Mateo 18

1Mena debaŋ kenaŋ man nɛ, Yesu kaseela baŋ kↄŋawↄ ↄ gyaŋ kaa bↄↄse e nyiaa, "Amↄte yɛna walaŋ kegyia Wurubuarɛ gyoori keŋ man?" 2Keŋte Yesu baake biikyaabii ŋolo kaa seŋ be siaman, 3te ↄ yako wↄ nyiaa, "Ampaŋ yaa mɛɛ yako ŋon ɛ ke nyii nyiaa, akpaa ɛ te kyɛɛkee ɛ dinↄↄ na ɛ ke yↄkↄse ɛ wose yɛɛ ŋgba bia ya nɛ, ɛ be gyae ɛ ka gyoo Wurubuarɛ gyoori keŋ man ya." 4Mena dↄↄ walaŋ kamasɛ ŋon ↄ yↄkↄse ↄ wose ŋgba biikyaabii kei nɛ, ŋon yɛna walaŋ kegyia Wurubuarɛ gyoori keŋ man. 5Te walaŋ kamasɛ ŋon ↄ lɛɛ biikyaabii kei dinↄↄ ma yele man na, maŋ yaa ↄ lɛɛwↄ. 6Mↄna walaŋ kamasɛ ŋon ↄ yeli bia buruburu kɛwↄ baŋ bↄↄ lɛɛ maŋ di nɛ man ŋolo de yɛɛ dukum nɛ, kenaŋ na nyi akpaa ba mo boe dinaa dinaa kpaŋ ↄ wↄŋe man, te be fuŋ e do ɛpo man na dei kela. 7Ɛmɛɛ balaŋ baŋ ɛ kyaa tɛɛle kei dↄↄ nɛ ɛ laako lee abↄↄ ŋan ne yeli balaŋ ne yɛɛ dukum nɛ dↄↄ. Kaboena nyi mena abↄↄ kɛŋa dɛɛ kↄŋ, mↄna nyaŋ walaŋ ŋon ŋe gyae ke ta n dↄↄ kↄŋ nɛ nyaa laako. 8Nyi akpaa n nyiŋmaa yaa n nae ne yele la te n ne yɛɛ dukum na kara ke leki. Nawolo nyi, dei nyi nya lee kadeŋ na n ka gyoo Wurubuarɛ gyoori keŋ man, kela nyi baa mo neŋ nyiŋmaase ala yaa nawↄↄ ala ka do boalaŋ keŋ ke bɛɛ yem ya nɛ man. 9Te akpaa nyi n sibii ne yele la te n ne yɛɛ dukum na kulu ke leki. Dei nyi nya mo sibii dokoloŋ gyoo Wurubuarɛ gyoori keŋ man, kela nyi baa mo neŋ na n sia ala ka do boalaŋ keŋ ke bɛɛ yem ya nɛ man. 10Keŋte Yesu besewↄ yako wↄ nyiaa, ɛ kɛɛ nideli nyi ɛ be kɛɛ balaŋ kɛwↄ baŋ bↄↄ lɛɛ maŋ di te bↄↄ yↄkↄse ba wose ŋgba bia nɛ nyi be man ŋolo yɛɛ walaŋ yakaate e ya. Mɛɛ yako ŋon baa ɛ ke nyii nyiaa, mena balaŋ kɛwↄ dana Wurubuarɛ kpilala baŋ ba seŋɛɛ me kya Wurubuarɛ ŋon ↄ kyaa adido nɛ siaman, bɛɛ fane fa wↄ debaŋ kamasɛ. 11Maŋ Deniwalaŋ Bu ŋon kↄŋae me kaa lɛɛ baŋ bↄↄ yoo Wurubuarɛ gbɛɛ man nɛ nyee. 12Keŋte Yesu bↄↄse wↄ nyiaa, sena te ɛ na gyueŋ lee nombia kɛŋa man? Akpaa ŋolo dana namense sↄŋonoŋ (100) te be man dokoloŋ da yoo na woŋ te ↄ ne yɛɛ? Ↄ be gyae waa tina sↄŋonaara na kufu kadaale (99) baŋ yela bula dↄↄ botↄↄ, na waa ta kɛo ŋon ↄ ba yoo nɛ kaboena waa naa e yee? 13Ampaŋ yaa mɛɛ yako ŋon nyi akpaa ↄ naa e na, ↄ sia na gye ↄ dↄↄ nideli kela sↄŋonaara na kufu kadaale baŋ be ta yoo ya nɛ. 14Mena mↄ te ɛ kya ŋon ↄ kyaa adido nɛ, bɛɛ gyae nyi balaŋ baŋ bↄↄ lɛɛ maŋ di nɛ, be man ŋolo dɛɛ yo ya. 15Keŋte Yesu besewↄ yako wↄ nyiaa, akpaa n dↄↄ Kristo baale de yɛɛ neŋ nombiikum na, gyu ↄ gyaŋ na n kaa bↄↄse e. Mↄna yela ka ke yɛɛ ɛmɛɛ na e ɛ bala nombia. Akpaa ↄ nyii neŋ na, n te tale baa besena e kↄŋ gbɛɛ kpaakpaate dↄↄ. 16Mↄna nyi akpaa ↄ te nyii neŋ ya na, mo Kristo baale dokoloŋ yaa balaŋ bala kpu na n wose na ɛ ke gyu ↄ gyaŋ. Kei gyae ke yela n ke nyiŋ adansɛɛtena bala yaa batooro nombia ŋenaŋ man, ŋgba mena keŋ Wurubuarɛ nombia ne yako nɛ. 17Akpaa ↄ bɛɛ ↄ te nyii ŋon ya nɛ, kenaŋ na baake e n tebia Kristotena dikpii keŋ gyaŋ. Te akpaa ↄ bɛɛ ↄ te nyii baŋ mↄ ya nɛ, kenaŋ na kɛɛ e nyi ↄ yɛɛ walaŋ ŋon ↄ ba gyeŋ Wurubuarɛ ya, yaa ↄ yɛɛ dukumyɛɛre e. 18"Ampaŋ yaa mɛɛ yako ŋon ɛ ke nyii nyiaa, kpene kamasɛ keŋ ɛ gyↄ ke dowoe tɛɛle kei dↄↄ nɛ, na ba te gyↄ ke dowoe adido, te kpene kamasɛ keŋ ɛ booli ke tɛɛle kei dↄↄ nɛ, na ba te booli ke adido mↄ." 19"Te mɛɛ yako ŋon baa bela nyiaa, kpene kamasɛ keŋ ɛ man balaŋ bala de yɛɛ nↄↄdokoloŋ seŋ ke dↄↄ fane tɛɛle kei dↄↄ na, me kya ŋon ↄ kyaa adido nɛ waa yɛɛ ke fa ŋon." 20Nawolo nyi botↄↄ keŋ balaŋ bala yaa balaŋ batooro de gyaŋee ma yele man na, me kpuɛ na wↄ. 21Keŋte Pita kↄŋawↄ Yesu gyaŋ kaa bↄↄse e nyiaa, "Me Gbeŋgyoo, betaboŋmon te me dↄↄ de yɛɛ nombiikum me dↄↄ na te maa mo kyɛɛ e? Maa mo kyɛɛ e betabonyetooro?" 22Keŋte Yesu tiranↄↄ fa e nyiaa, "Koa, na betabonyetooro ya, mↄna betabosↄŋotooro na kufu akpeŋ nyetooro (70 x 7)." 23Keŋte ↄ yako wↄ nyiaa, "Nnɛ te Wurubuarɛ gyoori keŋ doo. Ke yɛɛ ŋgba gyoo ŋon ↄ ne gyae nyi ŋon na ↄ tewulɛɛ ke kyaa, na baa kɛɛ koma ŋan be dana e nɛ. 24Be ka beta fiasɛɛ bɛɛ gyoo ŋe man nɛ, te ba moo tobaale ŋon ↄ dana e kom kↄba na nsendee ya nɛ kↄna e. 25Keŋ tobaale ŋon te nyiŋ kↄba keŋ waa tↄ ya dↄↄ nɛ, ↄ gbeŋgyoo ŋon yako wↄ nyi baa mo ŋon na ↄ wɛɛle na ↄ bia na wa abↄↄ ŋan pou ↄ dana nɛ ke yↄↄ, na baa mo kaa tↄ kom keŋ. 26Keŋte ↄ tobaale ŋon tisiwↄ buŋ ↄ nawↄↄ tɛɛ waase e nyiaa, 'Nyiŋ konↄↄ fa maŋ, maa tↄ neŋ kom keŋ pou.' 27Botↄↄ te ↄ nombia yɛɛ ↄ gbeŋgyoo ŋon waraŋase, te ↄ moo kom keŋ pou kyɛɛ e te ↄ tina e yela nyi waa ta. 28Mↄna mena tobaale ŋonaŋ ka lee botↄↄ nɛ, ↄ ke gyaŋee na ↄ dↄↄ ŋolo ŋon ↄ dana e kom bii daale nɛ. Botↄↄ te tobaale ŋon lↄↄwↄ kyaŋ ↄ dↄↄ ŋon wↄŋe man te ↄ yako e nyiaa, 'Tↄ maŋ ma kom keŋ pou n dana maŋ nɛ?' 29Keŋte ↄ dↄↄ ŋon mↄ tisiwↄ buŋ ↄ nawↄↄ tɛɛ waase e nyiaa, 'Me dↄↄ nyiŋ konↄↄ fa maŋ maa tↄ neŋ n kom keŋ pou.' 30Mↄna tobaale ŋon bɛe, te ↄ yela ba moo ↄ dↄↄ ŋon ketↄ deni nyi waa doo botↄↄ, kelii debaŋ keŋ waa tↄ e ↄ kom keŋ pou. 31Tewulɛɛ akaŋ baŋ kena mena nɛ takaa wↄ nideli, keŋte be gyuuwↄ ke tↄlɛɛ nombia ŋan pou fa be gbeŋgyoo ŋon. 32Botↄↄ te be gbeŋgyoo ŋon baake tobaale ŋon te ↄ yako e nyiaa, 'N yɛɛ walaŋkum ŋolo e. Nyaŋ waase maŋ te ma moo n kom keŋ n dana maŋ nɛ pou kyɛɛ neŋ. 33Woŋ dↄↄ te nyaŋ mↄ n te wii n dↄↄ ŋon waraŋase, ŋgba mena keŋ maŋ be wii neŋ nɛ ya?' 34Mena dↄↄ ↄ gbeŋgyoo ŋon gyeŋa baŋ, te ↄ yela ba moo tobaale ŋon ketↄ deni na waa naa diyem kelii debaŋ keŋ, ŋon mↄ waa tↄ ↄ koma ŋan ↄ dana e nɛ pou. 35Mena dↄↄ ɛmɛɛ baŋ ɛ ta mo ɛ tebia nombiakumɛɛ kyɛɛ wↄ lee ɛ konↄↄse man ya nɛ, mena te me kya ŋon ↄ kyaa adido nɛ waa yɛɛ ŋon."

will be added

X\