Maake 3

1Wee daale Yesu besewↄ gyu Gyudatena ↄsom deni man. Ↄ ke gyu nɛ, na baam dayeŋasate ŋolo kyaa botↄↄ. 2Na balaŋ baŋ baale na deke Yesu nyi waa kyↄ balee ŋon kawee ba kefɛɛfowee keŋ, na baa nyiŋ mo nombia gyakaa ↄ dↄↄ. 3Keŋte Yesu yako baam dayeŋasate ŋon nyiaa, "Lee kaa seŋ siaman kɛbo." 4Botↄↄ te Yesu bↄↄse wↄ nyiaa, "Woŋ te da mmaraa ne fa gbɛɛ nyi dɛɛ yɛɛ kefɛɛfowee? Da mmaraa ne fa daa gbɛɛ nyi dɛɛ yɛɛ kolo kpaakpaa yaa dɛɛ yɛɛ kolo kum? Dɛɛ lɛɛ walaŋ nyee yaa, dee yela waa yeŋ?" Botↄↄ na, ŋolo te tale gyuusu ↄ nↄↄ ya. 5Te Yesu kɛɛ wↄ pou gyaŋee baŋ man, te takaa e nideli lee ba deŋele doŋ keŋ dↄↄ. Keŋte ↄ yako kaweete ŋon nyiaa, "Tenee n baam." Botↄↄ te balee ŋon tenee ↄ baam keŋ, te kawee keŋ taŋawↄ te ↄ baam keŋ yɛɛ doŋ. 6Mena dↄↄ Farasiitena na Herode silala leewↄ be kaa bake mena keŋ baa mo ko Yesu. 7Kenaŋ wↄle te Yesu na ↄ kaseela baŋ wↄŋa ba wose lee botↄↄ gyu Galelia boo nↄↄman, te balaŋ burum baŋ bↄↄ lee Galelia nɛ sila e gyu botↄↄ. 8Be ke nyii kpene keŋ ↄ ne yɛɛ nɛ, balaŋ burum leewↄ Gyerusalɛm na Idumia donↄↄse na tɛɛle keŋ ke kyaa Gyↄↄdan boo diŋgyiŋ nɛ, na donↄↄse ŋan be kilisi Tae na Sidↄn nɛ man kↄŋ ↄ gyaŋ. 9Balaŋ baŋ booroŋ dↄↄ ↄ yako ↄ kaseela baŋ nyi baa gyae degbele fa e, na balaŋ baŋ be nyiŋ tↄ e do ya. 10Nawolo nyi ↄ te kyↄ balaŋ burum kaweese, mena dↄↄ baŋ be sɛɛ be dana kaweese nɛ te kaa wuu ↄ dↄↄ keŋ bɛɛ gyae baa mo be nyiŋmaase tina e. 11Te akpaa balaŋ baŋ feliŋkum doo be man nɛ de naa e na, bɛɛ buŋii ↄ nawↄↄtɛɛ na bɛɛ fae yeesa nyiaa, "Nyaŋ yɛna Wurubuarɛ bu ŋon." 12Keŋte Yesu faree wↄ nyi, be na yela balaŋ ka gyeŋ walaŋ ŋon dinↄↄ ↄ yɛɛ ya. 13Keŋte Yesu gyeŋa bula daale, te ↄ baake balaŋ baŋ ↄ ne gyae nɛ te be kaa yilaawↄ ↄ gyaŋ. 14Te ↄ lese balaŋ baŋ man baala kufu bala, te ↄ baake wↄ ↄ kpilala nyi baa kpu na e na waa kpilii wↄ na baa ta yako Wurubuarɛ nombia ŋan. 15Na waa fa wↄ doŋ na baa gberaa feliŋkumɛɛ lee balaŋ man. 16Baala kufu bala baŋ Yesu ba lese nɛ yela yaa, Simↄn te ↄ doo e yele nyi Pita, na 17Sebedeo bu Gyemisi na ↄ naabu Gyↄn, te ↄ besewↄ do wↄ yela nyi Boanegesi. Yele kei nawolo nyi bɛɛ yɛɛ nombia bo yakaa yakaa na doŋ ŋgba ↄga kefae nɛ, 18na Anderiase na Filipo na Batolomeo na Mateo na Tomase na Alfeose bu Gyemisi na Tadeose na Kaanan baale Simↄn ŋon ↄ ne gyae ↄ balaŋ nideli nɛ, 19na Gyudase Isekarↄte ŋon ↄ ba lese Yesu fa nɛ. 20Yesu ka lese ↄ kpilala baŋ taŋ nɛ te ↄ gyuuwↄ ↄ dɛɛ. Keŋte balaŋ burum kↄŋawↄ kaa wuu ↄ dↄↄ, keŋ ŋon na ↄ kaseela bee nyiŋ gbɛɛ baa di weenɛɛ paŋpaŋ gba ya. 21Ↄ loŋtona kenyii mena nɛ be gyuuwↄ be kaa kyaŋ e gyu dɛɛ, nawolo nyi na balaŋ baŋ kpa ↄ nyee ne wↄlɛɛ. 22Botↄↄ te Gyudatena mmaraa wolala baŋ bↄↄ lee Gyerusalɛm donↄↄ man kↄŋ botↄↄ nɛ yakowↄ nyiaa, "Feliŋkumɛɛ pou gyoo ŋon bɛɛ baake e nyi Bɛlisɛbu nɛ doola Yesu man. Ŋon faa na e doŋ te ↄ na mo gberaa feliŋkumɛɛ lee balaŋ man nɛ." 23Keŋte Yesu baake balaŋ baŋ kↄŋ ↄ gyaŋ yako wↄ aduya man nyiaa, "Sena te ↄbↄnsam waa tale gegi ↄ wose? 24Akpaa tɛɛle daale man balaŋ de kpase ba wose bee yoo na dↄŋa nɛ, tɛɛle kenaŋ be gyae ke seŋ ya. 25Mena mↄ te akpaa dekpaŋalaŋ daale man balaŋ de kpase ba wose bee yoo na dↄŋa nɛ, dekpaŋalaŋ kenaŋ mↄ be gyae ke tale seŋ ya. 26Te akpaa ↄbↄnsam na ↄ tewulɛɛ de kpase ba wose kpookpoo te ba koro seŋ tia dↄŋa na, ↄ be gyae waa tale seŋ ya. Na ↄ gyoori keŋ ↄto kenaŋ." 27Keŋte Yesu besewↄ yako wↄ nyiaa, ŋolo be tale gyu doŋte ŋolo dɛɛ na ↄ kaa mo ↄ kolo, keŋ nyi ↄ te di doŋte ŋon dↄↄ ya. Nyi akpaa ↄ di doŋte ŋon dↄↄ te ↄ bake e see nɛ, kenaŋ na waa tale kuu wa abↄↄ pou. 28Mɛɛ yako ŋon anokoare baa ɛ ke nyii nyiaa, Wurubuarɛ waa tale mo balaŋ pou nombiakumɛɛ na mmusuo nombia ŋan bɛɛ yɛɛ nɛ kyɛɛ wↄ. 29Mↄna walaŋ ŋon waa kolosi mmusuo nombia tia Wurubuarɛ feliŋ ŋon nɛ, ↄ be gyae waa mo kyɛɛ ↄtenate korakora ya. Nawolo nyi walaŋ ŋonaŋ te yɛɛ nombiakumɛɛ ŋan ŋe doo kekpaakekpaa. 30Keŋ dↄↄ te Yesu be yako nombia kɛŋa yɛna nyiaa, na balaŋ ne yako nyi feliŋkum doo la ↄ man. 31Keŋte Yesu ↄ naa na ↄ naabia kↄŋawↄ kaa seŋ debↄↄman kpila nyi baa baake e fa wↄ. 32Na balaŋ burum kyaa kilisi e te be yako e nyiaa, "Kɛɛ, n naa na n naabia seŋɛɛ debↄↄman bɛɛ gyae neŋ." 33Botↄↄ te Yesu bↄↄse wↄ nyiaa, "Bomↄ yɛna me naa na me naabia?" 34Keŋte ↄ kɛɛ baŋ be kyaa kilisi e nɛ gyaŋee te ↄ yakowↄ nyiaa, "Kɛɛ, me naa na me naabia yɛna kɛwↄ. 35Walaŋ kamasɛ ŋon ↄ ne yɛɛ Wurubuarɛ kegyaebii nɛ, ŋon yɛna me naabu na me deesi na me naa."

will be added

X\