Mateo 21

1Yesu na ↄ kaseela ka benaa Gyerusalɛm donↄↄ, te be kelii Bɛtifagi donↄↄ keŋ ke kyaa oliifi bula keŋ dↄↄ nɛ, ↄ kpila ↄ kaseela bala, 2te ↄ yako wↄ nyiaa, "Ɛ gyu donↄↄ keŋ kyaa ɛ siaman nɛ man. Ɛ gyoo ke man pɛ nɛ, ɛ kena afurum kpaŋɛɛ na ↄ bu seŋɛɛ ↄ gyaŋ. Ɛ booli wↄ na ɛ ka mo wↄ kↄna maŋ. 3Akpaa ŋolo de bↄↄse ŋon nombii daale nɛ, ɛ yako e nyiaa, 'De Gbeŋgyoo Yesu ne gyae na wↄ.' Ɛ yako mena nɛ, waa tina wↄ yela fa ŋon debokenaŋ man." 4Mena nombia kɛŋa pou kↄŋawↄ mena, te yela Wurubuarɛ nombia aŋmaraseŋ see ŋan ↄ be tɛɛ ↄ dekpeŋkpeŋgyↄↄre dↄↄ yako nɛ, kↄŋawↄ ampaŋ. 5Ↄ yakowↄ nyiaa, "Ɛ yako Gyerusalɛmtena nyiaa, 'Ɛ kɛɛ! Ɛ gyoo ne kↄŋ ɛ gyaŋ. Ↄ te yↄkↄse ↄ wose, te ↄ kyaa afurum dↄↄ. Ↄ kyae afurum bu dↄↄ ↄ ne kↄŋ.' " 6Keŋte Yesu kaseela baŋ gyuuwↄ ke yɛɛ ŋgba mena keŋ ↄ be yako wↄ nɛ. 7Ba moo afurum ŋon na ↄ bu kↄŋ, te ba moo be kanyaŋse gyakaa be dↄↄ, te Yesu gyeŋawↄ kyaa. 8Balaŋ burum fɛlɛɛ be kanyaŋse lↄ gbɛɛnaa keŋ man, te baale mↄ kɛrɛɛ daase tombia na ŋe faareŋse lↄ gbɛɛnaa man fa e. 9Balaŋ burum baŋ be dↄŋɛɛ Yesu siaman, na baŋ be dↄŋɛɛ ↄ wↄle nɛ pou fiasɛɛ bɛɛ fae yeesa nyiaa, "Gyoo Defidi ↄ naanabii, lɛɛ daa! Ɛ fa dɛɛ lese walaŋ ŋon ↄ ne kↄŋ de Gbeŋgyoo Wurubuarɛ yele man nɛ yele. Wurubuarɛ ŋon n kyaa adido, lɛɛ daa!" 10Yesu ke kↄŋ kaa gyoo Gyerusalɛm donↄↄ man nɛ, donↄↄ keŋ pou siŋiiwↄ te be bↄↄse dↄŋa nyiaa, "Walaŋ woŋti yɛna kei?" 11Keŋte balaŋ baŋ tiranↄↄ nyiaa, "Kei yɛna Yesu, Wurubuarɛ dekpeŋkpeŋgyↄↄre ŋon ↄ ba lee Nasarɛte donↄↄ keŋ ke kyaa Galelia tɛɛle man nɛ." 12Yesu gyuu Wurubuarɛ ↄsom deni dinaa keŋ dekpaŋalaŋ man, te ↄ kenaawↄ nyi balaŋ ne di kebu botↄↄ. Keŋte ↄ gegi balaŋ baŋ bɛɛ yↄↄ abↄↄ na baŋ bɛɛ lɛɛ abↄↄ botↄↄ nɛ pou. Ↄ besenaa balaŋ baŋ bɛɛ yɛlɛɛ kↄba nɛ tebuluse buŋii, te ↄ tɛɛse balaŋ baŋ bɛɛ yↄↄ awuluŋna nɛ mↄ gbelɛɛ lↄ. 13Keŋte ↄ yako wↄ nyiaa, "Wurubuarɛ nombia aŋmaraseŋ see ne yako daa nyiaa, Wurubuarɛ kpa, 'Me deni gyae ke yɛɛ botↄↄ keŋ baa fane,' mↄna ɛmɛɛ ta besena ke yɛɛ ŋmɛɛlatena dɛɛgyaŋee." 14Siayɛlɛɛsatena na ↄtakasese kↄŋawↄ ↄ gyaŋ Wurubuarɛ ↄsom deni dinaa keŋ man botↄↄ, te ↄ kyↄↄ wↄ be kaweese pou. 15Mↄna saese kegyiise na mmaraa wola baŋ kena gyakoloŋ nombia ŋan Yesu be yɛɛ, na mena keŋ bia ne fae yeesa Wurubuarɛ ↄsom deni dinaa keŋ man nyiaa, "Gyoo Defidi ↄ naanabii lɛɛ daa" nɛ, ba gyeŋa baŋ Yesu dↄↄ. 16Keŋte be bↄↄse Yesu nyiaa, "N ne nyii nombia ŋan bia baŋ ne yako?" Te Yesu tiranↄↄ fa wↄ nyiaa, "Ayi, mee nyii." Keŋte ↄ bↄↄse wↄ nyiaa, "Ɛ te kala ta na ɛ kena kpene keŋ Wurubuarɛ nombia aŋmaraseŋ see ŋan ne yako nɛ yee? Ba te ŋmarase see nyiaa, 'Bia buruburu na kyokyoose te n lesewↄ see nyi baa lese n yele' " 17Keŋte Yesu leewↄ be gyaŋ donↄↄ keŋ man, te ↄ gyuuwↄ Bɛtani donↄↄ man, te ↄ doowↄ botↄↄ. 18Tɛɛ kena nebo nebo fuu keŋ Yesu ba bese ↄ wↄle ↄ ne kↄŋ Gyerusalɛm donↄↄ man nɛ, na tanam na ko e. 19Botↄↄ te ↄ naa fiigi daŋ daale seŋɛɛ gbɛɛnaa nↄↄman, te ↄ kpasewↄ gyu ke tɛɛ nyi mberem waa nyiŋ ke bia ŋaale di. Mↄna ↄ te nyiŋ bii dokoloŋ na dokoloŋ ya. Ke yɛɛ faareŋse wolowolo bo. Botↄↄ te Yesu falaa daŋ kenaŋ nyiaa, "N be gyae n ka tekaa se bii na bii bela ya." Debokenaŋ man te fiigi daŋ keŋ botowↄ. 20Ↄ kaseela baŋ kena mena nɛ, doo be nↄↄ te be bↄↄse e nyiaa, "Kↄŋaa sena te fiigi daŋ keŋ botowↄ karatetee dokoloŋ mena?" 21Keŋte Yesu yako wↄ nyiaa, "Mɛɛ yako ŋon ɛ ke nyii nyiaa, akpaa ɛ lɛɛ maŋ di nideli te ɛ te lɛɛ aŋmaareŋ ya nɛ, na kpene keŋ be kↄŋ fiigi daŋ kei dↄↄ nɛ kaageŋ te ɛ ke tale yɛɛ ya. Mↄna ɛ ke tale yako bula kei koraŋ nyiaa, 'Koro ke yala ɛpo man' te ke gyae ke kↄŋ mena. 22Nyi akpaa ɛ lɛɛ maŋ di nɛ, kpene kamasɛ keŋ ɛ ke fane bↄↄse Wurubuarɛ nɛ, ɛ nyiŋmaa gyae ke kaŋ ke." 23Keŋte Yesu besewↄ kↄŋ Wurubuarɛ ↄsom deni dinaa keŋ man, te ↄ kɛɛ wola wↄ Wurubuarɛ nombia ŋan nɛ, saese kegyiise na donↄↄ kegyiise kↄŋawↄ ↄ gyaŋ kaa bↄↄse e nyiaa, "Doŋ woŋti yaa n dana n ne yɛɛ mena abↄↄ kɛŋa pou? Amↄte faa na neŋ mena doŋ kenaŋ?" 24Botↄↄ te Yesu tiranↄↄ fa wↄ nyiaa, "Maŋ mↄ ne gyae maa bↄↄse ŋon nombii dokoloŋ. Nyi akpaa ɛ tiranↄↄ fa maŋ nɛ kenaŋ na maŋ mↄ maa wola ŋon doŋ keŋ me dana mɛɛ yɛɛ mena abↄↄ kɛŋa pou. 25Gyↄn Wurubuarɛ loŋkesↄ keŋ ↄ be sↄ balaŋ nɛ, ka lee aleŋ? Ka lee Wurubuarɛ gyaŋ yaa balaŋ gyaŋ?" Botↄↄ te ba gyoo nombia ŋan man te be bↄↄse dↄŋa nyiaa, "Woŋ te dɛɛ yako? 'Akpaa de yako nyi ka lee Wurubuarɛ gyaŋ na, waa bↄↄse daa nyi woŋ dↄↄ te da te lɛɛ Gyↄn nombia ŋan di ya?' 26Te akpaa de yako nyi ka lee balaŋ gyaŋ na, dee yee balaŋ burum kɛwↄ mↄ. Nawolo nyi be popou ne lɛɛ di nideli nyi Gyↄn yɛɛ Wurubuarɛ dekpeŋkpeŋgyↄↄre e." 27Mena dↄↄ be tiranↄↄ fa Yesu nyiaa, "Dↄↄ gyeŋ ya." Keŋte Yesu mↄ yako wↄ nyiaa, "Akpaa mena na, maŋ mↄ ba wola ŋon me doŋ keŋ da lee ya." 28Keŋte Yesu besewↄ gyↄ dudu fa wↄ nyiaa, "Balee ŋolo kyaawↄ keŋ ↄ dana bia baala bala. Wee daale nɛ, ↄ gyuu ↄ bu kegyia ŋon gyaŋ ke yako e nyiaa, 'Me bu, mɛɛ gyae nyi gyɛŋ n ke gyu me wↄↄman ke yɛɛ tom fa maŋ.' 29Keŋte ↄ bu ŋon yako e nyiaa, mↄↄ gyae maa gyu ya, mↄna wↄle wↄle nɛ, ↄ kaa kyɛɛkee wa agyueŋ te ↄ gyuuwↄ. 30Keŋte balee ŋon gyuuwↄ ↄ bu kemaasa ŋon gyaŋ ke yako ŋon mↄ mena ke. Ↄ bu kemaasa ŋon sɛɛwↄ nyi, 'Yoo taata me nyiiwↄ, maa gyu,' mↄna ↄ te gyu ya. 31Botↄↄ te Yesu yako wↄ nyiaa, ɛ wola maŋ ya agyueŋ. Bia bala kɛwↄ man na, woŋti yɛɛna ↄ kya ŋon kegyaebii? Te balaŋ baŋ tiranↄↄ fae e nyiaa, 'Bu kegyia ŋon.' Keŋte Yesu yako wↄ nyiaa, 'Mɛɛ yako ŋon ɛ ke nyii nyiaa, lempoolɛɛra na kafoŋtena te taŋgbɛɛ ŋon bɛɛ gyoo Wurubuarɛ gyoori keŋ man.' 32Nawolo nyi Gyↄn Wurubuarɛ loŋsↄↄre ŋon kↄŋawↄ kaa wola ŋon gbɛɛ kpaakpaate keŋ ɛ ka mo, mↄna ɛ te lɛɛ e di ya. Lempoolɛɛra na kafoŋtena baŋ dↄↄ, be lɛɛ e di. Kenaŋ wↄle ɛ kena mena koraŋ nɛ, ɛ te kyɛɛkee ya agyueŋ na ɛ ke lɛɛ e di ya." 33Keŋte Yesu besewↄ yako wↄ nyiaa, "Ɛ nyii dudu daale bela. Wↄↄfarale ŋolo fara wↄↄ te ↄ duu daasebia ŋaale ŋan ŋe yɛɛ ŋgba akutuse te bɛɛ baake ŋa nyi gerepo nɛ. Ↄ dii abaŋ kilisi wↄↄ keŋ, te ↄ wula bↄↄ keŋ baa sara daasebia ŋan ke man na baa lese ŋa loŋ lee ŋe man nɛ. Te ↄ baŋa deni dↄↄloŋ dↄↄloŋ daale, keŋ walaŋ ke kyaa ke man na waa gyee wↄↄ kenaŋ. Te ↄ moo wↄↄ keŋ do paasetena baale nyiŋmaa man nyi baa kɛɛ ke dↄↄ, te ↄ korowↄ laŋ gbɛɛ. 34Debaŋ kelii nyi baa kↄ daasebia ŋan nɛ, ↄ kpila ↄ tewulɛɛ gyu paasetena baŋ gyaŋ nyi baa fa e ↄ wui nↄↄ. 35Botↄↄ te paasetena baŋ kyaŋa ↄ tewulɛɛ baŋ, te be tuku ŋolo te ba koo ŋolo te be fuŋii ŋolo mↄ boya. 36Keŋte wↄↄte ŋon besewↄ kpila ↄ tewulɛɛ baŋ ba boe kela gyaŋgba nyibaŋ baŋ gyu paasetena baŋ gyaŋ, mↄna be yɛɛ baŋ mↄ mena ke. 37Kenaŋ wↄle nɛ, wↄↄte ŋon kpila ŋon gbagba ↄ bu te ↄ yakowↄ nyiaa, 'Mberem ŋon na baa bu e.' 38Mↄna paasetena baŋ kena ↄ bu ŋon nɛ be yako dↄŋa nyiaa, 'Kei yɛna bu ŋon waa kaa di ↄ kya abↄↄ ŋan. Ɛ yela dɛɛ ko e na abↄↄ ŋan nafↄ waa di nɛ ka bese de wui!' 39Mena dↄↄ be wↄŋee e lee wↄↄ keŋ man ka ko. 40Botↄↄ te Yesu bↄↄse wↄ nyiaa, Mena dↄↄ wee keŋ wↄↄte ŋon de kↄŋ na, woŋ te waa yɛɛ paasetena baŋ?" 41Keŋte be tiranↄↄ fa e nyiaa, "Waa koe mena balaŋ kumɛɛ benaŋ pou, na waa mo wↄↄ keŋ do paasetena wↄlɛɛ baŋ debaŋ de lii na, baa fa e ↄ wui nↄↄ nɛ nyiŋmaa man." 42Botↄↄ te Yesu bↄↄse wↄ nyiaa, "Ɛ te kala ta Wurubuarɛ nombia aŋmaraseŋ see ŋan na ɛ kena kpene keŋ ne yako nɛ yee? Be ŋmarasewↄ see nyiaa, 'Boe keŋ deni mmaraa baŋ be bɛɛ nɛ, keŋ kaa bese na mokↄↄ kasee boe keŋ ne yeli deni keŋ ne yɛɛ doŋ. De Gbeŋgyoo Wurubuarɛ yɛɛ la te kↄŋawↄ mena, te ke yɛɛ kpene keŋ ke dana gyakoloŋ de siaman' " 43Keŋte Yesu besewↄ yako wↄ nyiaa, "Mena dↄↄ mɛɛ yako ŋon ɛ ke nyii nyiaa, Wurubuarɛ waa lɛo ↄ gyoori keŋ lee ɛ gyaŋ, na waa mo fa balaŋ baŋ baa yɛɛ ↄ kegyaebii nɛ. 44Walaŋ kamasɛ ŋon ↄ yale mena boe kei dↄↄ na, gyae ke keretii e kpetekpetekpete. Te nyaŋ walaŋ kamasɛ ŋon mↄ boe keŋ de yale n dↄↄ na, nyaŋ ke pɛtɛɛ." 45Saese kegyiise na Farasiitena baŋ ke nyii Yesu aduya kɛŋa nɛ, ba gyeŋawↄ nyi ba wose man nombia yaa ↄ ne yako. 46Mena dↄↄ be gyae gbɛɛ keŋ baa mo kyaŋ e, mↄna be yee balaŋ dikpii keŋ. Nawolo nyi bɛɛ lɛɛ di nideli nyi Yesu yɛɛ Wurubuarɛ dekpeŋkpeŋgyↄↄre e.

will be added

X\