Maake 9

1Keŋte Yesu besewↄ yako wↄ nyiaa, "Ampaŋ yaa mɛɛ yako ŋon nyi ɛ man baale kyaa kɛbo kei keŋ bↄↄ gyae baa yeŋ ya, kelii debaŋ keŋ baa naa Wurubuarɛ gyoori keŋ nyi ka seŋɛɛ na ke doŋ." 2Weeya looro wↄle nɛ, Yesu moo Pita na Gyemisi na Gyↄn kpu na ↄ wose te be gyuuwↄ bula dinaa daale dↄↄ baŋ baageŋ. Botↄↄ te Yesu wose kyɛɛkeewↄ be siaman. 3Wa abↄↄ ŋan ↄ doona nɛ bese abↄↄ wolomɛɛ pareparepare, na ŋɛɛ ŋalakee polɛpolɛpolɛ. Ŋa wolosewↄ keŋ nyi, ŋolo be kyaa tɛɛle kei dↄↄ keŋ waa tale faafo kolo na ke ka lee mena ya. 4Keŋte Mosesi na Elia kaa bɛɛwↄ lee be dↄↄ, te be kolosiwↄ na Yesu. 5Botↄↄ te Pita yako Yesu nyiaa, "De Gbeŋgyoo, dei ŋgba daa mↄ be kↄŋ kɛbo nɛ. Yela dɛɛ baŋ kefɛɛse atooro kɛbo. N wui daale, Mosesi wui daale te Elia mↄ wui daale." 6Na Pita ta gyeŋ kpene waa yako ya, nawolo nyi gyakoloŋ te kyaŋ wↄ gbaa. 7Botↄↄ te ŋↄma kaa wuu be dↄↄ, te be nyii nↄↄwoya ŋaale ŋↄma keŋ man nyiaa, "Kei yɛna me bu ŋon mɛɛ gyae e. Ɛ nyii e." 8Debokenaŋ man ↄ kaseela batooro baŋ besewↄ kɛɛ na, ba te naa walaŋ kamasɛ kpu na Yesu ya. 9Be ke tisi bula keŋ bɛɛ kↄŋ nɛ Yesu faree wↄ nyi, "Mↄↄ ne gyae nyi ɛ ke yako ŋolo na ŋolo kpene keŋ ɛ be naa nɛ ya, kelii debaŋ keŋ maŋ Deniwalaŋ Bu ŋon maa foŋ lee yeŋ man." 10Mena dↄↄ nombia ŋan dↄↄwↄ ba nyeeya man na bɛɛ bↄↄse dↄŋa nyiaa, kefoŋ lee yeŋ man kei na wolo baa nyi sena? 11Keŋte be bↄↄse Yesu nyiaa, "Weera dↄↄ te Gyudatena mmaraa wolala baŋ ne yako nyi, kaboena nyi Elia waa kyaŋ gbɛɛ kↄŋ pɛna Kristo ŋon Wurubuarɛ be yako see nyi waa kↄŋ nɛ ke kↄŋ?" 12Te Yesu tiranↄↄ fa wↄ nyiaa, "Ke yɛɛ ampaŋ nyi Elia waa taŋgbɛɛ nyeelɛɛre ŋon kↄŋ, na ↄ kaa desina kpene kamasɛ see nideli. Wurubuarɛ nombia aŋmaraseŋ see ŋan besewↄ yako yenaŋ daale lee Deniwalaŋ Bu ŋon wose man nyiaa, kaboena nyi waa naa diyem nideli na baa bɛɛ e nyi na ŋon yɛna nyeelɛɛre ŋon ya. Weera dↄↄ te be ŋmarase mena nombia kɛŋa? 13Mↄ mɛɛ yako ŋon baa nyiaa, Elia taŋ kekↄŋ te balaŋ yɛɛ e kpene kamasɛ keŋ be gyae ŋgba mena keŋ Wurubuarɛ nombia aŋmaraseŋ see be yako lee ↄ wose man nɛ." 14Ba ke kↄŋ ↄ kaseela akaŋ baŋ gyaŋ nɛ, be naa balaŋ burum te yilaa kilisi wↄ. Na Gyudatena mmaraa wolala baŋ, na ↄ kaseela baŋ ne wↄŋee nombia ŋaale. 15Balaŋ baŋ pou ke gyↄ sibii naa Yesu nɛ, doo be nↄↄ te be yeuwↄ ke gyaŋee na e te ba doo e nↄↄ. 16Botↄↄ te Yesu bↄↄse ↄ kaseela baŋ nyiaa, "Woŋ nombia yaa ɛmɛɛ na wↄ ne wↄŋee?" 17Keŋte balaŋ baŋ man ŋolo tiranↄↄ nyiaa, "De Gbeŋgyoo, ma moo me bu tobaale ŋon feliŋkum doo ↄ man, te keŋ dↄↄ ↄ bɛɛ tale kolosi ya nɛ baa kↄna neŋ nyi nya kyↄ. 18Debaŋ kamasɛ keŋ ka de kↄŋ ↄ dↄↄ nɛ, ne fuŋ e lↄ tɛɛle man. Afofose na lee ↄ nↄↄman, na ↄ ne tao ↄ kela na ↄ te kem. Me yako n kaseela baŋ nyi baa gegi feliŋkum keŋ lee ↄ man, mↄna ba te tale ya." 19Botↄↄ te Yesu yako wↄ nyiaa, "Ao! Ɛmɛɛ gyɛŋ balaŋ baŋ ɛ bɛɛ lɛɛ Wurubuarɛ di ya. Weeya aŋmoŋ yaa ɛ ne gyae nyi maa nyiŋ konↄↄ kyaa ɛ gyaŋ, pɛna ɛ ke lɛɛ maŋ di? Ɛ mo bu ŋon kↄna maŋ." 20Mena dↄↄ ba moo tobaale ŋon kↄna Yesu. Feliŋkum keŋ kena Yesu nɛ, debokenaŋ man te ke yela bu ŋon keŋawↄ ŋgba keleuleuse kyaŋa na e nɛ. Bu ŋon leewↄ yala tɛɛle man, na ↄ ne biliŋi gyu kↄŋ, na afofose na lee ↄ nↄↄman. 21Botↄↄ te Yesu bↄↄse bu ŋon ↄ kya nyiaa, "Weeya aŋmoŋ yaa ŋgba kawee kei ba gyoo e nɛ?" Keŋte balee ŋon tiranↄↄ nyiaa, "Lee naŋ ↄ biatɛɛ. 22Kawee keŋ ne tale fuŋ e do boalaŋ yaa loŋ man yeŋ yeŋ wui. Nyi akpaa n ke tale yɛɛ kolo na, wii de waraŋase na n ke kyↄ daa." 23Keŋte Yesu bↄↄse e nyi, "N ne bↄↄse maŋ nyi maa tale nɛ, nafↄ nyaŋ gbagba nyaŋ ke tale, nyi akpaa n lɛɛ maŋ di na. Nawolo nyi walaŋ kamasɛ ŋon ↄ ne lɛɛ Wurubuarɛ di nɛ, kpene kamasɛ ne dee fa e." 24Debokenaŋ man te bu ŋon ↄ kya fae yeesa yako nyiaa, "Mɛɛ lɛɛ di. Kyↄ maŋ na maa lɛɛ neŋ di kpu nideli." 25Yesu kena nyi balaŋ te yeu bɛɛ kↄŋ botↄↄ nɛ, ↄ faree feliŋkum keŋ nyiaa, "Nyaŋ deŋela atↄↄsa na omumuu feliŋkum, mɛɛ yako ŋon nyi ɛ lee ↄ man. Lee gyɛŋ ne gyu, ɛ na tekaa kaa gyoo ↄ man bela ya." 26Botↄↄ te feliŋkum keŋ fae yeesa te ke wosi bu ŋon nideli ŋgba keleuleu weere nɛ, te ka leewↄ ↄ man laŋ. Na bu ŋon doo tɛɛle man ŋgba ↄ yeŋae nɛ, mena dↄↄ balaŋ burum kpa ↄ ta yem. 27Keŋte Yesu kyaŋa bu nyiŋmaa man gate e seŋ ↄ nawↄↄ dↄↄ, te ↄ seŋawↄ. 28Kenaŋ wↄle Yesu ka gyoo deni man nɛ, ↄ kaseela baŋ bↄↄse e deni man nyiaa, "Woŋ dↄↄ te daa te tale gegi feliŋkum keŋ lee bu ŋon man ya?" 29Botↄↄ te Yesu yako wↄ nyiaa, "Nyi akpaa ɛ te fane fa Wurubuarɛ nideli ya nɛ, ɛ be gyae ɛ ke tale gegi mena feliŋkum kei dinↄↄ ya." 30Be ka lee botↄↄ nɛ, be tɛɛwↄ na Galelia tɛɛle man. Na Yesu te gyae nyi walaŋ kamasɛ ka gyeŋ botↄↄ keŋ be kyaa ya. 31Nawolo nyi na ↄ na wola ↄ kaseela baŋ nombia. Keŋte ↄ yako wↄ nyiaa, "Baa lese maŋ Deniwalaŋ Bu ŋon fa balaŋ na baa ko, mↄ weeya atoorote keŋ nɛ maa foŋ lee yeŋ man." 32Mↄna ↄ kaseela baŋ te nyii keŋ ↄ be yako nɛ man ya, te be yee mena keŋ baa bↄↄse e nombia ŋenaŋ man. 33Kenaŋ wↄle te be kↄŋawↄ Kapanum donↄↄ man. Be ke gyu dɛɛ nɛ te ↄ bↄↄse ↄ kaseela baŋ nyiaa, "Woŋ aŋmaareŋ yaa ɛ ne lɛɛ gbɛɛnaa man nɛ?" 34Mↄna be man ŋolo te tale kolosi ya. Nawolo nyi gbɛɛnaa man nɛ na bɛɛ lɛɛ aŋmaareŋ nyi be man woŋti kela na ↄ dↄↄ. 35Botↄↄ te Yesu tisiwↄ kyaa te ↄ baake ↄ kaseela kufu bala baŋ yako wↄ nyiaa, "Akpaa ŋolo ne gyae nyi waa yɛɛ siamante nɛ, kaboena nyi waa yↄkↄse ↄ wose ŋgba biikyaa nɛ, na waa som ɛ popou." 36Botↄↄ te ↄ moo biikyaabii ŋolo kaa seŋ ba nsana, te ↄ pukaa e te ↄ yako wↄ nyiaa, 37"Walaŋ kamasɛ ŋon ↄ lɛɛ biikyaabii kei dinↄↄ ma yele man na ↄ te lɛɛ maŋ, te ŋon ↄ lɛɛ maŋ na ↄ te lɛɛ ŋon ↄ be kpila maŋ nɛ." 38Botↄↄ te Gyↄn yako Yesu nyiaa, "De Gbeŋgyoo, de naa balee ŋolo na ↄ ne gegi feliŋkumɛɛ lee n yele man te de tↄↄ e, nawolo nyi ↄ be kpuɛ de man ya." 39Keŋte Yesu yako wↄ nyiaa, "Ɛ na tↄ e gbɛɛ ya. Nawolo nyi ŋolo be kyaa keŋ waa mo ma yele yɛɛ gyakoloŋ nombia, na waa bese kolosi ma wose man nombiikum debokenaŋ man ya. 40Nawolo nyi walaŋ kamasɛ ŋon ↄ bee yoo na daa ya nɛ, na ↄ kpuɛ na daa. 41Ampaŋ yaa mɛɛ yako ŋon nyiaa, walaŋ kamasɛ ŋon ↄ fa ŋon loŋ leenↄↄ tↄↄ nyi keŋ ɛ yɛɛ maŋ Kristo balaŋwↄ dↄↄ nɛ, Wurubuarɛ waa tↄ ↄtenate kom." 42"Walaŋ kamasɛ ŋon ↄ yeli bia buruburu kɛwↄ baŋ bↄↄ lɛɛ maŋ di nɛ man ŋolo de yɛɛ dukum nɛ, kenaŋ na nyi akpaa ba mo boe dinaa dinaa kpaŋ ↄ wↄŋe man, te be fuŋ e do ɛpo man na dei kela. 43Nyi akpaa n nyiŋmaa ne yele la te n ne yɛɛ dukum na, kara ke leki. Nawolo nyi dei nyi nya lee kadeŋ na n gyoo Wurubuarɛ gyoori keŋ man, kela keŋ n ka mo nyiŋmaase ala ka gyoo boalaŋ keŋ ke bɛɛ yem ya nɛ man. 44Nawolo nyi feelɛɛ baŋ bɛɛ gyoo balaŋ botↄↄ nɛ bↄↄ na yem ya, te boalaŋ keŋ mↄ bɛɛ yem korakora ya. 45Te akpaa n nae ne yele la te n ne yɛɛ dukum na kara ke leki. Nawolo nyi dei nyi nya mo nae dokoloŋ gyoo Wurubuarɛ gyoori keŋ man, kela nyi baa mo neŋ na n nawↄↄ ala ka do boalaŋ keŋ ke bɛɛ yem ya nɛ man. 46Nawolo nyi feelɛɛ baŋ bɛɛ gyoo balaŋ botↄↄ nɛ bↄↄ na yem ya, te boalaŋ keŋ mↄ bɛɛ yem korakora ya. 47Te akpaa n sibii ne yele la te n ne yɛɛ dukum na kulu ke leki. Nawolo nyi dei nyi nya mo sibii dokoloŋ gyoo Wurubuarɛ gyoori keŋ man, kela nyi baa mo neŋ na n sia ala ka do boalaŋ keŋ ke bɛɛ yem ya nɛ man. 48Nawolo nyi feelɛɛ baŋ bɛɛ gyoo balaŋ botↄↄ nɛ bↄↄ na yem ya, te boalaŋ keŋ mↄ bɛɛ yem korakora ya. 49Wurubuarɛ waa mo boalaŋ desina walaŋ kamasɛ, ŋgba mena keŋ bɛɛ mo yabia do kolo man te ke bɛɛ wↄlɛɛ ya nɛ. 50Yabia dei, mↄna akpaa ka gyoŋ da lee ke man na, sena te ɛ ke yɛɛ na ka gyoŋ keŋ ka bese kaa gyoo ke man bela? Ɛ yela ɛ nombia ayɛɛsa ke yɛɛ gyoŋ ŋgba yabia nɛ, na ɛ ke kyaa na dↄŋa wosefɛɛreŋ man."

will be added

X\