Maake 15

1Tɛɛ kena nebo nebo fuu nɛ, saese kegyiise na donↄↄ kegyiise na Gyudatena mmaraa wolala gyaŋeewↄ te be bake Yesu nyeeman. Mena dↄↄ be bake e te ba moo e gyu ka do Pilato ŋon ↄ seŋɛɛ Romantena gyoo dinaa nawↄↄ man nɛ, nyiŋmaa man. 2Keŋte Pilato bↄↄse e nyiaa, "Nyaŋ yɛna Gyudatena gyoo ŋon?" Te Yesu tiranↄↄ nyi, "Mena yaa n yakowↄ nɛ." 3Te Gyudatena saese kegyiise baŋ kɛrɛɛ ↄ nↄↄse mo nombia burum gyakaa ↄ dↄↄ. 4Keŋte Pilato bↄↄse e nyi, "Be ta mo nombia kɛŋa bɛɛ gyakaa n dↄↄ na, n ba lese n nↄↄse yee?" 5Botↄↄ te nombia ŋan doo gyoo Pilato nↄↄ, nawolo nyi Yesu te yako daale ya. 6Gyudatena nyeekelɛɛwee kedi kamasɛ nɛ, kaboena nyi Pilato waa tina balaŋ baŋ bↄↄ kyam tↄ deni nɛ man dokoloŋ, ŋon balaŋ benaŋ gbagba ne gyae nɛ yela fa wↄ. 7Mena debaŋ kenaŋ na ba te kyaŋ Barabase tↄ deni. Barabase kei kpuɛ balaŋ baŋ bↄↄ koro seŋ tia gyoo dinaa, te bↄↄ ko balaŋ nɛ man. 8Botↄↄ te balaŋ dikpii keŋ kↄŋa Pilato gyaŋ nyi waa yɛɛ kpene keŋ ↄ ne taŋ yɛɛ debaŋ kamasɛ nɛ fa wↄ. 9Te Pilato bↄↄse wↄ nyiaa, "Ɛ ne gyae nyi maa lese Gyudatena gyoo ŋon fa ŋon?" 10Keŋ dↄↄ Pilato be bↄↄse mena yɛna nyi, ↄ gyeŋ nyi saese kegyiise baŋ ne kↄla Yesu dↄↄ te ba lese e fa yeŋ. 11Mↄ Wurubuarɛ saese kegyiise baŋ feefuwↄ do balaŋ dikpii keŋ nyi, baa yako Pilato nyi waa lese Barabase fa wↄ. 12Botↄↄ te Pilato bↄↄse wↄ nyi, "Sena te ɛ ne gyae maa yɛɛ walaŋ ŋon ɛ ne baake e nyi Gyudatena gyoo nɛ?" 13Te balaŋ dikpii keŋ fae yeesa nyi, "Yela baa gyↄ e nyeelabia sakaa ↄpaŋdaŋ dↄↄ na waa yeŋ" 14Keŋte Pilato bↄↄse wↄ nyiaa, "Woŋ dukum te ↄ yɛɛwↄ?" Mↄna be gyakaa bo bɛɛ fae yeesa keŋkeŋ nyi, "Gyↄ e nyeelabia sakaa ↄpaŋdaŋ dↄↄ" 15Keŋ Pilato ne gyae mena keŋ be wↄe ke fɛɛ wↄ dↄↄ ↄ lese Barabase fa wↄ, te ↄ yela ↄ yoonↄↄtena tuku Yesu te ↄ moo e fa nyi baa gyu ke gyↄ e nyeelabia sakaa ↄpaŋdaŋ dↄↄ. 16Keŋte yoonↄↄtena baŋ moo Yesu gyu Pilato dekpaŋalaŋ man botↄↄ keŋ bee di nombia nɛ, te be baake be tebia yoonↄↄtena akaŋ baŋ pou gyaŋee. 17Te ba moo kegba yayam do e, te ba moo sↄↄse loo gyooro kotↄtↄↄ wuu e. 18Na bee kulu e nyiaa, "Gyudatena gyoo, n nyee dɛɛ wolose" 19Botↄↄ na be gyakaa bɛɛ mo daŋ ŋmeree e ↄ nyeeman, na bɛɛ tↄ nↄↄloŋ woli e na bɛɛ buŋ ↄ nawↄↄtɛɛ kulu e. 20Be ke kulu e taŋ nɛ, ba kpee kegba yayam keŋ te ba moo ŋon gbagba wui keŋ do e. Te ba moo e lee be kaa gyↄ e sakaa ↄpaŋdaŋ dↄↄ. 21Be ka lee donↄↄ keŋ man bee gyu nɛ, te be gyaŋee na Simↄn ŋon ↄ ba lee Kirene donↄↄ man nɛ na ↄ ne kↄŋ. Simↄn kei bia yɛna Alɛkesanda na Rufuse. Keŋte ba ŋere e nyi waa lɛɛ Yesu ↄpaŋdaŋ keŋ seele. 22Te ba moo Yesu gyu botↄↄ keŋ bɛɛ baake nyi "Golgata" keŋ nawolo nyi "Nyeepookoo" dɛɛ nɛ. 23Keŋte ba moo tee keŋ bɛɛ baake nyi mɛɛrɛ nɛ kyakale soloŋ man fa Yesu nyi waa nyↄↄ, mↄna ↄ te nyↄↄ ke ya. 24Ba ke gyↄ e sakaa ↄpaŋdaŋ dↄↄ nɛ, te be kpɛlɛɛ ↄ kegbase buŋii te be lↄↄ boe ŋe dↄↄ, na baa naa keŋ walaŋ kamasɛ waa nyiŋ. 25Gyae ke yɛɛ ŋgba nebo weese debaŋ atoorote man nɛ, te be gyↄↄ Yesu sakaa ↄpaŋdaŋ dↄↄ. 26Keŋte be ŋmarase dukum keŋ be kpa ↄ be yɛɛ nɛ mataa ↄ nyee gbɛɛ nyiaa, "GYUDATENA GYOO ŊON YAA." 27Botↄↄ te be gyↄↄ ŋmɛɛlatena bala baale mↄ sakaa ↄpaŋdaase dↄↄ kpu na Yesu. Ŋolo sakaa ↄ dunoluŋ dↄↄ, te ŋolo mↄ sakaa ↄ demena dↄↄ. 28Kei yela Wurubuarɛ nombia aŋmaraseŋ see ŋan kↄŋawↄ mena. Nombia ŋenaŋ yɛna nyi, "Be ta mo e kpu na nombiakumɛɛyɛɛra." 29Na balaŋ baŋ bɛɛ lam botↄↄ nɛ, na tee e na bee kpiisi ba nyeeya yako nyiaa, "Nyaŋ ŋon n kpa n ke tekerii Wurubuarɛ ↄsom deni dinaa keŋ na n ka mo weeya atooro maa ke nɛ, 30lɛɛ n wose na n ke tisi lee ↄpaŋdaŋ keŋ dↄↄ na dɛɛ kɛɛ." 31Mena mↄ te Wurubuarɛ saese kegyiise na Gyudatena mmaraa wolala baŋ mↄ kulu e. Te be yako dↄŋa nyiaa, "Ↄ ne tale lɛɛ baale nyee, mↄna ↄ be tale lɛɛ ŋon gbagba nyee ya." 32Nyi akpaa ŋon yɛna nyeedoŋ Gbeŋgyoo na Iseraetena gyoo ŋon Wurubuarɛ be yako see nyi waa kↄŋ nɛ, kenaŋ na waa lɛɛ ↄ wose lee ↄpaŋdaŋ keŋ dↄↄ na dɛɛ naa na dɛɛ lɛɛ e di. Te balaŋ bala baŋ bↄↄ gyↄ wↄ sakaa ↄpaŋdaase dↄↄ kpu na e nɛ mↄ tee e mena. 33Weese ka seŋ dɛɛ nɛ, ditiŋtɛɛ kaa lɛɛ tɛɛle keŋ dↄↄ pou kelii ↄ ke gɛɛse. 34Te weese ke gɛɛse kenaŋ nɛ Yesu fae yeesa keŋkeŋ nyiaa, "Eli, Eli, lama sabatani?" Keŋ nawolo nyi, "Me Wurubuarɛ, Me Wurubuarɛ, weera te n lese n sia yela maŋ?" 35Balaŋ baŋ ba seŋɛɛ botↄↄ ke nyii mena nɛ be yakowↄ nyiaa, "Ɛ nyii, ↄ ne baake Elaegya." 36Debokenaŋ man te be man ŋolo yeuwↄ ka mo kolo ŋgba kokyaa keŋ gyae ke tale lɛɛ loŋ nɛ do soloŋ denyaŋesa daale man, te ↄ moo ke tooso na daŋ te ↄ gyinaa ke adido fa Yesu nyi waa nyↄↄ. Keŋte ↄ yakowↄ nyiaa, "Ɛ seŋ dɛɛ kɛɛ nyi Elaegya waa kↄŋ kaa lese e lee ↄpaŋdaŋ keŋ dↄↄ." 37Botↄↄ te Yesu besewↄ fae yeesa keŋkeŋ, te ↄ kara weesi. 38Kekↄŋ mena nɛ, kanyaŋ keŋ bↄↄ mo kpase Wurubuarɛ ↄsom deni dinaa keŋ man nɛ bɛɛsewↄ kyɛɛkyɛɛ ala lee adido kaa lii ka mokↄↄ man. 39Yoonↄↄtena kegyia ŋon ↄ seŋɛɛ botↄↄ kena Yesu ke fae yeesa kara weesi nɛ, ↄ yakowↄ nyiaa, "Balee kei yɛna Wurubuarɛ bu ŋon ampaŋ." 40Na ala baale seŋɛɛ lemlem bɛɛ kɛɛ. Ala benaŋ man baale yɛna Mɛɛre ŋon ↄ ba lee Magedala nɛ, na Gyemisi kemaasa na Gyose be naa Mɛɛre na Salome. 41Ala kɛwↄ silana Yesu kɛɛ ↄ dↄↄ debaŋ keŋ ↄ kya Galelia nɛ. Na ala burum baŋ bↄↄ sila e kↄŋ Gyerusalɛm donↄↄ man nɛ mↄ seŋɛɛ botↄↄ. 42Na wee kenaŋ yɛɛ wee keŋ Gyudatena na mo desina ba wose fa ba kefɛɛfowee keŋ kedi. Ke lii balinↄↄ nɛ, 43balee ŋon bɛɛ baake e nyi Gyosɛfo ŋon ↄ ba lee Arimatia donↄↄ man nɛ gyↄↄ ↄ konↄↄ gyu Pilato gyaŋ ka sola e nyi waa mo Yesu woo ŋon fa e ↄ kaa wuu. Gyosɛfo kei yɛɛ donↄↄ kegyia ŋolo e, te ŋon mↄ ne gyeki Wurubuarɛ gyoori keŋ. 44Pilato ke nyii nyi Yesu ta yem nɛ, yɛɛ e gyakoloŋ. Mena dↄↄ ↄ baake ↄ yoonↄↄtena kegyia ŋon bↄↄse e nyiaa, "Yesu ŋon wulaa yeŋawↄ?" 45Ↄ ke nyii lee yoonↄↄtena kegyia ŋon nↄↄman nyi ke yɛɛ ampaŋ nɛ, ↄ faa Gyosɛfo ŋon gbɛɛ nyi waa gyu ka mo woo ŋon. 46Mena dↄↄ Gyosɛfo gyuuwↄ ke lɛɛ akaralɛɛ te ↄ lese woo ŋon lee ↄpaŋdaŋ keŋ dↄↄ te ↄ moo akaralɛɛ keŋ milii e. Keŋte ↄ moo e ke wuu yebↄↄ keŋ bↄↄ kare boe daale man nɛ man. Te ↄ biliŋi boe dinaa daale tↄ yebↄↄ keŋ nↄↄ. 47Na Mɛɛre ŋon ↄ ba lee Magedala nɛ, na Gyose ↄ naa Mɛɛre seŋɛɛ botↄↄ. Mena dↄↄ be naa botↄↄ keŋ bↄↄ wuu e nɛ.

will be added

X\