Mateo 27

1Tɛɛ kena nebo nebo fuu nɛ, saese kegyiise na donↄↄ kegyiise baŋ gyaŋeewↄ te be yakowↄ sɛɛ dↄŋa nyi baa ko Yesu. 2Mena dↄↄ be bake e te ba moo e gyu ka do Pilato ŋon ↄ seŋɛɛ Romantena gyoo dinaa nawↄↄ man nɛ nyiŋmaa man. 3Gyudase ŋon ↄ ba lese Yesu fa kena nyi be te bu Yesu fↄↄ nyi baa ko e nɛ, takaa e nideli te ↄ kyɛɛkee wa agyueŋ. Mena dↄↄ ↄ besena kↄba keŋ ↄ be lɛɛ Yesu nyeeman nɛ gyina kegyiise baŋ. 4Keŋte ↄ yako wↄ nyiaa, "Ma te yɛɛ nombiakumɛɛ ŋgba mↄↄ lese walaŋ ŋon dukum kamasɛ be doo ↄ man ya fa ŋon nɛ." Te kegyiise baŋ mↄ tiranↄↄ fa e nyiaa, daa be famenɛ na ŋenaŋ ya. Ŋe yɛɛ nyaŋ gbagba n nombia ŋa. 5Botↄↄ te Gyudase fuŋa kↄba keŋ lↄ wↄ Wurubuarɛ ↄsom deni dinaa keŋ man, te ↄ gyuuwↄ kado ↄ wose ŋmeleŋ. 6Keŋte saese kegyiise baŋ tↄↄsee kↄba ŋan te be yakowↄ nyiaa, "Da mmaraa bɛɛ fa daa gbɛɛ nyi dɛɛ mo kↄba kei kyakale na dↄ ↄsom deni kↄba man ya. Nawolo nyi kↄba keŋ dana ayimɛɛ." 7Keŋte kegyiise baŋ moo ba nyeeya baŋ na dↄŋa te be sɛɛwↄ nyi, baa mo kↄba kenaŋ ke lɛɛ tɛɛle saabuse maare ŋolo gyaŋ, na baa kyaa wuu ŋↄↄla botↄↄ. 8Mena dↄↄ kaa lii naŋ gyɛŋ nɛ, bɛɛ baake tɛɛle kenaŋ bo nyi fatabo tɛɛle. 9Kɛŋa pou yela Wurubuarɛ nombia ŋan ↄ be tɛɛ ↄ dekpeŋkpeŋgyↄↄre Gyeremia dↄↄ yako see nɛ kↄŋawↄ mena. Ↄ yakowↄ nyiaa, "Ba moo kↄba wolom bia sao na kufu 30 ŋan ŋe yɛɛ koya keŋ Iseraetena be dii ↄ nyeeman nɛ, 10ke lɛɛ tɛɛle saabuse maare gyaŋ ŋgba mena keŋ de Gbeŋgyoo Wurubuarɛ ba wola maŋ nɛ." 11Keŋte ba moo Yesu kaa seŋ Pilato ŋon ↄ seŋɛɛ Romantena gyoo dinaa nawↄↄ man nɛ siaman. Te Pilato bↄↄse e nyiaa, "Nyaŋ yɛna Gyudatena gyoo ŋon?" Te Yesu tiranↄↄ fa e nyiaa, "Keŋ yaa n yakowↄ nɛ." 12Mↄna debaŋ keŋ saese kegyiise na donↄↄ kegyiise ba mo nombia gyakaa Yesu dↄↄ nɛ, ↄ te gyuusu ↄ nↄↄ ya. 13Botↄↄ te Pilato bↄↄse Yesu nyiaa, "Nombia burum kɛŋa bɛɛ mo gyakaa n dↄↄ nɛ, n bee nyii yee?" 14Mↄna Yesu bɛe ↄ te gyuusu ↄ nↄↄ yako nombii dokoloŋ kooŋ gba ya. Nombii kei doo Pilato nↄↄ nideli. 15Gyudatena nyeekelɛɛwee kedi wee kamasɛ nɛ, kaboena nyi Pilato ŋon ↄ seŋɛɛ Romantena gyoo dinaa nawↄↄ man nɛ, waa tina balaŋ baŋ bↄↄ kyam tↄ deni nɛ man dokoloŋ, ŋon balaŋ benaŋ gbagba ne gyae nɛ yela fa wↄ. 16Mena debaŋ kenaŋ na Barabase ŋon ↄ yɛɛ nombiakumɛɛyɛɛre e, te balaŋ pou be nyii ↄ nombia nɛ doo deni man. 17Balaŋ dikpii keŋ ke kↄŋ kaa yilaa nɛ Pilato bↄↄse wↄ nyiaa, "Balaŋ bala kɛwↄ man na be man woŋti te ɛ ne gyae nyi maa tina yela fa ŋon. Barabase yaa Yesu ŋon bɛɛ baake e nyi Kristo nɛ?" 18Nawolo nyi na Pilato gyeŋ nyi, keŋ balaŋ baŋ ne kↄla Yesu dↄↄ te ba lese e fa. 19Pilato kekyaa ↄ ne di nombia ŋan nɛ, ↄ wɛɛle kpilawↄ kaa yako e nyiaa, "Lese n nyiŋmaase lee mena walaŋ ŋon nombiikum kamasɛ be doo ↄ man ya nɛ nombia man. Nawolo nyi nelim me doosi dosɛɛ ŋaale lee ↄ wose man na, yɛɛ maŋ gyakoloŋ te me naa diyem nideli." 20Mↄna Wurubuarɛ saese kegyiise na kegyiise akaŋ baŋ feefuwↄ do balaŋ dikpii keŋ nyi, baa sola Pilato na waa tina Barabase yela na baa ko Yesu. 21Keŋte Pilato besewↄ bↄↄse balaŋ baŋ nyiaa, "Balaŋ bala kɛwↄ man na, be man woŋti te ɛ ne gyae nyi maa tina e yela?" Te be tiranↄↄ fa nyiaa, "Tina Barabase yela fa daa." 22Keŋte Pilato besewↄ bↄↄse wↄ nyiaa, "Kenaŋ na sena te maa yɛɛ Yesu ŋon bɛɛ baake nyi Kristo nɛ?" Botↄↄ te be popou yakowↄ nyi, "Yela baa gyↄ e sakaa ↄpaŋdaŋ dↄↄ." 23Keŋte Pilato bↄↄse wↄ nyiaa, "Woŋ dukum te ↄ yɛɛwↄ?" Mↄna be sɛɛ bɛɛ fae yeesa nedoŋ nyiaa, "Yela baa gyↄ e sakaa ↄpaŋdaŋ dↄↄ." 24Pilato kena nyi balaŋ baŋ nↄↄwoya na kela e te ↄ be gyae waa tale yɛɛ kolo lee Yesu wose man ya nɛ, ↄ kyee loŋ faafo ↄ nyiŋmaase balaŋ dikpii keŋ siaman te ↄ yako wↄ nyiaa, "Maŋ nyiŋmaa be doo balee kei yeŋ man korakora ya. Ke yɛɛ ɛmɛɛ gbagba ɛ nombia ŋa." 25Keŋte balaŋ baŋ pou sɛɛwↄ yako nyiaa, "Deŋele kewↄŋ keŋ gyae ke kↄŋ lee ↄ kako wose man nɛ, dɛɛkↄŋ daa na de bia dↄↄ." 26Mena dↄↄ Pilato tinaa Barabase yela fa wↄ, te ↄ yela ba ŋmeree Yesu dambiise te ↄ moo e fa yoonↄↄtena baŋ nyi baa gyu ke gyↄ e sakaa ↄpaŋdaŋ dↄↄ. 27Keŋte Pilato yoonↄↄtena baŋ moo Yesu gyu ŋon Pilato dekpaŋalaŋ man, te be baake yoonↄↄtena akaŋ baŋ pou kaa gyaŋee kilisi Yesu. 28Be kyaŋa ↄ kegbase kpee te ba moo kegba yayam wurikyim daale ŋgba ŋan Romantena gyooneŋ na doo nɛ do e. 29Keŋte ba moo sↄↄse loo gyooro kotↄtↄↄ wuu e, te ba moo gbutu do e ↄ dunoluŋ nyiŋmaa man na bɛɛ buŋ ↄ siaman kulu e nyiaa, "Gyudatena gyoo nyaŋ na ke yɛɛ. N nyee dɛɛ wolose." 30Be tↄↄ nↄↄloŋse woli e, te be lɛo ↄ gbutu keŋ mo ŋmeree e ↄ nyee man. 31Be ke kulu e taŋ nɛ, te ba kpee kegba yayam keŋ bↄↄ mo do nɛ te ba moo ŋon gbagba wui abↄↄ do e. Te ba moo lee be kaa gyↄ e sakaa ↄpaŋdaŋ dↄↄ. 32Be ka lee debↄↄ man bee gyu nɛ, te be gyaŋee na balee ŋolo ŋon ↄ ba lee Kirene te bɛɛ baake e nyi Simↄn nɛ. Keŋte ba ŋere e nyi waa lɛɛ Yesu ↄpaŋdaŋ keŋ seele. 33Keŋte be gyuuwↄ ka gyoo botↄↄ keŋ bɛɛ baake nyi "Golgata," keŋ nawolo nyi Nyeepookoo dɛɛ nɛ. 34Botↄↄ te ba moo tee ŋaŋte daale mo kyakale na soloŋ fa Yesu nyi waa nyↄↄ. Mↄna ↄ ke daa ke kɛɛ nɛ te ↄ bɛɛwↄ nyi ↄ be nyↄↄ ya. 35Ba ke gyↄ e sakaa ↄpaŋdaŋ dↄↄ nɛ, te be kpɛlɛɛ ↄ kegbase buŋii te be lↄↄ boe ŋe dↄↄ na baa naa keŋ walaŋ kamasɛ waa nyiŋ. 36Kenaŋ wↄle nɛ, te be kyaawↄ botↄↄ bɛɛ deke e. 37Keŋte be ŋmarase nombii keŋ dↄↄ bↄↄ gyↄ e ↄpaŋdaŋ dↄↄ nɛ mataa ↄ nyee gbɛɛ nyiaa, "KEI YƐNA YESU, GYUDATENA GYOO ŊON." 38Botↄↄ te be gyↄↄ ŋmɛɛlatena bala baale sakaa ↄpaŋdaase dↄↄ kpu na Yesu. Ŋolo sakaa ↄ dunoluŋ dↄↄ te ŋolo mↄ sakaa ↄ demena dↄↄ. 39Na balaŋ baŋ bɛɛ lam botↄↄ nɛ na tee e na bee kpiisi ba nyeeya, 40na bɛɛ yako e nyiaa, "Nyaŋ ŋon n kpa n ke tekerii Wurubuarɛ ↄsom deni dinaa keŋ na n ka mo weeya atooro ma ke nɛ, lɛɛ n wose na dɛɛ kɛɛ. Akpaa nyaŋ yɛna Wurubuarɛ bu ŋon na, lɛɛ n wose na n ke tisi lee ↄpaŋdaŋ keŋ dↄↄ." 41Mena mↄ te saese kegyiise na mmaraa wolala na donↄↄ kegyiise baŋ mↄ kulu e nyiaa, 42"Ↄ ne lɛɛ balaŋ nyee, mↄna ↄ be tale lɛɛ ŋon gbagba wose ya. Ŋgba n kpa nyaŋ yɛna Iseraetena gyoo ŋon, tisi lee daŋ keŋ dↄↄ na dɛɛ lɛɛ neŋ di. 43Ↄ na mo ↄ wose lↄ Wurubuarɛ dↄↄ te ↄ ne yako nyi, 'Ŋon yɛna Wurubuarɛ bu. Akpaa Wurubuarɛ ne gyae e na, ɛ yela dɛɛ kɛɛ nyi waa lɛɛ e.' " 44Mena mↄ te nombiakumɛɛyɛɛra baŋ bↄↄ gyↄↄ wↄ sakaa ↄpaŋdaase dↄↄ kpu na e nɛ mↄ kulu e. 45Lee weese kaseŋ dɛɛ kelii ↄ ke gɛɛse nɛ, ditiŋtɛɛ kaa lɛɛ tɛɛle keŋ dↄↄ pou. 46Debaŋ kenaŋ nɛ, te Yesu fae yeesa keŋkeŋ nyiaa, "Eli, Eli lama sabatani?" Keŋ nawolo nyi, "Me Wurubuarɛ me Wurubuarɛ, weera te n lese n sia yela maŋ?" 47Balaŋ baŋ ba seŋɛɛ botↄↄ ke nyii mena nɛ be yakowↄ nyiaa, "Ɛ nyii, ↄ ne baake Elaegya." 48Debokenaŋ man te be man ŋolo yeuwↄ ka mo kolo ŋgba kokyaa keŋ gyae ke tale lɛɛ loŋ nɛ do soloŋ denyaŋesa daale man, te ↄ moo ke tooso na daŋ te ↄ gyinaa ke adido fa Yesu nyi waa nyↄↄ. 49Keŋte balaŋ akaŋ baŋ yakowↄ nyiaa, "Ɛ yela dɛɛ kɛɛ nyi Elaegya waa kↄŋ kaa lɛɛ e?" 50Keŋte Yesu besewↄ fae yeesa keŋkeŋ te ↄ kara weesi. 51Kekↄŋ mena nɛ, kanyaŋ keŋ bↄↄ mo kpase Wurubuarɛ ↄsom deni dinaa keŋ man nɛ bɛɛsewↄ kyɛɛkyɛɛ ala lee adido kaa lii ka mokↄↄ man. Tɛɛle wosiwↄ, te boya dinaana mↄ yɛlɛɛwↄ. 52Yebↄↄse gyuusuwↄ te Wurubuarɛ gyuusu ↄ balaŋ baŋ be gbɛɛneŋ tenɛɛ ↄ siaman te bↄↄ yekee nɛ, man balaŋ burum lee ba yebↄↄse man. 53Yesu kefoŋ lee yeŋ man nɛ, Wurubuarɛ balaŋ baŋ bↄↄ foŋii lee ba yebↄↄse man nɛ, gyuu Gyerusalɛm donↄↄ man ka lese ba wose wola balaŋ burum. 54Romantena yoonↄↄtena siamante ŋon na baŋ ba seŋɛɛ bɛɛ gyee Yesu nɛ kena tɛɛle kewosi na gyakoloŋ nombia ŋan be yɛɛ pou nɛ, ba wose yeŋa wↄ te be yakowↄ nyiaa, "Balee kei yɛna Wurubuarɛ bu ŋon ampaŋ." 55Na ala burum baale mↄ seŋɛɛ yenaŋ botↄↄ lemlem bɛɛ kɛɛ. Be wulaa be silana Yesu leenaŋ Galelia donↄↄ man bɛɛ kɛɛ ↄ dↄↄ. 56Ala benaŋ man baale yɛna Mɛɛre ŋon ↄ ba lee Magedala nɛ, na Gyemisi na Gyosɛfo be naa Mɛɛre, na Sebedeo bia baŋ be naa. 57Kelii balinↄↄ nɛ kↄbate ŋolo ŋon bɛɛ baake e nyi Gyosɛfo, ŋon ↄ ba lee Arimatia donↄↄ man nɛ kↄŋawↄ botↄↄ. Na ŋon mↄ yɛɛ Yesu silala baŋ man ŋolo e. 58Ↄ gyuu Pilato gyaŋ ka sola e nyi waa fa e gbɛɛ na waa mo Yesu woo ŋon ke wuu. Keŋte Pilato sɛɛwↄ nyi baa moo Yesu woo ŋon fa e. 59Keŋte Gyosɛfo moo woo ŋon, te ↄ moo akaralɛɛ wↄle wↄle daale milii e. 60Te ↄ moo e ke wuu boe bↄↄ wↄle keŋ ŋon Gyosɛfo gbagba be kare see ↄ wose nɛ man. Keŋte ↄ biliŋi boe dinaa daale tↄ yebↄↄ keŋ nↄↄ te ↄ laŋawↄ. 61Na Mɛɛre ŋon ↄ ba lee Magedala nɛ, na Mɛɛre balate ŋon baŋɛɛ botↄↄ be sia tee na yebↄↄ keŋ. 62Tɛɛ kena keŋ ke yɛɛ Gyudatena kefɛɛfowee ke nɛ, Wurubuarɛ saese kegyiise na Farasiitena baŋ gyuuwↄ ke gyaŋee Pilato dekpaŋalaŋ man. 63Keŋte be yako Pilato nyiaa, "Kegyia dɛɛ tↄↄse nyi Yesu dekarate ŋon ke kyaa keŋ nɛ ↄ yakowↄ nyiaa, weeya atoorote wↄle na waa foŋ lee yeŋ man. 64Mena dↄↄ yela be kaa deke yebↄↄ keŋ na baa gyee ke nideli kelii weeya atoorote keŋ. Na mena ya na ↄ kaseela baŋ baa yo gyu ke ŋmɛɛle e lese na baa yako nyi, ↄ foŋae lee yeŋ man. Na mena ya na, dekara alate kei gyae ka kela gyaŋgba te keŋ." 65Keŋte Pilato yako wↄ nyiaa, ɛ lese ɛmɛɛ gbagba ɛ balaŋ na baa gyu ka deke yebↄↄ keŋ nideli fa ŋon ŋgba mena keŋ baa tale nɛ. 66Mena dↄↄ be gyuuwↄ ke desina yebↄↄ keŋ tↄ nideli keŋ nyi ŋolo na ŋolo be tale tɛɛse boe keŋ lee ke nↄↄ man ya. Keŋte ba lese balaŋ nyi baa gyee yebↄↄ keŋ nideli.

will be added

X\