Mateo 4

1Keŋte Wurubuarɛ feliŋ ŋon yela Yesu gyuu depampaa dinaa daale man. Botↄↄ te ↄbↄnsam kɛɛse e kɛɛ. 2Yesu ke bake ↄ nↄↄ weeya sↄŋola (40) nelim na ka weese wↄle nɛ, tanam kyaŋa e nideli. 3Botↄↄ te ↄbↄnsam kↄŋawↄ ↄ gyaŋ kaa yako e nyiaa, "Akpaa nyaŋ yɛna Wurubuarɛ bu ŋon na, yela boya kɛŋa ka bese weenɛɛ." 4Keŋte Yesu tiranↄↄ fa e nyiaa, "Wurubuarɛ nombia aŋmaraseŋ see ne yako daa nyiaa, 'Na weenɛɛ ŋaageŋ ne faa na walaŋ nyeedoŋ ya, mↄna Wurubuarɛ nↄↄwoya kamasɛ mↄ ne fa walaŋ nyeedoŋ.' " 5Botↄↄ te ↄbↄnsam moo Yesu gyu Gyerusalɛm donↄↄ man, te ↄ moo e gyu Wurubuarɛ ↄsom deni dinaa keŋ nyeeman adido adido, 6te ↄ yako e nyiaa, "Akpaa nyaŋ yɛna Wurubuarɛ bu ŋon na, fuŋ n wose lee kɛbo ke lↄ tɛɛle man, nawolo nyi Wurubuarɛ nombia aŋmaraseŋ see ŋan ne yako daa nyiaa, 'Nyaŋ dↄↄ Wurubuarɛ waa kpila ↄ kpilala, na be kaa gyee neŋ nideli, na baa kↄlee neŋ keŋ nyi n be gyae n ka mo n nae gyↄ na boe koraŋ gba ya.' " 7Keŋte Yesu tiranↄↄ fa e nyiaa, "Wurubuarɛ nombia aŋmaraseŋ see na bese yako daa nyiaa, 'Na kɛɛse n Gbeŋgyoo Wurubuarɛ ŋon kɛɛ ya.' " 8Botↄↄ te ↄbↄnsam besewↄ mo Yesu gyu bula dinaa daale nyee dↄↄ, te ↄ wola e tɛɛle kei dↄↄ gyoorobiiri na ka kyeo pou. 9Keŋte ↄ yako Yesu nyiaa, "Akpaa n buŋ me nawↄↄ tɛɛ som maŋ na, maa mo abↄↄ kɛŋa pou fa neŋ." 10Keŋte Yesu yako e nyiaa, "Ↄbↄnsam ta lee me siaman, nawolo nyi Wurubuarɛ nombia aŋmaraseŋ see ne yako daa nyiaa, de Gbeŋgyoo Wurubuarɛ waageŋ te kaboena nyi dee buŋ e na dɛɛ som e." 11Botↄↄ te ↄbↄnsam leewↄ Yesu gyaŋ laŋ, te Wurubuarɛ kpilala kↄŋawↄ kaa kɛɛ ↄ dↄↄ. 12Yesu ke nyii nyi ba te kyaŋ Gyↄn Wurubuarɛ loŋsↄↄre ŋon tↄ deni nɛ, te ↄ besewↄ gyu Galelia tɛɛle man. 13Yesu ka lee Nasarɛte donↄↄ man nɛ, ↄ gyuuwↄ ke kyaa Kapanum donↄↄ man. Donↄↄ kei kyaa Galelia depaa nↄↄman, te ka benaa na Sebulↄn na Nafitali tɛɛlese. 14Kei yela kpene keŋ Wurubuarɛ dekpeŋkpeŋgyↄↄre Yesaya be yako see lee tɛɛle kenaŋ wose man nɛ kↄŋawↄ ampaŋ. Yesaya yakowↄ see nyiaa, 15"Ɛmɛɛ balaŋ baŋ ɛ kyaa Sebulↄn na Nafitali tɛɛlese ŋan ŋe kyaa benaa na Galelia depaa, botↄↄ keŋ balaŋ baŋ ba te yɛɛ Gyudatenawↄ ya nɛ boe nɛ, na Gyↄↄdan boo diŋgyiŋ nɛ, ɛ tei kɛbo. 16Balaŋ baŋ be doo ditiŋtɛɛ man nɛ te naa keŋmaŋee dinaa daale. Balaŋ baŋ mↄ be kyaa botↄↄ keŋ yeŋ ne di gyoori nɛ, keŋmaŋee te kↄŋ fa wↄ." 17Lee debaŋ kenaŋ te Yesu fiasɛɛ ↄ ne kolosi Wurubuarɛ nombia nyiaa, "Ɛ kyɛɛkee lee ɛ gbɛɛneŋ kumɛɛ man na ɛ ke kↄŋ Wurubuarɛ gyaŋ, nawolo nyi Wurubuarɛ gyoori keŋ ta benaa." 18Wee daale Yesu keta Galelia boo nↄↄ nↄↄ nɛ, ↄ naa Simↄn ŋon ↄ yele daale bela yɛna Pita nɛ, na ↄ naabu Anderiase na bɛɛ lↄ asawu boo keŋ man, nawolo nyi be yɛɛ kpɛɛ kyaŋarawↄ. 19Keŋte Yesu yako wↄ nyiaa, "Ɛ kaa sila maŋ, na maa yela ɛ ke yilaa balaŋ fa maŋ." 20Debokenaŋ man te be tinaa ba asawuse ŋan yela te be kaa sila Yesu. 21Ↄ ke gyu ↄ siaman kyomii nɛ, ↄ naa Sebedeo bia Gyemisi na ↄ naabu Gyↄn na baŋ na be kya Sebedeo doo degbele man bee desina ba asawuse te Yesu baake wↄ, 22debokenaŋ man te be tinaa degbele keŋ na be kya yela, te be sila Yesu laŋ. 23Keŋte Yesu kila Galelia tɛɛle keŋ pou, na ↄ na wola wↄ Gyudatena ↄsom denɛɛ man. Ↄ kolosi Wurubuarɛ nombia kpaakpaa lee Wurubuarɛ gyoori keŋ wose man, te ↄ kyↄↄ kaweese kpookpoo balaŋ wose man. 24Mena dↄↄ Yesu yele leewↄ Siria tɛɛle keŋ dↄↄ pou. Keŋte balaŋ moo kaweesetena kpookpoo, ŋgba baŋ bɛɛ wee keleuleuse na ↄtakasese na baŋ ba yenaase ba yekee nɛ kↄna e, te ↄ kyↄↄ wↄ te ↄ gberaa feliŋkumɛɛ lee baale mↄ man. 25Mena dↄↄ balaŋ burum lee Galelia, na Dekapolise tɛɛle man na Gyerusalɛm donↄↄ man na Gyudia tɛɛle man, na Gyↄↄdan diŋgyiŋ kaa sila e.

will be added

X\