Mateo 14

1Mena debaŋ kenaŋ man te gyoo Herode ŋon ↄ ne kɛɛ Galelia tɛɛle dↄↄ nɛ, nyii Yesu wose man nombia. 2Keŋte ↄ yako ↄ tewulɛɛ nyiaa, gyae ke yɛɛ Gyↄn Wurubuarɛ loŋsↄↄre ŋon bese la foŋ lee yeŋ man kↄŋ nɛ. Mena dↄↄ te ↄ ne tale yɛɛ gyakoloŋ nombia nɛ. 3Nawolo nyi gyoo Herode gbagba yele la be kyaŋa Gyↄn te be bake e, te ba moo e ke tↄ deni lee ↄ kegyia Filipo wɛɛle Herodia dↄↄ. 4Kpene keŋ dↄↄ gyoo Herode be yɛɛ mena yɛna nyi, Gyↄn yako e nyi gbɛɛ be doo nyi waa mo ↄ kegyia Filipo wɛɛle Herodia yala ya. 5Gyoo Herode gyaewↄ nyi nafↄ waa ko Gyↄn mↄna ↄ ne yee Gyudatena baŋ, nawolo nyi bɛɛ lɛɛ Gyↄn di nyi ↄ yɛɛ Wurubuarɛ dekpeŋkpeŋgyↄↄre e. 6Wee daale gyoo Herode kee di ↄ kalolawee nɛ, Herodia bu alebu kↄŋawↄ kaa sↄe balaŋ baŋ pou siaman, te yɛɛ gyoo Herode kyeo. 7Mena dↄↄ gyoo Herode kaŋa ntam yako alebu ŋon nyiaa, "Kpene kamasɛ keŋ n gyae nyi maa fa neŋ na, yako na maa fa neŋ." 8Keŋte alebu ŋon ↄ naa feefuwↄ do ↄ bu nyi waa yako nyiaa, "Mɛɛ gyae n ke kara Gyↄn Wurubuarɛ loŋsↄↄre nyee do tasa taŋtaŋalaŋ man fa maŋ debokeiman." 9Nombia ŋan takaa gyoo ŋon, mↄna ntam keŋ ↄ be kam na balaŋ baŋ bↄↄ yilaa botↄↄ dↄↄ nɛ, ↄ yela be yɛɛ alebu ŋon kegyaebii fa e. 10Mena dↄↄ ↄ yela be gyuuwↄ ke kara Gyↄn nyee deni keŋ man. 11Keŋte ba moo Gyↄn nyee keŋ do tasa taŋtaŋalaŋ man kↄna alebu ŋon, te ↄ moo ke gyina ↄ naa. 12Kenaŋ wↄle te Gyↄn kaseela gyuuwↄ ka mo Gyↄn woo ŋon ke wuu, te be gyuuwↄ ke yako Yesu. 13Yesu ke nyii Gyↄn Wurubuarɛ loŋsↄↄre yeŋ nɛ, ↄ gyoowↄ debgele man laŋ yenaŋ daale gyu ke kyaa waageŋ kooŋ. Balaŋ dikpii keŋ ke nyii nyi ↄ te lam nɛ, te ba leewↄ be donↄↄse man, mo na be nawↄↄ sila e. 14Yesu ke tisi lee degbele keŋ man, te ↄ kena balaŋ dikpii keŋ nɛ, be nombia yɛɛ e waraŋase te ↄ kyↄↄ kaweesetena baŋ pou bↄↄ sila wↄ gyu nɛ. 15Ke lii balinↄↄ nɛ, Yesu kaseela baŋ kↄŋawↄ ↄ gyaŋ kaa yako e nyiaa, "De Gbeŋgyoo, tɛɛ ne yuu te kɛbo mↄ yɛɛ ŋale nsana ke. Lↄ balaŋ baŋ gbɛɛ, na baa gyu akuraase ŋan benaa nɛ man na be kaa gyae kolo lɛɛ di." 16Keŋte Yesu yako wↄ nyiaa, "Tekaboena nyi baa ta ya. Ɛmɛɛ gbagba ɛ gyae kolo fa wↄ na baa di." 17Botↄↄ te ↄ kaseela baŋ yako e nyiaa, "Bodobodose abiliŋ anoŋ na kpebia bala pɛ te de dana." 18Keŋte Yesu yako wↄ nyiaa, "Ɛ mo ŋa kↄna maŋ." 19Te ↄ yela balaŋ baŋ tisiwↄ kyakee tɛɛle man. Keŋte Yesu moo bodobodose anoŋ na kpebia bala baŋ, te ↄ gyinaa ↄ nyee adido te ↄ fanewↄ do Wurubuarɛ nↄↄ, te ↄ kɛrɛɛ ŋa te ↄ moo ŋa fa ↄ kpilala baŋ, te baŋ mↄ moowↄ kpɛlɛɛ balaŋ baŋ. 20Balaŋ baŋ pou diiwↄ baa, te be tↄↄsee weenɛɛ buruburu akaŋ ŋan na, be nyiŋa doŋase kufu ala (12). 21Balaŋ baŋ bↄↄ di weenɛɛ ŋan nɛ, be yaanↄↄle gyae ke yɛɛ ŋgba baala kakpoŋse banoŋ (5000) nɛ. Ba te kala ala na bia kpu ya. 22Debokenaŋ man te Yesu yela ↄ kaseela baŋ gyoowↄ degbele man kyaŋ gbɛɛ gyu boo keŋ diŋgyiŋ na waa nyiŋ lↄ balaŋ baŋ gbɛɛ. 23Yesu ke lↄ balaŋ baŋ gbɛɛ taŋ nɛ, ↄ gyuuwↄ bula dↄↄ waageŋ ↄ kaa fane. Kelii balinↄↄ nɛ, na Yesu waageŋ kaa la botↄↄ. 24Debaŋ kenaŋ na degbele keŋ te lii lem, na feliŋ dinaa daale mↄ ne gyↄↄ degbele keŋ wosi loŋ keŋ dↄↄ. 25Tɛɛ kɛɛ bee kena nɛ, Yesu tɛɛwↄ loŋ keŋ dↄↄ ↄ ne gyu ↄ kaseela baŋ gyaŋ. 26Ↄ kaseela baŋ kena e ↄ dↄŋɛɛ loŋ keŋ dↄↄ ↄ ne kↄŋ nɛ, be wↄe lↄↄ wↄ gbaa. Keŋte be kpa "Ↄ yɛɛ woo e," te be fae yeesa nawolo nyi gyakoloŋ te kyaŋ wↄ. 27Debokenaŋ man te Yesu kolosiwↄ fa wↄ nyi, "Ɛ nyiŋ konↄↄ, ɛ na yee ya, maŋ e." 28Botↄↄ te Pita yako e nyiaa, "Me Gbeŋgyoo, akpaa nyaŋ e na, yela maa ta loŋ keŋ dↄↄ kↄŋ n gyaŋ." 29Keŋte Yesu yako e nyiaa, "Kↄŋ" te Pita leewↄ degbele keŋ man ta loŋ keŋ dↄↄ ↄ ne gyu Yesu gyaŋ. 30Mↄna Pita kena mena keŋ feliŋ keŋ ne gyↄↄ loŋ keŋ dↄↄ nɛ, gyakoloŋ gyoo e te ↄ fiasɛɛ ↄ na gyoo loŋ keŋ man. Keŋte ↄ fae yeesa nyiaa, "Me Gbeŋgyoo, lɛɛ maŋ!" 31Debokenaŋ man te Yesu tenee ↄ nyiŋmaa kyaŋ e te ↄ yako e nyiaa, "Baale, n kelɛɛdi ta boo ya. Weera dↄↄ te n lɛɛ maŋ aŋmaareŋ n konↄↄ man?" 32Yesu na Pita ka gyeŋ gyoo degbele keŋ man nɛ, te feliŋ keŋ tinaa kegyↄ yela. 33Botↄↄ te baŋ be doo degbele keŋ man nɛ, korowↄ buŋ Yesu nawↄↄtɛɛ te be yako e nyiaa, "Nyaŋ yɛna Wurubuarɛ bu ŋon ampaŋ." 34Be ka toŋ boo keŋ nɛ, be gyuuwↄ kelii tɛɛle keŋ bɛɛ baake ke Genesareti nɛ dↄↄ. 35Balaŋ baŋ be kyaa tɛɛle kenaŋ dↄↄ ka gyeŋ nyi Yesu ŋonaŋ nɛ, be kpiliiwↄ gyu ke yako donↄↄse ŋan pou kyaa botↄↄ yenaŋ nɛ. Mena dↄↄ balaŋ moo be kaweesetena pou kↄŋ Yesu gyaŋ. 36Keŋte be waase e nyi waa yela kaweesetena baŋ ka mo be nyiŋmaase tina ↄ kegba nↄↄbii paŋpaŋ bo gba. Te baŋ pou bↄↄ tina ↄ kegba keŋ nɛ, wose yɛɛ wↄ doŋ.

will be added

X\