Mateo 17

1Weeya looro wↄle nɛ, Yesu moo Pita na Gyemisi na ŋon Gyemisi ↄ naabu Gyↄn kpu na ↄ wose te be gyuuwↄ bula dinaa daale dↄↄ baageŋ. 2Be ka seŋ botↄↄ nɛ, karatetee dokoloŋ te Yesu wose kyɛɛkeewↄ be siaman. Na ↄ sia gbɛɛ ne ŋalakee ŋgba weese nɛ, te wa abↄↄ ŋan ↄ doona nɛ bese abↄↄ wolomɛɛ futututu na ŋɛɛ ŋalakee polɛpolɛpolɛ. 3Debokenaŋ man te Mosesi na Elia kaa bɛɛwↄ lee be dↄↄ, te be kolosiwↄ na Yesu. 4Keŋte Pita yako Yesu nyiaa, "De Gbeŋgyoo, dei ŋgba daa mↄ be kↄŋ kɛbo nɛ. Nyi akpaa n ne gyae na, yela dɛɛ baŋ kefɛɛse atooro kɛbo. N wui daale, Mosesi wui daale te Elia mↄ wui daale." 5Pita ke gyakaa ↄ ne kolosi nɛ, te ŋↄma ŋɛlɛɛŋɛlɛɛ ŋaale kaa wuuwↄ be dↄↄ. Keŋte be nyii nↄↄwoya ŋaale lee ŋↄma ŋan man nyiaa, "Kei yɛna me bu ŋon mɛɛ gyae e lee me konↄↄ man te ↄ na gyoo me sia, ɛ nyii e." 6Ↄ kaseela baŋ ke nyii nↄↄwoya kɛŋa nɛ, gyakoloŋ gyoo wↄ te be tisiwↄ buŋii tɛɛle man. 7Keŋte Yesu kaa mo ↄ nyiŋmaa tina wↄ te ↄ yako wↄ nyiaa, "Ɛ koro, ɛ na yee ya." 8Be ka koro gyina be sia nɛ, ba te naa ŋolo kpu na Yesu ya. 9Be ke tisi lee bula keŋ dↄↄ bɛɛ kↄŋ nɛ Yesu tↄↄ wↄ kiiŋ nyiaa, "Ɛ na yako walaŋ na walaŋ kpene keŋ ɛ be naa nɛ ya, kelii debaŋ keŋ Wurubuarɛ waa gyuusu maŋ Deniwalaŋ Bu ŋon lee yeŋ man." 10Keŋte ↄ kaseela baŋ bↄↄse e nyiaa, "Weera dↄↄ te Gyudatena mmaraa wolala baŋ ne yako nyi, kaboena nyi Elia waa taŋgbɛɛ kↄŋ pɛna nyeelɛɛre ŋon Wurubuarɛ be yako see nyi waa kↄŋ nɛ ke kↄŋ?" 11Keŋte Yesu yako wↄ nyiaa, "Ke doo mena nyi Elia waa taŋgbɛɛ nyeelɛɛre ŋon kↄŋ na ↄ kaa desina kpene kamasɛ see ŋgba ŋa kedoobii nɛ." 12Mↄna mɛɛ yako ŋon baa nyi Elia taŋ wulaa kↄŋ laŋ mↄna balaŋ ta gyeŋ e ya, te be yɛɛ e kpene kamasɛ keŋ bɛɛ gyae. Mena mↄ te maŋ Deniwalaŋ Bu ŋon maa naa diyem be nyiŋmaa man. 13Botↄↄ te ↄ kaseela baŋ gyeŋawↄ nyiaa, Gyↄn Wurubuarɛ loŋsↄↄre ŋon wose man nombia yaa ↄ ne yako nɛ. 14Ba ke kↄŋ kaa gyoo balaŋ burum baŋ man nɛ, balee ŋolo kaa tisiwↄ buŋ Yesu nawↄↄtɛɛ, 15te ↄ yako e nyiaa, "Me Gbeŋgyoo, wii me bu kei waraŋase fa maŋ. Ↄ na wee keleuleuse, te ↄ ne naa diyem nideli mↄ. Ne kyaa kuu e lↄ boalaŋ yaa loŋ man. 16Ma moo e kↄŋ n kaseela baŋ gyaŋ, mↄna ba te tale kyↄ e ya." 17Botↄↄ te Yesu yako wↄ nyiaa, "Ao! Ɛmɛɛ gyɛŋ balaŋ baŋ ɛ bɛɛ lɛɛ maŋ di ya, te ɛ yɛɛ balaŋ kumɛɛwↄ. Weeya aŋmoŋ te kaboena nyi maa kyaa ɛ gyaŋ, na maa nyiŋ konↄↄ fa ŋon?" Keŋte ↄ yako balee ŋon nyiaa, "Mo n bu ŋon kↄna maŋ." 18Keŋte Yesu fae feliŋkum keŋ te ka leewↄ bu ŋon man, te ↄ kawee taŋawↄ debokenaŋ man. 19Kenaŋ wↄle te Yesu kaseela baŋ gyuuwↄ ↄ gyaŋ, te be baake e lee yenaŋ bↄↄse e nyiaa, "Weera dↄↄ te daa te tale gegi feliŋkum keŋ lee bu ŋon man ya?" 20Botↄↄ te Yesu tiranↄↄ fa wↄ nyiaa, "Nawolo nyi ɛ kelɛɛdi ta boo ya. Mɛɛ yako ŋon ɛ ke nyii nyiaa, nyi akpaa ɛ kelɛɛdi yɛɛ peperee ŋgba kefaabii koraŋ nɛ, nafↄ ɛ ke tale yako bula kei nyiaa, 'Kulu lee kɛbo ke yala nnɛ' te ke gyae ke kↄŋ mena. Te kolo be kyaa keŋ nyi ɛ be gyae ɛ ke tale yɛɛ ya." 21Mↄna mena feliŋkumɛɛ kɛŋa dinↄↄ dↄↄ nɛ, kefane na nↄↄkebake kaageŋ te n ke tale mo gegi ŋa. 22Debaŋ keŋ be popou be kↄŋ kaa gyaŋee Galelia tɛɛle man nɛ, Yesu yako ↄ kaseela baŋ nyiaa, "Baa lese maŋ Deniwalaŋ Bu ŋon fa balaŋ, 23na baa ko maŋ, mↄna weeya atoorote keŋ nɛ, Wurubuarɛ waa gyuusu maŋ lee yeŋ man." Botↄↄ te dekↄkↄrↄkↄↄ kyaŋa ↄ kaseela baŋ. 24Yesu na ↄ kaseela baŋ ke kↄŋ kaa gyoo Kapanum donↄↄ man nɛ, balaŋ baŋ bɛɛ lɛɛ lempoo Wurubuarɛ ↄsom deni dinaa keŋ man nɛ, kↄŋawↄ kaa bↄↄse Pita nyiaa, "Ɛ gbeŋgyoo ŋon bɛɛ tↄ Wurubuarɛ ↄsom deni dinaa lempoo keŋ yee?" 25Keŋte Pita tiranↄↄ fa wↄ nyiaa, ↄ ne tↄↄ. Pita ke kↄŋ kaa gyoo dekpaŋalaŋ man pɛ nɛ, Yesu taŋgbɛɛ la kolosi na e te ↄ bↄↄse e nyiaa, "Simↄn, sena yɛna nya agyueŋ? Balaŋ bomↄ gyaŋ te tɛɛle kei dↄↄ gyooneŋ ne lɛɛ lempoo lee? Donↄↄsetena gyaŋ yaa ŋↄↄla gyaŋ?" 26Te Pita tiranↄↄ nyiaa, "Ŋↄↄla gyaŋ te bɛɛ lɛɛ." Keŋte Yesu yako e nyiaa, "Akpaa mena na donↄↄsetena te nyiŋ ba wose. 27Mↄna keŋ dↄↄ ne gyae nyi daa na wↄ ke yala dↄŋa dↄↄ ya nɛ, mo n darawaa na n ke gyu boo man ke lↄ. Kpebii gyaŋgbate ŋon n ke kyaŋ nɛ, n wola ↄ nↄↄ na n kena kↄba keŋ gyae ka yee daa na neŋ wui lempoo keŋ ketↄ. Lese ke na n ka mo gyina wↄ."

will be added

X\