Maake 8

1Debaŋ daale bela nɛ, balaŋ burum baale besewↄ kↄŋ kaa yilaa Yesu gyaŋ. Na bↄↄ dana kolo baa di ya, te Yesu baake ↄ kaseela baŋ kↄŋ ↄ gyaŋ yako wↄ nyiaa, 2"Balaŋ kɛwↄ nombia dana maŋ waraŋase. Nawolo nyi gyɛŋ weeya kpaakpaa atooro yaa ŋgba be kyaa me gyaŋ, te kolo be doo baa di ya nɛ. 3Nyi akpaa me lↄ wↄ gbɛɛ na tanam na, be sia gyae kaa biri wↄ gbɛɛnaa man. Nawolo nyi be man baale lee lemlem" 4Botↄↄ te ↄ kaseela baŋ bↄↄse e nyiaa, "Aleŋ te walaŋ waa nyiŋ weenɛɛ depampaa kei dↄↄ na ka yee mena balaŋ burum kɛwↄ?" 5Keŋte Yesu bↄↄse wↄ nyiaa, "Bodobodose aŋmoŋ te ɛ dana?" Te be yako e nyi be dana bodobodose nyetooro. 6Te Yesu yela balaŋ baŋ kyakeewↄ tɛɛle man, te ↄ moo bodobodose nyetooro ŋan te ↄ fanewↄ fa Wurubuarɛ karaŋ, te ↄ kɛrɛɛ ŋa mo fa ↄ kaseela baŋ nyi baa mo kpɛlɛɛ balaŋ baŋ. Keŋte baŋ mↄ moo ŋa kpɛlɛɛ balaŋ baŋ. 7Na ↄ kaseela baŋ dana kpebia kyomii baale mↄ. Te Yesu moo kpebia baŋ mↄ te ↄ fanewↄ fa Wurubuarɛ karaŋ te ↄ moo ŋa fa wↄ nyi baa mo kpɛlɛɛ fa balaŋ baŋ. 8Balaŋ baŋ pou diiwↄ baa nideli. Kenaŋ wↄle te ↄ kaseela baŋ tↄↄsee buruburu akaŋ ŋan na, be nyiŋa doŋatↄↄse nyetooro. 9Balaŋ baŋ bↄↄ di weenɛɛ ŋan nɛ, be man baala yɛɛ balaŋ kakpoŋse banaara (4000). Yesu ke lↄ balaŋ baŋ gbɛɛ nɛ, 10te ŋon na ↄ kaseela baŋ gyoowↄ degbele man gyu Dalimanuta tɛɛle man. 11Keŋte Farasiitena baale kↄŋawↄ Yesu gyaŋ bɛɛ bↄↄse e nombia na baa mo teese ↄ nↄↄ man. Be yako e nyi waa yɛɛ gyakoloŋ nombia na kawola nyi ↄ lee Wurubuarɛ gyaŋ ampaŋ. 12Botↄↄ te Yesu lee weesɛɛ ↄ man te ↄ yako wↄ nyiaa, "Woŋ dↄↄ te ɛmɛɛ gyɛŋ wee kei balaŋ ne gyae nyi maa yɛɛ gyakoloŋ nombia wola ŋon? Ampaŋ yaa mɛɛ yako ŋon nyiaa, mↄↄ gyae maa yɛɛ gyakoloŋ nombia wola ŋon ya." 13Keŋte Yesu leewↄ balaŋ baŋ gyaŋ, te ↄ moo degbele toŋ gyu boo keŋ diŋgyiŋ. 14Yesu na ↄ kaseela baŋ kee gyu nɛ, na ↄ kaseela baŋ te wolee be ta mo bodobodo ŋaale tela kpu na dokoloŋ keŋ doo ba degbele keŋ man nɛ ya. 15Te Yesu faree ↄ kaseela baŋ nyiaa, "Ɛ kɛɛ ɛ wose man nideli lee Farasiitena na Herodetena wose man. Nawolo nyi be dinↄↄ yɛɛ ŋgba tee keŋ bɛɛ mo do bodobodo man te kɛɛ koro nɛ." 16Botↄↄ te ↄ kaseela baŋ yako dↄŋa nyiaa, "Keŋ de ta mo bodobodo tela ya dↄↄ te ↄ ne yako mena nɛ." 17Yesu ka gyeŋ kpene keŋ bɛɛ yako nɛ te ↄ bↄↄse wↄ nyiaa, "Weera dↄↄ te ɛ ne kolosi nyi ɛ ta mo bodobodo tela ya? Mena dↄↄ ɛ ta gyeŋa ta nombia man yee? Ya agyueŋse man ta toro ta yee? 18Ɛ dana sia nɛ, ɛ bɛɛ naa yee? Te ɛ dana deŋela mↄ nɛ, ɛ bee nyii nombia yee? Ɛ bɛɛ tↄↄse nombia yee? 19Debaŋ keŋ mↄↄ kɛrɛɛ bodobodose anoŋ ŋan kpɛlɛɛ balaŋ kakpoŋse banoŋ baŋ te bↄↄ dii baa nɛ, doŋatↄↄse aŋmoŋ te ɛ tↄↄsee buruburu akaŋ ŋan wulu?" Keŋte be tiranↄↄ nyi, "Doŋatↄↄse kufu ala." 20Te Yesu besewↄ bↄↄse wↄ nyiaa, "Debaŋ keŋ mↄ kɛrɛɛ bodobodose nyetooro ŋan kpɛlɛɛ balaŋ kakpoŋse banaara (4000) baŋ te bↄↄ dii baa nɛ, doŋatↄↄse aŋmoŋ te ɛ tↄↄsee buruburu akaŋ ŋan wulu?" Keŋte be tiranↄↄ nyi, "Doŋatↄↄse nyetooro." 21Botↄↄ te Yesu bↄↄse wↄ nyi, "Ɛ sɛɛ ɛ te nyii ta nombia ŋan man yee?" 22Yesu na ↄ kaseela baŋ ke kↄŋ Bɛtesaida donↄↄ man nɛ, te balaŋ baale moo siayɛlɛɛsate ŋolo kↄŋ ↄ gyaŋ te ba waase e nyi waa mo ↄ nyiŋmaa tina e na ↄ sia ke gyuusu. 23Botↄↄ te Yesu kyaŋa siayɛlɛɛsate ŋon nyiŋmaa man te ↄ moo e lee donↄↄ keŋ man, te ↄ tↄↄ nↄↄloŋ woli ↄ sia te ↄ moo ↄ nyiŋmaa gyakaa ↄ dↄↄ te ↄ bↄↄse e nyiaa, "N ne naa kolo?" 24Keŋte balee ŋon gyinaa ↄ sia kɛɛ adido te ↄ yakowↄ nyiaa, "Mɛɛ naa balaŋ, mↄna be yɛɛ ŋgba daase ne tɛɛ la nɛ." 25Te Yesu besewↄ mo ↄ nyiŋmaa tina balee ŋon sia bela. Keŋte ↄ sia gyuusuwↄ, te ↄ naa kpene kamasɛ nideli. 26Botↄↄ te Yesu lↄↄ balee ŋon gbɛɛ te ↄ faree e nyiaa, "Na bese gyu donↄↄ keŋ man bela ya. Ta gyu n dɛɛ." 27Kenaŋ wↄle te Yesu na ↄ kaseela baŋ gyuu donↄↄse ŋan ŋe kyaa benaa na Kaesaria Filipi donↄↄ keŋ nɛ. Be kee gyu keŋ nɛ te ↄ bↄↄse ↄ kaseela baŋ nyiaa, "Balaŋ ne kolosi ma wose man nombia na, be kpa maŋ yɛna amↄ?" 28Botↄↄ te ↄ kaseela baŋ tiranↄↄ nyi, "Baale kpa nyaŋ yɛna Gyↄn Wurubuarɛ loŋsↄↄre ŋon, baale mↄ kpa nyaŋ yɛna Wurubuarɛ dekpeŋkpeŋgyↄↄre Elia, te baale mↄ kpa n yɛɛ Wurubuarɛ akpeŋkpeŋgyↄↄra baŋ man ŋolo e." 29Keŋte Yesu bↄↄse wↄ nyiaa, "Ɛmɛɛ mↄ de? Ɛ kpa maŋ yɛna amↄ?" Botↄↄ te Pita tiranↄↄ nyiaa, "Nyaŋ yɛna Kristo, nyeelɛɛre ŋon Wurubuarɛ be yako see nyi waa kↄŋ nɛ" 30Botↄↄ te Yesu faree wↄ nyi be na yako ↄ wose man nombia fa ŋolo na ŋolo ya. 31Kenaŋ wↄle te Yesu fiasɛɛ ↄ na wola ↄ kaseela baŋ nombia nyiaa, "Kaboena nyi maŋ Deniwalaŋ Bu ŋon maa naa diyem nideli, na Gyudatena kegyiise na Wurubuarɛ saese kegyiise na Gyudatena mmaraa wolala baŋ ke bɛɛ maŋ nyi na maŋ yɛna nyeelɛɛre ŋon ya. Baa ko maŋ, mↄ weeya atoorote keŋ na maa foŋ lee yeŋ man." 32Yesu ka toro nombia kɛŋa yako fa ↄ kaseela baŋ nɛ, te Pita moo e lee yenaŋ te ↄ faree e nyi ↄ na kolosi mena ya. 33Botↄↄ te Yesu gɛɛsewↄ kɛɛ ↄ kaseela baŋ te ↄ fae Pita nyiaa, "Ta lee me gyaŋ, ↄbↄnsam! Na Wurubuarɛ kegyaebii te n na gyueŋ ya, mↄna denibalaŋ kegyaebii te n na gyueŋ." 34Keŋte Yesu baake balaŋ dikpii keŋ na ↄ kaseela baŋ kↄŋ ↄ gyaŋ te ↄ yako wↄ nyiaa, "Akpaa ŋolo ne gyae waa sila maŋ na ↄ na yɛɛ kpene keŋ ŋon gbagba ne gyae ya. Mↄna waa mo ↄ ↄpaŋdaŋ keŋ seele, na waa sila maŋ. 35Nawolo nyi walaŋ kamasɛ ŋon ↄ ne gyae waa lɛɛ ŋon gbagba nyeedoŋ na, ke gyae ka lee ↄ nyiŋmaa man. Te walaŋ kamasɛ ŋon ↄ nyeedoŋ da lee ↄ nyiŋmaa man lee maŋ Yesu na me nombia dↄↄ nɛ, waa bese nyiŋ ke. 36Akpaa ŋolo de nyiŋ tɛɛle kei dↄↄ abↄↄ pou te ↄ nyeedoŋ da lee ↄ nyiŋmaa man na, woŋ tↄnↄↄ te waa nyiŋ? 37Yaa woŋ te walaŋ waa tale mo kyɛɛkee na ↄ nyeedoŋ? 38Akpaa maŋ Yesu na me nombia de yɛɛ ŋolo desɛŋ gyɛŋ wee kei balaŋ baŋ bↄↄ besena be wↄle tee Wurubuarɛ te be yɛɛ nombiakumɛɛyɛɛrawↄ nɛ siaman na, kenaŋ na wee keŋ maŋ Deniwalaŋ Bu ŋon maa bese kↄŋ daa na me kya Wurubuarɛ na Wurubuarɛ kpilala baŋ gyoorobiiri man nɛ, walaŋ ŋonaŋ mↄ nombia gyae ke yɛɛ maŋ desɛŋ."

will be added

X\