Mateo 22

1Yesu besewↄ kolosi fa balaŋ baŋ aduya man nyiaa, 2"Wurubuarɛ gyoori keŋ yɛɛ ŋgba gyoo ŋon ↄ ba do kesaa fa ↄ bu ŋon ↄ ba kpeo alo nɛ. 3Keŋte ↄ kpila ↄ tewulɛɛ nyiaa, baa gyu ke baake balaŋ baŋ ↄ be lↄ yele baake wↄ nɛ nyi baa kↄŋ na be kaa di, mↄna be bɛe ba te kↄŋ ya. 4Mena dↄↄ ↄ besewↄ kpila ↄ tewulɛɛ wↄlɛɛ baale bela nyiaa, ɛ gyu ke yako balaŋ baŋ mↄↄ lↄ yele baake wↄ nɛ nyiaa, 'Ɛ kↄŋ, ma te taŋ kpene kamasɛ. Be ta koe me nunkyue baala na me wonembia baŋ be dana nuŋ nɛ, te ba te yɛɛ kpene kamasɛ mↄ taŋ. Ɛ kↄŋ alowↄle keŋ tɛɛ na ɛ kaa di.' 5Mↄna balaŋ baŋ ↄ be lↄ yele baake nɛ ta mo ↄ nombia ŋan yɛɛ kolo ya. Kei da koro na ↄ te laŋ ↄ wↄↄ, kei mↄ da koro na ↄ te laŋ ↄ tom man. 6Balaŋ akaŋ baŋ kyaŋa gyoo ŋon tewulɛɛ baŋ, te be tuku wↄ te ba koe wↄ. 7Mena dↄↄ gyoo ŋon gyeŋa baŋ nideli te ↄ kpila ↄ yoonↄↄtena te be ka koe balaŋ baŋ bↄↄ koe ↄ tewulɛɛ baŋ nɛ, te ba too be donↄↄ keŋ mↄ. 8Keŋte gyoo ŋon baake ↄ tewulɛɛ baŋ bↄↄ kaa nɛ te ↄ yako wↄ nyiaa, 'Ba te saa ma alowↄle weenɛɛ ŋan taŋ, mↄna balaŋ baŋ mↄↄ lↄ yele baake wↄ nɛ, ba tekaboena nyi baa kↄŋ kaa di ya. 9Mena dↄↄ ɛ ŋere gyoo donↄↄ keŋ abↄnterese man, na ɛ ke baake walaŋ kamasɛ ŋon ɛ kena nɛ, nyi waa kↄŋ alowↄle keŋ tɛɛ.' 10Mena dↄↄ ↄ tewulɛɛ baŋ gyoowↄ donↄↄ keŋ man te be baake balaŋ baŋ pou bↄↄ naa nɛ. Be baake balaŋ kpaakpaa nyibaŋ na balaŋ kumɛɛ pou, te balaŋ kaa wulu alowↄle dekpaŋalaŋ keŋ man. 11Mↄna gyoo ŋon ke kↄŋ kaa gyoo dekpaŋalaŋ keŋ man ↄ kaa kɛɛ balaŋ baŋ pou bↄↄ baake nɛ, ↄ naa baale ŋolo kyaa be man keŋ ↄ ba doona alowↄletɛɛ kegba keŋ kaboena nyi walaŋ kamasɛ waa do nɛ ya. 12Keŋte gyoo ŋon bↄↄse e nyiaa, 'Me gyoo, sena te n yɛɛwↄ kↄŋ kɛbo keŋ n ba doona alowↄletɛɛ kegba ya?' Mↄna baale ŋon te tale tiranↄↄ fa e ya. 13Botↄↄ te gyoo ŋon yako ↄ tewulɛɛ baŋ nyi, 'Ɛ bake e ↄ nyiŋmaase na ↄ nawↄↄ, na ɛ ke fuŋ e leki ditiŋtɛɛ man. Botↄↄ te waa kyaŋ ↄ nyee wii na waa naa diyem nideli.' 14Keŋte Yesu yako wↄ nyiaa, Wurubuarɛ baake balaŋ burum, mↄna balaŋ kyomii te ↄ lesewↄ lee be man." 15Keŋte Farasiitena baŋ korowↄ lee yenaŋ gyu ke bake Yesu nyeeman, mena keŋ baa kaa teese ↄ nↄↄman na baa mo ŋon gbagba ↄ nↄↄwoya kyaŋ e. 16Mena dↄↄ be kpila be kaseela baŋ man baale kpu na gyoo Herode balaŋ gyu Yesu gyaŋ. Keŋte be yako e nyiaa, "De Gbeŋgyoo, da gyeŋ nyi n nombia doo na ŋe gbɛɛ, te n na wola balaŋ Wurubuarɛ gbɛɛneŋ kpaakpaa ŋan bo na anokoare. Da gyeŋ nyi ŋolo be tale beo neŋ ya, nawolo nyi n bɛɛ kɛɛ balaŋ siaman ya. 17Mena dↄↄ yako daa nya agyueŋ. Dei nyi dɛɛ tↄ lempoo fa Romantena gyoo dinaa ŋon, yaa de na tↄↄ ya?" 18Mↄna Yesu kena ba agyueŋ kumɛɛ ŋan nɛ ↄ yako wↄ nyiaa, "Ɛmɛɛ baŋ ɛ na beo ɛ wose, woŋ dↄↄ te ɛ ne gyae ɛ ka teese me nↄↄman. 19Ɛ mo kↄbabii keŋ ɛ na mo tↄ lempoo nɛ kↄŋ maa kɛɛ." Keŋte ba moo kↄbabii keŋ daale kↄna e. 20Keŋte ↄ bↄↄse wↄ nyiaa, "Amↄte nyee na ↄ yele gyakaa la ke dↄↄ?" 21Botↄↄ te be tiranↄↄ nyiaa, "Romantena gyoo dinaa ŋon." Mena dↄↄ Yesu yako wↄ nyiaa, "Mena na kpene keŋ yɛɛ Gyoo dinaa ŋon wui na ɛ mo fa e, te kpene keŋ yɛɛ Wurubuarɛ mↄ wui na ɛ mo fa e." 22Be ke nyii Yesu nↄↄwoya kɛŋa nɛ, doo be nↄↄ. Mena dↄↄ be laŋawↄ tina e yela. 23Mena wee kenaŋ ke nɛ, Sadukiitena baŋ bɛɛ yako nyi yeŋ wↄle kefoŋ be kyaa ya nɛ kↄŋawↄ Yesu gyaŋ kaa bↄↄse e nyiaa, 24"De Gbeŋgyoo, de naana Mosesi ŋmarase mmaraa kei fa daa nyi, akpaa ŋolo da yem tina ↄ wɛɛle yela te be ta lolo bia ya na, kaboena nyi ↄ naabu waa yala lialo ŋon na baa lola bia ↄ kegyia ŋon yele man. 25Kↄŋawↄ nyi naa bia nyetooro baale kyaawↄ te kegyia ŋon yala alo te ↄ yeŋawↄ. Mↄna keŋ be ta lola bia dↄↄ ya nɛ, te balate ŋon mↄ yala alo ŋon. 26Ↄ naabu balate na batoorote mↄ yeŋawↄ yela alo ŋon mena keŋ be ta lola bia ya. Balaŋ nyetooro kɛwↄ pou yala alo kei te ba yekeewↄ, mↄna be man ŋolo na alo ŋon ta lolo ya. 27Kenaŋ wↄle nɛ, te alo ŋon mↄ yeŋawↄ. 28Mena dↄↄ wee keŋ Wurubuarɛ waa gyuusu balaŋ baŋ pou bↄↄ yem nɛ lee yeŋ man na, baala nyetooro kɛwↄ baŋ bↄↄ yala alo kei gyaŋee nɛ, be man woŋti te alo ŋon waa yɛɛ ↄ wɛɛle?" 29Keŋte Yesu tiranↄↄ fa wↄ nyiaa, "Ɛ ta yoo, nawolo nyi ɛ ba gyeŋ Wurubuarɛ nombia aŋmaraseŋ see ŋan ya, te ɛ ba gyeŋ Wurubuarɛ doŋ mↄ ya. 30Nawolo nyi wee keŋ Wurubuarɛ waa gyuusu balaŋ lee yeŋ man nɛ, baala be gyae baa yala ya, te bↄↄ gyae baa mo ala mↄ fa yale ya. Be popou baa yɛɛ ŋgba Wurubuarɛ kpilala baŋ be kyaa adido nɛ. 31Ɛ te kala ta Wurubuarɛ nombia aŋmaraseŋ see ŋan, na ɛ kena kpene keŋ Wurubuarɛ be yako lee kefoŋ lee yeŋ man wose man nombia yee? Ↄ yakowↄ nyiaa, 32'Maŋ yɛna Aberaham na Asiki na Gyekↄpo Wurubuarɛ.' Wurubuarɛ te yɛɛ woya Wurubuarɛ e ya, mↄna ↄ yɛɛ balaŋ baŋ be kyaa na be sia nɛ Wurubuarɛ e." 33Balaŋ dikpii keŋ ke nyii nombia kɛŋa nɛ, ↄ kawola keŋ doo be nↄↄ. 34Farasiitena baŋ ke nyii nyi Yesu ta mo ↄ nyansa di Sadukiitena baŋ dↄↄ nɛ, be popou kaa gyaŋeewↄ debodokoloŋ. 35Keŋte be maŋ ŋolo ŋon ↄ yɛɛ mmaraa wolale e nɛ, kↄŋawↄ ↄ kaa teese Yesu nↄↄman te ↄ bↄↄse e nyiaa, 36"De Gbeŋgyoo, Wurubuarɛ mmaraase ŋan pou na, woŋti kela la?" 37Botↄↄ te Yesu tiranↄↄ fa e nyiaa, " 'Mo n konↄↄ pou na n wose pou na nya agyueŋ pou gyae n Gbeŋgyoo Wurubuarɛ.' 38Kei yɛna mmaraa siamante na keŋ ka kela ŋe popou. 39Alate keŋ mↄ yɛɛ ŋgba gyaŋgbate keŋ nɛ. Keŋ yɛna nyi, 'Gyae n dↄↄ ŋgba nyaŋ gbagba n wose nɛ.' 40Mosesi mmaraase ŋan pou na Wurubuarɛ akpeŋkpeŋgyↄↄra baŋ pou nombia ŋan bↄↄ wolo nɛ, seŋae mmaraase ala kɛŋa dↄↄ." 41Farasiitena baŋ ke yilaa debodokoloŋ nɛ, Yesu bↄↄse wↄ nyiaa, 42"Sena te ɛ na gyueŋ lee nyeelɛɛre ŋon Wurubuarɛ be yako see nyi waa kↄŋ nɛ wose man? Ↄ yɛɛ amↄte ↄ naanabii e?" Keŋte be tiranↄↄ nyiaa, "Ↄ yɛɛ gyoo Defidi ↄ naanabii e." 43Keŋte Yesu bↄↄse wↄ nyiaa, "Akpaa mena na, weera dↄↄ te Wurubuarɛ feliŋ ŋon yela gyoo Defidi baake nyeelɛɛre ŋon Wurubuarɛ be yako see nyi waa kↄŋ nɛ nyi me 'Gbeŋgyoo?' Gyoo Defidi yakowↄ nyiaa, 44'De Gbeŋgyoo Wurubuarɛ ŋon yako me Gbeŋgyoo nyi, tisi kyaa me dunoluŋ dↄↄ, kelii debaŋ keŋ maa mo n kↄlala baŋ do n tɛɛ.' 45Akpaa nyi gyoo Defidi baake nyeelɛɛre ŋon nyi ↄ 'Gbeŋgyoo' na, kenaŋ na sena te nyeelɛɛre ŋon waa bese gyoo Defidi ↄ naanabii?" 46Be man ŋolo te tale tiranↄↄ fa Yesu ya. Te lee mena wee kenaŋ ne gyu mↄ na, ŋolo te tale gyↄ ↄ konↄↄ bↄↄse e nombii daale bela ya.

will be added

X\