1 Ba lola Yesu bo Bɛtelɛhɛm donↄↄ keŋ ke kyaa Gyudia tɛɛle man nɛ man. Debaŋ kenaŋ na gyoo Herode ne diina gyoori. Be ka lola Yesu nɛ, te di weeya ala ya te siakaralatena baale baŋ ba gyeŋ kyolobiise wose man nombia nɛ lee weese dɛɛlee yenaŋ kↄŋ Gyerusalɛm donↄↄ man, 2 kaa bↄↄse balaŋ nyiaa, "Aleŋ te ba lola bu ŋon waa kaa bese Gyudatena gyoo nɛ? Da te naa kyolobii ŋolo weese dɛɛlee yenaŋ keŋ na wola daa nyi be ta lola e, mena dↄↄ te de kↄŋawↄ de kaa som e." 3 Gyoo Herode na baŋ pou be kyaa Gyerusalɛm donↄↄ man ke nyii nombia kɛŋa nɛ, takaa wↄ nideli. 4 Mena dↄↄ gyoo Herode baake Gyudatena saese kegyiise na ba mmaraa wolala pou yilaa te ↄ bↄↄse wↄ nyiaa, "Aleŋ te baa lola nyeelɛɛre ŋon Wurubuarɛ be yako see nyi waa kↄŋ nɛ?" 5 Keŋte be tiranↄↄ fa e nyiaa, "Bɛtelɛhɛm donↄↄ keŋ ke kyaa Gyudia tɛɛle man nɛ." Nawolo nyi Wurubuarɛ dekpeŋkpeŋgyↄↄre ŋolo yakowↄ see lee Bɛtelɛhɛm wose man nyiaa, 6 Wurubuarɛ kpa, "Ɛmɛɛ Bɛtelɛhɛmtena baŋ ɛ kyaa Gyudia tɛɛle man nɛ ɛ yɛɛ gyoorobiawↄ. Nawolo nyi ɛ man te gyoo dinaa ŋon waa kɛɛ me balaŋ Iseraetena dↄↄ nɛ waa lee." 7 Mena dↄↄ gyoo Herode moo Siakaralatena baŋ lee yenaŋ, te ↄ bↄↄse wↄ na waa gyeŋ debaŋ kitii keŋ kyolobii ŋon ba lee. 8 Be ke tiranↄↄ fa e taŋ nɛ, ↄ yako wↄ nyiaa, "Ɛ gyu na ɛ ke kɛo bu ŋon nideli. Akpaa ɛ naa e na ɛ bese kaa yako maŋ, na maŋ mↄ ke gyu ka som e." Keŋte ↄ lↄↄ wↄ gbɛɛ te be laŋa Bɛtelɛhɛm donↄↄ man. 9 Be ke nyii gyoo ŋon nↄↄwoya taŋ nɛ, ba korowↄ mo be gbɛɛ bee gyu. Te kyolobii ŋon bↄↄ naa weese dɛɛlee yenaŋ nɛ, tɛɛwↄ be siaman menɛɛ te ke ka seŋawↄ botↄↄ keŋ bu ŋon doo nɛ adido. 10 Ba kena kyolobii ŋon mena nɛ, yɛɛ wↄ gyoŋ nideli. 11 Be ke gyu ka gyoo dekpaŋalaŋ keŋ man nɛ, be naa bu ŋon na ↄ naa Mɛɛre keŋte ba buŋawↄ som bu ŋon. Be gyuusu ba akpose te ba lese kↄba yayam, na oliifi na adudo kyɛɛ bu ŋon. 12 Kenaŋ wↄle nɛ, Wurubuarɛ faree wↄ dosɛɛ man nyi be na bese gyu ka mo gyoo Herode gyaŋ bela ya, mena dↄↄ ba moo gbɛɛ wↄle kpoo man gyu be dɛɛ. 13 Siakaralatena baŋ ke laŋ wↄle nɛ, de Gbeŋgyoo Wurubuarɛ kpilale ŋolo kaa lese ↄ wose wola Gyosɛfo dosɛɛ man te ↄ yako e nyiaa, "Koro mo bu ŋon na ↄ naa na ɛ ke yeu gyu Igyipite tɛɛle man, na ɛ ke kyaa botↄↄ kelii debaŋ keŋ maa yako ŋon nyi yaa koro botↄↄ. Nawolo nyi gyoo Herode waa kɛo bu ŋon waa ko." 14 Mena dↄↄ Gyosɛfo korowↄ nelim kenaŋ te ↄ moo bu ŋon na ↄ naa te be yeuwↄ gyu Igyipite tɛɛle man, 15 te be kyaawↄ botↄↄ kaboena gyoo Herode yeŋawↄ. Kɛŋa pou kↄŋawↄ mena na kpene keŋ de Gbeŋgyoo be tɛɛ ↄ dekpeŋkpeŋgyↄↄre dↄↄ yako see nɛ ke kↄŋ mena ampaŋ. Ↄ yakowↄ nyiaa, "Igyipite tɛɛle man te ma lese me bu lee." 16 Gyoo Herode kena nyi Siakaralatena baŋ ta mo adao di ↄ dↄↄ, keŋ be ta bese kↄŋ kaa mo ↄ gyaŋ bela ya nɛ ↄ gyeŋa baŋ nideli. Keŋte ↄ kpila ↄ yoonↄↄtena nyi baa gyu Bɛtelɛhɛm donↄↄ man, na ke donↄↄsebia ŋan benaa na ke nɛ, na baa koe bia baala baŋ pou be ta bee ta kela kulutooneŋ ala ya nɛ, nawolo nyi mena debaŋ kenaŋ man te Siakaralatena baŋ yako e nyi be naa kyolobii ŋon. 17 Kei yele la kpene keŋ Wurubuarɛ dekpeŋkpeŋgyↄↄre Gyeremia be yako see nɛ kↄŋawↄ ampaŋ. Ↄ yakowↄ nyiaa, 18 "De nyii yeesa na kewii na kayeyɛɛ dinaa Rama tɛɛle man. Rahɛle ne wii ↄ bia te ↄ te bɛɛ nyi be na kyↄlɛɛ e ya, nawolo nyi ↄ bia pou te munu." 19 Gyoo Herode yeŋ wↄle nɛ, Wurubuarɛ kpilale ŋolo kaa lese ↄ wose wola Gyosɛfo dosɛɛ man Igyipite tɛɛle man te ↄ yako e nyiaa, 20 "Koro na n ka mo bu ŋon na ↄ naa, na ɛ ka bese gyu Iserae tɛɛle man. Nawolo nyi balaŋ baŋ nafↄ bɛɛ gyae bu ŋon baa ko nɛ ta yekee." 21 Mena dↄↄ Gyosɛfo desina ↄ wose, te ↄ moo bu ŋon na ↄ naa te be laŋa Iserae tɛɛle man. 22 Mↄna Gyosɛfo ke nyii nyi gyoo Herode bu Akelↄse kyaa la ↄ kya nawↄↄ man ↄ ne di gyoori Gyudia tɛɛle dↄↄ nɛ, ↄ yee botↄↄ ke gyu. Te keŋ Wurubuarɛ be faree e dosɛɛ man dↄↄ nɛ, ↄ kpasewↄ gyu Galelia tɛɛle man. 23 Te ↄ gyuuwↄ ke kyaa donↄↄ keŋ bɛɛ baake ke nyi Nasarɛte nɛ man. Kei yela kpene keŋ Wurubuarɛ be tɛɛ wa akpeŋkpeŋgyↄↄra dↄↄ yako see nɛ, kↄŋawↄ ampaŋ. Be yakowↄ nyiaa, "Baa baake e nyi Nasarɛte baale."
