Mateo 20

1Keŋte Yesu gyↄↄ dudu lese nombia ŋan ↄ be yako nɛ man wola wↄ nyiaa, "Wurubuarɛ gyoori keŋ yɛɛ ŋgba wↄↄfarale ŋon, ↄ ba koro nebo nebo fuu gyu ↄ ne gyae paasetena na be kaa yɛɛ tom ↄ wↄↄman nɛ. 2Balee ŋon na paasetena baŋ pou ke sɛɛ wee dokoloŋ koya dↄↄ nɛ, ↄ moo wↄ gyu ↄ wↄↄ keŋ man nyi ba ke yɛɛ tom. 3Kegyↄ debaŋ kadaale nɛ, ↄ leewↄ gyu abↄntere man te ↄ kenaa tewulɛɛ baale mↄ seŋɛɛ yakaa bↄↄ ne yɛɛ kolo ya. 4Keŋte ↄ yako wↄ nyiaa 'Ɛmɛɛ mↄ ɛ gyu me wↄↄ keŋ man ke yɛɛ tom. Maa tↄ ŋon kom keŋ kaboena nyi maa tↄ ŋon nɛ.' " 5Mena dↄↄ baŋ mↄ gyuuwↄ ↄ wↄↄ keŋ man. Weese ka seŋ dɛɛ, na ↄ ke gɛɛse nɛ, ↄ besewↄ ka mo balaŋ gyu ↄ wↄↄ keŋ man bela. 6Ke lii balinↄↄ weese ŋgba debaŋ anoŋ nɛ, ↄ besewↄ gyu kena balaŋ baale mↄ seŋɛɛ yakaa. Keŋte ↄ bↄↄse wↄ nyiaa, "Weera te gyɛŋ pou ɛ seŋɛɛ kɛbo yakaa ɛ bɛɛ yɛɛ kolo ya?" 7Keŋte balaŋ baŋ tiranↄↄ nyiaa, "Nawolo nyi ŋolo te fa daa tom dɛɛ yɛɛ ya." Botↄↄ te balee ŋon yako wↄ nyiaa, "Kenaŋ na ɛmɛɛ mↄ ɛ gyu ke yɛɛ tom me wↄↄman." 8Ke lii balinↄↄ nɛ, wↄↄte ŋon yako ↄ tewulɛɛ baŋ man kegyia ŋon nyiaa, "Baake paasetena baŋ na n ke tↄ wↄ kom. Taŋgbɛɛ tↄ baŋ bↄↄ dↄↄ wↄle gyu wↄↄ keŋ man nɛ kom, pɛna n kaa tↄ baŋ bↄↄ taŋgbɛɛ gyu nɛ." 9Balaŋ baŋ bↄↄ dↄↄ wↄle gyu wↄↄ keŋ man balinↄↄ weese nɛ kↄŋawↄ, te be tↄↄ wↄ kom ŋgba mena keŋ wↄↄte ŋon be yako nyi waa tↄ gyaŋgba nyibaŋ baŋ nɛ. 10Mena dↄↄ baŋ bↄↄ taŋgbɛɛ gyu wↄↄ keŋ man lee nebo nebo nɛ kↄŋawↄ na, ba agyueŋ yɛna nyi baŋ baa nyiŋ kela be tebia baŋ. Mↄna be tↄↄ baŋ mↄ man walaŋ kamasɛ kom ŋgba wↄle nyibaŋ baŋ nɛ. 11Ba ke lɛɛ be kↄbase taŋ nɛ, be fiasɛɛ bɛɛ kolosi tia wↄↄte ŋon nyiaa, 12"Balaŋ kɛwↄ baŋ bↄↄ kↄŋ wↄle wↄle kei nɛ, yɛɛ tom bo debaŋ dokoloŋ kooŋ. Mↄna daa dↄↄ da seŋawↄ weese kpalala kei man leenaŋ nebo kaa lii balinↄↄ kei. Kenaŋ wↄle koraŋ na, n besewↄ tↄ de popou kom kyɛɛkyɛɛ." 13Botↄↄ te wↄↄte ŋon tiranↄↄ fa be man ŋolo nyiaa, "Me gyoo, me ta ŋere neŋ do ya na. Ŋgba daa na neŋ kolosiwↄ see nyi n yɛɛ tom wee dibiliŋ na, nnɛ te maa tↄ neŋ kom. 14Mo n kↄba na n ke ta gyu n dɛɛ. Maŋ gbagba gyae la nyi maa tↄ baŋ bↄↄ dↄↄ wↄle kↄŋ nɛ kom ŋgba mena keŋ mↄↄ tↄ neŋ nɛ. 15Me dana gbɛɛ keŋ nyi maa mo maŋ gbagba me kↄba yɛɛ kpene keŋ mɛɛ gyae. Keŋ me dana wↄe dↄↄ te na wee neŋ nɛ?" 16Keŋte Yesu yako wↄ nyiaa, "Mena mↄ te wↄle nyibaŋ baa kaa bese gyaŋgba nyibaŋ, na gyaŋgba nyibaŋ mↄ kaa bese wↄle nyibaŋ." 17Wee daale Yesu kee gyu Gyerusalɛm donↄↄ man nɛ, ↄ baake ↄ kaseela kufu bala baŋ lee yenaŋ te ↄ yako wↄ nyiaa, 18"Dee gyu Gyerusalɛm donↄↄ man baa. Baa lese maŋ Deniwalaŋ Bu ŋon fa Wurubuarɛ saese kegyiise na Gyudatena mmaraa wola baŋ, na baa di me nombia bu maŋ fↄↄ nyi baa ko maŋ. 19Baa mo maŋ do balaŋ baŋ ba te yɛɛ Gyudatenawↄ ya nɛ nyiŋmaa man na baa kulu maŋ, na baa tuku maŋ na baa gyↄ maŋ sakaa ↄpaŋdaŋ dↄↄ na maa yeŋ. Mↄna weeya atoorote na, Wurubuarɛ waa gyuusu maŋ lee yeŋ man." 20Keŋte Sebedeo bia, Gyemisi na Gyↄn be naa moo wↄ kↄŋ Yesu gyaŋ te ↄ buŋawↄ ↄ nawↄↄ tɛɛ sola e nyi waa kyↄ e na nombii daale. 21Keŋte Yesu bↄↄse e nyiaa, "Woŋ te n ne gyae nyi maa yɛɛ fa neŋ?" Te alo ŋon tiranↄↄ fa Yesu nyiaa, "Mɛɛ gyae nyi n ke fa me bia bala kɛwↄ gbɛɛ, na ŋolo ke kyaa n dunoluŋ dↄↄ, na ŋolo mↄ ke kyaa n demena dↄↄ n gyoori keŋ man." 22Botↄↄ te Yesu yako wↄ nyiaa, "Ɛ ba gyeŋ kpene ɛ na solo nɛ ya. Ɛ ke tale naa diyem keŋ maa naa nɛ?" Keŋte be tiranↄↄ fa e nyi, "Ayi, dɛɛ tale." 23Te Yesu yako wↄ nyiaa, "Ɛ ke tale naa diyem keŋ maa naa nɛ, mↄna mↄↄ taŋ doŋ keŋ maa lese walaŋ ŋon waa kyaa ma dunoluŋ yaa ma demena dↄↄ ya. Mena akyaese kɛŋa doe fa balaŋ baŋ me kya gbagba be desina see wↄ nɛ." 24Yesu kaseela kufu akaŋ baŋ ke nyii mena nombia kɛŋa nɛ, ba gyeŋa baŋ Gyemisi na Gyↄn dↄↄ. 25Botↄↄ te Yesu baake ↄ kaseela baŋ pou yilaa te ↄ yako wↄ nyiaa, "Ɛ gyeŋ nyi tɛɛle kei dↄↄ gyooneŋ ne di gyoori bo be balaŋ dↄↄ, te be kegyiise baŋ mↄ dana doŋ be dↄↄ. 26Mↄna ɛmɛɛ dↄↄ, na mena te kaboena nyi dɛɛ doo ɛ man ya. Ɛ man walaŋ kamasɛ ŋon ↄ ne gyae nyi waa bese ɛ kegyia nɛ, kaboena nyi waa bese ɛ kegbetibii. 27Te ɛ man walaŋ kamasɛ ŋon ↄ ne gyae nyi waa bese ɛ siamante nɛ, kaboena nyi waa bese ɛ popou ɛ kegbetibii. 28Mena mↄ te maŋ Deniwalaŋ Bu ŋon te kↄŋ nyi balaŋ baa som maŋ ya, mↄna me kↄŋae me kaa som balaŋ, na maa yeŋ lɛɛ balaŋ burum nyee." 29Yesu na ↄ kaseela baŋ kɛɛ lee Gyeriko donↄↄ man nɛ, balaŋ burum sila wↄ. 30Na siayɛlɛɛsatena bala baale kyaa gbɛɛnaa nↄↄman botↄↄ. Be ke nyii nyi Yesu ne laŋa laa nɛ, be gyinaa be nↄↄ baake nyiaa "De Gbeŋgyoo, gyoo Defidi ↄ naanabii, wii de waraŋase." 31Keŋte balaŋ baŋ ŋmanyaŋ wↄ nyi baa wu be nↄↄ. Mↄna nɛnɛɛ gba te be desina fae yeesa nedoŋ nyiaa, "De Gbeŋgyoo, gyoo Defidi ↄ naanabii, wii de waraŋase." 32Botↄↄ te Yesu dↄↄwↄ seŋ te ↄ baake wↄ bↄↄse wↄ nyiaa, "Woŋ te ɛ ne gyae nyi maa yɛɛ fa ŋon?" 33Keŋte be tiranↄↄ nyiaa, "De Gbeŋgyoo, dɛɛ gyae de sia ke gyuusu." 34Botↄↄ te Yesu wii be waraŋase, te ↄ moo ↄ nyiŋmaa tinaa be sia. Debokenaŋ man te be sia gyuusuwↄ, te be sila Yesu laŋ.

will be added

X\