Mateo 1

1Gyoo Defidi na Aberaham be naanabii Yesu Kristo duuluŋ man balaŋ yaa. 2Aberaham lolana Asiki te Asiki mↄ lola Gyekↄpo te Gyekↄpo mↄ lola Gyuda na ↄ naabia. 3Gyuda lolana Peresi na Sera baŋ be naa yɛna Tama nɛ, te Peresi mↄ lola Heserↄn, te Heserↄn mↄ lola Ram. 4Ram lolana Aminadabo te Aminadabo mↄ lola Nasↄn te Nasↄn mↄ lola Salimↄn. 5Salimↄn na ↄ wɛɛle Rahabo lolana Boase te Boase na ↄ wɛɛle Ruute mↄ lolana Obedi te Obedi mↄ lolana Gyese. 6Gyese mↄ lolana gyoo Defidi te gyoo Defidi mↄ lolana Solomↄn. Solomↄn ↄ naa yɛna Yuria lialo ŋon gyoo Defidi ba mo yala nɛ. 7Solomↄn mↄ lolana Rehoboam te Rehoboam mↄ lolana Abigya te Abigya mↄ lolana Asa. 8Asa lolana Gyehosafate te Gyehosafate mↄ lolana Gyehoram te Gyehoram mↄ lolana Yusia. 9Yusia lolana Gyotam te Gyotam mↄ lolana Ahase te Ahase mↄ lolana Hesekia. 10Hesekia lolana Manase te Manase mↄ lola Amↄn te Amↄn mↄ lola Gyosia. 11Gyosia lolana Gyekonia na ↄ naabia debaŋ keŋ bↄↄ kyaŋ Iseraetena yoo man mo gyu Babilↄn tɛɛle man nɛ. 12Ba ke kyaŋ Iseraetena gyu Babilↄn tɛɛle man wↄle nɛ te Gyekonia lola Selateli te Selateli mↄ lola Serubabeli. 13Serubabeli lolana Abiudi te Abiudi mↄ lola Eliakim te Eliakim mↄ lola Asↄ. 14Asↄ lolana Sadoki te Sadoki mↄ lola Akim te Akim mↄ lola Eliudi. 15Eliudi mↄ lolana Eliasa te Eliasa mↄ lola Matan te Matan mↄ lola Gyekↄpo. 16Gyekↄpo mↄ lolana Gyosɛfo. Te Gyosɛfo yala Mɛɛre ŋon ↄ ba lola Yesu ŋon bɛɛ baake e nyi Kristo nɛ. Ŋon yɛna nyeelɛɛre ŋon Wurubuarɛ be yako see nyi waa kↄŋ nɛ. 17Mena dↄↄ lee Aberaham dↄↄ kelii gyoo Defidi dↄↄ yɛɛ kalola kegyakaare kufu anaara. Te lee gyoo Defidi dↄↄ kelii debaŋ keŋ bↄↄ kyaŋ Iseraetena gyu Babilↄn nɛ yɛɛ kalola kegyakaare kufu anaara. Te lee debaŋ keŋ bↄↄ kyaa Babilↄn kelii debaŋ keŋ bↄↄ lola Kristo mↄ nɛ yɛɛ kalola kegyakaare kufu anaara. 18Yesu Kristo kalola wose man nombia yaa. Gyosɛfo na Yesu ↄ naa Mɛɛre yakowↄ see nyi baa yala dↄŋa. Mↄna Gyosɛfo ta kpeo ta e ya, te Wurubuarɛ feliŋ yela Mɛɛre kyaŋa fulu. 19Na Gyosɛfo yɛɛ walaŋ ŋon ↄ gbɛɛneŋ tenɛɛ Wurubuarɛ siaman, te ↄ bɛɛ gyae nyi waa do Mɛɛre desɛŋ balaŋ man dↄↄ ya nɛ, ↄ yɛɛ wa agyueŋ nyi waa yo bɛɛ e keŋ ŋolo na ŋolo ba gyem ya. 20Debaŋ keŋ Gyosɛfo na mo mena agyueŋ kei nɛ, te de Gbeŋgyoo Wurubuarɛ kpilale ŋolo kaa lese ↄ wose wola e dosɛɛ man, te ↄ yako e nyiaa, "Defidi ↄ naanabii Gyosɛfo, na yee Mɛɛre ke yala ya. Nawolo nyi Wurubuarɛ feliŋ yele la te ↄ kyaŋa fulu kei. 21Waa lola bu baale na n ka do e yele nyi Yesu. Nawolo nyi ŋon ne gyae la waa lese ↄ balaŋ lee be nombiakumɛɛ man." 22Kɛŋa pou kↄŋawↄ mena, na kpene keŋ de Gbeŋgyoo Wurubuarɛ be tɛɛ ↄ dekpeŋkpeŋgyↄↄre Yesaya dↄↄ yako see nɛ ke kↄŋ mena ampaŋ. Nombia ŋenaŋ yɛna nyiaa, 23"Alebu ŋon ↄ te doo ta na baale see ya nɛ waa kyaŋ fulu na waa lola bu baale na baa baake e nyi Imanuɛle." Keŋ nawolo nyi "Wurubuarɛ kyaa de man." 24Mena dↄↄ Gyosɛfo kefoŋ nɛ, ↄ moo Mɛɛre yala ŋgba mena keŋ de Gbeŋgyoo Wurubuarɛ kpilale ŋon be yako e nɛ. 25Mↄna ŋon na Mɛɛre te doo ŋgba alo na baale nɛ ya kaboena ↄ lola bu baale. Te Gyosɛfo doo e yele nyi Yesu.

will be added

X\