawee kekyↄ." Debokenaŋ man te alo ŋon kawee taŋawↄ. 23Yesu ke gyu ka gyoo Gyudatena ↄsom kegyia ŋon dɛɛ, te ↄ kena baŋ bɛɛ wola kefereese na baŋ bee wii lia ŋan tɛɛ nɛ, 24ↄ yako wↄ nyiaa, "Ɛ popou ɛ lee. Nawolo nyi alebu ŋon ta yeŋa ta ya, ↄ doo dosoroŋ bo." Keŋte balaŋ baŋ pou boŋo Yesu. 25Balaŋ baŋ ka lee debↄↄ man nɛ, Yesu gyuuwↄ deni keŋ man woo ŋon doo nɛ, te ↄ kyaŋa e ↄ nyiŋmaa man te alebu ŋon foŋawↄ. 26Mena nombia kɛŋa yaaseewↄ tɛɛle kenaŋ dↄↄ pou. 27Yesu ka lee botↄↄ ↄ ne gyu nɛ, siayɛlɛɛsatena bala baale sila e na bɛɛ fae yeesa baake nyiaa. "Gyoo Defidi ↄ naanabii, wii de waraŋase." 28Yesu ke gyu ka gyoo dekpaŋalaŋ man nɛ, siayɛlɛɛsatena baŋ kↄŋawↄ ↄ gyaŋ te ↄ bↄↄse wↄ nyiaa, "Ɛ ne lɛɛ maŋ di nyi maa tale gyuusu ɛ sia?" Keŋte be tiranↄↄ fa e nyi, "Ayi de Gbeŋgyoo." 29Keŋte Yesu moo ↄ nyiŋmaa tina be sia te ↄ yako wↄ nyiaa, "Mena keŋ ɛ be lɛɛ di nɛ, dɛɛkↄŋ mena fa ŋon." Keŋte be sia gyuusuwↄ. 30Botↄↄ te Yesu faree wↄ nideli nyi, "Ɛ na yele ŋolo na ŋolo ke nyii nombia kɛŋa ya." 31Mↄna baŋ moo ↄ wose man nombia kpeŋkpeleŋ fa balaŋ tɛɛle kenaŋ pou dↄↄ. 32Be ka lee botↄↄ bee gyu nɛ, ba moo walaŋ ŋon feliŋkum doo ↄ man te ↄ bɛɛ tale kolosi ya nɛ kↄŋ Yesu gyaŋ. 33Yesu ke gegi feliŋkum keŋ lee balee ŋon man nɛ, te ↄ kolosiwↄ. Balaŋ dikpii keŋ kena mena nɛ, nombia ŋan doo be nↄↄ te be yakowↄ nyiaa, "Da te naa ta mena nombia kɛŋa see Iserae tɛɛle kei dↄↄ ya." 34Mↄna Farasiitena baŋ yakowↄ nyiaa, "Feliŋkumɛɛ pou gyoo ŋon doŋ yaa ↄ na mo gegi feliŋkumɛɛ nɛ." 35Keŋte Yesu tɛɛwↄ kila donↄↄse na akuraase ŋan pou man, na ↄ na wola wↄ Gyudatena ↄsom denɛɛ man. Ↄ ne kolosi Wurubuarɛ gyoori keŋ nombia kpaakpaa fa wↄ, te ↄ kyↄↄ kaweese kpookpoo kamasɛ mↄ. 36Ↄ kena balaŋ dikpii keŋ nɛ, be nombia yɛɛ e waraŋase. Nawolo nyi bɛɛ yeyɛɛ te bↄↄ dana walaŋ ŋon waa lɛɛ wↄ ya. Be nombia yɛɛ ŋgba namense baŋ bↄↄ dana gbeŋgyoo ya nɛ. 37Botↄↄ te ↄ yako ↄ kaseela baŋ nyiaa, "Wↄↄman abↄↄ ŋan boe na kekɛrɛɛ, mↄna tomyɛɛra baŋ ta boo ya. 38Mena dↄↄ ɛ fane fa wↄↄte ŋon, na waa lese balaŋ ke kↄŋ ↄ wↄↄ keŋ man kaa yɛɛ tom."

will be added

X\