Mateo 16

1Wee daale nɛ, Farasiitena na Sadukiitena kↄŋawↄ Yesu gyaŋ kaa teese e ↄ nↄↄman nyi waa yɛɛ gyakoloŋ nombia wola wↄ, na kawola nyi ↄ lee Wurubuarɛ gyaŋ ampaŋ. 2Keŋte Yesu tiranↄↄ fa wↄ nyiaa, "De lii balinↄↄ te ŋↄma yasɛɛ na ɛ ne tale naa yako nyi, tɛɛ de naa na weese waa gyↄ. 3Te nebo mↄ na, ɛ ne tale kɛɛ ŋↄma dinↄↄ yako nyi gyɛŋ ↄga waa ŋɛɛ. Ɛ ne tale kɛɛ ŋↄma na ɛ kawola kpene keŋ gyae ke kↄŋ. Mↄna nombia ŋan ne yɛɛ debaŋ kei man nɛ, ɛ bɛɛ tale wola ŋe man ya. 4Ɛmɛɛ gyɛŋ wee kei balaŋ, ɛ yɛɛ balaŋ kumɛɛwↄ te ɛ bee yee Wurubuarɛ ya. Ɛ ne gyae nyi maa yɛɛ gyakoloŋ nombia ɛ kena, mↄna mↄↄ gyae maa yɛɛ gyakoloŋ nombia kamasɛ wola ŋon kpu na ŋan be kↄŋ Wurubuarɛ dekpeŋkpeŋgyↄↄre Gyona dↄↄ nɛ ya." Keŋte Yesu leewↄ be gyaŋ laŋ tina wↄ yela. 5Yesu na ↄ kaseela ka toŋ gyu boo keŋ diŋgyiŋ nɛ, ↄ kaseela baŋ wolee bodobodo ka mo bo. 6Keŋte Yesu faree wↄ nyiaa, ɛ kɛɛ ɛ wose man nideli lee Farasiitena na Sadukiitena wose man. Nawolo nyi be dinↄↄ yɛɛ ŋgba tee keŋ bɛɛ mo do bodobodo man te kɛɛ koro nɛ. 7Mena dↄↄ ↄ kaseela baŋ bↄↄse dↄŋa nyiaa, "Keŋ de ta mo bodobodo kↄŋ dↄↄ ya te ↄ ne yako mena nombia kɛŋa yaa?" 8Na Yesu ta gyeŋ kpene keŋ bee kolosi na dↄŋa nɛ te ↄ yako wↄ nyiaa, "Ɛ kelɛɛdi ta boo ya. Weera dↄↄ te ɛ ne kolosi nyi ɛ ta mo bodobodo tela ya? 9Mena dↄↄ ɛ sɛɛ ɛ te nyii ta me nombia man yee? Ɛ bɛɛ tↄↄse bodobodose anoŋ ŋan mↄↄ kɛrɛɛ fa balaŋ kakpoŋse banoŋ, na ŋan bↄↄ dii kaase te ɛ be tↄↄsee wulu doŋase nɛ yee? 10Yaa ɛ bɛɛ tↄↄse bodobodose nyetooro ŋan balaŋ kakpoŋse banaara be dii, na ŋan bↄↄ dii kaase te ɛ be tↄↄsee wulu doŋase nɛ yee? 11Weera dↄↄ te ɛ ta gyem nyi na bodobodo wose man nombia yaa mee kolosi fa ŋon ya? Mↄna ɛ kɛɛ ɛ wose man nideli lee Farasiitena na Sadukiitena wose man. Be dinↄↄ yɛɛ ŋgba tee keŋ bɛɛ mo do bodobodo man te kɛɛ koro nɛ." 12Botↄↄ te ↄ kaseela baŋ gyeŋawↄ nyi, na tee keŋ ne yeli bodobodo na koro nɛ yaa ↄ ne yako wↄ nyi baa kɛɛ ba wose man nideli na ke ya. Mↄna Farasiitena na Sadukiitena nombia ŋan bɛɛ wolo nɛ yaa ↄ ne yako wↄ. 13Yesu na ↄ kaseela baŋ ka gyoo Kaesaria Filipi tɛɛle man nɛ, ↄ bↄↄse ↄ kaseela baŋ nyiaa, "Balaŋ ne kolosi ma wose man nombia na be kpa maŋ Deniwalaŋ Bu ŋon yɛna amↄ?" 14Keŋte ↄ kaseela baŋ tiranↄↄ nyiaa, "Balaŋ baale kpa nyaŋ yɛna Gyↄn Wurubuarɛ loŋsↄↄre ŋon. Baale mↄ kpa nyaŋ yɛna Wurubuarɛ dekpeŋkpeŋgyↄↄre Elia, te baale mↄ kpa nyaŋ yɛna Wurubuarɛ dekpeŋkpeŋgyↄↄre Gyeremia, yaa Wurubuarɛ akpeŋkpeŋgyↄↄra baŋ man ŋolo." 15Botↄↄ te Yesu bↄↄse wↄ nyiaa, "Ɛmɛɛ mↄ de? Ɛ kpa maŋ Deniwalaŋ Bu ŋon yɛna amↄ?" 16Botↄↄ te Simↄn Pita tiranↄↄ nyiaa, "Nyaŋ yɛna Kristo, nyeelɛɛre ŋon Wurubuarɛ be yako see nyi waa kↄŋ nɛ. Wurubuarɛ ŋon ↄ kyaa kekpaakekpaa nɛ Bu." 17Keŋte Yesu yako e nyiaa, "Gyona bu Simↄn, nyaŋ na nyeebam, nawolo nyi na deniwalaŋ lese na nombia kɛŋa wola neŋ ya, mↄna me kya ŋon ↄ kyaa adido nɛ lese na ŋa wola neŋ. 18Mena dↄↄ mɛɛ yako neŋ nyiaa, nyaŋ yɛna Pita, te n yele kenaŋ asɛɛ yɛna nyi boe. Nyaŋ boe kei dↄↄ te maa baake me balaŋ pou yilaa. Te yeŋ gba koraŋ be gyae ke tale di be dↄↄ ya. 19Maa mo Wurubuarɛ gyoori keŋ safowaase do n nyiŋmaa man. Kpene kamasɛ keŋ nyaŋ ke gyↄ ke dowoe tɛɛle kei dↄↄ nɛ, baa gyↄ ke dowoe adido, te kpene kamasɛ keŋ nyaŋ ke booli ke tɛɛle kei dↄↄ nɛ, baa booli ke adido mↄ." 20Keŋte Yesu faree ↄ kaseela baŋ nyi, be na yako walaŋ kamasɛ nyi ŋon yɛna nyeelɛɛre ŋon Wurubuarɛ be yako see nyi waa kↄŋ nɛ ya. 21Lee debaŋ kenaŋ pou nɛ, Yesu fiasɛɛ ↄ na lese nombia ŋan asɛɛ fa ↄ kaseela baŋ nyiaa, "Kaboena nyi maa gyu Gyerusalɛm donↄↄ man, na me kaa naa diyem nideli Gyudatena kegyiise na Wurubuarɛ saese kegyiise na Gyudatena mmaraa wolala baŋ nyiŋmaa man. Baa ko maŋ, mↄna weeya atoorote keŋ man na, Wurubuarɛ waa gyuusu maŋ lee yeŋ man." 22Botↄↄ te Pita moo Yesu lee yenaŋ te ↄ tↄↄ e nyi, "Me Gbeŋgyoo, na yako mena ya. Wurubuarɛ dɛɛ mo kɛŋa gyu lem. Kɛŋa na kↄŋ n dↄↄ korakora ya." 23Botↄↄ te Yesu gɛɛsewↄ kɛɛ Pita te ↄ yako e nyiaa, "Ↄbↄnsam, ta lee me gyaŋ! N ne gyae n ke tↄ maŋ gbɛɛ. Nawolo nyi na Wurubuarɛ kegyaebii te n na gyueŋ ya, mↄna denibalaŋ kegyaebii te n na gyueŋ." 24Keŋte Yesu yako ↄ kaseela baŋ nyiaa, "Akpaa ŋolo ne gyae waa sila maŋ na, ↄ na yɛɛ kpene keŋ ŋon gbagba ne gyae ya, mↄna waa mo ↄ ↄpaŋdaŋ keŋ seele, na waa sila maŋ wee kamasɛ. 25Nawolo nyi walaŋ kamasɛ ŋon ↄ ne gyae waa lɛɛ ŋon gbagba nyeedoŋ na, ke gyae ka lee ↄ nyiŋmaa man. Mↄna walaŋ kamasɛ ŋon ↄ nyeedoŋ da lee ↄ nyiŋmaa man lee maŋ Yesu na me nombia dↄↄ nɛ, waa bese nyiŋ ke. 26Akpaa ŋolo de nyiŋ tɛɛle kei dↄↄ abↄↄ pou te ↄ nyeedoŋ da lee ↄ nyiŋmaa man na, woŋ tↄnↄↄ te waa nyiŋ? Yaa woŋ te walaŋ waa tale mo kyɛɛkee na ↄ nyeedoŋ? 27Maŋ Deniwalaŋ Bu ŋon na me kpilala dɛɛ lee adido kↄŋ me kya Wurubuarɛ gyoorobiiri man, na me kaa tↄ walaŋ kamasɛ kom lee ↄ tom keŋ ↄ be yɛɛ nɛ man. 28Ampaŋ yaa mɛɛ yako ŋon ɛ ke nyii nyiaa, baale seŋɛɛ ɛ man kɛbo keŋ bↄↄ gyae baa yeŋ ya, kelii debaŋ keŋ maŋ Deniwalaŋ Bu ŋon maa lese ma wose wola me gyoorobiiri man."

will be added

X\