Mateo 15

1Keŋte Farasiitena na Gyudatena mmaraa wolala baŋ baale korowↄ lee Gyerusalɛm donↄↄ man gyu ke bↄↄse Yesu nyiaa, 2"Weera dↄↄ te n kaseela baŋ bee di da beneŋ amanberɛse dↄↄ ya? Nawolo nyi bↄↄ ne faafo be nyiŋmaase ŋgba mena keŋ da beneŋ amanberɛse nawolo nɛ pɛte baa di ya!" 3Keŋte Yesu tiranↄↄ fa wↄ nyiaa, "Weera dↄↄ te ɛmɛɛ mↄ, lee ɛ beneŋ amanberɛse dↄↄ te ɛ bee di Wurubuarɛ mmaraase dↄↄ ya?" 4Nawolo nyi Wurubuarɛ yakowↄ nyiaa, "Bu n kya na n naa, te nyaŋ ŋon n falaa n kya yaa n naa na, kaboena nyi baa ko neŋ." 5Mↄna ɛmɛɛ ne yako nyiaa, "Akpaa ŋolo de yako ↄ kya yaa ↄ naa nyi, 'Kpene keŋ nafↄ me dana maa fa neŋ nɛ, yɛɛ Wurubuarɛ wui.' 6Mena dↄↄ be kaboena nyi ↄtenate waa mo kpene kenaŋ fa ↄ lolala ya. Nnɛ na ɛ ne yako baa nyi ↄtenate na bu ↄ kya na ↄ naa na waa yɛɛ kpene keŋ kaboena nyi waa yɛɛ fa wↄ nɛ ya. Kei nawolo baa nyi lee ɛ beneŋ amanberɛse dↄↄ, ɛ te bɛɛ kpene keŋ Wurubuarɛ kpa yaa yɛɛ nɛ. 7Ɛmɛɛ baŋ ɛ na beo ɛ wose, Wurubuarɛ nombia ŋan ↄ be tɛɛ ↄ dekpeŋkpeŋgyↄↄre Yesaya dↄↄ yako see lee ɛ wose man nɛ yɛɛ ampaŋ. Ↄ yakowↄ nyiaa, 8'Balaŋ kɛwↄ na mo be nↄↄ bo yako nyi bee bu maŋ, mↄna be konↄↄse man na, bↄↄ na mo maŋ yɛɛ kolo ya. 9Bɛɛ som maŋ bo yakaa, nawolo nyi mmaraase ŋan denibalaŋ gbagba be kyaa yɛɛ nɛ, ŋan te bɛɛ mo wola balaŋ beo wↄ nyi ŋe yɛɛ maŋ Wurubuarɛ mmaraase ŋa.' " 10Keŋte Yesu besewↄ baake balaŋ baŋ pou kↄŋ ↄ gyaŋ te ↄ yako wↄ nyiaa, "Ɛ popou ɛ tei me gyaŋ, na ɛ ke nyii nombia kɛŋa man nideli. 11Na kpene keŋ na gyoo walaŋ nↄↄman nɛ ne yɛɛ na e ayimɛɛ ya, mↄna kpene keŋ na lee ↄ nↄↄman nɛ, keŋ ne yɛɛ na e ayimɛɛ." 12Keŋte Yesu kaseela baŋ kↄŋawↄ ↄ gyaŋ kaa bↄↄse nyiaa, "Ŋgba n gyeŋ nyi debaŋ keŋ Farasiitena baŋ be nyii nombia ŋan na, te yɛɛ wↄ gyoŋ ya?" 13Keŋte Yesu tiranↄↄ fa wↄ nyiaa, "Daŋ kamasɛ keŋ ka te yɛɛ nyi me kya ŋon ↄ kyaa adido nɛ duu na ke ya na, waa kulu ke na ke lila pou ke leki. 14Ɛ tina Farasiitena benaŋ yela botↄↄ, be yɛɛ ŋgba siayɛlɛɛsatena baŋ bɛɛ wola siayɛlɛɛsatena gbɛɛ nɛ. Akpaa siayɛlɛɛsate na wola siayɛlɛɛsate gbɛɛ nɛ, be bala pou baa kaa yala bↄↄ man bo." 15Botↄↄ te Pita yako e nyiaa, "De Gbeŋgyoo, lese dudu kei asɛɛ fa daa." 16Keŋte Yesu bↄↄse ↄ kaseela baŋ nyiaa, "Keŋ dↄↄ ɛmɛɛ mↄ nyeeya ta yem? 17Keŋ dↄↄ ɛ ba gyeŋ nyi kpene kamasɛ keŋ da gyoo walaŋ nↄↄman na, ne gyu ka gyoo ↄ dubulu man na ke ta bese lee ↄ wose man yee? 18Mↄna nombii kamasɛ keŋ na lee walaŋ nↄↄman nɛ, na lee bo ↄ konↄↄ man, te keŋ ne yɛɛ na e ayimɛɛ. 19Nawolo nyi walaŋ konↄↄ man te nombiakumɛɛ ŋgba, balaŋ kako, na yale kewↄlɛɛ na kafoŋ na ŋmɛɛleŋ na balaŋ nↄↄ kekɛrɛɛ na balaŋ yela kewↄlɛɛ na lee. 20Mena abↄↄ kɛŋa ne yɛɛ na walaŋ ayimɛɛ, mↄna akpaa ŋolo te faafo ↄ nyiŋmaase pɛte waa di ya nɛ, ke bɛɛ yɛɛ e ayimɛɛ ya." 21Yesu ka lee botↄↄ nɛ, ↄ wↄŋa ↄ wose lee botↄↄ gyu Tae na Sidↄn donↄↄse ŋan yenaŋ. 22Keŋte Kaanan alo ŋolo leewↄ botↄↄ yenaŋ kↄŋ Yesu gyaŋ kaa wii fa e nyiaa, "Me Gbeŋgyoo, gyoo Defidi ↄ naanabii, wii me waraŋase! Feliŋkum doo me bu alebubii man, te kɛɛ naase e diyem nideli." 23Mↄna Yesu te yako daale ya. Mena dↄↄ ↄ kaseela baŋ waase e nyiaa, "Lↄ alo ŋon gbɛɛ na waa ta, nawolo nyi ↄ ne fae yeesa tↄ daa deŋela." 24Keŋte Yesu yako alo ŋon nyiaa, "Iseraetena baŋ bↄↄ yoo Wurubuarɛ gbɛɛ nɛ baageŋ gyaŋ te Wurubuarɛ kpila maŋ." 25Mↄna alo ŋon kↄŋawↄ kaa buŋ Yesu nawↄↄ tɛɛ waase e nyiaa, "Me Gbeŋgyoo, lɛɛ maŋ!" 26Keŋte Yesu yako alo ŋon nyiaa, "Tekaboena nyi baa mo bia weenɛɛ fa babaase ya." 27Botↄↄ te alo ŋon mↄ sɛɛwↄ nyiaa, "Ayi, me Gbeŋgyoo, doo mena, mↄna babaase baa tale fiu weenɛɛ ŋan be gbeŋgyoo ne dii te ŋɛɛ yale tɛɛle man nɛ di." 28Keŋte Yesu yako alo ŋon nyiaa, "Alo n kelɛɛdi boe. Kpene keŋ n ne gyae nɛ, dɛɛkↄŋ mena fa neŋ." Debokenaŋ man te ↄ bu ŋon kawee taŋawↄ. 29Yesu ka lee botↄↄ nɛ, te ↄ tɛɛwↄ na Galelia boo keŋ nↄↄ nↄↄ. Keŋte ↄ gyuuwↄ ka gyeŋ bulabii daale gyu ke kyaa ke dↄↄ. 30Balaŋ burum moo be kaweesetena kↄŋ ↄ gyaŋ. Kaweese ŋgba baŋ be nawↄↄ ba yekee, na baŋ be sia be yɛlɛɛ na ↄtakasese na omumuuse na kaweese kpookpoo nɛ. Keŋte Yesu kyↄↄ be popou. 31Balaŋ baŋ kena nyi baŋ be nawↄↄ ba yekee ne tɛɛ, te omumuuse ne kolosi te ↄtakasese wose ne yɛɛ wↄ doŋ, te siayɛlɛɛsatena sia ne naa nɛ, doo be nↄↄ. Keŋte ba lese Iseraetena Wurubuarɛ ŋon yele. 32Keŋte Yesu baake ↄ kaseela baŋ kↄŋ ↄ gyaŋ te ↄ yako wↄ nyiaa, "Balaŋ kɛwↄ nombia dana maŋ waraŋase, nawolo nyi gyɛŋ weeya kpaakpaa atooro yaa ŋgba be kyaa me gyaŋ te be te dii ta kolo ya nɛ. Mↄↄ ne gyae maa lↄ wↄ gbɛɛ na tanam ya, nawolo nyi be sia de kaa biri wↄ gbɛɛnaa man." 33Botↄↄ te ↄ kaseela baŋ bↄↄse e nyiaa, "Aleŋ yaa dee nyiŋ weenɛɛ fa balaŋ burum kɛwↄ ŋale nsana kɛbo?" 34Keŋte Yesu bↄↄse wↄ nyiaa, "Bodobodose aŋmoŋ te ɛ dana?" Te be tiranↄↄ fa e nyi, "Bodobodose nyetooro na kpebia buruburu akalansɛɛ baale te de dana." 35Keŋte Yesu yela balaŋ baŋ tisiwↄ kyakee tɛɛle man. 36Ↄ moo bodobodose nyetooro ŋan, na kpebia baŋ te ↄ fanewↄ fa Wurubuarɛ karaŋ, te ↄ kɛrɛɛ ŋa mo fa ↄ kaseela baŋ. Keŋte ↄ kaseela baŋ mↄ moo ŋa kpɛlɛɛ balaŋ baŋ. 37Balaŋ baŋ pou diiwↄ baa. Te ↄ kaseela baŋ tↄↄsee buruburu akaŋ ŋan na, be nyiŋa doŋase nyetooro. 38Balaŋ baŋ bↄↄ di weenɛɛ ŋan nɛ, be yaanↄↄle yɛɛ baala kakpoŋse banaara (4000). Ba te kala ala na bia kpu ya. 39Yesu ke lↄ balaŋ baŋ gbɛɛ taŋ nɛ, ↄ gyoowↄ degbele man te ↄ gyuu tɛɛle keŋ bɛɛ baake ke nyi Magadan nɛ dↄↄ.

will be added

X\