Mateo 19

1Yesu kekolosi nombia kɛŋa pou taŋ nɛ, ↄ leewↄ Galelia tɛɛle man gyu Gyudia tɛɛle man, Gyↄↄdan boo keŋ diŋgyiŋ. 2Balaŋ burum sila e gyu botↄↄ te ↄ kyↄↄ wↄ be kaweese pou. 3Keŋte Farasiitena baale kↄŋawↄ be kaa teese ↄ nↄↄman te be bↄↄse e nyiaa, "Da mmaraa ne fa daa gbɛɛ nyi ŋolo waa tale bɛɛ ↄ wɛɛle lee nombii kamasɛ dↄↄ?" 4Keŋte Yesu tiranↄↄ fa wↄ nyiaa, "Ɛ te kala ta Wurubuarɛ nombia aŋmaraseŋ see ŋan nyi, lee kewalaŋ keŋ na, Wurubuarɛ yɛɛ alo na baale bo, 5te ↄ yakowↄ nyiaa, 'Lee kei dↄↄ nɛ baale waa tina ↄ kya na ↄ naa yela, na waa mo ↄ wose mataa na ↄ wɛɛle, na be balaŋ bala ka bese walaŋ dokoloŋ yee?' 6Mena dↄↄ be ta tekaa yɛɛ balaŋ bala bela ya, mↄna be ta bese walaŋ dokoloŋ. Mena dↄↄ kpene keŋ Wurubuarɛ ba mo bom yɛɛ ke dokoloŋ nɛ, ŋolo na ŋolo na kpase ke man ya." 7Keŋte Farasiitena baŋ bↄↄse Yesu nyiaa, "Nyi akpaa mena te doo na, weera dↄↄ te de naana Mosesi yɛɛ mmaraa see nyi, baale waa tale ŋmarase yale kebɛɛ tↄne fa ↄ wɛɛle na waa bɛɛ e?" 8Botↄↄ te Yesu tiranↄↄ fa wↄ nyiaa, "Ɛ konↄↄyuŋ dↄↄ te de naana Mosesi fa ŋon mena gbɛɛ kenaŋ. Mↄna lee kewalaŋ keŋ na, be doo mena ya. 9Mena dↄↄ mɛɛ yako ŋon baa nyiaa, nyi akpaa na alo lee ↄ baale wↄle bo ya, te ↄ baale de bɛɛ e gyu ke yala alo wↄle nɛ, Wurubuarɛ siaman na ↄtenate gyae ŋolo wɛɛle baa." 10Keŋte Yesu kaseela baŋ yako e nyiaa, "Nyi akpaa nnɛ te yale wose man nombia doo na, kenaŋ na walaŋ te yale koraŋ ya na dei." 11Keŋte Yesu yako wↄ nyiaa, "Nombia ŋan mɛɛ yako ŋon nɛ, na walaŋ kamasɛ ne gyae la waa tale lɛɛ ŋa do ya, gyisɛ balaŋ baŋ Wurubuarɛ ba mo mena bɛrɛɛ kenaŋ boele wↄ nɛ baageŋ. 12Balaŋ baale kyaa keŋ nyi bↄↄ gyae baa tale yala ala ya, nawolo nyi mena te ba lola wↄ. Balaŋ baale mↄ dↄↄ, balaŋ yɛɛ na wↄ keŋ nyi bↄↄ gyae baa tale yala ala ya. Balaŋ baale mↄ dↄↄ, Wurubuarɛ gyoori keŋ dↄↄ te baŋ gbagba bɛɛwↄ nyi bↄↄ yale ya. Walaŋ kamasɛ ŋon waa tale lɛɛ nombia kɛŋa do na, waa lɛɛ ŋa do." 13Keŋte balaŋ baale moo bia kↄŋ Yesu gyaŋ nyi waa mo ↄ nyiŋmaa gyakaa be dↄↄ na waa fane fa wↄ. Mↄna ↄ kaseela baŋ kena mena nɛ, be ŋmanyaŋ balaŋ baŋ. 14Yesu kena mena nɛ ↄ yako wↄ nyiaa, "Ɛ yela bia baŋ ke kↄŋ me gyaŋ. Ɛ na tↄ wↄ gbɛɛ ya, nawolo nyi Wurubuarɛ gyoori keŋ yɛɛ balaŋ baŋ bɛɛ yↄkↄse ba wose ŋgba bia kɛwↄ dinↄↄ nɛ wui." 15Yesu ka mo ↄ nyiŋmaa gyakaa bia baŋ dↄↄ taŋ nɛ, te ↄ leewↄ botↄↄ laŋ. 16Wee daale nɛ tobaale ŋolo kaa bↄↄse Yesu nyiaa, "De Gbeŋgyoo, woŋ deeli yaa maa yɛɛ na maa nyiŋ nyeedoŋ kekpaa keŋ?" 17Botↄↄ te Yesu bↄↄse e nyiaa, "Weera te n ne bↄↄse maŋ lee deeli keyɛɛ wose man. Wurubuarɛ waageŋ dei la. Mena dↄↄ nyi akpaa n ne gyae n ke nyiŋ nyeedoŋ kekpaa keŋ nɛ, kenaŋ na kaboena nyi nya di Wurubuarɛ mmaraase ŋan dↄↄ." 18Botↄↄ te tobaale ŋon bↄↄse Yesu nyiaa, "Mmaraase ŋemↄ?" Keŋte Yesu tiranↄↄ fa e nyiaa, "Na ko walaŋ ya, na lee n wɛɛle yaa n baale wↄle ya, na ŋmɛɛle ya, na kara n dↄↄ nↄↄ ya. 19Bu n kya na n naa, na n ke gyae n tebia ŋgba mena keŋ n ne gyae nyaŋ gbagba n wose nɛ." 20Keŋte tobaale ŋon yakowↄ nyiaa, "Me wulaa mee di mmaraase kɛŋa pou dↄↄ. Woŋ kaa la nyi maa yɛɛ bela?" 21Botↄↄ te Yesu yako e nyiaa, "Nyi akpaa n ne gyae n ke de kelii ↄto na, gyu ke yↄↄ nya abↄↄ ŋan pou n dana nɛ, na n ka mo kↄba keŋ kpɛlɛɛ ayematena na n ke kↄŋ kaa sila maŋ. N yɛɛ mena na, n ke nyiŋ abↄↄ kpaakpaa see n wose Wurubuarɛ gyaŋ adido." 22Tobaale ŋon ke nyii nombia kɛŋa nɛ, ↄ moo waraŋase lee botↄↄ nawolo nyi ↄ dana kↄba na nsendee ya. 23Keŋte Yesu yako ↄ kaseela baŋ nyiaa, "Mɛɛ yako ŋon ɛ ke nyii nyiaa, gyae ke yɛɛ doŋ fa baŋ be dana kↄba nɛ nyi baa gyoo Wurubuarɛ gyoori keŋ man. 24Mɛɛ yako ŋon bela nyiaa, gyae ke yɛɛ doŋ fa baŋ be dana kↄba nɛ nyi baa gyoo Wurubuarɛ gyoori keŋ man, kela nyi kurumↄↄ ka gyoo ŋarale bↄↄ man lee." 25Yesu kaseela baŋ ke nyii nombia kɛŋa nɛ doo be nↄↄ te be bↄↄse e nyiaa, "Nyi nnɛ te doo na, amↄte ne gyae la waa nyiŋ nyeekelɛɛ baa?" 26Keŋte Yesu kɛɛ wↄ te ↄ yako wↄ nyiaa, "Denibalaŋ gyaŋ na ŋolo be tale yɛɛ nombii kei ya, mↄna kpene kamasɛ be kyaa keŋ Wurubuarɛ be tale yɛɛ ya." 27Botↄↄ te Pita bↄↄse Yesu nyiaa, "De Gbeŋgyoo! Daa dↄↄ de te tina kpene kamasɛ keŋ de dana nɛ yela, te de dↄŋɛɛ de silana neŋ. Woŋ yaa dee nyiŋ baa?" 28Keŋte Yesu yako wↄ nyiaa, "Ampaŋ yaa mɛɛ yako ŋon ɛ ke nyii nyiaa, debaŋ keŋ kpene kamasɛ de kaa bese wↄle te maŋ Deniwalaŋ Bu ŋon de kyaa me gyooro gbeli keŋ dↄↄ me gyoorobiiri man nɛ, ɛmɛɛ baŋ ɛ be sila maŋ nɛ ɛ ke kyaa gyooro gbelɛɛ kufu ala dↄↄ, na ɛ ke di Iseraetena akpaŋalaŋse kufu ala ŋan balaŋ nombia. 29Te ɛ man walaŋ kamasɛ ŋon ↄ be tina ↄ dekpaŋalaŋ yaa ↄ naabia yaa ↄ deesina, yaa ↄ kya yaa ↄ naa yaa ↄ bia yaa ↄ tɛɛlese yela lee maŋ dↄↄ nɛ, waa bese nyiŋ ŋa akpeŋ sↄŋonoŋ (100) kpu, na waa bese nyiŋ nyeedoŋ kekpaa keŋ mↄ. 30Mↄna balaŋ burum baŋ be yɛɛ siamantenawↄ nɛ, baa kaa bese wↄle nyibaŋ, na balaŋ burum baŋ be yɛɛ wↄle nyibaŋwↄ nɛ kaa bese siamantena."

will be added

X\