Maake 4

1Wee daale Yesu besewↄ ↄ na wola Wurubuarɛ nombia Galelia boo nↄↄman. Te mena keŋ balaŋ burum be kaa wuu ↄ dↄↄ dↄↄ nɛ, ↄ gyoowↄ ke kyaa degbele man gyu loŋ keŋ dↄↄ na balaŋ akaŋ baŋ pou seŋɛɛ dekeŋkeŋ dↄↄ. 2Botↄↄ te ↄ wola wↄ nombia aduya man. 3Te ↄ yako wↄ nyiaa, "Ɛ tei kɛbo, wↄↄfarale ŋolo gyuuwↄ ke ŋmatee abↄↄbia ŋgba amↄla nɛ ↄ wↄↄman. 4Ↄ kɛɛ ŋmatee ŋa nɛ, ŋaale yalawↄ gbɛɛneŋbia ŋan doo wↄↄ keŋ man nɛ man, te gyebuse kaa tↄↄsee ŋa di. 5Ŋaale mↄ yalawↄ kpanaŋse dↄↄ te ŋe tuuwↄ, mↄna tɛɛle ta boo botↄↄ ya. 6Mena dↄↄ ↄga kaa seŋawↄ na te ŋa botowↄ. Te keŋ ŋe te nyiŋ lila burum dↄↄ ya nɛ, ŋe popou yekeewↄ. 7Bia ŋan ŋaale mↄ yalawↄ kpalamse man te ŋe tuuwↄ, te kpalamse ŋan mↄ tuuwↄ milii ŋa. Mena dↄↄ ŋe te nyiŋ ŋa wose se bia ya. 8Abↄↄbia ŋan ŋaale mↄ yalawↄ tɛɛle kpaakpaa dↄↄ te ŋe tuuwↄ bee, te ŋa see bia burum. Ŋaale see bia sao na kufu (30), te ŋaale mↄ see bia sↄŋotooro (60), te ŋaale mↄ see bia sↄŋonoŋ (100)." 9Keŋte Yesu yako wↄ nyiaa, "Ŋon ↄ dana deŋela waa nyii na, waa tei nideli." 10Keka Yesu waageŋ nɛ, ↄ kaseela kufu bala baŋ na balaŋ baŋ be kyaa botↄↄ kpu na wↄ nɛ yako e nyi waa wola wↄ dudu keŋ asɛɛ. 11Keŋte Yesu yako wↄ nyiaa, "Ɛmɛɛ dↄↄ Wurubuarɛ ta toro ya agyueŋse na ɛ ka gyeŋ nombia ŋan weesɛɛ lee ↄ gyoori keŋ wose man. Mↄna balaŋ baŋ bↄↄ kpuɛ na ŋon ya nɛ dↄↄ, aduya man te baa kolosi fa wↄ, 12na ke yela, 'Baa kɛo kɛo mↄna bↄↄ gyae baa naa kolo ya, te baa tei tei mↄna bↄↄ gyae baa nyii nombia ŋenaŋ man ya. Na mena ya nɛ, baa kyɛɛkee lee be gbɛɛneŋ kumɛɛ man, na Wurubuarɛ ka mo be nombiakumɛɛ kyɛɛ wↄ.' " 13Keŋte Yesu yako wↄ nyiaa, "Akpaa ɛ bee nyii dudu kei asɛɛ ya na, sena te ɛ ke yɛɛ na ɛ ke nyii aduya akaŋ man? 14Abↄↄbia ŋan wↄↄfarale ŋon be ŋmatee nɛ seŋɛɛ fa Wurubuarɛ nombia ŋan. 15Balaŋ baale yɛɛ ŋgba bia ŋan be yale wↄↄ keŋ gbɛɛneŋbia man nɛ. Be nyii Wurubuarɛ nombia ŋan pɛ, na ↄbↄnsam te kↄŋ kaa lese ŋa lee be konↄↄse man. 16Balaŋ baale mↄ yɛɛ ŋgba bia ŋan be yale kpanaŋse dↄↄ nɛ. Be nyii Wurubuarɛ nombia ŋan na, bɛɛ lɛɛ ŋa na gyoŋ debokenaŋ man. 17Mↄna keŋ Wurubuarɛ nombia ŋan te nyiŋ lila be man dↄↄ ya nɛ, bↄↄ ne tale seŋ keŋkeŋ kelii ↄto ya. Mena dↄↄ akpaa de kↄŋ nyi Wurubuarɛ nombia ŋan dↄↄ te bɛɛ naase wↄ diyem na, be ta bese be wↄle bileŋ. 18Balaŋ baale mↄ yɛɛ ŋgba bia ŋan be yale kpalamse man nɛ. Bee nyii Wurubuarɛ nombia ŋan, 19mↄna akpaa tɛɛle kei dↄↄ nombia na kↄba kegyae beiŋ, na tɛɛle kei dↄↄ abↄↄ akaŋ ŋan kegyae da gyoo be man nɛ, na bee yele baa bee Kristo man ya. 20Balaŋ baale mↄ yɛɛ ŋgba bia ŋan be yale tɛɛle kpaakpaa dↄↄ nɛ. Bee nyii Wurubuarɛ nombia ŋan te bɛɛ lɛɛ ŋa do konↄↄ kpaakpaa man, te bɛɛ tela ŋa nideli te bɛɛ yɛɛ kakyeŋ di ŋe dↄↄ. Mena dↄↄ nombia ŋan ne yele bɛɛ yɛɛ abↄↄ kpaakpaa ŋgba ŋan ŋↄↄ se bia sao na kufu (30) na sↄŋotooro (60), na sↄŋonoŋ (100), nɛ." 21Keŋte Yesu yako wↄ nyiaa, "Ŋolo bɛɛ kyaŋee kanea na waa mo kolo wuu ke dↄↄ yaa waa mo ke do mpa ateta ya. Mↄna ↄ na mo ke bo gyakaa kolo dↄↄ adido. 22Nawolo nyi kolo ba weesɛɛ keŋ be gyae ka lee debↄↄ ya, te kolo mↄ be wuɛ keŋ nyi be gyae ka lee debↄↄ ya. 23Walaŋ ŋon ↄ dana deŋele anenyiiŋ dei nɛ, waa see deŋele na waa tei." 24Keŋte Yesu yako wↄ bela nyiaa, "Ɛ kɛɛ ɛ wose nideli lee nombia ŋan ɛ ne nyii nɛ man. Nawolo nyi kpene keŋ n mo yɛɛ n dↄↄ nɛ, keŋ ke te Wurubuarɛ mↄ waa mo yɛɛ neŋ, te waa yɛɛ neŋ gba kela mena keŋ n ba mo yɛɛ n dↄↄ nɛ. 25Nyaŋ ŋon n dana kolo na Wurubuarɛ waa kpu neŋ na n ke nyiŋ kpu. Te nyaŋ ŋon n be dana kolo ya na, kyomii keŋ n na gyueŋ nyi n dana koraŋ nɛ, Wurubuarɛ waa lɛo ke lee n nyiŋmaa man." 26Yesu besewↄ gyↄ dudu fa wↄ nyiaa, "Wurubuarɛ gyoori keŋ yɛɛ ŋgba mena keŋ walaŋ ne ŋmatee abↄↄbia ŋaale ŋgba amↄla ↄ wↄↄman nɛ. 27Nelim na ka weese ↄ doo te ↄ fom na abↄↄbia ŋan ne tuu na ŋɛɛ bee, mↄna ŋon gbagba ba gyeŋ mena keŋ ne yɛɛ pɛte ŋɛɛ bee ya. 28Tɛɛle keŋ gbagba ne yele la te bia ŋan ne tuu. Ne taŋgbɛɛ yɛɛ faareŋse na te fulu, pɛte kaa yɛɛ bia. 29Amↄla bia ŋan de yɛɛ pɛ, na wↄↄte ŋon ta mo ↄ sakawa gyu ke kara ŋa, nawolo nyi amↄla ŋan kekara debaŋ te lii." 30Yesu besewↄ bↄↄse wↄ nyiaa, "Woŋ te dɛɛ mo Wurubuarɛ gyoori keŋ maa na? Yaa dudu woŋti te dɛɛ gyↄ na dɛɛ mo lese ke man? 31Wurubuarɛ gyoori keŋ yɛɛ ŋgba daŋbii peperee daale keŋ bɛɛ baake nyi Mastade nɛ. Wↄↄ man abↄↄ ŋan bee duu pou nɛ, daŋbii kei yɛna ŋe man kemaasa. 32Mↄna nyi akpaa be duu ke nɛ, kɛɛ bee bese kolo dinaa kela daasebia akaŋ ŋan pou, keŋ nyi gyebuse ne kↄŋ kaa loo ba asaase do ke tombia man." 33Aduya burum ŋgba kei dinↄↄ nɛ te Yesu moowↄ kolosi Wurubuarɛ nombia fa balaŋ baŋ, ŋgba mena keŋ baa tale nyii ŋe man nideli nɛ. 34Ↄ te kolosi nombii yakaa fa wↄ keŋ ↄ te gyↄ dudu ya. Mↄ nyi akpaa de ka ŋon na ↄ kaseela baŋ baageŋ nɛ, ↄ na lese aduya ŋan pou man wola wↄ. 35Mena wee kenaŋ balinↄↄ nɛ, Yesu yako ↄ kaseela baŋ nyiaa, "Ɛ yela dɛɛ toŋ gyu boo keŋ diŋgyiŋ." 36Keŋte be tinaa balaŋ dikpii keŋ yela, te ŋon na ↄ kaseela baŋ gyoowↄ degbele man te be laŋawↄ. Na agbelese ŋaale mↄ silana wↄ. 37Be kee gyu na te feliŋ dinaa daale korowↄ ne gyↄↄ, te gyↄↄ loŋ do degbele keŋ man te ke yela ke munu. 38Debaŋ kenaŋ na Yesu te doo dosoroŋ degbele keŋ wↄle mo ↄ nyee gyakaa keputu dↄↄ. Keŋte ↄ kaseela baŋ ke gyuusu e bↄↄse e nyiaa, "De Gbeŋgyoo, n be famenɛ ŋgba dɛɛ gyae dee munu yee?" 39Botↄↄ te Yesu korowↄ te ↄ fae feliŋ keŋ te ↄ yako loŋ keŋ nyiaa, "Yɛɛ yididi!" Keŋte feliŋ keŋ tinaa kegyↄ yela, te loŋ keŋ mↄ yɛɛwↄ yididi. 40Keŋte Yesu bↄↄse ↄ kaseela baŋ nyiaa, "Woŋ dↄↄ te ɛ dana gyakoloŋ mena? Ɛ sɛɛ ɛ te lɛɛ ta maŋ di yee?" 41Gyakoloŋ kyaŋa ↄ kaseela baŋ te be bↄↄse dↄŋa nyiaa, "Walaŋ woŋti yaa kei, te feliŋ na loŋ gba ne nyii ↄ dei nɛ?"

will be added

X\