Mateo 6

1Keŋte Yesu besewↄ yako wↄ nyiaa "Ɛ kɛɛ nideli nyi ɛ be yɛɛ deeli balaŋ man, na baa nyiŋ naa ŋon ya. Akpaa ɛ yɛɛ mena na, ɛ be gyae ɛ ke nyiŋ kom ketↄ kamasɛ lee ɛ kya ŋon ↄ kyaa adido nɛ gyaŋ ya. 2Mena dↄↄ akpaa ɛ yɛɛ deeli fa diyemte ŋolo na, ɛ na mo ke gyↄ dekpeŋkpeŋ ŋgba mena keŋ balaŋ baŋ bɛɛ beo ba wose nɛ ne yɛɛ Gyudatena ↄsom denɛɛ na abↄnterese man, na balaŋ kenyiŋ kɛlɛɛ wↄ nɛ ya. Ampaŋ yaa mɛɛ yako ŋon nyiaa, be taŋ nyiŋ ba kom ketↄ pou. 3Mↄna akpaa n yɛɛ deeli fa diyemte ŋolo na, na yele n dↄↄ kpaakpaa gba koraŋ ke nyii ya. 4Yela kedoo walaŋ ŋon n be yɛɛ deeli keŋ fa e nɛ, ɛmɛɛ na e ɛ bala nsana. Dekↄŋ mena na, n kya Wurubuarɛ ŋon ↄ ne naa kpene keŋ n be yɛɛ weese nɛ, waa tↄ neŋ kom." 5Keŋte Yesu yako wↄ nyi, "Akpaa ɛ ne fane nɛ, ɛ na yɛɛ ŋgba mena keŋ balaŋ baŋ bɛɛ beo ba wose ne yɛɛ nɛ ya. Nawolo nyi bɛɛ gyae Gyudatena ↄsom denɛɛ man, na abↄnterese man keta seŋee fane na balaŋ kenyiŋ naa wↄ. Ampaŋ yaa mɛɛ yako ŋon nyi be taŋ tↄ wↄ ba kom pou. 6Mↄna akpaa ɛ ne gyae ɛ ke fane na, ɛ gyu ɛ denɛɛ man na ɛ ketↄ disim na ɛ ke fane fa ɛ kya ŋon ɛ bɛɛ naa e na ɛ sia fonɛɛ ya nɛ. Akpaa ɛ yɛɛ mena na, ɛ kya ŋon ↄ ne naa kpene keŋ ɛ be yɛɛ weese nɛ, waa tↄ ŋon kom. 7Akpaa ɛ ne fane na, ɛ na kolosi nↄↄwoya burum ŋan ŋↄↄ taŋ tↄnↄↄ, ŋgba mena keŋ balaŋ baŋ bↄↄ gyeŋ Wurubuarɛ ya ne yɛɛ nɛ ya. Baŋ gyeŋ nyi akpaa be kolosi nↄↄwoya burum na, te Wurubuarɛ waa nyii wↄ. 8Mena dↄↄ ɛ na yɛɛ ŋgba be kɛɛ yɛɛ nɛ ya, nawolo nyi ɛ kya Wurubuarɛ wulaa ↄ gyeŋ kpene keŋ ne hia ŋon koraŋ gba pɛte ɛ ne bↄↄse e." 9"Ɛ ne gyae ɛ ke fane na, ɛ yako nyiaa, 'De kya ŋon n kyaa adido, dɛɛ fane nyi balaŋ pou baa lese n yele. 10Lese n gyoori debↄↄ, yela baa yɛɛ n kegyaebii tɛɛle dↄↄ, ŋgba mena keŋ bɛɛ yɛɛ adido nɛ. 11Fa daa gyɛŋ wee kei weenɛɛ. 12Mo de nombiakumɛɛ kyɛɛ daa, ŋgba mena keŋ daa mↄ na mo kyɛɛ balaŋ baŋ bɛɛ yɛɛ nombiakumɛɛ tia daa nɛ. 13Na yele dɛɛ yala kekɛɛsekɛɛ man ya. Mↄna lese daa lee walaŋkum ŋon nyiŋmaa man.' " 14Nawolo nyi akpaa ɛ mo balaŋ nombiakumɛɛ kyɛɛ wↄ na, ɛ kya ŋon ↄ kyaa adido nɛ mↄ waa mo ɛmɛɛ mↄ ɛ nombiakumɛɛ kyɛɛ ŋon. 15Mↄna akpaa ɛ ta mo balaŋ nombiakumɛɛ kyɛɛ wↄ ya na, ɛ kya ŋon ↄ kyaa adido nɛ mↄ be gyae waa mo ɛmɛɛ mↄ wui nombiakumɛɛ kyɛɛ ŋon ya. 16Keŋte Yesu besewↄ yako wↄ nyi, "Akpaa ɛ ne bake ɛ nↄↄ nɛ, ɛ na nyaŋe ɛ sia ŋgba mena keŋ balaŋ baŋ bɛɛ beo ba wose nɛ ne yɛɛ nɛ ya. Bɛɛ nyaŋe be sia na balaŋ ke nyiŋ naa nyi bɛɛ bake be nↄↄ. Ampaŋ yaa mɛɛ yako ŋon nyi be taŋ nyiŋ ba kom ketↄ. 17Mↄna akpaa n bake n nↄↄ nɛ, faafo n sia na n ke tiu nuŋ na n ke fulaa n nyee. 18N yɛɛ mena na balaŋ ba gyem nyi n ne bake n nↄↄ ya. Mↄna n kya ŋon n bɛɛ naa e na n sia fonɛɛ ya, te ↄ ne naa kpene kamasɛ keŋ n ne yɛɛ weese nɛ waa tↄ neŋ kom." 19Keŋte Yesu besewↄ yako wↄ nyiaa, "Ɛ na gyae abↄↄ see tɛɛle kei dↄↄ fa ɛ wose ya. Nawolo nyi tɛɛle kei dↄↄ na, paapaase na kandorↄse gyae ke tale wↄlɛɛ ŋa, yaa ŋmɛɛlatena mↄ baa tale kaa ŋmɛɛle ŋa. 20Mↄna ɛ gyae abↄↄ see ɛ wose Wurubuarɛ man, botↄↄ keŋ paapaase na kandorↄse be wↄlɛɛ ŋa ya, te ŋmɛɛlatena mↄ be gyae baa tale gyu ke ŋmɛɛle ŋa ya nɛ. 21Nawolo nyi botↄↄ keŋ nya abↄↄ kpaakpaa doo nɛ, botↄↄ mↄ te n loo gyakaa." 22Keŋte Yesu besewↄ yako wↄ nyiaa, "Sia yɛɛ ŋgba kanea nɛ fa deniwalaŋ wose. N sia dei na n wose pou doo keŋmaŋee man. 23Mↄna n sia de wↄlɛɛ na, n wose pou doo ditiŋtɛɛ tuum man. Nyi akpaa kanea keŋ doo n man nɛ da gyoo ditiŋtɛɛ na, kenaŋ na ditiŋtɛɛ dinaa ta gyoo neŋ." 24"Walaŋ be kyaa keŋ waa tale som gbeŋgyoona bala ya. Dekↄŋ mena na, waa kↄla ŋolo na waa gyae ŋolo nombia, yaa waa som ŋolo nideli kela ŋolo. Ɛ be gyae ɛ ke tale som Wurubuarɛ na kↄba bom ya. 25Mena dↄↄ te mɛɛ yako ŋon nyiaa, ɛ na yeyɛɛ na ɛ kekyaa man kedi na kenyↄↄ, na abↄↄ ŋan ɛ ka do ya. Nyeedoŋ ne hia kela weenɛɛ, te deniwalaŋ wose mↄ ne hia kela abↄↄ ŋan waa do. 26Ɛ kɛɛ gyebuse, bↄↄ ne duu abↄↄ ya te bↄↄ ne kↄↄ ya te bↄↄ dana kpeese yaa denɛɛ ŋan man baa see weenɛɛ ya. Mↄna ɛ kya ŋon ↄ kyaa adido nɛ ne fa wↄ weenɛɛ. Kaboena ya gyeŋ nyi, ɛ wose ne hia kela gyebuse. 27Ɛ man woŋti te lee ↄ kayeyɛɛ man nɛ, waa tale mo debaŋ dokoloŋ kooŋ pɛ kpu na ↄ weeya ŋan Wurubuarɛ be fa e nɛ? 28Woŋ dↄↄ te ɛ na yeyɛɛ na abↄↄ ŋan ɛ ka do. Ɛ kɛɛ mena keŋ kyeŋkyeŋkↄↄse na bee, ŋe bɛɛ yɛɛ tom ya te ŋe bɛɛ loo kanyaŋse mↄ ya. 29Mↄna mɛɛ yako ŋon ɛ ke nyii nyiaa, Gyoo Solomↄn gba na ↄ wosekenyiŋ koraŋ nɛ, ↄ te nyiŋ kyeŋkyeŋkↄↄse kɛŋa man dokoloŋ kyeo ya. 30Weera dↄↄ te ɛ bɛɛ lɛɛ Wurubuarɛ di nideli ya. Nyi akpaa mena te Wurubuarɛ ne mia ŋalese ŋan ɛ kena ŋa gyɛŋ kyoo na be ta too ŋa na, kenaŋ na ɛ tↄↄse nyi Wurubuarɛ waa mia ŋon kela ŋalese ŋenaŋ. 31Mena dↄↄ ɛ na yeyɛɛ na kpene keŋ ɛ ke di, yaa kpene keŋ ɛ ke nyↄↄ yaa kpene keŋ ɛ ka do nɛ dↄↄ ya. 32Nawolo nyi mena abↄↄ kɛŋa te tɛɛle kei dↄↄ balaŋ baŋ bↄↄ gyeŋ Wurubuarɛ ya nɛ sia ne yɛɛ ŋe dↄↄ, mↄna ɛ kya Wurubuarɛ gyeŋ nyi mena abↄↄ kɛŋa ne hia ɛmɛɛ mↄ. 33Mena dↄↄ ɛ taŋgbɛɛ mo ɛ loo pou gyakaa Wurubuarɛ gyoori keŋ na ↄ gbɛɛneŋ ŋan tenɛɛ nɛ dↄↄ. Nyi akpaa ɛ yɛɛ mena na, Wurubuarɛ waa mo abↄↄ akaŋ ŋan pou kpu ŋon. 34Mena dↄↄ ɛ na yeyɛɛ na kyoo wui nombia ya, te ɛ na mo gyɛŋ wui nombia kpu kyoo wui man ya. Nawolo nyi wee kamasɛ na ke wui nombia."

will be added

X\