Maake 2

1Weeya akalansɛɛ ŋaale wↄle nɛ, Yesu besewↄ gyu Kapanum donↄↄ man te balaŋ nyiiwↄ nyi ↄ te kↄŋ dɛɛ. 2Keŋte balaŋ burum kaa wuuwↄ botↄↄ, keŋ nyi nae daseŋae be doo ya. Mena dↄↄ gbɛɛ be doo keŋ ŋolo waa mo gyoo dekpaŋalaŋ keŋ man gba ya. Te Yesu kolosi Wurubuarɛ nombia fa wↄ. 3Keŋte balaŋ banaara baale seele ↄtakase ŋolo bɛɛ kↄŋ Yesu gyaŋ. 4Keŋ balaŋ boe dↄↄ be te nyiŋ gbɛɛ mo e ta denanↄↄ man ya. Mena dↄↄ ba gyeŋa deni keŋ man Yesu kyaa nɛ nyee dↄↄ te be wolee yenaŋ daale, te be tisinaa kaweete ŋon na ↄ dofoŋoŋ keŋ pou dɛɛdɛɛ see Yesu siaman. 5Yesu kena mena keŋ balaŋ baŋ be lɛɛ e di nɛ, ↄ yako kaweete ŋon nyiaa, "Me bu, me ta mo n nombiakumɛɛ kyɛɛ neŋ." 6Botↄↄ te Gyudatena mmaraa wolala baŋ be kyaa botↄↄ nɛ yakowↄ ba nyeeya man nyiaa, 7"Weera dↄↄ te balee kei ne kolosi mena? Ↄ te kolosi mmusuo nombia. Lee Wurubuarɛ wↄle na, amↄte kyaa la keŋ waa tale mo dukum kyɛɛ?" 8Debokenaŋ man te Yesu gyeŋa kpene keŋ bɛɛ gyueŋ nɛ te ↄ yako wↄ nyiaa, "Woŋ dↄↄ te ɛ na gyueŋ kɛŋa ɛ nyeeya man? 9Nombia kɛŋa man woŋti woɛla na keyako fa ↄtakase ŋon? 'Me ta mo n dukum kyɛɛ neŋ,' yaa 'Koro seŋ na n ka mo n dofoŋoŋ na n ke ta?' 10Mↄna mɛɛ gyae ɛ ka gyeŋ nyi, Maŋ Deniwalaŋ Bu dana doŋ tɛɛle kei dↄↄ nyi maa mo dukum kyɛɛ." Mena dↄↄ ↄ yako kaweete ŋon nyiaa, 11"Koro seŋ. Gate n dofoŋoŋ, na n ke ta gyu n dɛɛ." 12Debokenaŋ man te kaweete ŋon korowↄ seŋ ↄ nawↄↄ dↄↄ, te ↄ gate ↄ dofoŋoŋ keŋ dↄↄ ↄ doo nɛ, te ↄ leewↄ laŋ ↄ dɛɛ balaŋ baŋ pou siaman. Nombia kɛŋa doo balaŋ baŋ pou nↄↄ te ba lese Wurubuarɛ yele yako nyiaa, "Da te naa ta mena nombia kɛŋa dinↄↄ see ya." 13Kenaŋ wↄle te Yesu besewↄ gyu Galelia boo nↄↄman, te balaŋ burum kↄŋawↄ ↄ gyaŋ te ↄ wola wↄ Wurubuarɛ nombia. 14Ↄ ke ta ↄ ne lam nɛ, ↄ naa Alfeose bu Lewi ŋon ↄ yɛɛ lempoolɛɛre e nɛ, na ↄ kyaa ↄ lempoo delɛe man. Te Yesu yako e nyiaa, "Sila maŋ." Keŋte Lewi korowↄ sila e. 15Kenaŋ wↄle nɛ, Lewi baake Yesu na ↄ kaseela baŋ gyu ↄ dɛɛ be kaa di. Lempoolɛɛra na nombiakumɛɛyɛɛra burum sila Yesu na ↄ kaseela baŋ gyu botↄↄ, te baŋ na wↄ pou ke diiwↄ bom. 16Gyudatena mmaraa wolala baŋ bↄↄ lee Farasiitena dikpii keŋ man kena ŋgba Yesu ne dii bom na lempoolɛɛra na nombiakumɛɛyɛɛra nɛ be bↄↄse ↄ kaseela baŋ nyiaa, "Weera dↄↄ te Yesu ne dii bom na lempoolɛɛra na nombiakumɛɛyɛɛra?" 17Yesu kenyii mena nɛ te ↄ yako wↄ nyiaa, "Kaweesetena te kaboena nyi baa kyↄ wↄ kawee. Balaŋ baŋ bↄↄ na wee ya nɛ, dↄↄ bↄↄ ne hia kawee kekyↄ ya. Ma te kↄŋ nyi me kaa baake balaŋ baŋ be gbɛɛneŋ wulaa tenɛɛ Wurubuarɛ siaman nɛ ya. Mↄna me kↄŋae na me kaa baake balaŋ baŋ be yɛɛ nombiakumɛɛyɛɛrawↄ nɛ." 18Wee daale balaŋ baale naawↄ na Gyↄn Wurubuarɛ loŋsↄↄre silala na Farasiitena ne bake be nↄↄ. Keŋte be bↄↄse Yesu nyiaa, "Weera dↄↄ te Gyↄn Wurubuarɛ loŋsↄↄre silala na Farasiitena ne bake be nↄↄ, te nyaŋ wui kɛwↄ dↄↄ bↄↄ ne bake be nↄↄ ya?" 19Botↄↄ te Yesu tiranↄↄ fa wↄ nyiaa, "Sena te balaŋ baŋ be kyaa alowↄletɛɛ nɛ baa tale bake be nↄↄ keŋ alowↄle baale kyaa be gyaŋ? Alowↄle baale nyiŋa ↄ kyaa be gyaŋ nɛ, bↄↄ gyae baa tale bake be nↄↄ ya. 20Mↄna debaŋ daale gyae kekↄŋ keŋ baa mo alowↄle baale ŋon lee be gyaŋ. Mena wee kenaŋ man te baa bake be nↄↄ. 21Ŋolo bɛɛ kara kanyaŋ wↄle mo taa kakyeŋgbelaa keŋ ba yem nɛ bↄↄ ya. Akpaa ↄ yɛɛ mena nɛ, kanyaŋ wↄle keŋ gyae ke tao kakyeŋgbelaa keŋ wolose ke bↄↄ keŋ yɛɛ ke dinaa. 22Mena mↄ te ŋolo bɛɛ mo soloŋ wↄle do wonembu tↄne ogele bene man ya. Akpaa ↄ yɛɛ mena na soloŋ keŋ gyae ke tao tↄne keŋ lii, na soloŋ keŋ na wonembu tↄne ogele keŋ pou ke wↄlɛɛ. Bɛɛ mo soloŋ wↄle bo do wonembu tↄne ogele wↄle man." 23Kelii Gyudatena kefɛɛfowee nɛ, Yesu na ↄ kaseela baŋ gyuuwↄ ka mo wↄↄ daale man. Na weenɛɛ ŋan seŋɛɛ wↄↄ kenaŋ man nɛ yɛɛ ŋgba kefaa nɛ. Keŋte ba kpera ŋaale posaa bɛɛ tao. 24Keŋte Farasiitena bↄↄse Yesu nyiaa, "Weera te n kaseela baŋ ne yɛɛ kpene keŋ dɛɛ kↄle nɛ da kefɛɛfowee?" 25Botↄↄ te Yesu tiranↄↄ fa wↄ nyiaa, "Ɛ te kala ta lee Wurubuarɛ tↄne keŋ man kpene keŋ de naana Defidi be yɛɛ debaŋ keŋ tanam be kyaŋ ŋon na ↄ tebia, te ba wose be kyaŋ wↄ nɛ yee? 26Debaŋ keŋ Abiata yɛɛ Wurubuarɛ sae kegyia e nɛ, de naana Defidi gyoowↄ Wurubuarɛ ↄsom deni dinaa keŋ man, te ↄ dii bodobodo keŋ bↄↄ mo deesi fa Wurubuarɛ keŋ ŋolo be dana gbɛɛ waa di ke kpu na Wurubuarɛ saese ya nɛ. Keŋte ↄ moo ŋaale mↄ fa ↄ tebia baŋ be kpuɛ na e nɛ, te baŋ mↄ diiwↄ." 27Te Yesu torowↄ yako wↄ nyiaa, "Wurubuarɛ yɛɛ kefɛɛfowee bo fa walaŋ. Ↄ te yɛɛ walaŋ fa kefɛɛfowee ya. 28Mena dↄↄ maŋ Deniwalaŋ Bu ŋon yɛna kefɛɛfowee keŋ gba Gbeŋgyoo."

will be added

X\