Mateo 11

1Yesu ke kolosi nombia kɛŋa fa ↄ kaseela kufu bala baŋ taŋ nɛ, ↄ leewↄ botↄↄ gyu donↄↄse akaŋ ŋan kyaa Galelia tɛɛle man nɛ ke kolosi Wurubuarɛ nombia fa wↄ, te ↄ wola wↄ ŋe man nideli. 2Mena debaŋ kenaŋ na ba te kyaŋ Gyↄn Wurubuarɛ loŋsↄↄre tↄ deni. Ↄ ke nyii kpene keŋ Yesu ne yɛɛ nɛ, ↄ kpila ↄ kaseela nyi 3baa gyu ke bↄↄse Yesu nyiaa, "Nyaŋ yɛna walaŋ ŋon Wurubuarɛ be yako see nyi nyaŋ ke kↄŋ nɛ yaa, dɛɛ kɛɛ walaŋ wↄle gbɛɛ?" 4Be ke gyu ke bↄↄse Yesu nɛ te ↄ tiranↄↄ fa wↄ nyiaa, "Ɛ bese gyu ke yako Gyↄn kpene keŋ ɛ be nyii na ɛ deŋela, na ŋan ɛ be naa na ɛ sia. 5Siayɛlɛɛsatena ne naa, ↄtakasese ne tɛɛ, baŋ bɛɛ wee kawee yayam nɛ kaweese te taŋ, te deŋela atↄↄsatena ne nyii. Woya ne foŋii, te bɛɛ yako Wurubuarɛ nombia ŋan mↄ fa ayematena. 6Walaŋ kamasɛ ŋon ↄ bɛɛ lɛɛ maŋ aŋmaareŋ nyi maŋ yɛna ŋon Wurubuarɛ be kpili ya nɛ, ŋon na nyeebam." 7Gyↄn kpilala baŋ ka bese bee gyu nɛ, Yesu kolosi Gyↄn wose man nombia fa balaŋ dikpii keŋ te ↄ bↄↄse wↄ nyiaa, "Ɛ ke gyu Gyↄn gyaŋ depampaa dinaa keŋ man nɛ, woŋ te ɛ gyaewↄ nyi ɛ kena? Ŋale keŋ feliŋ ne gyↄ ke wosi nɛ? 8Akpaa na keŋ ya na, woŋ te ɛ gyuuwↄ ɛ kaa kɛɛ? Walaŋ ŋon ↄ doona abↄↄ kpaakpaa nyiŋan yaa? Baŋ bee mia mena nɛ, ne kyaa bo gyooneŋ dɛɛ. 9Ɛ yako maŋ maa nyii, woŋ te nafↄ ɛ gyuuwↄ nyi ɛ kaa kɛɛ? Wurubuarɛ dekpeŋkpeŋgyↄↄre? Ampaŋ yaa mɛɛ yako ŋon nyi, ŋon ɛ be naa nɛ gba kela Wurubuarɛ dekpeŋkpeŋgyↄↄre. 10Nawolo nyi Gyↄn kei yɛna ŋon bↄↄ yako ↄ wose man nombia Wurubuarɛ nombia aŋmaraseŋ see man nɛ nyiaa, 'Wurubuarɛ kpa, mee kpila me kpilale ke ta n siaman, ŋon ne gyae la waa desina n gbɛɛ fa neŋ.' 11Keŋte Yesu besewↄ yako wↄ nyiaa, mɛɛ yako ŋon ɛ ke nyii nyiaa, balaŋ baŋ bↄↄ lolo tɛɛle kei dↄↄ nɛ, ŋolo be kyaa keŋ nyi ↄ kela Gyↄn Wurubuarɛ loŋsↄↄre ya. Mↄna Wurubuarɛ gyoori keŋ man nɛ, walaŋ ŋon ↄ yɛɛ kemaasa e koraŋ nɛ, ↄ kela Gyↄn kei. 12Leenaŋ Gyↄn Wurubuarɛ loŋsↄↄre debaŋ kaa lii na gyɛŋ kei nɛ, balaŋ na mo kale na doŋ nombia bo gyaŋee na Wurubuarɛ gyoori keŋ nombia ŋan, te balaŋ baŋ mↄ bɛɛ gyae ke nɛ, na mo siadoŋ bo baa gyoo ke man. 13Nawolo nyi Wurubuarɛ akpeŋkpeŋgyↄↄra, na Wurubuarɛ mmaraase ŋan pou kolosi Wurubuarɛ gyoori keŋ wose man nombia, pɛte Gyↄn Wurubuarɛ loŋsↄↄre kↄŋawↄ. 14Akpaa ɛ ke sɛɛ lɛɛ mena nombia kɛŋa di na, ŋon Gyↄn yɛna Elia ŋon Wurubuarɛ dekpeŋkpeŋgyↄↄre ŋolo be yako see nyi waa bese kↄŋ nɛ. 15Nyaŋ ŋon n dana deŋela anenyiiŋ dei na, tei. 16Keŋte Yesu bↄↄse wↄ nyiaa, woŋ te maa mo gyɛŋ wee kei balaŋ maa na? Sena te be wↄɛ? Be yɛɛ ŋgba bia kyaa la abↄntere man bee yoi nɛ, na bɛɛ fae yeesa yako dↄŋa nyiaa, 17De kpee alowↄle nↄↄneŋse fa ŋon mↄna ɛ te sↄe ya! De kpee lia nↄↄneŋse mↄ fa ŋon, mↄna ɛ te wii ya. 18Gyↄn Wurubuarɛ loŋsↄↄre ŋon kↄŋawↄ na ↄ ne kyaa bake ↄ nↄↄ. Ↄ te nyↄↄ soloŋ kamasɛ ya te ɛ kpa nyi 'Feliŋkumɛɛ doola ↄ man.' 19Maŋ Deniwalaŋ Bu ŋon kↄŋawↄ mee dii mɛɛ nyↄↄ, te ɛ kpa nyi, 'Ɛ kɛɛ balee kei. Ↄ yɛɛ kedikumte na soloŋnyↄↄre e. Ↄ gyoona yɛna lempoolɛɛra na nombiakumɛɛyɛɛra.' Mↄna walaŋ ŋon ↄ dana Wurubuarɛ nyansa nɛ, ↄ tom na wola la." 20Donↄↄse ŋan man Yesu be yɛɛ gyakoloŋ nombia nɛ, ŋe man balaŋ burum te lɛɛ e di na baa kyɛɛkee lee be gbɛɛneŋ kumɛɛ man, na baa kↄŋ Wurubuarɛ gyaŋ ya. Keŋte Yesu kolosiwↄ tia wↄ nyiaa, 21"Ɛmɛɛ Korasintena na Bɛtesaidatena, ɛ laako! Nawolo nyi gyakoloŋ nombia ŋan Wurubuarɛ be yɛɛ ɛ gyaŋ nɛ, nyi akpaa beŋ yɛɛ ŋa Tae na Sidↄn donↄↄse man na nafↄ beŋ te wulaa do titere abↄↄ kyaa mo tↄŋ buraa ba wose, na kawola nyi ba te kyɛɛkee ba agyueŋ lee be gbɛɛneŋ kumɛɛ man kↄŋ Wurubuarɛ gyaŋ. 22Mↄna mɛɛ yako ŋon ɛ ke nyii nyiaa, wee keŋ Wurubuarɛ waa kaa di balaŋ nombia nɛ, waa wii Taetena na Sidↄntena waraŋase kela ŋon. 23Te nɛnɛɛ ɛmɛɛ Kapanumtena, ɛ gyeŋ nyi Wurubuarɛ waa kɛlɛɛ ŋon gyina ŋon adido? Koa, waa yↄkↄse ŋon, na waa mo ŋon do boalaŋ keŋ bɛɛ yem ya nɛ man, na ɛ kena diyem kekpaakekpaa. Nafↄ gyakoloŋ nombia ŋan mↄↄ yɛɛ ɛ man yaa meŋ yɛɛwↄ Sodom donↄↄ man nɛ, nafↄ gyɛŋ ke deŋ sɛɛ ke kyaa. 24Mↄna mɛɛ yako ŋon ɛ ke nyii nyi wee keŋ Wurubuarɛ waa kaa di balaŋ pou nombia nɛ, waa wii Sodomtena waraŋase kela ŋon." 25Mena debaŋ kenaŋ man te Yesu fanewↄ nyiaa, "Me kya, adido na ateta pou Gbeŋgyoo, mɛɛ fa neŋ karaŋ nawolo nyi n ta mo abↄↄ kɛŋa weese nyansatena na baŋ ba gyeŋ nombia nɛ, te n lese ŋa wola balaŋ baŋ be dinↄↄ yɛɛ ŋgba bia nɛ. 26Taata, ma gyeŋ nyi kei yɛna nyaŋ gbagba n kegyaebii." 27Botↄↄ te Yesu yako balaŋ baŋ nyiaa, "Me kya ta mo kpene kamasɛ do maŋ me nyiŋmaa man. Ŋolo ba gyeŋ maŋ ↄ bu ŋon ya, me kya waageŋ kooŋ gyeŋa na maŋ. Ŋolo mↄ ba gyeŋ kya ŋon ya, maŋ ↄ bu ŋon na baŋ maa lese me kya ŋon wola wↄ nɛ, baageŋ ne gyae la baa gyeŋ e." 28Keŋte Yesu besewↄ yako nyiaa, "Ɛmɛɛ baŋ ɛ seelena kasolↄse yuŋnyiŋan te ne takaa ŋon nɛ, ɛ kↄŋ me gyaŋ na maa yela ɛ ke fɛɛfo. 29Ɛ kↄŋ na daa na ŋon ke yɛɛ nↄↄdokoloŋ na ɛ ke kasee maŋ, na ɛ ke nyiŋ wosefɛɛreŋ. Nawolo nyi ma woɛ, te ma te yↄkↄse ma wose mↄ lee me konↄↄ man. 30Nawolo nyi gbɛɛ keŋ dↄↄ maa mo ŋon ta nɛ, be taŋ baŋ ya te kasolↄ keŋ maa bake seele ŋon nɛ, be gyae ke yɛɛ ŋon yuŋ ya."

will be added

X\