Mateo 12

1Te di weeya ala ya nɛ, Yesu na ↄ kaseela gyuuwↄ ka mo wↄↄ daale man. Na weenɛɛ ŋan seŋɛɛ wↄↄ kenaŋ man nɛ yɛɛ ŋgba kefaa nɛ. Tanam kyaŋa ↄ kaseela baŋ te ba kpera ŋaale posaa bɛɛ tao. Na wee kenaŋ yɛɛ Gyudatena kefɛɛfowee ke. 2Farasiitena baŋ kena mena nɛ be yako Yesu nyiaa, "Kɛɛ! N kaseela ne yɛɛ kpene keŋ da mmaraa bɛɛ fa gbɛɛ nyi dɛɛ yɛɛ da kefɛɛfowee ya." 3Botↄↄ te Yesu mↄ bↄↄse wↄ nyiaa, "Ɛ te kala ta lee Wurubuarɛ nombia aŋmaraseŋ see ŋan man kpene keŋ gyoo Defidi be yɛɛ debaŋ keŋ tanam be kyaŋ ŋon na ↄ balaŋ baŋ nɛ yee? 4Ↄ gyoowↄ Wurubuarɛ ↄsom deni dinaa keŋ man te ↄ ka moo weenɛɛ ŋan bↄↄ mo deesi fa Wurubuarɛ, keŋ nafↄ tekaboena nyi walaŋ ŋon ↄ te yɛɛ Wurubuarɛ sae e ya waa di ya nɛ, te ↄ diiwↄ te ↄ moo ŋaale mↄ fa ↄ balaŋ baŋ be silana e nɛ. 5Yaa ɛ ta bese ta kala lee Wurubuarɛ mmaraa tↄne keŋ man nyi, saese baŋ be kyaa Wurubuarɛ ↄsom deni dinaa keŋ man nɛ, deesiwↄ fa Wurubuarɛ kefɛɛfowee keŋ mↄna ŋolo te bu wↄ fↄↄ nyi ba te walaa ke yee? 6Ampaŋ yaa mɛɛ yako ŋon nyiaa, walaŋ ŋon ↄ kela Wurubuarɛ ↄsom deni dinaa keŋ nɛ kyaa kɛbo. 7Wurubuarɛ yakowↄ ↄ nombia aŋmaraseŋ see man nyiaa, 'Mɛɛ gyae bo nyi yaa wii balaŋ waraŋase, na kedeesa te mɛɛ gyae ya. Nyi yeŋ nyii nombia kɛŋa man nɛ, nafↄ ɛ be gyae ɛ ke bu balaŋ baŋ be nombia dei nɛ fↄↄ ya.' 8Nawolo nyi maŋ Deniwalaŋ Bu ŋon yɛna kefɛɛfowee keŋ gbeŋgyoo." 9Yesu ka lee botↄↄ nɛ, ↄ gyuuwↄ Gyudatena ↄsom deni man. 10Na balee ŋolo kyaa botↄↄ keŋ ↄ baam ba yem. Lee mena keŋ bɛɛ gyae gbɛɛ na baa mo nombiikum seele Yesu dↄↄ nɛ, be bↄↄse e nyi da mmaraa ne fa daa gbɛɛ nyi dɛɛ kyↄ walaŋ kawee da kefɛɛfowee? 11Keŋte Yesu bↄↄse wↄ nyiaa, "Ɛ man woŋti te akpaa ↄ dana nam dokoloŋ te ↄ yale gyoo bↄↄ man kefɛɛfowee na, waa bɛɛ nyi ↄ ba lese e ya? 12Deniwalaŋ kela nam. Mena dↄↄ gbɛɛ doo nyi dɛɛ yɛɛ deeli kefɛɛfowee." 13Botↄↄ te Yesu yako balee ŋon nyiaa, "Tenee n baam keŋ." Keŋte balee ŋon mↄ tenee ke, te ↄ baam keŋ yɛɛ doŋ ŋgba alate keŋ nɛ. 14Lee mena dↄↄ Farasiitena baŋ leewↄ gyu kebake, lee gbɛɛ keŋ man baa mo na baa ko Yesu. 15Yesu kena mena nɛ, ↄ wↄŋa ↄ wose lee yenaŋ. Balaŋ burum sila e te ↄ kyↄↄ be man kaweesetena baŋ pou, 16mↄna ↄ faree wↄ nyi be na yako ↄ wose man nombia fa ŋolo na ŋolo ya. 17Kei yele la Wurubuarɛ nombia ŋan ↄ be tɛɛ ↄ dekpeŋkpeŋgyↄↄre Yesaya dↄↄ yako nɛ kↄŋawↄ ampaŋ. Yesaya yakowↄ nyiaa, Wurubuarɛ kpa 18"Kei yɛna me tobaale ŋon mↄↄ lese e, ŋon te mɛɛ gyae te me sia na gye ↄ dↄↄ. Maa mo me feliŋ do ↄ man, na waa yako debiise pou nyi debaŋ keŋ maa lɛɛ ba nyee nɛ te lii. 19Ↄ be gyae waa ta gyae kale yaa waa ta fae yeesa na abↄnterese na balaŋ ke nyii ya. 20Waa nyiŋ konↄↄ fa baŋ be nombia dana waraŋase nɛ, te ↄ be gyae waa yɛɛ baŋ bↄↄ taŋ doŋ mↄ nɛ akpanyaŋnyaŋ ya. Debaŋ kamasɛ na waa nyiŋ konↄↄ fa mena balaŋ kɛwↄ dinↄↄ, keŋ nyi ↄ be gyae waa yɛɛ kolo na ba wose keyↄkↄse wↄ ya mo kelii debaŋ keŋ baa nyiŋ nyeekelɛɛ. 21Te debiise balaŋ pou baa mo be loo gyakaa ↄ dↄↄ bo." 22Wee daale ba moo walaŋ ŋon feliŋkum doo ↄ man, te ↄ sia be yɛlɛɛ te ↄ bɛɛ tale kolosi mↄ ya nɛ kↄŋ Yesu gyaŋ. Keŋte Yesu kyↄↄ e te ↄ kolosiwↄ te ↄ sia mↄ gyuusuwↄ. 23Nombia kɛŋa doo balaŋ baŋ pou nↄↄ te be bↄↄse dↄŋa nyiaa, "Na kei yɛna gyoo Defidi ↄ naanabii ŋon baa yaa?" 24Mↄna Farasiitena baŋ kenyii nombia kɛŋa nɛ be yakowↄ nyiaa, "Feliŋkumɛɛ pou gyoo Bɛlisɛbu faa na balee kei doŋ te ↄ ne tale gegi feliŋkumɛɛ nɛ." 25Mↄna Yesu gyeŋ kpene keŋ bɛɛ gyueŋ nɛ te ↄ yako wↄ nyiaa, "Tɛɛle kamasɛ keŋ ke man balaŋ de kpase ba wose kpookpoo bee yoo na dↄŋa na, tɛɛle kenaŋ be gyae ke de ya. Mena mↄ te donↄↄ yaa dekpaŋalaŋ daale man balaŋ de kpase ba wose kpookpoo bee yoo na dↄŋa na, dekpaŋalaŋ kenaŋ ne yɛlɛɛ bo. 26Akpaa nyi ba mo ↄbↄnsam doŋ gegi feliŋkumɛɛ nɛ, na keŋ nawolo baa nyi ↄ gyoori keŋ man balaŋ te kpase ba wose kpookpoo bee yoo na dↄŋa. Dekↄŋ mena na, sena te ↄ gyoori keŋ gyae ke tale seŋ? 27Akpaa nyi Bɛlisɛbu doŋ te mɛɛ mo gegi feliŋkumɛɛ na, amↄte doŋ yaa ɛ balaŋ baŋ mↄ na mo gegi feliŋkumɛɛ? Mena na ɛmɛɛ gbagba ɛ balaŋ ne gyae la baa bu ŋon fↄↄ. 28Te akpaa Wurubuarɛ doŋ te mɛɛ mo gegi feliŋkumɛɛ na, kenaŋ na ɛ wulaa gyeŋ nyi Wurubuarɛ gyoori keŋ taŋ kekↄŋ ɛ gyaŋ." 29Keŋte Yesu besewↄ yako wↄ nyiaa, "Sena te ŋolo waa tale gyu doŋte ŋolo dɛɛ na ↄ kaa mo ↄ kolo, keŋ nyi ↄ te di doŋte ŋon dↄↄ ya? Nyi akpaa ↄ di doŋte ŋon dↄↄ te ↄ bake e see nɛ, kenaŋ na waa tale kuu wa abↄↄ pou. 30Walaŋ kamasɛ ŋon ↄ be kpuɛ na maŋ ya nɛ na ↄ ne kↄla maŋ, te walaŋ kamasɛ ŋon mↄ ↄ bɛɛ kyↄ maŋ na dee yilaa balaŋ fa Wurubuarɛ ya nɛ, na ↄ ne yaasee wↄ bo. 31Mena dↄↄ mɛɛ yako ŋon ɛ ke nyii nyiaa, Wurubuarɛ waa mo balaŋ nombiakumɛɛ na mmusuo nombia ŋan bɛɛ yako nɛ pou kyɛɛ wↄ, mↄna walaŋ ŋon waa mo mmusuo nombia gyakaa Wurubuarɛ feliŋ ŋon dↄↄ nɛ, Wurubuarɛ be gyae waa mo kyɛɛ e korakora ya. 32Walaŋ kamasɛ ŋon ↄ kolosi nombiikum tia maŋ Deniwalaŋ Bu ŋon nɛ, Wurubuarɛ waa mo kyɛɛ e. Mↄna walaŋ kamasɛ ŋon waa kolosi nombiikum tia Wurubuarɛ feliŋ ŋon nɛ, Wurubuarɛ be gyae waa mo kyɛɛ e gyɛŋ yaa kyoo ya. 33N kɛɛ daŋ dↄↄ nideli te ke de nyiŋ doŋ nɛ, kɛɛ se bia kpaakpaa. Te akpaa n te kɛɛ ke dↄↄ nideli ya te kawee de kyaŋ ke na, kɛɛ se bia kumɛɛ bo. Nawolo nyi daŋ kamasɛ nɛ, ke bia te bɛɛ mo gyeŋ ke dinↄↄ. 34Ɛmɛɛ baŋ ɛ dana nombiakumɛɛ ŋgba doma nɛ, sena te ɛmɛɛ balaŋ kumɛɛ kɛwↄ ɛ ke tale kolosi nombia kpaakpaa? Nawolo nyi kpene kamasɛ keŋ be wulu walaŋ konↄↄ man nɛ, keŋ na lee la ↄ nↄↄman. 35Mena ke te denibalaŋ mↄ doo. Walaŋ kpaakpaate kamasɛ na lese abↄↄ kpaakpaa ŋan doo ↄ konↄↄ man nɛ wola, te walaŋkum kamasɛ mↄ na lese nombiakumɛɛ ŋan doo ↄ konↄↄ man nɛ wola. 36Mena dↄↄ mɛɛ yako ŋon ɛ ke nyii nyiaa, nombiikum kamasɛ keŋ gyae ka lee walaŋ kamasɛ nↄↄman nɛ, wee keŋ Wurubuarɛ waa di balaŋ pou nombia tɛɛle kei dↄↄ nɛ, ↄtenate waa seŋ Wurubuarɛ siaman na waa tira ke nↄↄ fa e. 37Nawolo nyi walaŋ kamasɛ nↄↄwoya te baa mo di ↄ nombia, na baa naa nyi ↄ dii deŋele, yaa ↄ dii fↄↄ." 38Botↄↄ te Farasiitena na mmaraa wolala baŋ baale yako Yesu nyiaa, "De Gbeŋgyoo, dɛɛ gyae n ke yɛɛ gyakoloŋ nombia wola daa." 39Keŋte Yesu tiranↄↄ fa wↄ nyiaa, "Ɛmɛɛ gyɛŋ wee kei balaŋ, ɛ yɛɛ nombiakumɛɛyɛɛrawↄ te ɛ be yee Wurubuarɛ ya. Ɛ ne gyae nyi maa yɛɛ gyakoloŋ nombia na ɛ kena, mↄna mↄↄ gyae maa yɛɛ gyakoloŋ nombii kamasɛ kpu na keŋ be kↄŋ Wurubuarɛ dekpeŋkpeŋgyↄↄre Gyona dↄↄ nɛ ya. 40Mena keŋ Gyona be doo kpebii dinaa ŋon tↄↄman weeya atooro nelim na ka weese nɛ, mena te maŋ Deniwalaŋ Bu ŋon mↄ maa doo tɛɛle tↄↄman weeya atooro nelim na ka weese. 41Wee keŋ Wurubuarɛ waa di balaŋ nombia nɛ, Niniwetena baa koro seŋ na baa bu gyɛŋ wee kei balaŋ fↄↄ, nawolo nyi debaŋ keŋ Gyona be kolosi Wurubuarɛ nombia ŋan fa wↄ nɛ, be kyɛɛkeewↄ lee be gbɛɛneŋ kumɛɛ man te be kↄŋawↄ Wurubuarɛ gyaŋ. Mɛɛ yako ŋon baa nyiaa, walaŋ ŋon ↄ kela Gyona nɛ kyaa kɛbo. 42Mena mↄ te wee keŋ Wurubuarɛ waa di balaŋ nombia nɛ, Seba gyoo ŋon ↄ yɛɛ alo e te ↄ ba lee ata yenaŋ nɛ, waa koro seŋ na waa bu gyɛŋ wee kei balaŋ fↄↄ. Nawolo nyi ↄ ke nyii Solomↄn nyansa nombia ŋan nɛ, ↄ tɛɛwↄ leenaŋ tɛɛle ↄto kↄŋ kaa nyii ŋa. Mɛɛ yako ŋon baa nyiaa, walaŋ ŋon ↄ kela gyoo Solomↄn ŋonaŋ nɛ kyaa kɛbo." 43Keŋte Yesu yako wↄ nyiaa, "Feliŋkum da lee walaŋ man nɛ ↄ ne tɛɛ kila kɛo tɛɛle awolɛɛ ↄ ne gyae dekyae, mↄna ↄ bee nyim ya. 44Akpaa ↄ te nyiŋ dekyae ya na ↄ ne yako ↄ wose nyiaa, maa bese gyu ma dekyae bene keŋ mↄↄ lee nɛ man. Akpaa ↄ kↄŋ kaa naa nyi ba te gbee botↄↄ desina ke nideli keŋ nyi ayimɛɛ kamasɛ be doo ya nɛ, 45ↄ na bese gyu ka mo feliŋkumɛɛ nyetooro, ŋan ŋe dana nombiakumɛɛ kela e nɛ kpu na ↄ wose na be kaa kyaa walaŋ ŋonaŋ man. Dekↄŋ mena na, walaŋ ŋonaŋ dinↄↄ na bese wↄlɛɛ kela ↄ kekyaa gyaŋgba keŋ. Mena ne gyae la ke kↄŋ gyɛŋ wee kei balaŋ kumɛɛ dↄↄ." 46Yesu ke gyakaa ↄ ne kolosi fa balaŋ baŋ nɛ, ↄ naa na ↄ naabia kↄŋawↄ kaa seŋ debↄↄ man keŋ bɛɛ gyae gbɛɛ baa kolosi na e. 47Botↄↄ te ŋolo yako Yesu nyiaa, "N naa na n naabia seŋɛɛ debↄↄ man bɛɛ gyae baa naa neŋ." 48Keŋte Yesu bↄↄse wↄ nyiaa, "Amↄte yɛna me naa, te bomↄ yɛna me naabia?" 49Keŋte ↄ tenee ↄ nyiŋmaa wola ↄ kaseela baŋ te ↄ yakowↄ nyiaa, "Kɛwↄ yɛna me naa na me naabia. 50Nawolo nyi walaŋ kamasɛ ŋon ↄ ne yɛɛ me kya ŋon ↄ kyaa adido nɛ kegyaebii na, ŋon yɛna me naabu na me deesi na me naa."

will be added

X\