Mateo 10

1Yesu baake ↄ kaseela kufu bala baŋ kↄŋ ↄ gyaŋ, te ↄ faa wↄ doŋ keŋ baa mo gegi feliŋkumɛɛ lee balaŋ man, na baa kyↄ kaweese kamasɛ. 2Kpilala kufu bala baŋ yela yaa. Gyaŋgbate ŋon yɛna Simↄn, ŋon ↄ yele daale mↄ yɛna nyi Pita nɛ, na ↄ naabu Anderiase, na Sebedeo bu Gyemisi na ↄ naabu Gyↄn, 3na Filipo na Batolomeo na Tomase na Mateo ŋon nafↄ ↄ yɛɛ lempoolɛɛre e nɛ, na Alfeose bu Gyemisi na Tadeose, 4na Simↄn ŋon ↄ ne gyae ↄ balaŋ nideli nɛ, na Gyudase Isekarↄte ŋon waa kaa lese Yesu fa nɛ. 5Mena kpilala kufu bala kɛwↄ te Yesu kpilawↄ te ↄ faree wↄ nyiaa, "Ɛ na gyu balaŋ baŋ ba te yɛɛ Gyudatenawↄ ya nɛ gyaŋ ya, te ɛ na gyu Samariatena mↄ donↄↄ kamasɛ man ya. 6Mↄna ɛ taŋgbɛɛ gyu Iseraetena baŋ gyaŋ. Be yɛɛ ŋgba namense baŋ bↄↄ yoo nɛ. 7Ɛ gyu na ɛ kolosi Wurubuarɛ nombia fa wↄ nyiaa, 'Wurubuarɛ gyoori keŋ ta benaa.' 8Ɛ kyↄ kaweesetena na ɛ ke gyuusu balaŋ baŋ bↄↄ yekee nɛ, na ɛ ke kyↄ baŋ bɛɛ wee kawee yayam nɛ, na ɛ ke gegi feliŋkumɛɛ lee balaŋ man. Ba moo mena doŋ kei fa ŋon bo yakaa keŋ ɛ te tↄ kom ya, mena dↄↄ ɛmɛɛ mↄ ɛ mo fa wↄ yakaa keŋ ɛ na lɛɛ wↄ kolo ya. 9Ɛ na mo kↄba na kↄba tela ya. 10Ɛ na mo akpo ya, te ɛ na mo kegba alate yaa nkyokota alate yaa gbutu alate tela ya. Nawolo nyi kaboena nyi baa tↄ tomyɛɛre kamasɛ kom. 11Donↄↄ yaa akuraa kamasɛ keŋ man ɛ gyoo nɛ, ɛ taŋgbɛɛ bↄↄse walaŋ ŋon ↄ kaboena te waa lɛɛ ŋon nɛ dↄↄ, na ɛ ke kyaa ↄ gyaŋ kaboena e ka mo lee donↄↄ kenaŋ man. 12Ɛ gyoo dekpaŋalaŋ kenaŋ man nɛ, ɛ do dekpaŋalaŋmantena baŋ nↄↄ nyiaa, Wurubuarɛ wosefɛɛreŋ dɛɛ kyaa ɛ man. 13Nyi akpaa dekpaŋalaŋmantena benaŋ de lɛɛ ŋon nideli na, ɛ sola Wurubuarɛ wosefɛɛreŋ fa wↄ. Te akpaa ba te lɛɛ ŋon nideli ya na, ɛ yela wosefɛɛreŋ keŋ ka bese kↄŋ ɛ gyaŋ. 14Mↄna donↄↄ yaa akuraa kamasɛ keŋ ke man balaŋ de bɛɛ ba te lɛɛ ŋon ya, yaa be te nyii ɛ nombia ŋan ya nɛ, nyi akpaa ɛ na lee botↄↄ na ɛ kpiisi ɛ nawↄↄ aŋasa lↄ wↄ, na kawola nyi be ta fom Wurubuarɛ. 15Ampaŋ yaa mɛɛ yako ŋon nyi wee keŋ Wurubuarɛ waa di balaŋ nombia nɛ, waa naase mena balaŋ benaŋ diyem kela Sodom na Gomoratena diyem keŋ bↄↄ naa kaalaŋ nɛ. 16Ɛ kɛɛ, mee kpila ŋon baa ŋgba namense nɛ, nyi yaa gyu gbougbouse man. Mena dↄↄ ɛ yela ɛ sia ke kara ŋgba doma nɛ, na ɛ ke yↄkↄse ɛ wose ŋgba awuluŋna nɛ. 17Mena dↄↄ ɛ kɛɛ ɛ wose man nideli lee balaŋ wose man. Nawolo nyi baa mo ŋon gyu kegyiise siaman na baa di ɛ nombia, na baa tuku ŋon bↄ ↄsom denɛɛ man. 18Lee maŋ dↄↄ, baa mo ŋon gyu tɛɛle kegyiise na gyooneŋ siaman. Kei gyae ke yela ɛ ke nyiŋ gbɛɛ kolosi Wurubuarɛ nombia ŋan fa wↄ, na baŋ ba te yɛɛ Gyudatenawↄ ya nɛ. 19Mↄna nyi akpaa be kyaŋ ŋon ka seŋ be siaman nɛ, ɛ na wↄlɛɛ na kpene keŋ ɛ ke yako, na mena keŋ ɛ ke yako ke ya. Debaŋ kenaŋ de lii nɛ, Wurubuarɛ waa wola ŋon kpene keŋ ɛ ke yako. 20Nawolo nyi na ɛmɛɛ ne gyae la ɛ ke kolosi ya. Wurubuarɛ feliŋ ŋon ne gyae la waa ta ɛ dↄↄ kolosi. 21Mena debaŋ kenaŋ nɛ, naa lolo bia baa lese dↄŋa fa yeŋ. Kya waa lese ↄ bu fa yeŋ, te bia mↄ baa koro seŋ ba lolala nyeeya dↄↄ na baa lese wↄ fa yeŋ. 22Lee maŋ dↄↄ balaŋ pou baa kↄla ŋon. Mↄna walaŋ ŋon ↄ yɛɛ kakyeŋ seŋ keŋkeŋ ↄ kelɛɛdi man kelii ↄto nɛ, Wurubuarɛ waa lɛɛ ↄ nyee. 23Nyi akpaa be naase ŋon diyem donↄↄ daale man na, ɛ yeu gyu donↄↄ wↄle man. Ampaŋ yaa mɛɛ yako ŋon nyiaa, ɛ be gyae ɛ ke yɛɛ tom Iserae donↄↄse ŋan man pou taŋ, pɛte maŋ Deniwalaŋ Bu ŋon maa bese kↄŋ ya. 24Walaŋ ŋon ↄ ne kasee abↄↄ nɛ ↄ ba kela ŋon ↄ na wola e nɛ ya, te gbeŋi mↄ ba kela ↄ gbeŋgyoo ya. 25Kaboena nyi kaseele waa yɛɛ ŋgba ↄ wolale nɛ, na gbeŋi mↄ ke yɛɛ ŋgba ↄ gbeŋgyoo nɛ. Te akpaa bɛɛ baake dekpaŋalaŋte ŋon nyi ŋon yɛna feliŋkumɛɛ gyoo Bɛlisɛbu na, woŋ dↄↄ te bↄↄ mo yela kumɛɛ gyakaa ↄ dekpaŋalaŋmantena baŋ dↄↄ ya? 26Mena dↄↄ ɛ na yee wↄ ya. Nawolo nyi kolo be kyaa keŋ bↄↄ wuu ke dↄↄ keŋ nyi bↄↄ gyae baa gyuusu ke ya, te nombia aweeseŋ ŋaale mↄ be kyaa keŋ be gyae ka lee debↄↄ ya. 27Nombii kamasɛ keŋ me yako ŋon nelim na ɛ yako ke weeseteŋteŋ, te nombii kamasɛ keŋ me kolosi ke adadawoya man do ɛ deŋela man na, ɛ mo ke gyↄ dekpeŋkpeŋ. 28Ɛ na yee balaŋ baŋ baa tale ko deniwalaŋ kaageŋ bo, mↄna bↄↄ tale yɛɛ kolo kpu bela nɛ ya. Mↄna ɛ yee Wurubuarɛ ŋon ↄ ko walaŋ taŋ na, ↄ dana doŋ nyi waa fuŋ e na ↄ woo pou ka do boalaŋ keŋ bɛɛ yem ya nɛ man. 29Akpelee koya yɛɛ aŋmoŋ? Na kaperɛ te bɛɛ yↄↄ akpeleese bala yee? Mↄna akpaa Wurubuarɛ te fa gbɛɛ ya na, be man dokoloŋ gba be gyae waa yala yeŋ ya. 30Ɛ nyeenyↄↄse koraŋ nɛ, Wurubuarɛ gyeŋ ŋe yaanↄↄle. 31Mena dↄↄ ɛ na yee ya, nawolo nyi ɛ dana tↄnↄↄ kela akpeleese burum. 32Ɛ man walaŋ kamasɛ ŋon ↄ lɛɛ man do denibalaŋ siaman nyi me yɛɛ ↄ Gbeŋgyoo e nɛ, maŋ mↄ maa lɛɛ e do me kya ŋon ↄ kyaa adido nɛ siaman. 33Mↄna walaŋ kamasɛ ŋon ↄ te lɛɛ maŋ do denibalaŋ siaman nyi me yɛɛ ↄ Gbeŋgyoo e ya nɛ, maŋ mↄ maa bɛɛ e me kya ŋon ↄ kyaa adido nɛ siaman. 34Keŋte Yesu yako wↄ nyiaa, ɛ na gyueŋ nyi wosefɛɛreŋ yaa ma moowↄ kↄŋ tɛɛle kei dↄↄ ya. Koa, na wosefɛɛreŋ ya, mↄna yoo te ma moowↄ kↄŋ, ŋgba mena keŋ Wurubuarɛ nombia aŋmaraseŋ see ne yako nɛ. 35Bia baala baa koro seŋ tia be kyaↄ, na bia alebia mↄ ka koro seŋ tia be naↄ, na bia ala mↄ ka koro seŋ tia ba awuna. 36Walaŋ dekpaŋalaŋ man balaŋ gbagba ne gyae la baa kↄla e. 37Akpaa ŋolo ne kↄŋ me gyaŋ ↄ kaa sila maŋ te ↄ ne gyae ↄ kya yaa ↄ naa kela maŋ na, ↄ tekaboena nyi waa yɛɛ me kaseele ya. Te walaŋ ŋon mↄ ↄ ne gyae ↄ bu tobaale yaa ↄ bu alebu kela maŋ na, ↄ tekaboena nyi waa yɛɛ me kaseele ya. 38Te walaŋ kamasɛ ŋon ↄ ta mo ↄ ↄpaŋdaŋ keŋ ka seŋɛɛ fa kaale na yeŋ nɛ na waa sila maŋ ya na, ↄ tekaboena nyi waa yɛɛ me kaseele ya. 39Walaŋ kamasɛ ŋon ↄ mo ŋon gbagba doŋ ↄ ne kɛo ↄ nyeedoŋ nɛ, ke gyae ka lee ↄ nyiŋmaa man. Mↄna walaŋ kamasɛ ŋon ↄ mo ↄ wose fa yeŋ lee maŋ dↄↄ nɛ, waa bese nyiŋ ↄ nyeedoŋ keŋ. 40Walaŋ kamasɛ ŋon ↄ lɛɛ ŋon na maŋ yaa ↄ lɛɛwↄ, te ŋon ↄ lɛɛ maŋ na Wurubuarɛ ŋon ↄ be kpila maŋ nɛ yaa ↄ lɛɛwↄ. 41Walaŋ kamasɛ ŋon ↄ lɛɛ Wurubuarɛ dekpeŋkpeŋgyↄↄre, nyi keŋ ↄ yɛɛ Wurubuarɛ dekpeŋkpeŋgyↄↄre e dↄↄ nɛ, Wurubuarɛ dekpeŋkpeŋgyↄↄre kom te Wurubuarɛ waa mo tↄ walaŋ ŋonaŋ. Te walaŋ kamasɛ ŋon ↄ lɛɛ walaŋ ŋon ↄ gbɛɛneŋ tenɛɛ Wurubuarɛ siaman nyi keŋ ↄ gbɛɛneŋ tenɛɛ Wurubuarɛ siaman dↄↄ nɛ, walaŋ ŋon ↄ gbɛɛneŋ tenɛɛ Wurubuarɛ siaman nɛ kom te Wurubuarɛ waa mo tↄ walaŋ ŋonaŋ. 42Walaŋ kamasɛ ŋon ↄ fa balaŋ kɛwↄ man ŋolo loŋ defɛɛsa leenↄↄ tↄↄ nyi keŋ ↄ yɛɛ me kaseele e dↄↄ nɛ, Wurubuarɛ waa tↄ e kom."

will be added

X\