Maake 5

1Kenaŋ wↄle te Yesu na ↄ kaseela baŋ toŋa boo keŋ gyu Gerasenetena tɛɛle man. 2Yesu ka lee degbele keŋ man pɛ te balee ŋolo ŋon feliŋkum doo ↄ man nɛ, leewↄ amusee man kↄŋ kaa gyaŋee na e. 3Na mena balee ŋonaŋ kyae amusee man botↄↄ, te ŋolo na ŋolo bɛɛ tekaa tale kyaŋ e do agbaraagbaraa bela ya. 4Nawolo nyi nafↄ bɛɛ mo agbaraagbaraa do e ↄ nyiŋmaase na ↄ nawↄↄ man, mↄna ↄ ne tirii ŋa pou leki. Te ŋolo be dana doŋ keŋ waa tale yↄkↄse e ya. 5Nelim na ka weese na ↄ dↄŋ amusee man na bulase dↄↄ botↄↄ ↄ ne fae yeesa, na ↄ na mo boya kɛrɛɛ ↄ wose. 6Balee ŋonaŋ kena Yesu ne kↄŋ lemlem nɛ, te ↄ yeuwↄ ke buŋ ↄ siaman. 7Botↄↄ te Yesu fae feliŋkum keŋ nyi waa lee balee ŋon man. Keŋte balee ŋon fae yeesa keŋkeŋ nyiaa, "Yesu, Wurubuarɛ Adidote Bu, woŋ te n ne gyae me gyaŋ? Mɛɛ mo Wurubuarɛ mɛɛ doo neŋ teree nyi, na naase maŋ diyem ya." 9Te Yesu bↄↄse balee ŋon nyi, "N yele yɛna sena?" Te ↄ yako e nyi, "Ma yele yɛna dikpii, nawolo nyi da boe." 10Keŋte balee ŋon waase Yesu agbaatee agbaatee nyi, ↄ na gegi feliŋkumɛɛ ŋan lee depuŋ kenaŋ man ya. 11Kekↄŋ mena na kekuiriise dikpii daale seŋɛɛ bula keŋ teŋa man bee dii. 12Keŋte feliŋkumɛɛ ŋan doo Yesu teree nyi, "Waaseda, fa daa gbɛɛ na de kaa gyoo kekuiriise kɛwↄ man." 13Botↄↄ te Yesu sɛɛwↄ te ba leewↄ ka gyoo kekuiriise baŋ man. Kekuiriise baŋ baa yɛɛ ŋgba kakpoŋse ala nɛ, te be yeuwↄ tisi dekeŋkeŋ kyoloŋkyoloŋ keŋ gyu ka gyoo loŋ man, te be popou munuwↄ. 14Mena dↄↄ balaŋ baŋ bɛɛ kɛɛ kekuiriise baŋ dↄↄ nɛ yeuwↄ, te be gyuuwↄ ke yako kpene keŋ be kↄŋ nɛ fa balaŋ baŋ be kyaa donↄↄ keŋ man nɛ na akuraase ŋan man pou. Keŋte balaŋ kↄŋawↄ kaa kɛɛ kpene keŋ be kↄŋ nɛ. 15Mena dↄↄ te kyare ya te balaŋ kↄŋawↄ Yesu gyaŋ te be naa walaŋ ŋon nafↄ feliŋkumɛɛ doo ↄ man nɛ baŋɛɛ, na ↄ doona wa abↄↄ na ↄ diteŋ keŋ te taŋ. Ba kena nyi balee ŋon diteŋ te taŋ nɛ, gyakoloŋ gyoo wↄ nideli. 16Botↄↄ te balaŋ baŋ bↄↄ naa kpene keŋ be kↄŋ balee ŋon feliŋkumɛɛ doo ↄ man na kekuiriise baŋ dↄↄ nɛ, yako nombia ŋan pou be kↄŋ nɛ fa balaŋ akaŋ baŋ. 17Keŋte balaŋ baŋ waase Yesu nyi waa lee be tɛɛle dↄↄ. 18Yesu ka mo waa gyoo degbele man nɛ, balee ŋon ↄ be kyↄ e nɛ waase e nyi waa sila e. 19Mↄna Yesu te sɛɛ ya te ↄ yako e nyiaa, "Ta gyu n dɛɛ, na n kaa yako n loŋtona kpene keŋ n Gbeŋgyoo be yɛɛ fa neŋ, na mena keŋ ↄ be wii n waraŋase nɛ." 20Mena dↄↄ balee ŋon laŋawↄ, te ↄ gyuuwↄ donↄↄse kufu ŋan ŋe kyaa dupuŋ kenaŋ man nɛ ↄ ne yako kpene keŋ Yesu be yɛɛ fa e nɛ. Te gyakoloŋ gyoo balaŋ baŋ pou. 21Kenaŋ wↄle te Yesu besewↄ gyoo degbele man toŋ boo keŋ gyu diŋgyiŋ. Keŋte balaŋ burum kↄŋawↄ kaa wuu ↄ dↄↄ boo nↄↄman botↄↄ. 22Keŋte Gyudatena ↄsom deni man kegyia ŋon bɛɛ baake e nyi Gyariose nɛ kↄŋawↄ botↄↄ. Ↄ kena Yesu nɛ, ↄ ke buŋawↄ ↄ nawↄↄ tɛɛ, 23te ↄ waase e nideli nyiaa, "Me bu alebubii ne gyae waa yeŋ. Kↄŋ na n kaa mo n nyiŋmaa gyakaa ↄ dↄↄ na waa nyiŋ nyeedoŋ." 24Mena dↄↄ Yesu sila e laŋ. Be kee gyu na balaŋ burum silana wↄ, na bɛɛ soko e. 25Na alo ŋolo kyaa keŋ fatabo ne gyↄ e kulutooneŋ kufu ala yaa. 26Ↄ te naa diyem nideli teeneŋtena nyiŋmaa man, te ↄ wↄlɛɛ ↄ kↄba keŋ pou ↄ dana nɛ nyi waa nyiŋ kawee kekyↄ. Mↄna ↄ kawee keŋ na bese bo yɛɛ doŋ kpu. 27Alo ŋon ke nyii Yesu wose man nombia nɛ, ↄ gyoowↄ balaŋ baŋ man kaa sila Yesu te ↄ yakowↄ ↄ nyeeman nyiaa, "Akpaa me nyiŋ mo me nyiŋmaa tina ↄ kegba koraŋ na, me kawee gyae ke taŋ." Keŋte ↄ ŋereketee ↄ wose do balaŋ baŋ man ka seŋ Yesu wↄle, te ↄ moo ↄ nyiŋmaa tina ↄ kegba. 29Karatetee dokoloŋ te fatabo keŋ ne gyↄ e nɛ karawↄ, te ↄ naawↄ ↄ wose man nyi ↄ kawee te taŋ. 30Debokenaŋ man te Yesu naawↄ nyi doŋ daale ta lee ↄ man. Keŋte ↄ besenawↄ kɛɛ balaŋ baŋ gyaŋee te ↄ bↄↄse wↄ nyiaa, "Amↄte tinaa na ma kegba?" 31Botↄↄ te ↄ kaseela baŋ yako e nyiaa, "Nyaŋ gbagba n naa mena keŋ balaŋ be wuu n dↄↄ, na n na bese bↄↄse nyi 'Amↄte tinaa na maŋ?' " 32Mↄna Yesu gyakaa ↄ ne kɛo nyi waa naa walaŋ ŋon ↄ be tina ↄ kegba nɛ. 33Alo ŋon kena mena keŋ ↄ wose be yɛɛ e nɛ, ↄ moo gyakoloŋ na wose keseree kaa buŋ Yesu nawↄↄtɛɛ te ↄ yako e kpene keŋ be kↄŋ nɛ pou. 34Botↄↄ te Yesu yako e nyiaa, "Me bu, n kelɛɛ maŋ di dↄↄ te n nyiŋa kawee kekyↄ. Ta wosefɛɛreŋ man, nawolo nyi n kaale keŋ pou te taŋ." 35Yesu ka seŋ botↄↄ ↄ ne kolosi nɛ, baale leewↄ Gyudatena ↄsom deni man kegyia Gyariose ŋon dɛɛ kaa yako e nyiaa, "N bu alebu ŋon ta yem. Weera te n ne naase de Gbeŋgyoo ŋon diyem bela" 36Mↄ Yesu ta mo balaŋ baŋ nombia ŋan bↄↄ kaa yako ŋon nɛ yɛɛ kolo ya. Mena dↄↄ ↄ yako ↄsom deni man kegyia ŋon nyiaa, "Na yee ya, nyaŋ lɛɛ maŋ di." 37Mena dↄↄ Yesu te yela ŋolo ke sila e kpu na Pita na Gyemisi, na Gyemisi ↄ naabu Gyↄn baageŋ ya. 38Be ka benaa Gyudatena ↄsom deni man kegyia Gyariose ŋon dɛɛ nɛ, Yesu nyiiwↄ na balaŋ ne wii na bɛɛ fae yeesa keŋkeŋ. 39Yesu ka gyoo dekpaŋalaŋ keŋ man nɛ te ↄ bↄↄse balaŋ baŋ nyiaa, "Weera te ɛ ne wii te ɛ ne fae yeesa? Bu ŋon ta yeŋa ta ya, ↄ doo dosoroŋ bo." 40Botↄↄ te balaŋ baŋ boŋo Yesu. Keŋte ↄ gegi balaŋ baŋ pou lee te ↄ moo bu ŋon ↄ kya na ↄ naa, na ↄ kaseela batooro baŋ be silana e nɛ, te be gyuuwↄ deni keŋ man woo ŋon doo nɛ. 41Keŋte ↄ kyaŋa bu ŋon nyiŋmaa man te ↄ yako e nyiaa, "Talita kumi!" Kei nawolo nyi, "Alebubii, me kpa koro." 42Karatetee dokoloŋ te alebu ŋon korowↄ seŋ ↄ ne tɛɛ. Keŋte gyakoloŋ gyoo wↄ nideli. Na bu ŋon te di kulutooneŋ kufu ala. 43Botↄↄ te Yesu faree wↄ nideli nyi be na yeli walaŋ na walaŋ ke nyii nombii kei ya. Te ↄ yako wↄ nyi baa gyae kolo fa bu ŋon ke di.

will be added

X\