Mateo 28

1Gyudatena kefɛɛfowee wↄle tɛɛ kena nebo nebo fuu nɛ, Mɛɛre ŋon ↄ ba lee Magedala na Mɛɛre balate ŋon korowↄ gyu botↄↄ keŋ bↄↄ wuu Yesu nɛ. 2Debaŋ kenaŋ nɛ tɛɛle wosiwↄ nawolo nyi de Gbeŋgyoo Wurubuarɛ kpilale te tisi lee adido kↄŋ kaa biliŋi boe keŋ see yenaŋ, te ↄ tisiwↄ kyaa ke dↄↄ. 3Na Wurubuarɛ kpilale ŋon ne ŋalakee ŋgba ↄga keŋmaale nɛ, te ↄ kegba wolosɛɛ futututu ŋgba akaralɛɛ nɛ. 4Balaŋ baŋ bɛɛ deke yebↄↄ keŋ kena Wurubuarɛ kpilale ŋon nɛ, gyakoloŋ gyoo wↄ nideli te be dↄↄwↄ ba seŋɛɛ botↄↄ ŋgba woya nɛ. 5Keŋte Wurubuarɛ kpilale ŋon yako ala baŋ nyiaa, "Ɛ na yee ya, ma gyeŋ nyi Yesu ŋon bↄↄ gyↄↄ sakaa ↄpaŋdaŋ dↄↄ nɛ yaa ɛ ne kɛo. 6Ↄ be kyaa kɛbo ya. Ↄ te fom lee woya man ŋgba mena keŋ ↄ be yako see nɛ. Ɛ kↄŋ kaa kɛɛ ↄ dedoi man, 7na ɛ ke ta bileŋbileŋ ke yako ↄ kaseela baŋ nyiaa 'Ↄ te fom lee woya man te ↄ te kyaŋ ŋon gbɛɛ ↄ ne gyu Galelia tɛɛle man. Botↄↄ te ɛ kena e. Kei yɛna nombii keŋ me dana maa yako ŋon.' " 8Keŋte ala baŋ moo gyakoloŋ yeu lee yebↄↄ keŋ gyaŋ. Mↄna yɛɛ wↄ gyoŋ te be yeuwↄ gyu be kaa yako ↄ kaseela baŋ. 9Karatetee dokoloŋ te Yesu gyaŋee na ala baŋ te ↄ doo wↄ nↄↄ nyiaa, "Wurubuarɛ waa fa ŋon wosefɛɛreŋ." Keŋte ala baŋ tuuwↄ benaa e te be tisiwↄ buŋ kyaŋ ↄ nawↄↄ som e. 10Keŋte Yesu yako wↄ nyiaa, "Ɛ na yee ya, ɛ gyu ke yako me tebia baŋ nyiaa, baa gyu Galelia tɛɛle man. Botↄↄ te baa naa maŋ." 11Debaŋ keŋ ala baŋ ne gyuu nɛ, yoonↄↄtena baŋ bee gyee yebↄↄ keŋ nɛ man baale gyuuwↄ donↄↄ man ke yako Wurubuarɛ saese kegyiise kpene kamasɛ keŋ be kↄŋ nɛ. 12Botↄↄ te Wurubuarɛ saese kegyiise na donↄↄ kegyiise baŋ gyaŋeewↄ, te be bakewↄ te be faa yoonↄↄtena baŋ bɛɛ deke yebↄↄ keŋ nɛ kↄba burum daale, 13na baa yako nyi nelim ba ke doo na, te Yesu kaseela baŋ kↄŋawↄ kaa ŋmɛɛle ↄ woo ŋon. 14Te be yako wↄ nyi akpaa Pilato de nyii nombia kɛŋa na, daa dee gyu kekolosi na e na dɛɛ lese ŋon lee nombia man. 15Mena dↄↄ yoonↄↄtena baŋ lɛɛ kↄba keŋ te be gyuuwↄ ke yɛɛ ŋgba mena keŋ kegyiise baŋ be yako wↄ nɛ. Mena nombia kɛŋa te yaasee Gyudatena tɛɛle man kaa lii na gyɛŋ. 16Mena dↄↄ Yesu kaseela kufu daale akaŋ baŋ gyuuwↄ Galelia tɛɛle man, te be gyuu bula keŋ dↄↄ Yesu ba wola wↄ nyi baa gyu nɛ. 17Botↄↄ te Yesu ka lese ↄ wose wola wↄ te be buŋawↄ som e, mↄna be man baale te lɛɛ di ya. 18Keŋte Yesu tuuwↄ benaa wↄ te ↄ yako wↄ nyiaa, "Wurubuarɛ te fa maŋ doŋ adido na tɛɛle kei pou dↄↄ. 19Mena dↄↄ ɛ gyu tɛɛle kei pou dↄↄ na ɛ kaa wola balaŋ na baa bese me kaseela. Ɛ sↄ wↄ Wurubuarɛ loŋ lee Wurubuarɛ kya ŋon na ↄ Bu ŋon na ↄ Feliŋ ŋon yele man. 20Na ɛ ka wola wↄ na baa di kpene kamasɛ keŋ mↄↄ faree ŋon nɛ dↄↄ. Te mɛɛ yako ŋon ɛ ke nyii nyiaa, me kpuɛ na ŋon debaŋ kamasɛ kelii tɛɛle kei ↄto."

will be added

X\