Mateo 8

1Yesu ke tisi lee bula keŋ dↄↄ kↄŋ nɛ, balaŋ burum kaa sila e. 2Keŋte akuŋtuŋte ŋolo kaa buŋawↄ ↄ nawↄↄ tɛɛ waase e nyiaa, "Me Gbeŋgyoo, akpaa n ne gyae na nyaŋ ke tale kyↄ maŋ me kawee." 3Botↄↄ te Yesu tenee ↄ nyiŋmaa tina e te ↄ yako e nyiaa, "Mɛɛ gyae, n kawee dɛɛ taŋ." Debokenaŋ man te balee ŋon kawee taŋawↄ. 4Keŋte Yesu tↄↄ e kiiŋ nyi, "Na yele walaŋ na walaŋ ke nyii ya, mↄna mo n wose gyu kawola Wurubuarɛ sae ŋon, na n ke deesi fa Wurubuarɛ ŋgba mena keŋ Mosesi ba wola ŋon nɛ, na ke di adansɛɛ fa walaŋ kamasɛ nyi n kawee te taŋ." 5Yesu ke gyu ka gyoo Kapanum donↄↄ man nɛ, Romantena yoonↄↄtena kegyia ŋolo kↄŋawↄ kaa waase nyiaa, 6"Me Gbeŋgyoo lɛɛ maŋ, nawolo nyi me tobaale te tekerii ↄ doo deni man ↄ ne naa diyem nideli." 7Keŋte Yesu yako e nyiaa, "Maa kↄŋ na me kaa kyↄ e ↄ kawee." 8Botↄↄ te yoonↄↄtena kegyia ŋon yako e nyiaa, "Me gbeŋgyoo, na haa n wose ya. Nawolo nyi ma tekaboe nyi nya kↄŋ me dɛɛ ya. Mena dↄↄ nyaŋ betaa gyuusu n nↄↄ faree kawee keŋ, me tobaale ŋon waa koro. 9Nawolo nyi maŋ gbagba mↄ yɛɛ walaŋ ŋon me doo baale tɛɛ, te yoonↄↄtena mↄ doo me tɛɛ. Me yako ŋolo nyi waa gyu yenaŋ daale na ↄ ne gyu, te me yako ŋolo nyi waa kↄŋ na ↄ ne kↄŋ. Kpene kamasɛ keŋ me yako be man ŋolo nyi waa yɛɛ na, keŋ te ↄ ne yɛɛ." 10Yesu ke nyii nↄↄwoya kɛŋa nɛ, doo ↄ nↄↄ te ↄ yako balaŋ dikpii keŋ be silana e nɛ nyiaa, "Ampaŋ yaa mɛɛ yako ŋon nyiaa, Iserae tɛɛle kei dↄↄ pou nɛ ma te naa ta walaŋ ŋon ↄ ne lɛɛ Wurubuarɛ di ŋgba balee kei nɛ ya." 11Mɛɛ yako ŋon ɛ ke nyii nyiaa, balaŋ burum baa lee weese dɛɛlee na weese dɛɛyalae kↄŋ, na baŋ na Aberaham na Asiki na Gyekↄpo kaa kyaa Wurubuarɛ gyoori keŋ man na baa di bom. 12Te ɛmɛɛ Gyudatena baŋ nafↄ kaboena nyi yaa kyaa Wurubuarɛ gyoori keŋ man nɛ, baa lese ŋon debↄↄ ka see ditiŋtɛɛ keŋ man. Botↄↄ te ɛ ke kyaŋ ɛ nyeeya wii nideli. 13Keŋte Yesu yako yoonↄↄtena kegyia ŋon nyiaa "Ta gyu dɛɛ, mena keŋ n be lɛɛ maŋ di nɛ dↄↄ gyae ke kↄŋ mena fa neŋ." Debokenaŋ man te ↄ tobaale ŋon kawee taŋawↄ. 14Kenaŋ wↄle te Yesu korowↄ gyu Pita dɛɛ. Ↄ ke gyu nɛ, na Pita wa awu doo ↄ na wee kpaŋalaŋ. 15Keŋte Yesu kyaŋa e ↄ nyiŋmaa man te kpaŋalaŋ keŋ taŋawↄ. Keŋte ↄ korowↄ kɛɛ be dↄↄ. 16Kelii balinↄↄ nɛ, ba moo balaŋ baŋ feliŋkumɛɛ doo be man nɛ kↄŋ Yesu gyaŋ. Ↄ moo nombii dokoloŋ kooŋ bo gegi feliŋkumɛɛ ŋan pou, te ↄ kyↄↄ kaweesetena baŋ mↄ pou. 17Ↄ ke yɛɛ kei yela nombia ŋan Wurubuarɛ dekpeŋkpeŋgyↄↄre Yesaya be yako see nɛ kↄŋawↄ ampaŋ. Yesaya yakowↄ nyiaa, "Ŋon lɛɛ na de kaweese pou, te ↄ moo de kaale mↄ seele." 18Yesu kena nyi balaŋ burum te kilisi e nɛ, ↄ yako ↄ kaseela baŋ nyi baa toŋ gyu boo keŋ diŋgyiŋ. 19Keŋte Wurubuarɛ mmaraa wolale ŋolo kↄŋawↄ ↄ gyaŋ kaa yako e nyiaa, "De Gbeŋgyoo, yenaŋ kamasɛ keŋ n ke gyu na, maa sila neŋ gyu." 20Keŋte Yesu yako e nyiaa, "Nyanyase dana bↄↄneŋ te gyebuse mↄ dana asaase, mↄna Deniwalaŋ Bu ŋon be taŋ botↄↄ keŋ waa mo ↄ nyee teeli ya." 21Botↄↄ te Yesu silala baŋ man ŋolo mↄ yako e nyiaa, "Me gbeŋgyoo, yela maa taŋgbɛɛ gyu kewuu me kya pɛna me kaa sila neŋ." 22Keŋte Yesu yako e nyiaa, "Sila maŋ, na n ke yela woya kewuu ba woya." 23Botↄↄ te Yesu gyoowↄ degbele man, te ↄ kaseela baŋ mↄ gyoowↄ kpu na e. 24Karatetee dokoloŋ te feliŋ dinaa daale korowↄ ne gyↄↄ loŋ keŋ dↄↄ, te gyↄↄ loŋ do degbele keŋ man. Debaŋ kenaŋ na Yesu te doo dosoroŋ. 25Mena dↄↄ Yesu kaseela baŋ gyuuwↄ ke gyuusu e yako e nyiaa, "De Gbeŋgyoo lɛɛ daa, dɛɛ gyae dɛɛ munu." 26Keŋte Yesu yako wↄ nyiaa, "Ɛmɛɛ dↄↄ ɛ kelɛɛdi ta boo ya. Weera dↄↄ te ɛ dana gyakoloŋ mena?" Botↄↄ te ↄ korowↄ te ↄ fae feliŋ keŋ na loŋ keŋ te ŋe yɛɛwↄ yididi. 27Balaŋ baŋ wose yeŋa wↄ te be bↄↄse dↄŋa nyiaa, "Walaŋ woŋti yɛna kei, te feliŋ na loŋ koraŋ ne nyii e nɛ?" 28Yesu ka toŋ gyu boo keŋ diŋgyiŋ Gadaratena tɛɛle man nɛ, baala bala baale leewↄ amuseese man kↄŋ kaa gyaŋee na e. Na feliŋkumɛɛ doo balaŋ kɛwↄ man, te ba wose dana gyakoloŋ. Mena dↄↄ ŋolo bɛɛ tale mo gbɛɛ kenaŋ man ya. 29Ba kena Yesu nɛ be fae yeesa nedoŋ nyiaa, "Wurubuarɛ Bu, woŋ te n ne gyae de gyaŋ? N kↄŋae n kaa naase daa diyem pɛna debaŋ keŋ kelii?" 30Debaŋ kenaŋ na, kekuiriise dikpii dinaa daale seŋɛɛ botↄↄ yenaŋ bee dii. 31Keŋte feliŋkumɛɛ ŋan waase Yesu nyiaa, "Akpaa n ke gegi daa na, yela de kaa gyoo kekuiriise dikpii kei man." 32Keŋte Yesu yako feliŋkumɛɛ ŋan nyiaa, "Ɛ lee ta." Mena dↄↄ feliŋkumɛɛ ŋan leewↄ balaŋ baŋ man gyu ka gyoo kekuiriise baŋ man, te be dikpii keŋ pou yeuwↄ tisi bula kyoloŋkyoloŋ keŋ gyu ka gyoo loŋ keŋ man te be munuwↄ pou. 33Keŋte balaŋ baŋ bɛɛ kɛɛ kekuiriise baŋ dↄↄ nɛ, yeuwↄ gyu donↄↄ man te be yako nombia ŋan be kↄŋ nɛ pou na kpene keŋ be kↄŋ balaŋ baŋ feliŋkumɛɛ doo be man dↄↄ nɛ fa balaŋ. 34Mena dↄↄ donↄↄ keŋ man balaŋ pou leewↄ kↄŋ kaa gyaŋee na Yesu. Ba kena e nɛ, be waase e nyi waa lee be tɛɛle dↄↄ.

will be added

X\