Maake 16

1Gyudatena kefɛɛfowee keŋ ke taŋ nɛ, Mɛɛre ŋon ↄ ba lee Magedala na Gyemisi ↄ naa Mɛɛre na Salome, lɛɛ abↄↄ ofoŋ nyiŋan be kaa buraa Yesu woo ŋon. 2Kosida nebo nebo weese ke bɛɛ nɛ, ala baŋ korowↄ bee gyu yebↄↄ keŋ tɛɛ. 3Be kee gyu na bɛɛ bↄↄse dↄŋa nyiaa, "Amↄte ne gyae la waa biliŋi boe keŋ lee yebↄↄ keŋ nↄↄman fa daa?" 4Mↄ be ke gyina be sia kɛɛ na, be naawↄ nyi be te biliŋi boe dinaa dinaa keŋ lee yebↄↄ keŋ nↄↄman. 5Be ka mo baa gyoo yebↄↄ keŋ man nɛ, te be naa tobaale ŋolo na ↄ doona kegba wolom wurikyim na ↄ baŋɛɛ dunoluŋ dↄↄ te be ŋeŋawↄ. 6Botↄↄ te ↄ yako ala baŋ nyiaa, "Ɛ na ŋeŋii ya. Ma gyeŋ nyi Yesu ŋon ↄ ba lee Nasarɛte, ŋon bↄↄ gyↄ e sakaa ↄpaŋdaŋ dↄↄ nɛ yaa ɛ ne kɛo. Ↄ te fom. Ↄ be kyaa kɛbo ya. Ɛ kɛɛ botↄↄ keŋ ↄ be doo nɛ. 7Mena dↄↄ ɛ gyu ke yako ↄ kaseela baŋ na Pita nyiaa, 'Ↄ te kyaŋ ŋon gbɛɛ ↄ ne gyu Galelia donↄↄ man. Botↄↄ te ɛ kena e ŋgba mena keŋ ↄ be yako ŋon nɛ.' " 8Keŋte ala baŋ leewↄ yebↄↄ keŋ man bileŋ, nawolo nyi gyakoloŋ ta gyoo wↄ te ba wose mↄ ta yeŋ wↄ. Te ba te yako ŋolo mↄ kolo ya, nawolo nyi bee yee. 9Yesu kefoŋ lee yeŋ man Kosida nebo nebo fuu keŋ nɛ, ↄ taŋgbɛɛwↄ lese ↄ wose wola Mɛɛre ŋon ↄ ba lee Magedala nɛ. Mɛɛre kei te Yesu gegi feliŋkumɛɛ nyetooro lee ↄ man nɛ. 10Mena dↄↄ ŋon mↄ gyuuwↄ ke yako balaŋ baŋ be silana Yesu nɛ. Ↄ ke gyu na be kyaa bee wii na bee di walaŋsa. 11Keŋ na be ke nyii nyi Yesu te fom te Mɛɛre naa e koraŋ nɛ, ba te lɛɛ di ya. 12Kenaŋ wↄle nɛ, Yesu lese ↄ wose dinↄↄ wↄle daale man wola ↄ kaseela bala baale debaŋ keŋ bee gyu donↄↄ daale man nɛ. 13Keŋte baŋ mↄ besewↄ kↄŋ kaa yako be tebia akaŋ baŋ. Mↄ baŋ mↄ te lɛɛ wↄ di ya. 14Kɛŋa pou wↄle nɛ, ↄ kaseela kufu daale baŋ yilaawↄ bee dii te Yesu besewↄ kaa lese ↄ wose wola wↄ. Keŋte ↄ gyeŋa baŋ do wↄ lee mena keŋ balaŋ be kↄŋ kaa yako wↄ nyi ↄ te fom, te ba lɛɛ wↄ di ya nɛ dↄↄ. 15Botↄↄ te Yesu yako wↄ nyiaa, "Ɛ gyu tɛɛle kei pou dↄↄ na ɛ kaa kolosi Wurubuarɛ nombia ŋan fa balaŋ pou. 16Walaŋ kamasɛ ŋon ↄ lɛɛ nombia ŋan di te be sↄ e Wurubuarɛ loŋ na, waa nyiŋ nyeedoŋ. Mↄ walaŋ kamasɛ ŋon ↄ te lɛɛ nombia ŋan di ya nɛ, Wurubuarɛ waa bu e fↄↄ. 17Balaŋ baŋ baa lɛɛ maŋ di nɛ, baa yɛɛ gyakoloŋ nombia kɛŋa. Baa gberaa feliŋkumɛɛ lee balaŋ man lee ma yele man, na baa kolosi deise wↄlɛɛ kpookpoo ŋan bↄↄ gyeŋ ya. 18Nyi akpaa be gate doma na be nyiŋmaase yaa be nyↄↄ teekum daale koraŋ na, be gyae ke yɛɛ wↄ kolo ya. Baa mo be nyiŋmaase gyakaa kaweesetena dↄↄ, na ba wose ke yɛɛ wↄ doŋ." 19De Gbeŋgyoo Yesu kekolosi fa wↄ taŋ nɛ, Wurubuarɛ moo e gyu adido te ↄ ke kyaawↄ Wurubuarɛ dunoluŋ dↄↄ. 20Yesu kaseela baŋ ka lee botↄↄ nɛ, be gyuuwↄ tɛɛle kei pou dↄↄ kekolosi Wurubuarɛ nombia ŋan. Te de Gbeŋgyoo seŋawↄ be wↄle te be yɛɛ gyakoloŋ nombia, na kawola nyi Wurubuarɛ nombia ŋan yɛɛ ampaŋ.

will be added

X\