Mateo 25

1Yesu besewↄ gyↄ dudu fa wↄ nyiaa, "Weeya ŋenaŋ man na Wurubuarɛ gyoori keŋ gyae ke yɛɛ ŋgba, alebia kufu baŋ bↄↄ koro mo be kanease be kaa gyaŋee na alowↄle baale nɛ. 2Be man banoŋ yɛɛ ayiŋtenawↄ, te banoŋ mↄ yɛɛ siakaralatenawↄ. 3Ayiŋtena baŋ ka mo be kanease na, be ta gyem na baa mo nuŋse tela kpu na ŋan doo be kanease man nɛ ya. 4Mↄna siakaralatena baŋ dↄↄ, baŋ moo nuŋ do porontiase man tela kpu na ŋan doo be kanease man nɛ. 5Alowↄle baale ŋon te kↄŋ bileŋ ya, mena dↄↄ alebia baŋ pou moowↄ bee deŋeli te be doo dosoroŋ. 6Ke lii tɛɛ nsana nɛ te akelelee yalawↄ nyiaa, 'Alowↄle baale ŋon te kↄŋ! Ɛ lee kaa gyaŋee na e!' 7Keŋte alebia kufu baŋ pou korowↄ te be gyinaa be kanea ŋmeeseŋ ŋan. 8Botↄↄ te ayiŋtena baŋ yako siakaralatena baŋ nyiaa, 'De kanease na yekee, mena dↄↄ ɛ fa daa ɛ nuŋse ŋan kyomii.' 9Keŋte siakaralatena baŋ yako wↄ nyiaa, 'Koa de nuŋse ŋan be gyae ka yee dɛɛ fa ŋon ya.' Mena dↄↄ ɛ gyu donↄↄ man na ɛ kaa gyae ŋaale lɛɛ. 10Mↄna debaŋ keŋ ayiŋtena baŋ be lam be kaa lɛɛ nuŋse ŋan nɛ te alowↄle baale ŋon kaa gyoowↄ. Alebia banoŋ baŋ bↄↄ desina ba wose see nɛ, gyoowↄ alowↄle nↄↄkedi deni keŋ man, te be kyaŋa disim keŋ tↄ. 11Kenaŋ wↄle te alebia akaŋ baŋ mↄ kↄŋawↄ kaa gyoo. Keŋte be fae yeesa baake nyi, 'De Gbeŋgyoo toro daa.' 12Keŋte alowↄle baale ŋon yako wↄ nyiaa, 'Mɛɛ yako ŋon ɛ ke nyii nyiaa mↄↄ gyeŋ ŋon ya.' 13Botↄↄ te Yesu yako ↄ kaseela baŋ nyiaa, 'Ɛ doo ɛ wose dↄↄ nideli, nawolo nyi ɛ ba gyeŋ wee yaa debaŋ keŋ maŋ Deniwalaŋ Bu ŋon maa bese kↄŋ ya.' " 14Yesu besewↄ gyↄ dudu fa wↄ nyiaa, "Debaŋ kenaŋ man na Wurubuarɛ gyoori keŋ gyae ke yɛɛ ŋgba balee ŋon ↄ ne gyae waa gyu gbɛɛ, te ↄ be baake ↄ tewulɛɛ te ↄ be kpɛlɛɛ wa abↄↄ do wↄ be nyiŋmaa man nɛ. 15Ↄ faa walaŋ kamasɛ ŋgba mena keŋ waa tale tela nɛ. Ↄ faa ŋolo kↄba kakpoŋse anoŋ (5,000) te ↄ faa ŋolo kakpoŋse ala (2,000) te ↄ faa ŋolo mↄ kakpoŋ dokoloŋ (1,000). Keŋte ↄ korowↄ laŋ ↄ gbɛɛ keŋ. 16Tobaale ŋon ↄ be fa e kakpoŋse anoŋ nɛ, korowↄ debokenaŋ man te ↄ moo kↄba keŋ ke yɛɛ tom te ↄ nyiŋa kakpoŋse anoŋ kpu bela. 17Mena mↄ te ŋon ↄ be fa e kakpoŋse ala nɛ, nyiŋa kakpoŋse ala bela kpu. 18Mↄna tobaale ŋon bↄↄ fa e kakpoŋ dokoloŋ nɛ, korowↄ ke wula bↄↄ te ↄ moo ↄ gbeŋgyoo kↄba keŋ kewuu. 19Be gbeŋgyoo ŋon kyaawↄ botↄↄ kyare pɛte ↄ kↄŋawↄ. Ↄ ke kↄŋ nɛ te ↄ baake ↄ tewulɛɛ baŋ gyaŋee nyi baa gyoo be kↄbase ŋan man. 20Tobaale ŋon ↄ be fa e kↄba kakpoŋse anoŋ nɛ, moo kakpoŋse kufu kↄŋ te ↄ yako ↄ gbeŋgyoo ŋon nyiaa, kɛɛ kakpoŋse anoŋ te n faa maŋ mↄna me ta bese nyiŋ kakpoŋse anoŋ kpu bela. 21Keŋte ↄ gbeŋgyoo ŋon yako e nyiaa, 'Ao baale kpaakpaa anokoarete, karaŋ na keyɛɛ. N te di anokoare lee kyomii maa moo fa neŋ kei man, mena dↄↄ maa mo abↄↄ burum do n nyiŋmaa man. Kↄŋ na dee di gyoŋ keŋ mee dii nɛ.' 22Tobaale ŋon ↄ be fa e kↄba kakpoŋse ala nɛ mↄ kↄŋawↄ kaa yako e nyiaa, 'Me gbeŋgyoo, n faa maŋ kakpoŋse ala, mↄna me te nyiŋ kakpoŋse ala kpu bela.' 23Keŋte ↄ gbeŋgyoo ŋon yako e nyiaa, 'Tobaale kpaakpaa anokoarete, karaŋ na ke yɛɛ. N te di anokoare lee kyomii maa moo fa neŋ kei man, mena dↄↄ maa mo abↄↄ burum do n nyiŋmaa man. Kↄŋ na dee di gyoŋ keŋ mee dii nɛ.' 24Tobaale ŋon ↄ be fa e kakpoŋ dokoloŋ nɛ mↄ kↄŋawↄ te ↄ yako ↄ gbeŋgyoo ŋon nyiaa, 'Me gbeŋgyoo, ma gyeŋ nyi n nombia dana doŋ te botↄↄ keŋ n te duu kolo mↄ ya nɛ, botↄↄ te n ne kↄↄ. 25Me yee neŋ mena dↄↄ ma moo n kↄba keŋ ka weese bↄↄ man. Kɛɛ, n kↄba yaa, lɛɛ n woni.' 26Keŋte ↄ gbeŋgyoo ŋon yako e nyiaa, 'N yɛɛ tobaale kum na kebↄŋalete e. N gyeŋ nyi mɛɛ kↄ abↄↄ botↄↄ keŋ me te duu ya, te mee yilaa abↄↄ botↄↄ keŋ ma te ŋmatee ya na, 27weera n ta moo me kↄba ka see maŋ kↄba dɛɛsee man ya. Nafↄ ma ke kↄŋ kei na, ŋgba maa gyu ke lɛɛ keŋ na ka loŋ. Keŋte ↄ yako ↄ tewulɛɛ baŋ nyiaa, 28ɛ lɛo kↄba keŋ lee ↄ gyaŋ na ɛ ka mo kpu ŋon ↄ be nyiŋ kakpoŋse kufu nɛ. 29Nawolo nyi walaŋ ŋon ↄ dana kolo na baa kpu e na waa nyiŋ burum, te ŋon ↄ be dana ya na, kyomii keŋ koraŋ ↄ dana nɛ baa lɛo ke lee ↄ gyaŋ. 30Mena dↄↄ ɛ fuŋ tobaale ohuhoo kei ŋon ↄ be dana tↄnↄↄ ya nɛ leki ditiŋtɛɛ keŋ man. Botↄↄ te waa kyaŋ ↄ nyee wii na waa tao ↄ kela.' " 31Keŋte Yesu besewↄ yako wↄ nyiaa, "Debaŋ keŋ maŋ Deniwalaŋ Bu ŋon maa bese kↄŋ na, daa na Wurubuarɛ kpilala ne gyae la dɛɛ kↄŋ. Maa kↄŋ me gyoorobiiri man kaa kyaa me gyooro gbeli keŋ dↄↄ. 32Tɛɛle kei balaŋ pou baa kaa yilaa me gyaŋ, na maa kpase be man akpeŋ ala ŋgba mena keŋ wonembia kɛɛlere ne kpase asoose lee namense man nɛ. 33Maa mo namense baŋ see me dunoluŋ dↄↄ, na maa mo asoose baŋ see ma demena dↄↄ. 34Botↄↄ te maŋ gyoo ŋon maa yako baŋ be kyaa ma dunoluŋ dↄↄ nɛ nyiaa, 'Ɛmɛɛ baŋ me kya be hiraa ŋon. Ɛ kↄŋ kaa kyaa Wurubuarɛ gyoori keŋ ↄ be wulaa desina see ŋon leenaŋ debaŋ keŋ ↄ be yɛɛ tɛɛle kei nɛ man. 35Nawolo nyi debaŋ keŋ tanam na ko maŋ na, ɛ faa maŋ weenɛɛ me diiwↄ. Debaŋ keŋ loŋboaneŋ na ko maŋ na ɛ faa maŋ loŋ me nyↄↄwↄ. Debaŋ keŋ me yɛɛ ŋↄↄle e na, ɛ lɛɛ maŋ gyu ya akpaŋalaŋse man, 36debaŋ keŋ me dↄŋɛɛ diteŋteli na, ɛ faa maŋ abↄↄ ma doowↄ. Debaŋ keŋ mɛɛ wee na ɛ kaa kɛɛ me dↄↄ, debaŋ keŋ bↄↄ kyaŋ maŋ ketↄ deni na, ɛ ka doo maŋ nↄↄ.' 37Keŋte mena balaŋ kɛwↄ baŋ be gbɛɛneŋ tenɛɛ Wurubuarɛ siaman nɛ, baa bↄↄse gyoo ŋon nyiaa, 'De gbeŋgyoo, woromↄ te de naa neŋ nyi tanam na ko neŋ te de faa neŋ weenɛɛ, yaa loŋboaneŋ na ko neŋ te de faa neŋ loŋ n nyↄↄwↄ. 38Woromↄ te de naa neŋ nyi n yɛɛ ŋↄↄle te de lɛɛ neŋ gyu da akpaŋalaŋse man, yaa n dↄŋɛɛ diteŋteli te de faa neŋ abↄↄ n doowↄ? 39Woromↄ te de naa neŋ nyi n na wee, yaa ba te kyaŋ neŋ ketↄ deni te de kaa doo neŋ nↄↄ?' 40Botↄↄ te maŋ gyoo ŋon maa tiranↄↄ fa wↄ nyiaa, 'Ampaŋ yaa mɛɛ yako ŋon nyiaa, kpene kamasɛ keŋ ɛ be yɛɛ fa me balaŋ kɛwↄ man kemaasabii koraŋ na, maŋ yaa ɛ yɛɛwↄ fa!' 41Botↄↄ te maa yako baŋ be kyaa ma demena dↄↄ nɛ nyiaa, 'Ɛ seŋ lee me gyaŋ, ɛmɛɛ baŋ Wurubuarɛ be falaa ŋon nyi ya gyu ka gyoo boalaŋ degyapaa keŋ ↄ be desina see fa ↄbↄnsam na ↄ kpilala baŋ nɛ man. 42Nawolo nyi tanam koo maŋ na, ɛ te fa maŋ weenɛɛ ya, loŋboaneŋ koo maŋ na ɛ te fa maŋ loŋ ya. 43Debaŋ keŋ me yɛɛ ŋↄↄle e na ɛ ta mo maŋ gyu ya akpaŋalaŋse man ya. Me tɛɛwↄ diteŋteli na, ɛ te fa maŋ kolo maa do ya. Ma weewↄ mↄna ɛ te kaa do maŋ nↄↄ ya, te be kyaŋa maŋ ketↄ deni, mↄna ɛ te kaa do maŋ nↄↄ ya.' 44Botↄↄ te balaŋ baŋ baa bↄↄse maŋ gyoo ŋon nyiaa, 'De gbeŋgyoo woromↄ te de naa neŋ nyi tanam na ko neŋ, yaa loŋboaneŋ na ko neŋ, yaa n yɛɛ ŋↄↄle e yaa n dↄŋ diteŋteli yaa n weewↄ yaa be kyaŋa neŋ ketↄ deni te da te kyↄ neŋ ya?' 45Keŋte maa tiranↄↄ fa wↄ nyiaa, ampaŋ yaa mɛɛ yako ŋon ɛ ke nyii nyiaa, 'Kpene keŋ ɛ be bɛɛ ɛ te yɛɛ fa me balaŋ kɛwↄ man kemaasabii koraŋ ya nɛ, na maŋ yaa ɛ bɛɛwↄ ɛ te yɛɛ fa ya.' 46Botↄↄ te baa mo balaŋ benaŋ gyu botↄↄ keŋ baa naa diyem kekpaakekpaa nɛ, mↄna balaŋ baŋ be gbɛɛneŋ tenɛɛ Wurubuarɛ siaman nɛ dↄↄ, baa nyiŋ nyeedoŋ kekpaakekpaa."

will be added

X\