Mateo 7

1Keŋte Yesu besewↄ yako wↄ nyiaa, "Ɛ na yɛɛ ɛ wose balaŋ nombiadiira na ɛ ke bu wↄ fↄↄ ya, na Wurubuarɛ mↄ be di ɛ nombia na waa bu ŋon fↄↄ ya. 2Nawolo nyi gbɛɛ keŋ man ɛ ka mo di ɛ tebia nombia na, mena mↄ te Wurubuarɛ waa mo di ɛ nombia. Nombii keŋ ɛ ka mo yɛɛ ɛ tebia nɛ, keŋ ke te Wurubuarɛ mↄ waa mo yɛɛ ŋon. 3Weera dↄↄ te n ne naa woŋsilibii keŋ doo n dↄↄ sibii man, te n be famenɛ na daakpee keŋ doo nyaŋ gbagba n sibii man ya? 4Sena te n ke tale yako n dↄↄ nyi, 'Me dↄↄ yela maa lese woŋsilibii lee n sibii man, keŋ nyaŋ gbagba be famenɛ na daakpee keŋ doo n sibii man ya?' 5Nyaŋ walaŋ ŋon n na beo n wose, kaboena nyi nya taŋgbɛɛ lese daakpee keŋ doo n sibii man nɛ, pɛna n kena nideli na n ka lese woŋsilibii keŋ doo n dↄↄ sibii man nɛ. 6Ɛ na mo kpene keŋ ke yɛɛ kolo kpaakpaa ke Wurubuarɛ siaman nɛ fa babaase ya, na mena ya na baa besena bo kↄŋ ɛ dↄↄ na baa doŋee ŋon. Ɛ na mo ɛ kegyaŋase kpaakpaa nyiŋan mↄ fuŋ lↄ kekuiriise ya, na mena ya na baa sakatee ŋa bo." 7Keŋte Yesu besewↄ yako wↄ nyiaa, "Ɛ sola Wurubuarɛ kolo na ɛ nyiŋmaa gyae ke kaŋ ke. Ɛ kɛo kolo lee ↄ gyaŋ na ɛ ke nyiŋ ke, te ɛ gyↄ e disim na waa toro fa ŋon. 8Nawolo nyi walaŋ kamasɛ ŋon ↄ bↄↄse e kolo na ↄ nyiŋmaa ne kaŋ ke. Ŋon ↄ gyae kolo lee ↄ gyaŋ na ↄ ne nyiŋ ke, te ŋon mↄ ↄ gyↄ e disim na waa toro fa e. 9Ɛ man woŋti kyaa la keŋ nyi ↄ bu da sola e weenɛɛ na waa mo boe fa e? 10Yaa ɛ man woŋti kyaa la keŋ nyi ↄ bu da sola e kpebii na waa mo dom fa e? 11Akpaa ɛmɛɛ baŋ ɛ yɛɛ nombiakumɛɛyɛɛrawↄ koraŋ gyeŋ abↄↄ kpaakpaa ka mo fa ɛ bia na, de yaa sena te ɛ kya ŋon ↄ kyaa adido nɛ be gyae waa mo abↄↄ kpaakpaa ŋan kela kɛŋa nɛ fa baŋ bɛɛ sola e nɛ ya. 12Wurubuarɛ mmaraase na Wurubuarɛ akpeŋkpeŋgyↄↄra nombia ŋan pou bↄↄ wolo nɛ ŋa nyee yɛna nyi, kpene keŋ n ne gyae nyi balaŋ baa yɛɛ fa neŋ na, keŋ te kaboena nyi nyaŋ mↄ nya yɛɛ fa wↄ." 13Keŋte Yesu besewↄ yako wↄ nyiaa, "Ɛ yɛɛ kakyeŋ na ɛ ka mo denanↄↄ bↄbↄↄkyee keŋ man gyoo Wurubuarɛ man. Nawolo nyi denanↄↄ keŋ ka keerɛɛ te ke gbɛɛnaa fɛlɛɛ te ke dↄↄ keta be taŋ baŋ ya nɛ, na mo balaŋ bo gyu kayeyɛɛ keŋ be taŋ ↄto ya nɛ man. Mↄna ke man te balaŋ burum dↄŋɛɛ. 14Te denanↄↄ bↄbↄↄkyee keŋ ke gbɛɛnaa yɛɛ peperee te ke dↄↄ keta dana baŋ nɛ, na moona balaŋ gyu nyeedoŋ keŋ be taŋ ↄto ya nɛ man. Mↄna balaŋ baŋ bɛɛ naa ke te bɛɛ moo ke man gyoo nɛ, be ta boo ya." 15Keŋte Yesu besewↄ yako wↄ nyiaa, "Ɛ kɛɛ ɛ wose man nideli lee akɛrɛɛ akpeŋkpeŋgyↄↄra baŋ wose man. Akpaa be kↄŋ ɛ gyaŋ na, bɛɛ yↄkↄse ba wose ŋgba namense nɛ mↄna be konↄↄse man na be yɛɛ ŋgba gbougbouse nɛ. 16Be nombia ŋan bɛɛ yɛɛ nɛ te ɛ ka mo gyeŋ wↄ. Ŋolo bɛɛ kↄ mango bia lee akutu daŋ man ya, mena mↄ te bↄↄ ne kↄ apaŋ lee abotoo woŋse man ya. 17Mena mↄ te daŋ kpaakpaate kamasɛ na se bia kpaakpaa, te daŋ kum mↄ na see bia kumɛɛ. 18Daŋ kpaakpaate be gyae ke tale see bia kumɛɛ ya, te daŋ kum mↄ be gyae ke tale see bia kpaakpaa ya. 19Daŋ kamasɛ keŋ bɛɛ se bia kpaakpaa ya nɛ, bɛɛ kara ke na be ta mo do boalaŋ. 20Mena dↄↄ nombia ŋan balaŋ benaŋ ne yɛɛ nɛ, te ɛ ka mo gyeŋ wↄ." 21"Na walaŋ kamasɛ ŋon ↄ ne baake maŋ nyi 'Me Gbeŋgyoo, me Gbeŋgyoo' nɛ, ne gyae la waa gyoo Wurubuarɛ gyoori keŋ man ya. Mↄna walaŋ ŋon ↄ ne yɛɛ kpene keŋ me kya ŋon ↄ kyaa adido ne gyae nɛ, ŋon waageŋ ne gyae la waa gyoo Wurubuarɛ gyoori keŋ man. 22Nombia kedi wee dinaa keŋ man nɛ, balaŋ burum baa kaa yako nyiaa, 'De Gbeŋgyoo, na n yele man te de kolosi Wurubuarɛ nombia yee? Yaa na n yele te da moowↄ gegi feliŋkumɛɛ lee balaŋ man yee? Na n yele te da moowↄ yɛɛ gyakoloŋ nombia na nombia dinaana yee?' 23Botↄↄ te maa toro yako wↄ nyiaa, 'Mↄↄ gyeŋ ŋon ya, ɛ lee me siaman. Ɛmɛɛ nombiakumɛɛyɛɛra!' " 24Keŋte Yesu besewↄ yako wↄ nyiaa, "Mena dↄↄ walaŋ kamasɛ ŋon ↄ ne nyii me nↄↄwoya kɛŋa te ↄ ne di ŋe dↄↄ nɛ, ↄ yɛɛ ŋgba siakaralate ŋon ↄ be baŋ ↄ deni gyakaa boe dↄↄ nɛ. 25Ↄga ŋɛɛwↄ te booneŋ wuuwↄ te feliŋ dinaa gyↄↄ deni keŋ, mↄna ka te yale ya. Nawolo nyi ↄ see ka mokↄↄ gyakaa boe dↄↄ. 26Mↄna walaŋ kamasɛ ŋon ↄ ne nyii me nↄↄwoya kɛŋa te ↄ bee di ŋe dↄↄ ya nɛ, ↄ yɛɛ ŋgba diyiŋte ŋon ↄ be ma ↄ deni gyakaa aŋasa dↄↄ nɛ. 27Ↄga ŋɛɛwↄ te booneŋ wuuwↄ te feliŋ dinaa gyↄↄ deni keŋ te ka leewↄ yala worom tekerii pou." 28Yesu ke yako nombia kɛŋa taŋ nɛ, ↄ kawola keŋ doo balaŋ dikpii keŋ nↄↄ. 29Nawolo nyi ↄ wolawↄ ŋgba walaŋ ŋon ↄ dana doŋ nombia ŋan dↄↄ nɛ, be yɛɛ ŋgba mena keŋ ba mmaraa wolala baŋ na wolo nɛ ya.

will be added

X\