Maake 10

1Yesu ka lee botↄↄ nɛ, ↄ gyuuwↄ Gyudia tɛɛle keŋ ke kyaa Gyↄↄdan boo keŋ diŋgyiŋ nɛ. Balaŋ burum besewↄ kaa wuu ↄ dↄↄ botↄↄ, te ↄ wola wↄ nombia ŋgba mena keŋ ↄ ne kyaa wola wↄ nɛ. 2Keŋte Farasiitena baale kↄŋawↄ be kaa teese ↄ nↄↄman te be bↄↄse e nyiaa, "Da mmaraa ne fa daa gbɛɛ nyi ŋolo waa tale bɛɛ ↄ wɛɛle?" 3Botↄↄ te Yesu bↄↄse wↄ nyiaa, "Sena te de naana Mosesi yako ŋon nyi yaa yɛɛ?" 4Keŋte be yako e nyi, "De naana Mosesi faa gbɛɛ nyi baale waa tale ŋmarase yale kebɛɛ tↄne keŋ nawolo nyi ↄ te bɛɛ ↄ wɛɛle nɛ, pɛna waa bɛɛ e" 5Te Yesu yako wↄ nyiaa, "Ɛ konↄↄyuŋ dↄↄ te Mosesi yɛɛ mena mmaraa kenaŋ fa ŋon. 6Nawolo nyi lee kewalaŋ keŋ nɛ, 'Alo na baale te Wurubuarɛ yɛɛwↄ.' 7'Lee kei dↄↄ baale waa tina ↄ kya na ↄ naa yela na ŋon na ↄ wɛɛle kaa bom, 8na ŋon na ↄ wɛɛle ka bese walaŋ dokoloŋ.' Mena dↄↄ be ta tekaa yɛɛ kpookpoo ya, mↄna be ta bese walaŋ dokoloŋ. 9Lee mena dↄↄ kpene keŋ Wurubuarɛ ba mo bom yɛɛ ke dokoloŋ nɛ, ŋolo na ŋolo na kpase ke man ya." 10Be ke gyu kagyoo deni man bela nɛ, Yesu kaseela baŋ bↄↄse e nombia kɛŋa man. 11Keŋte ↄ tiranↄↄ fa wↄ nyiaa, "Nyi akpaa baale de bɛɛ ↄ wɛɛle te ↄ ke yala alo wↄle nɛ, na yɛɛ yaa ŋgba ↄ lee ↄ wɛɛle ŋon wↄle baa nɛ. 12Te akpaa alo mↄ de bɛɛ ↄ baale te ↄ ke yala baale wↄle nɛ, na yɛɛ yaa ŋgba ŋon mↄ lee ↄ baale wↄle baa nɛ." 13Botↄↄ te balaŋ moo bia kↄŋ Yesu gyaŋ nyi waa mo ↄ nyiŋmaa gyakaa be dↄↄ. Mↄna ↄ kaseela baŋ ŋmanyaŋ balaŋ baŋ bↄↄ mo bia baŋ kↄŋ nɛ bo. 14Yesu kena mena nɛ, te yɛɛ e gyoŋ ya te ↄ yako wↄ nyiaa, "Ɛ yela bia baŋ kekↄŋ me gyaŋ, ɛ na tↄ wↄ gbɛɛ ya. Nawolo nyi Wurubuarɛ gyoori keŋ yɛɛ balaŋ baŋ bɛɛ yↄkↄse ba wose ŋgba bia kɛwↄ dinↄↄ nɛ wui. 15Ampaŋ yaa mɛɛ yako ŋon nyiaa, walaŋ kamasɛ ŋon ↄ te yↄkↄse ↄ wose do Wurubuarɛ tɛɛ ŋgba biikyaa e ya nɛ, ↄ be gyae waa gyoo Wurubuarɛ gyoori keŋ man korakora ya." 16Keŋte Yesu kyaŋa bia baŋ nyiŋmaa man te ↄ moo ↄ nyiŋmaa gyakaa be dↄↄ, te ↄ hiraa wↄ. 17Yesu ka mo gbɛɛ ↄ ne gyu nɛ, tobaale ŋolo yeuwↄ kaa buŋ ↄ nawↄↄtɛɛ te ↄ bↄↄse e nyiaa, "Me Gbeŋgyoo kpaakpaa, woŋ te kaboena nyi maa yɛɛ na maa nyiŋ nyeedoŋ kekpaa?" 18Botↄↄ te Yesu bↄↄse e nyiaa, "Woŋ dↄↄ te n ne baake maŋ walaŋ kpaakpaa? Lee Wurubuarɛ wↄle nɛ, walaŋ kamasɛ be kyaa keŋ ↄ yɛɛ walaŋ kpaakpaate e ya." 19Ŋgba n gyeŋ Wurubuarɛ mmaraase ŋan ne yako nyi, "Na ko walaŋ ya, na lee n baale yaa n wɛɛle wↄle ya, na ŋmɛɛle ya, na kara n dↄↄ nↄↄ ya, na ŋere ŋolo do ya, bu n kya na n naa nɛ?" 20Keŋte balee ŋon mↄ yakowↄ nyiaa "Me Gbeŋgyoo, me wulaa mee di mmaraase kɛŋa pou dↄↄ leenaŋ me biatɛɛ" 21Botↄↄ te Yesu kɛɛ ↄ siaman yididi, na ↄ ne gyae ↄ nombia, mena dↄↄ ↄ yako e nyiaa, "Ta bese ka neŋ kolo dokoloŋ n ke yɛɛ. Gyu ke yↄↄ nya abↄↄ ŋan pou n dana nɛ, na n ka mo kↄba keŋ kpɛlɛɛ ayematena, na n ke kↄŋ kaa sila maŋ. N yɛɛ mena na, n ke nyiŋ abↄↄ kpaakpaa see n wose Wurubuarɛ gyaŋ adido." 22Tobaale ŋon ke nyii nombia kɛŋa nɛ, ↄ moo waraŋase lee botↄↄ nawolo nyi na ↄ dana ↄ wose nideli. 23Keŋte Yesu kɛɛ balaŋ baŋ gyaŋee te ↄ yako ↄ kaseela baŋ nyiaa, "Dana doŋ fa balaŋ baŋ be dana ba wose nideli nɛ, nyi baa gyoo Wurubuarɛ gyoori keŋ man." 24Ↄ kaseela baŋ ke nyii nombia kɛŋa nɛ, doo be nↄↄ. Te Yesu besewↄ yako wↄ nyiaa, "Me bia, ŋgba ɛ naa mena keŋ gyae ke yɛɛ doŋ fa balaŋ baŋ be dana ba wose nideli nɛ, nyi baa gyoo Wurubuarɛ gyoori keŋ man. 25Gyae ke yɛɛ doŋ fa balaŋ baŋ be dana ba wose nideli nɛ nyi baa gyoo Wurubuarɛ gyoori keŋ man, kela nyi kurumↄↄ ka gyoo ŋarale bↄↄ man lee." 26Ↄ kaseela baŋ ke nyii nombia kɛŋa nɛ, besewↄ doo be nↄↄ nideli te be bↄↄse dↄŋa nyiaa, "Nyi nnɛ te doo na, amↄte ne gyae la waa nyiŋ nyeekelɛɛ baa?" 27Te Yesu kɛɛ wↄ yididi yako wↄ nyiaa, "Balaŋ gyaŋ na dana doŋ, mↄna Wurubuarɛ gyaŋ na be dana doŋ ya. Nawolo nyi Wurubuarɛ gyaŋ na, kpene kamasɛ gyae ke tale kↄŋ mena." 28Botↄↄ te Pita yako Yesu nyiaa, "De Gbeŋgyoo, daa mↄ te tina kpene kamasɛ keŋ de dana nɛ yela, te de silana neŋ." 29Keŋte Yesu tiranↄↄ fa e nyiaa, "Ampaŋ yaa mɛɛ yako ŋon nyiaa, ɛ man ŋolo be kyaa keŋ ↄ be tina ↄ dekpaŋalaŋ yaa ↄ naabia yaa ↄ desina, yaa ↄ kya yaa ↄ naa yaa ↄ bia yaa ↄ tɛɛlese yela lee maŋ na nyeekelɛɛ nombia ŋan dↄↄ, 30te ↄ be gyae waa bese nyiŋ akpaŋalaŋse na naabia na desina na naa na kya na bia na tɛɛlese akpeŋ sↄŋonoŋ (100) kpu gyɛŋ weeya kɛŋa man ya. Mↄ kayeyɛɛ gyae ke kↄŋ ↄ dↄↄ, na balaŋ kekↄla e kpu. Te kenaŋ wↄle na, waa nyiŋ nyeedoŋ kekpaakekpaa. 31Mↄ balaŋ burum baŋ be yɛɛ siamantenawↄ nɛ baa kaa bese wↄle nyibaŋ, na wↄle nyibaŋ kaa bese siamantena." 32Lee botↄↄ te Yesu na ↄ kaseela baŋ moo gbɛɛ bee gyu Gyerusalɛm donↄↄ man, na Yesu dↄŋɛɛ la be siaman. Be kee gyu nɛ, ↄ kaseela baŋ wose yeŋa wↄ, te gyakoloŋ mↄ kyaŋa balaŋ baŋ be silana wↄ nɛ. Keŋte ↄ baake ↄ kaseela kufu bala baŋ lee yenaŋ te ↄ yako wↄ kpene keŋ gyae ke kↄŋ ↄ dↄↄ nɛ nyiaa, 33"Ɛ kɛɛ! Dee gyu Gyerusalɛm donↄↄ man baa. Baa lese maŋ Deniwalaŋ Bu ŋon fa Wurubuarɛ saese kegyiise na Gyudatena mmaraa wolala baŋ. Baa di me nombia na baa bu maŋ fↄↄ nyi baa ko maŋ, na baa mo maŋ do balaŋ baŋ ba te yɛɛ Gyudatenawↄ ya nɛ nyiŋmaa man. 34Baa kulu maŋ na baa tↄ nↄↄloŋ woli maŋ, na baa ŋmeree maŋ dambiise na baa ko maŋ. Mↄna weeya atooro wↄle na, maa foŋ lee yeŋ man." 35Kenaŋ wↄle nɛ, Sebedeo bia Gyemisi na Gyↄn kↄŋawↄ Yesu gyaŋ kaa yako e nyiaa, "De Gbeŋgyoo, dɛɛ gyae nyi kpene kamasɛ keŋ de bↄↄse neŋ na, n ke yɛɛ ke fa daa." 36Botↄↄ te Yesu bↄↄse wↄ nyi, "Woŋ te ɛ ne gyae nyi maa yɛɛ fa ŋon?" 37Keŋte be yako e nyiaa, "Dɛɛ gyae nyi de man ŋolo ke kyaa n dunoluŋ dↄↄ, na ŋolo mↄ ke kyaa n demena dↄↄ n gyoori keŋ man." 38Botↄↄ te Yesu yako wↄ nyiaa, "Ɛ ba gyeŋ kpene keŋ ɛ ne bↄↄse nɛ ya. Ɛ ke tale nyiŋ konↄↄ naa diyem keŋ maa naa nɛ, yaa ɛ ke tale gyoo kayeyɛɛ keŋ man maa gyoo nɛ?" 39Keŋte be tiranↄↄ fa e nyi, "Ayi, dɛɛ tale." Te Yesu yako wↄ nyiaa, "Ɛ ke tale naa diyem keŋ maa naa, na ɛ ka gyoo kayeyɛɛ keŋ maa gyoo nɛ man. 40Mↄna mↄↄ taŋ doŋ keŋ maa lese walaŋ ŋon waa kyaa ma dunoluŋ yaa ma demena dↄↄ ya. Mena akyaese kɛŋa doe fa balaŋ baŋ me kya Wurubuarɛ gbagba be desina see wↄ nɛ." 41Yesu kaseela kufu akaŋ baŋ kenyii nombia kɛŋa nɛ, ba gyeŋa baŋ Gyemisi na Gyↄn dↄↄ. 42Botↄↄ te Yesu baake ↄ kaseela baŋ pou yilaa te ↄ yako wↄ nyiaa, "Ɛ gyeŋ nyi tɛɛle kei dↄↄ gyooneŋ ne di gyoori bo be balaŋ dↄↄ, te be kegyiise baŋ mↄ dana doŋ be dↄↄ. 43Mↄ ɛmɛɛ dↄↄ, na mena te kaboena nyi dɛɛ doo ɛ man ya. Ɛ man walaŋ kamasɛ ŋon ↄ ne gyae nyi waa bese ɛ kegyia nɛ, kaboena nyi waa bese ɛ kegbetibii. 44Te ɛ man walaŋ kamasɛ ŋon ↄ ne gyae nyi waa bese ɛ siamante nɛ, kaboena nyi waa bese ɛ popou ɛ kegbetibii. 45Nawolo nyi maŋ Deniwalaŋ Bu ŋon te kↄŋ nyi balaŋ baa som maŋ ya, mↄna me kↄŋae me kaa som balaŋ, na maa yeŋ mo ma nyeedoŋ lɛɛ balaŋ burum nyee." 46Kenaŋ wↄle te Yesu na ↄ kaseela baŋ gyuuwↄ Gyeriko donↄↄ man. Ŋon na ↄ kaseela na balaŋ burum baŋ ka lee botↄↄ bee gyu nɛ, be naa Timeo bu Batimeo ŋon ↄ sia be yɛlɛɛ nɛ na ↄ kyaa gbɛɛnaa nↄↄman ↄ na solee abↄↄ. 47Balee ŋon kenyii nyi Yesu Nasarɛte baale ŋon ne kↄŋ nɛ, ↄ fae yeesa yako nyiaa, "Yesu, gyoo Defidi ↄ naanabii, wii me waraŋase." 48Keŋte balaŋ baŋ man burum too be nↄↄ gyakaa ↄ dↄↄ nyi waa wu ↄ nↄↄ. Mↄna nɛnɛɛ gba te ↄ ne fae yeesa keŋkeŋ nyiaa, "Gyoo Defidi ↄ naanabii, wii me waraŋase." 49Botↄↄ te Yesu seŋawↄ yako wↄ nyi, "Ɛ baake e fa maŋ." Te be baake siayɛlɛɛsate ŋon yako e nyiaa, "Yela ke yɛɛ neŋ gyoŋ na n ka koro seŋ. Ↄ ne baake neŋ." 50Botↄↄ te ↄ fuŋa ↄ kegba wurikyim lↄ yenaŋ, te ↄ toŋawↄ seŋ ta kↄŋ Yesu gyaŋ. 51Keŋte Yesu bↄↄse e nyiaa, "Woŋ te n ne gyae nyi maa yɛɛ fa neŋ?" Botↄↄ te siayɛlɛɛsate ŋon yako e nyiaa, "Me Gbeŋgyoo, mɛɛ gyae me sia ke gyuusu" 52Botↄↄ te Yesu yako e nyiaa, "Ta, n ke lɛɛ maŋ di dↄↄ n kawee te taŋ." Debokenaŋ man te ↄ sia gyuusuwↄ, te ↄ sila Yesu laŋ.

will be added

X\