Maake 12

1Keŋte Yesu besewↄ kolosi nombia burum fa wↄ aduya man, te ↄ gyↄↄ dudu fa wↄ nyiaa, "Wↄↄfarale ŋolo fara wↄↄ te ↄ duu daasebia ŋaale ŋan ŋe yɛɛ ŋgba akutuse te bɛɛ baake ŋa nyi gerepo nɛ ke man. Ↄ dii abaŋ kilisi wↄↄ keŋ, te ↄ wula bↄↄ keŋ baa sara daasebia ŋan ke man na baa lese ŋa loŋ lee ŋe man nɛ. Te ↄ baŋa deni dↄↄloŋ dↄↄloŋ daale keŋ walaŋ ke kyaa ke man na waa gyee wↄↄ kenaŋ. Te ↄ moo wↄↄ keŋ do paasetena baale nyiŋmaa man nyi baa kɛɛ ke dↄↄ, te ↄ korowↄ laŋ gbɛɛ. 2Debaŋ kelii nyi baa kↄ daasebia ŋan nɛ, balee ŋon kpila ↄ tobaale ŋolo gyu paasetena baŋ gyaŋ nyi baa fa e ↄ wui nↄↄ. 3Mↄna paasetena baŋ kyaŋa ↄ tobaale ŋon, te be tuku e te be yela ↄ laŋawↄ nyiŋmaase kufu nawↄↄ kufu. 4Keŋte wↄↄte ŋon besewↄ kpila ↄ tobaale ŋolo bela gyu paasetena baŋ gyaŋ. Mↄna be tuku ŋon mↄ do e gyamɛɛ ↄ nyee man, te ba doo e desɛŋ. 5Kenaŋ wↄle wↄↄte ŋon besewↄ kpila ↄ tobaale ŋolo bela, mↄna paasetena baŋ koo e bo. Ↄ kpila tewulɛɛ burum, mↄna be tuku baale te ba koe baale. 6Walaŋ ŋon ↄ be kaa keŋ wↄↄte ŋon waa kpila yɛna, ŋon gbagba bu dokoloŋ kooŋ ŋon ↄ bɛɛ sɛɛ ↄ dↄↄ ya nɛ. Wↄle wↄle nɛ, ↄ kaa kpila ŋon mↄ gyu paasetena baŋ gyaŋ te ↄ yakowↄ nyiaa, 'Mberem me bu na, baa bu e.' 7Mↄ paasetena baŋ kena ↄ bu ŋon nɛ be yako dↄŋa nyiaa, 'Kei yɛna bu ŋon waa kaa di ↄ kya abↄↄ ŋan. Ɛ yela dɛɛ ko e, na abↄↄ ŋan nafↄ waa di nɛ ka bese de wui!' 8Mena dↄↄ be kyaŋa bu ŋon ko, te be wↄŋee e lee wↄↄ keŋ man ke leki." 9Botↄↄ te Yesu bↄↄse wↄ nyiaa, "Woŋ te wↄↄte ŋon waa yɛɛ? Waa kↄŋ kaa koe mena paasetena benaŋ, na waa mo wↄↄ keŋ do paasetena wↄlɛɛ nyiŋmaa man." 10Te ↄ besewↄ bↄↄse wↄ nyiaa, "Ɛ te kala ta Wurubuarɛ nombia aŋmaraseŋ see ŋan na ɛ kena kpene keŋ ne yako nɛ yee? Be ŋmarasewↄ nyiaa, 'Boe keŋ deni maara baŋ be bɛɛ nɛ, keŋ kaa bese na mokↄↄ kasee boe keŋ ne yeli deni keŋ ne yɛɛ doŋ. 11De Gbeŋgyoo Wurubuarɛ yɛɛ la te kↄŋawↄ mena, te ke yɛɛ kpene keŋ ke dana gyakoloŋ de siaman' " Saese kegyiise na Farasiitena baŋ ke nyii Yesu aduya kɛŋa nɛ, ba gyeŋawↄ nyi ba wose man nombia yaa ↄ ne yako nɛ. 12Botↄↄ te Gyudatena kegyiise baŋ gyae gbɛɛ baa kyaŋ Yesu, nawolo nyi be naawↄ nyi baŋ dↄↄ te ↄ gyↄↄ dudu kei. Mↄna bee yee balaŋ baŋ, mena dↄↄ be tinaa e yela te be laŋawↄ. 13Kenaŋ wↄle te Gyudatena kegyiise baŋ gyuuwↄ ke kpila gyoo Herode balaŋ baale, na Farasiitena baŋ baale nyi baa kↄŋ kaa teese Yesu nↄↄman na baa nyiŋ gbɛɛ kyaŋ e. 14Baŋ mↄ kↄŋawↄ ↄ gyaŋ kaa bↄↄse e nyiaa, "De Gbeŋgyoo, da gyeŋ nyi n bee di dekara ya, te n be famenɛ na kpene keŋ balaŋ ne yako nɛ ya. N bɛɛ kɛɛ walaŋ siaman ya, te n na wola Wurubuarɛ gbɛɛneŋ kpaakpaa ŋan ŋe gbɛɛ dↄↄ. Dei nyi dɛɛ tↄ lempoo fa Romantena gyoo dinaa Kaesa, yaa de na tↄↄ ya?" 15Mↄ Yesu kena ba agyueŋ kumɛɛ ŋan nɛ ↄ yako wↄ nyiaa, "Ɛmɛɛ baŋ ɛ na beo ɛ wose, woŋ dↄↄ te ɛ ne gyae ɛ ka teese me nↄↄman. Ɛ mo kↄbabii keŋ kↄŋ maa kɛɛ" 16Keŋte ba moo kↄbabii dokoloŋ kↄna e. Botↄↄ te ↄ bↄↄse wↄ nyiaa, "Amↄte nyee na ↄ yele gyakaa la ke dↄↄ?" Te be yako e nyi gyoo dinaa Kaesa wui. 17Keŋte Yesu yako wↄ nyiaa, "Kpene keŋ yɛɛ gyoo Kaesa wui na ɛ mo fa e, te kpene keŋ mↄ yɛɛ Wurubuarɛ wui nɛ, ɛ mo ke fa e." Botↄↄ te gyakoloŋ gyoo balaŋ baŋ lee nↄↄ keŋ Yesu be tiri fa wↄ nɛ dↄↄ. 18Kenaŋ wↄle te Sadukiitena baŋ bↄↄ ne lɛɛ di nyi walaŋ da yem na waa bese foŋ ya nɛ, man baale kↄŋawↄ Yesu gyaŋ kaa bↄↄse e nyiaa, 19"De Gbeŋgyoo, de naana Mosesi ŋmarase mmaraa fa daa nyi, akpaa walaŋ da yem tina ↄ wɛɛle yela te be ta lola bia ya na, ↄ naabu waa yala lialo ŋon na baa lola bia ↄ kegyia ŋon yele man. 20Kↄŋawↄ nyi balee ŋolo bia baala nyetooro baale kyaawↄ, te be kegyia ŋon yala alo keŋ be ta lola bia ya te ↄ yeŋawↄ. 21Balate ŋon mↄ yala alo ŋonaŋ te ŋon mↄ yeŋawↄ keŋ be ta lola bia ya. Batoorote ŋon mↄ mena. 22Mena mↄ te akaŋ baŋ mↄ pou yala alo ŋonaŋ, mↄna be ta lolo ya. Te kyare ya, te alo ŋon mↄ yeŋawↄ. 23Mena dↄↄ wee keŋ Wurubuarɛ waa gyuusu balaŋ baŋ pou bↄↄ yem nɛ lee yeŋ man na, baala nyetooro kɛwↄ baŋ bↄↄ yala alo kei gyaŋee nɛ, be man woŋti te alo ŋon waa yɛɛ ↄ wɛɛle?" 24Keŋte Yesu tiranↄↄ fa wↄ nyiaa, "Ɛ ta yoo, nawolo nyi ɛ ba gyeŋ Wurubuarɛ nombia aŋmaraseŋ see ŋan ya, te ɛ ba gyeŋ Wurubuarɛ doŋ keŋ mↄ ya. 25Wee keŋ Wurubuarɛ waa gyuusu balaŋ lee yeŋ man nɛ, baala be gyae baa yala ya, te bↄↄ gyae baa mo ala mↄ fa yale ya. Be popou baa yɛɛ bo ŋgba Wurubuarɛ kpilala baŋ be kyaa adido nɛ. 26Lee kefoŋ lee yeŋ man wose man nombia na, ɛ te kala ta de naana Mosesi tↄne man mena keŋ Wurubuarɛ be kolosi na ŋon Mosesi depoŋfa keŋ ne kpaa nɛ man yee? Ↄ yakowↄ nyiaa, 'Maŋ yɛna Aberaham na Asiki na Gyekↄpo Wurubuarɛ.' Wurubuarɛ keyako kei nɛ, na nawolo baa nyi ↄ siaman na balaŋ kɛwↄ sɛɛ be kyaa 27Wurubuarɛ te yɛɛ woya Wurubuarɛ e ya, ↄ yɛɛ balaŋ baŋ be kyaa na be sia nɛ Wurubuarɛ e. Mena dↄↄ ɛ ta yoo nideli ŋgba ɛ ne yako nyi yeŋ wↄle kefoŋ be kyaa ya nɛ." 28Botↄↄ te Gyudatena mmaraa wolala baŋ man ŋolo kↄŋawↄ botↄↄ. Ↄ ke kↄŋ kaa nyii mena keŋ bɛɛ wↄŋee nombia ŋan, na ↄ kena nyi Yesu ke tiranↄↄ fa wↄ nideli nɛ ↄ bↄↄse e nyiaa, "Wurubuarɛ mmaraase ŋan pou na, woŋti yɛna keŋ ne hia kela?" 29Botↄↄ te Yesu tiranↄↄ fa e nyiaa, "Iseraetena pou ɛ nyii, 'De Gbeŋgyoo Wurubuarɛ ŋon yɛɛ dokoloŋ. 30Mena dↄↄ kaboena nyi nya mo n konↄↄ pou na nya agyueŋ pou na n doŋ pou gyae n Gbeŋgyoo Wurubuarɛ.' 31Alate keŋ mↄ yɛna nyi, 'Gyae n dↄↄ ŋgba nyaŋ gbagba n wose nɛ.' Mmaraa daale be kyaa keŋ kela kɛŋa ya." 32Keŋte Gyudatena mmaraa wolale ŋon yako Yesu nyiaa, "De Gbeŋgyoo, ampaŋ yaa n yakowↄ nyi Wurubuarɛ yɛɛ dokoloŋ, te ŋolo be kyaa kpu na e ya. 33Te n besewↄ yako nyi kaboena nyi walaŋ waa mo ↄ konↄↄ pou na ↄ doŋ pou na wa agyueŋ pou gyae Wurubuarɛ, na waa bese gyae ↄ dↄↄ ŋgba ŋon gbagba nɛ. Mmaraase kɛŋa dↄↄ kedi dei kela keŋ walaŋ ka mo abↄↄ ke deesi fa Wurubuarɛ." 34Yesu kena nyi Gyudatena mmaraa wolale ŋon te tiranↄↄ nideli nɛ ↄ yako e nyiaa, "Ɛmɛɛ na Wurubuarɛ gyoori keŋ nsana be dana lem ya." Lee kei wↄle nɛ, ŋolo te tale gyↄ ↄ konↄↄ bↄↄse e nombii daale bela ya. 35Yesu ke gyakaa ↄ na wolo Gyudatena ↄsom deni dinaa keŋ dekpaŋalaŋ man nɛ ↄ bↄↄse wↄ nyiaa, "Sena dↄↄ te Gyudatena mmaraa wolala baŋ ne tale yako nyi, Kristo ŋon Wurubuarɛ ba lese nɛ yɛɛ gyoo Defidi ↄ naanabii e? 36Nawolo nyi Wurubuarɛ feliŋ ŋon yela gyoo Defidi gbagba yakowↄ nyiaa, 'Me Gbeŋgyoo Wurubuarɛ yako me Gbeŋgyoo nyi, Tisi kyaa me dunoluŋ dↄↄ, kelii debaŋ keŋ maa mo n kↄlala pou do n tɛɛ.' 37Te akpaa nyi gyoo Defidi baake nyeelɛɛre ŋon nyi ↄ 'Gbeŋgyoo' na, kenaŋ na sena te nyeelɛɛre ŋon waa bese gyoo Defidi ↄ naanabii?" Keŋte yɛɛ balaŋ baŋ pou bↄↄ gyaŋee bee tei nɛ gyoŋ. 38Yesu kɛɛ wolo nɛ ↄ faree wↄ nyiaa, "Ɛ kɛɛ ɛ wose nideli na Gyudatena mmaraa wolala baŋ. Bɛɛ gyae kegbase dↄↄloŋ nyiŋan kado na be dↄŋ na kebu agantaŋ man, na balaŋ kenyiŋ do wↄ nↄↄ. 39Akpaa be gyaŋee Gyudatena ↄsom denɛɛ man, na botↄↄse ŋan bɛɛ gyaŋee di be nↄↄ nɛ, na bɛɛ gyae akyaese kpaakpaa baa kyaa. 40Bɛɛ beo liala lɛo ba abↄↄ kamasɛ ŋan be dana nɛ. Te bɛɛ fane balaŋ man kyare mo wola ba wose. Wurubuarɛ waa wↄŋ mena balaŋ benaŋ dinↄↄ deŋela nideli." 41Yesu ke gyu ka gyoo Wurubuarɛ ↄsom deni dinaa keŋ man nɛ, ↄ ke kyaawↄ yenaŋ mo ↄ sia tee adakaa keŋ bɛɛ do kↄba ke man nɛ. Te ↄ gyinaa ↄ sia ↄ ne kɛɛ mena keŋ balaŋ na mo kↄba kaa do adakaa keŋ man. Balaŋ baŋ be dana kↄba nɛ, moo kↄba burum kaa do adakaa keŋ man. 42Keŋte lialo diyemte ŋolo moo kↄbabia ala, ŋan ŋe gyae ke yɛɛ ŋgba kotoku dokoloŋ nɛ kaa do adakaa keŋ man. 43Botↄↄ te Yesu baake ↄ kaseela baŋ gyaŋee te ↄ yako wↄ nyiaa, "Ampaŋ yaa mɛɛ yako ŋon nyi lialo diyemte kei ta do kↄba kela balaŋ akaŋ baŋ pou. 44Nawolo nyi balaŋ baŋ pou lese kↄba kyomii bo lee burum ŋan be dana nɛ man kaa do. Mↄ lialo diyemte kei dↄↄ, keŋ na ↄ diyem koraŋ nɛ kpene kamasɛ keŋ ↄ dana nɛ yaa ↄ moowↄ kaa do nɛ."

will be added

X\