Maake 6

1Kenaŋ wↄle te Yesu na ↄ kaseela baŋ lee botↄↄ gyu ŋon gbagba ↄ dɛɛ. 2Gyudatena kefɛɛfowee kelii nɛ, ↄ korowↄ gyu bↄ ↄsom deni man ↄ na wola wↄ Wurubuarɛ nombia. Ↄ nombia ŋan ↄ na wolo nɛ doo balaŋ baŋ pou nↄↄ te be bↄↄsewↄ nyiaa, "Aleŋ yaa balee kei nyiŋa abↄↄ kɛŋa pou lee? Aleŋ yaa ↄ nyiŋa mena nyansa kei lee? Kɛɛ gyakoloŋ nombia ŋan ↄ ne yɛɛ? 3Na kapenta ŋon yaa yee? Na ↄ naa yɛna Mɛɛre yee? Na ↄ naabia yɛna Gyemisi na Gyosɛfo na Simↄn na Gyuda yee? Na daa na ↄ desina kyaa la kɛbo yee?" Mena dↄↄ ba te lɛɛ e do ya. 4Botↄↄ te Yesu yako wↄ nyiaa, "Balaŋ ne bu Wurubuarɛ dekpeŋkpeŋgyↄↄre yenaŋ kamasɛ, mↄna ŋon gbagba ↄ donↄↄ man balaŋ, na ↄ loŋtona na ↄ dekpaŋalaŋmantena bee buu na e ya." 5Mena dↄↄ Yesu te tale yɛɛ gyakoloŋ nombia burum ↄ dɛɛ botↄↄ ya. Ↄ moo ↄ nyiŋmaa bo gyakaa balaŋ kyomii baale bo dↄↄ, te ↄ kyↄↄ wↄ be kaweese. 6Yesu wose yeŋa e ŋgba mena keŋ ↄ balaŋ gbagba te lɛɛ e di ya nɛ dↄↄ. Keŋte ↄ leewↄ donↄↄ keŋ man, ta kila akuraase ŋan man ↄ na wola wↄ Wurubuarɛ nombia. 7Te Yesu baake ↄ kaseela kufu bala baŋ te ↄ kpilii wↄ bala bala. Te ↄ fa wↄ doŋ keŋ baa mo di feliŋkumɛɛ dↄↄ. 8Keŋte ↄ yako wↄ nyiaa, "Ɛ na mo kolo tela kpu na ɛ gbutuse ya. Ɛ na mo weenɛɛ, yaa akpo yaa kↄba tela ya. 9Ɛ do nkyokotase, mↄna ɛ na mo kegbase tela kpu ya. 10Ɛ gyu donↄↄ daale man te dekpaŋalaŋ keŋ man be lɛɛ ŋon nɛ, ɛ kyaa botↄↄ kaboena ɛ ka mo lee donↄↄ kenaŋ man. 11Te akpaa ɛ gyu yenaŋ daale te ba te lɛɛ ŋon yaa be te nyii ŋon ya nɛ, ɛ lee botↄↄ na ɛ kpiisi ya nkyokotase aŋasa lↄ wↄ na ke di adansɛɛ tia wↄ nyi Wurubuarɛ be gyae waa tina wↄ yela ya." 12Mena dↄↄ be gyuuwↄ kekolosi Wurubuarɛ nombia ŋan fa balaŋ, nyi baa kyɛɛkee lee be gbɛɛneŋ kumɛɛ man kↄŋ Wurubuarɛ gyaŋ. 13Be gegi feliŋkumɛɛ burum lee balaŋ man, te ba moo nuŋ fee kaweesetena burum te ba wose yɛɛ wↄ doŋ. 14Abↄↄ ŋan pou Yesu be yɛɛ nɛ, yela ↄ yele yaaseewↄ gyu yenaŋ kamasɛ te gyoo Herode mↄ nyiiwↄ. Be ke nyii Yesu yele nɛ, na baale kpa "Gyↄn Wurubuarɛ loŋsↄↄre ŋon ↄ ba yem nɛ yaa Wurubuarɛ gyuusuwↄ lee yeŋ man, mena dↄↄ te ↄ nyiŋa doŋ ↄ ne yɛɛ gyakoloŋ nombia na nombia dinaana kɛŋa nɛ." 15Baale mↄ kpa, "Ŋon yɛna Wurubuarɛ dekpeŋkpeŋgyↄↄre Elia," te baale mↄ kpa "Ↄ yɛɛ gyaŋgba Wurubuarɛ akpeŋkpeŋgyↄↄra baŋ bↄↄ kyaa kaalaŋ nɛ man ŋolo e." 16Gyoo Herode kenyii mena nɛ ↄ yakowↄ nyiaa, "Gyↄn ŋon mↄↄ kara ↄ nyee nɛ bese la foŋ nɛ!" 17Nawolo nyi na Gyↄn gyakaa ↄ ne yako gyoo Herode nyi, "Gbɛɛ be doo nyi waa mo ↄ kegyia Filipo wɛɛle yala ŋgba mena keŋ ↄ be yɛɛ nɛ ya." Mena dↄↄ gyoo Herode gbagba yela be kyaŋa Gyↄn te ba doo e agbaraagbaraase mo e ketↄ deni. 19Nombii kei dↄↄ Herodia moo Gyↄn do ↄ tↄↄ man, te ↄ gyae gbɛɛ keŋ waa mo ko e mↄna ↄ bɛɛ tale ya. 20Nawolo nyi gyoo Herode gyeŋ nyi Gyↄn yɛɛ walaŋ ŋon ↄ gbɛɛneŋ tenɛɛ Wurubuarɛ siaman, te ↄ ta mo ↄ wose mↄ fa Wurubuarɛ. Mena dↄↄ gyoo Herode na weese Gyↄn keŋ nyi nombiikum daale be yɛɛ e ya. Debaŋ kamasɛ keŋ gyoo Herode de nyii Gyↄn nↄↄwoya na bɛɛ seŋ e nideli ya, mↄna ↄ ne gyae nyi waa tei e. 21Kɛŋa pou wↄle nɛ, gbɛɛ kaa torowↄ fa Herodia. Nawolo nyi Gyoo Herode kee di ↄ kalolawee nɛ, ↄ baake ↄ kegyiise na ↄ yoonↄↄtena kegyiise na Galeliatena baŋ ba wose dana obuo nɛ, nyi be kaa di wee keŋ kyↄ e. 22Ba ke gyaŋee keŋ nɛ, Herodia bu alebu kↄŋawↄ kaa sↄe te yɛɛ gyoo Herode na balaŋ baŋ pou kyeo. Botↄↄ te gyoo Herode yako alebu ŋon nyiaa, "Yako maŋ kpene kamasɛ keŋ n ne gyae, na maa fa neŋ." 23Keŋte gyoo Herode kaŋa ntam kpu fa bu ŋon nyiaa, "Kpene kamasɛ keŋ n bↄↄse maŋ na maa fa neŋ. Akpaa me gyoori koraŋ te n ne gyae na, maa kpase ke man fa neŋ." 24Botↄↄ te alebu ŋon leewↄ yenaŋ gyu ke bↄↄse ↄ naa nyiaa, "Nna, woŋ te maa bↄↄse?" Botↄↄ te ↄ naa yako e nyiaa, "Yako nyi n ne gyae Gyↄn Wurubuarɛ loŋsↄↄre ŋon nyee." 25Debokenaŋ man te alebu ŋon barasewↄ gyu gyoo Herode gyaŋ ke yako e nyiaa, "Mɛɛ gyae n ke kara Gyↄn Wurubuarɛ loŋsↄↄre nyee do tasa taŋtaŋalaŋ man fa maŋ." 26Nombii kei takaa gyoo Herode nideli, mↄna ntam keŋ ↄ be kam ŋↄↄla baŋ siaman dↄↄ nɛ, ↄ te tale bɛɛ ya. 27Mena dↄↄ debokenaŋ man te ↄ kpila ↄ balaŋ baŋ bɛɛ kɛrɛɛ balaŋ nyeeya nɛ man ŋolo nyi, waa gyu ke kara Gyↄn nyee kↄna e. Keŋte balee ŋon gyuu deni keŋ man Gyↄn doo nɛ ka lese e kara ↄ nyee. 28Keŋte ↄ moo ke do tasa taŋtaŋalaŋ man kↄna gyoo Herode te ↄ moowↄ fa alebu ŋon, te ŋon mↄ moo ke fa ↄ naa. 29Gyↄn kaseela baŋ kenyii ↄ yeŋ nɛ, be gyuuwↄ ka mo e ke wuu. 30Yesu kpilala kufu bala baŋ ↄ be kpilii nɛ besewↄ kↄŋ kaa yako e nombia ŋan pou bↄↄ yɛɛ, na ŋan pou bↄↄ wola balaŋ nɛ. 31Na mena keŋ balaŋ na gyem tisi be dↄↄ beiŋ dↄↄ nɛ, be te nyiŋ gbɛɛ baa di weenɛɛ gba ya. Mena dↄↄ Yesu yako wↄ nyiaa, "Ɛ yela dɛɛ wↄŋ da wose lee yenaŋ gyu botↄↄ keŋ balaŋ be kyaa ya nɛ, na ɛ kaa fɛɛfo." 32Keŋte ba gyoowↄ degbele man te be laŋa botↄↄ keŋ balaŋ be kyaa ya nɛ. 33Mↄ be kee gyu nɛ, balaŋ burum naa wↄ te ba gyeŋawↄ nyi baŋ benaŋ. Mena dↄↄ balaŋ leewↄ donↄↄse ŋan man pou yeu gyu ka gyoo botↄↄ keŋ bee gyu nɛ, pɛte Yesu na ↄ kaseela baŋ kaa gyoowↄ botↄↄ. 34Yesu ke tisi lee degbele keŋ man na ↄ kena balaŋ burum baŋ nɛ, be nombia yɛɛ e waraŋase. Nawolo nyi na be yɛɛ ŋgba namense baŋ bↄↄ dana gbeŋgyoo ya nɛ. Mena dↄↄ ↄ fiasɛɛ ↄ na wola wↄ abↄↄ burum. 35Mena debaŋ kenaŋ na te lii balinↄↄ, mena dↄↄ ↄ kaseela baŋ kↄŋawↄ ↄ gyaŋ kaa yako e nyiaa, "Kɛbo yɛɛ ŋale nsana ke, te tɛɛ mↄ te yuu. 36Lↄ balaŋ baŋ gbɛɛ na baa gyu donↄↄse na akuraase ŋan ŋa benaa nɛ man, na be kaa gyae kolo lɛɛ di." 37Mↄ Yesu yako wↄ nyiaa, "Ɛmɛɛ gbagba ɛ gyae kolo fa wↄ na baa di." Keŋte be bↄↄse e nyiaa, "Da mo tomyɛɛre kulutoo dokoloŋ kↄba lɛɛ weenɛɛ koraŋ na, gyae ka yee balaŋ burum kɛwↄ pou?" 38Botↄↄ te Yesu mↄ bↄↄse wↄ nyiaa, "Bodobodose aŋmoŋ te ɛ dana? Ɛ gyu ke kɛɛ." Be ke gyu ke kɛɛ nɛ te be kaa yako e nyiaa, "Bodobodose abiliŋ anoŋ na kpebia bala pɛ te de dana." 39Keŋte Yesu yako ↄ kaseela baŋ nyi baa yela balaŋ baŋ ke kyakee akpii akpii ŋalese nalaŋ ŋan dↄↄ. 40Mena dↄↄ balaŋ baŋ kyakeewↄ akpii akpii. Akpii ŋaale yɛɛ balaŋ sↄŋonoŋ (100) te ŋaale mↄ yɛɛ balaŋ sↄŋola na kufu (50). 41Botↄↄ te Yesu moo bodobodose anoŋ na kpebia bala baŋ, te ↄ gyinaa ↄ nyee kɛɛ adido te ↄ fanewↄ do Wurubuarɛ nↄↄ. Te ↄ kɛrɛɛ ŋa fa ↄ kaseela baŋ nyi baa kpɛlɛɛ fa balaŋ baŋ. 42Balaŋ baŋ pou diiwↄ baa ba kegyaebii. 43Be ke di taŋ nɛ, ↄ kaseela baŋ tↄↄsee bodobodose na kpebia buruburu ŋan bↄↄ dii kaase na, be nyiŋa doŋase kufu ala (12). 44Balaŋ baŋ bↄↄ di weenɛɛ ŋan nɛ, be man baala baageŋ yɛɛ balaŋ kakpoŋse banoŋ (5000). 45Debokenaŋ man te Yesu yela ↄ kaseela baŋ gyoowↄ degbele man kyaŋ gbɛɛ bee gyu Bɛtesaida donↄↄ keŋ ke kyaa boo keŋ diŋgyiŋ nɛ, na ŋon ke lↄ balaŋ baŋ gbɛɛ. 46Ↄ ke lↄ balaŋ baŋ gbɛɛ taŋ nɛ, ↄ gyuuwↄ bula dↄↄ ↄ kaa fane. 47Kelii balinↄↄ nɛ, na degbele keŋ te lii boo keŋ nsana nsana, te kaa Yesu waageŋ boo keŋ diŋgyiŋ. 48Botↄↄ te Yesu kɛɛwↄ na feliŋ ne gyↄↄ gyaŋee na ↄ kaseela baŋ, mena dↄↄ bɛɛ kaa na degbele keŋ kesaa. Keŋte ↄ karatɛɛwↄ ta loŋ keŋ dↄↄ gyu be gyaŋ, te ↄ yɛɛwↄ ŋgba ↄ ne gbaa wↄ nɛ. 49Ↄ kaseela baŋ kena e ↄ dↄŋ loŋ keŋ dↄↄ ↄ ne kↄŋ nɛ, na ba gyeŋ nyi ↄ yɛɛ woo e te be fae yeesa. 50Nawolo nyi be popou naa e te gyakoloŋ kyaŋa wↄ. Debokenaŋ man te Yesu kolosiwↄ na wↄ nyi, "Ɛ nyiŋ konↄↄ! Ɛ na yee ya! Maŋ e." 51Botↄↄ te ↄ gyoowↄ kyaa degbele keŋ man kpu na wↄ, te feliŋ ŋon nↄↄ yↄkↄsewↄ. Nombia kɛŋa doo ↄ kaseela baŋ nↄↄ nideli. 52Yesu ka mo bodobodose anoŋ kpala balaŋ kakpoŋse banoŋ baŋ nɛ, ↄ kaseela baŋ te nyii ka asɛɛ ya, nawolo nyi na be sɛɛ be ta gyeŋa walaŋ ŋon dinↄↄ Yesu yɛɛ ya. 53Keŋte ba toŋa boo keŋ gyu Genesareti tɛɛle man, te be kpaŋa ba degbele keŋ botↄↄ. 54Be ka betaa lee degbele keŋ man pɛ, te balaŋ naa Yesu te ba gyeŋawↄ nyi ŋon ŋonaŋ. 55Mena dↄↄ balaŋ yekiiwↄ lee tɛɛle kenaŋ yenaŋ kamasɛ man kↄŋ ↄ gyaŋ. Yenaŋ kamasɛ keŋ be nyii nyi Yesu kyaa na, bɛɛ kↄŋ na ba seele be kaweesetena ba afoŋoŋse dↄↄ bɛɛ kↄŋ botↄↄ. 56Te akuraase yaa donↄↄse kamasɛ ŋan man Yesu de gyu nɛ, balaŋ na mo be kaweesetena kaa see abↄntere man, na ba te waase e nyi waa yela kaweesetena baŋ ka mo be nyiŋmaase tina ↄ kegba nↄↄbii paŋpaŋ bo gba. Te baŋ pou bↄↄ tina ↄ kegba keŋ nɛ, wose yɛɛ wↄ doŋ.

will be added

X\