Maake 7

1Wee daale nɛ, Farasiitena na Gyudatena mmaraa wolala baale baŋ bↄↄ lee Gyerusalɛm donↄↄ man nɛ, kaa yilaawↄ Yesu gyaŋ. 2Botↄↄ te be naawↄ nyi, ↄ kaseela baŋ baale te faafo be nyiŋmaase ŋgba mena keŋ ba beneŋ amanberɛse na wola wↄ nɛ ya pɛte bee dii. 3Nawolo nyi Farasiitena na Gyudatena baŋ pou bee tina ba beneŋ amanberɛse ŋan yela ya. Mena dↄↄ nyi akpaa ba te faafo be nyiŋmaase ŋgba mena keŋ be naanaↄ be yako see ya na bↄↄ ne dii ya. 4Mena ke mↄ te akpaa ba lee kebu man kↄŋ na, bɛɛ saase ba wose pɛte baa di weenɛɛ. Ba beneŋ amanberɛse boe nideli. Be dana gbɛɛneŋ ŋan bɛɛ mo saase ba leenↄↄse na tasase na osuŋse mↄ. 5Mena dↄↄ Farasiitena na Gyudatena mmaraa wolala baŋ bↄↄse Yesu nyiaa, "Weera dↄↄ te n kaseela baŋ bee di da beneŋ amanberɛse dↄↄ ya? Nawolo nyi bↄↄ ne faafo be nyiŋmaase ŋgba mena keŋ da beneŋ amanberɛ nawolo nɛ pɛ baa di ya!" 6Keŋte Yesu tiranↄↄ fa wↄ nyiaa, "Ɛ ne yɛɛ ɛ wose ŋgba ɛ yɛɛ balaŋ kpaakpaawↄ nɛ, mↄna ɛ na beo ɛ wose bo. Ɛ nombia ŋan Wurubuarɛ be tɛɛ ↄ dekpeŋkpeŋgyↄↄre Yesaya dↄↄ yako ↄ nombia aŋmaraseŋ see ŋan man nɛ yɛɛ ampaŋ. Ↄ yakowↄ nyiaa, 'Wurubuarɛ kpa, balaŋ kɛwↄ dana be nↄↄ bo bɛɛ yako nyi bee bu maŋ, mↄna be konↄↄse man na bↄↄ na mo maŋ yɛɛ kolo ya. 7Bɛɛ som maŋ bo yakaa, nawolo nyi mmaraase ŋan denibalaŋ be yɛɛ nɛ te be dana bɛɛ wola balaŋ nombia.' 8Ɛ te tina Wurubuarɛ mmaraase ŋan yela, te ɛ dana ɛ beneŋ amanberɛse ŋan balaŋ na wolo nɛ man." 9Keŋte Yesu besewↄ yako wↄ nyiaa, "Ɛ gyeŋ adao gbɛɛneŋ ŋan ɛ na mo bɛɛ Wurubuarɛ nombia ŋan, na ɛ ke nyiŋ di ɛ beneŋ amanberɛse ŋan dↄↄ. 10Nawolo nyi gyaŋgba keŋ de naana Mosesi yakowↄ Wurubuarɛ mmaraase ŋan man nyiaa, 'Bu n kya na naa, te walaŋ kamasɛ ŋon ↄ kolosi nombiakumɛɛ tia ↄ kya yaa ↄ naa na, kaboena nyi baa ko e.' 11Mↄna ɛmɛɛ ne yako nyiaa, 'Akpaa ŋolo de yako ↄ kya yaa ↄ naa nyi, "Kpene keŋ nafↄ me dana maa mo kyↄ neŋ nɛ yɛɛ Koriban ke." ' (Koriban kei nawolo nyi, kpene keŋ yɛɛ Wurubuarɛ wui). 12Dekↄŋ mena na, ɛ bɛɛ tekaa fa ↄtenate gbɛɛ waa yɛɛ kolo fa ↄ kya yaa ↄ naa ya. 13Mena yaa ɛ na mo ɛ beneŋ amanberɛse ŋan wↄlɛɛ Wurubuarɛ nombia ŋan, te ɛ yɛɛ ŋa see ɛ bia mↄ. Te ɛ ne yɛɛ nombia burum ŋan ŋe yɛɛ ŋgba kɛŋa dinↄↄ nɛ kpu." 14Kenaŋ wↄle nɛ, Yesu besewↄ baake balaŋ baŋ pou kaa yilaa ↄ gyaŋ te ↄ yako wↄ nyiaa, "Ɛ popou ɛ tei maŋ, na ɛ ke nyii nombia kɛŋa man nideli. 15Kolo be kyaa keŋ ke da lee yenaŋ gyoo walaŋ wose man na, ke gyae ke tale yɛɛ e ayimɛɛ ya. Mↄna kpene keŋ na lee walaŋ man kↄŋ nɛ, keŋ ne yɛɛ na e ayimɛɛ. 16Walaŋ kamasɛ ŋon ↄ dana deŋele anenyiiŋ dei nɛ, waa see deŋele na waa nyii." 17Yesu ka lee balaŋ baŋ man gyu dekpaŋalaŋ man nɛ, ↄ kaseela baŋ bↄↄse e dudu keŋ asɛɛ. 18Botↄↄ te ↄ bↄↄse wↄ nyiaa, "Mena dↄↄ ɛmɛɛ mↄ bee nyii nombia asɛɛ yee? Ɛ ba gyeŋ nyi kpene kamasɛ keŋ na lee yenaŋ gyoo walaŋ wose man na, ke bɛɛ yɛɛ e ayimɛɛ yee? 19Ɛ ba gyeŋ nyi na ↄ konↄↄ man te ŋee gyu ka gyoo yee? Ŋee gyu bo ka gyoo ↄ dubulu man, na ta lee ↄ wose man." Yesu ke yako kei nɛ, na ↄ nawolo baa nyi weenɛɛ kamasɛ dei na kedi. 20Keŋte Yesu yako wↄ nyiaa, "Kpene kamasɛ keŋ na lee walaŋ konↄↄ man nɛ, keŋ ne yɛɛ na e ayimɛɛ. 21Nawolo nyi walaŋ konↄↄ man te nombiakumɛɛ pou na lee. Mena abↄↄ kɛŋa ŋaale yɛna, kafoŋ na ŋmɛɛleŋ na balaŋ kako na yale kewↄlɛɛ, 22na sibii na nombiakumɛɛ keyɛɛ, na kabeo na kewↄlɛɛ nombia na balaŋ kekↄla, na nombiakumɛɛ ka mo gyakaa balaŋ dↄↄ, na wose kegate adido na diyiŋ nombia. 23Nombiakumɛɛ kɛŋa pou na lee bo walaŋ konↄↄ man, te ŋan ne yɛɛ na e ayimɛɛ." 24Lee botↄↄ te Yesu korowↄ gyu Tae na Sidↄn donↄↄse ŋan ŋe yɛɛ Iseraetena donↄↄse ŋa nɛ yenaŋ. Te ↄ ka gyoowↄ dekpaŋalaŋ daale man keŋ ↄ te gyae nyi ŋolo ka gyeŋ nyi ↄ kyaa botↄↄ ya, mↄna balaŋ naa e. 25Te alo ŋolo ŋon feliŋkum doo ↄ bu alebubii man ka betaa nyii nyi Yesu kyaa botↄↄ nɛ, te ↄ kaa buŋawↄ ↄ nawↄↄ tɛɛ. 26Na alo ŋonaŋ yɛɛ Giriki alo e, te ba lola e bo Fonisia keŋ ke kyaa Siria tɛɛle man nɛ. Keŋte ↄ sola Yesu nyi waa gegi feliŋkum keŋ lee ↄ bu ŋon man. 27Botↄↄ te Yesu bↄↄse e nyiaa, "Nyi n dana bia na, n ke sɛɛ mo be weenɛɛ fa babaase? Koa, n ke taŋgbɛɛ mo weenɛɛ ŋan fa bia kedi pɛ. Te akpaa be dii kaase na, pɛna na n ka mo fa babaase." 28Keŋte alo ŋon mↄ yako e nyiaa, "Ayi, me Gbeŋgyoo, doo mena. Mↄ babaase baa tale fiu weenɛɛ ŋan bia ne dii te ŋɛɛ yale tɛɛle man nɛ di." 29Botↄↄ te Yesu yako alo ŋon nyiaa, "Nↄↄ keŋ n be tiri fa maŋ nɛ dↄↄ ta, feliŋkum keŋ ta lee n bu alebubii ŋon man." 30Alo ŋon ka lee botↄↄ gyu ↄ dɛɛ nɛ, te ↄ kenaawↄ nyi ↄ bu ŋon doo mpa dↄↄ na feliŋkum keŋ ta lee ↄ man. 31Yesu ka lee Tae donↄↄ man nɛ, ↄ tɛɛwↄ Sidↄn donↄↄ man ka lee Galelia boo nↄↄ nↄↄ kↄŋ donↄↄse kufu ŋaale tɛɛle man. 32Keŋte balaŋ baale moo balee ŋolo ŋon ↄ deŋela be tↄↄ te ↄ bɛɛ tale kolosi nideli ya nɛ kↄŋ Yesu gyaŋ. Te ba sola e nyi waa mo ↄ nyiŋmaa gyakaa ↄ dↄↄ, na waa kyↄ e ↄ kawee. 33Botↄↄ te Yesu moo kaweete ŋon lee balaŋ baŋ man gyu yenaŋ. Te ↄ moo ↄ nyiŋmaasebia do kaweete ŋon deŋela man, te ↄ tↄↄ nↄↄloŋ mo tina ↄ laakem. 34Te Yesu kɛɛ adido te ↄ lee weesɛɛ te ↄ yako e nyiaa, "Efata!" Keŋ nawolo nyi toro! 35Debokenaŋ man te ↄ deŋela torowↄ te ↄ laakem booliwↄ, te ↄ talewↄ kolosi nideli. 36Keŋte Yesu faree balaŋ baŋ nideli nyi be na yako walaŋ kamasɛ ya. Mↄna keŋ na ↄ ke faree wↄ koraŋ nɛ, keŋ gba te be yela balaŋ nyiiwↄ beiŋ. 37Balaŋ baŋ wose yeŋawↄ nideli te be yakowↄ nyiaa, "Yesu te yɛɛ kpene kamasɛ nideli. Ↄ te yela deŋela atↄↄsatena ne nyii dei, te omumuuse mↄ ne kolosi."

will be added

X\