Luka 8

1Kedi weeya ala nɛ Yesu gyuuwↄ ke kila donↄↄse na akuraase pou man, na ↄ ne yako Wurubuarɛ gyoori keŋ wose man nombia kpaakpaa ŋan fa balaŋ, na ↄ kaseela kufu bala baŋ mↄ silana e. 2Na ala baale baŋ ↄ be kyↄ wↄ be kaweese te ↄ be gegi feliŋkumɛɛ lee be baale man nɛ mↄ kpuɛ na e. Be man baale yɛna Mɛɛre ŋon bɛɛ baake e nyi Magedala, ŋon Yesu be gegi feliŋkumɛɛ nyetooro lee ↄ man nɛ, 3na Gyoana ŋon ↄ baale yɛna Kusa nɛ. Kusa kei yɛɛ kegyia ŋolo e gyoo Herode dekpaŋalaŋ man, na Susana na ala burum baŋ bↄↄ mo ba abↄↄ kɛɛ Yesu na ↄ kaseela dↄↄ nɛ. 4Debaŋ keŋ balaŋ burum kpu na baŋ bↄↄ lee debiise man kↄŋ be kaa yilaa Yesu gyaŋ nɛ, ↄ gyↄↄ dudu fa wↄ nyiaa, 5"Wↄↄfarale ŋolo gyuuwↄ ke ŋmatee abↄↄ bia ŋgba amↄla nɛ ↄ wↄↄman. Ↄ kɛɛ ŋmatee ŋa nɛ ŋaale yalawↄ wↄↄ keŋ gbɛɛneŋ man te balaŋ tɛɛwↄ ŋe dↄↄ sakatee ŋa laŋ, te gyebuse kaa tↄↄsee ŋa di. 6Ŋaale mↄ yalawↄ kpanaŋse dↄↄ te ŋe tuuwↄ, mↄna te kyare ya te ŋa yekeewↄ. Nawolo nyi tɛɛle ta boo kpanaŋse ŋan dↄↄ na ke lɛɛ loŋ see ya. 7Bia ŋan ŋaale mↄ yalawↄ kpalamse man te ŋe tuuwↄ, te kpalamse ŋan mↄ tuuwↄ milii ŋa. 8Ŋaale mↄ yalawↄ tɛɛle kpaakpaa dↄↄ te ŋe tuuwↄ bee, te ŋa see bia burum." Botↄↄ te Yesu yako wↄ nyiaa, "Ŋon ↄ dana deŋele waa nyii na, waa tei nideli." 9Keŋte Yesu kaseela baŋ yako e nyi waa wola wↄ dudu keŋ asɛɛ. 10Te Yesu yako wↄ nyiaa, "Ɛmɛɛ dↄↄ Wurubuarɛ ta toro ya agyueŋse na ɛ ka gyeŋ nombia ŋan weesɛɛ lee ↄ gyoori keŋ wose man. Mↄna balaŋ akaŋ baŋ dↄↄ aduya kaageŋ man te maa kolosi fa wↄ. 'Baa kɛo na baa kɛo mↄna bↄↄ gyae baa naa ya, te baa tei na baa tei mↄna bↄↄ gyae baa nyii asɛɛ ya.' " 11Keŋte Yesu yako wↄ nyiaa, dudu keŋ mↄↄ gyↄↄ nɛ ka asɛɛ yaa. "Abↄↄ bia ŋan seŋɛɛ fa Wurubuarɛ nombia ŋan. 12Bia ŋan be yale gbɛɛnaa man nɛ, seŋɛɛ fa balaŋ baŋ bee nyii Wurubuarɛ nombia ŋan te ↄbↄnsam ne kↄŋ kaa ŋmɛɛle ŋa lee be konↄↄse man, na bↄↄ nyiŋ lɛɛ ŋa di na Wurubuarɛ ke lɛɛ ba nyee ya nɛ. 13Bia ŋan be yale kpanaŋse dↄↄ nɛ seŋɛɛ fa balaŋ baŋ bee nyii Wurubuarɛ nombia ŋan te bɛɛ lɛɛ ŋa na gyoŋ, mↄna ŋe bee nyiŋ lila be man ya. Bɛɛ lɛɛ ŋa di debaŋ kyomii bo, te akpaa ↄbↄnsam de kɛɛse wↄ kɛɛ na ba te yale. 14Bia ŋan be yale kpalamse man nɛ seŋɛɛ fa balaŋ baŋ bee nyii Wurubuarɛ nombia ŋan, te tɛɛle kei dↄↄ nombia, na kↄba kegyae beiŋ, na tɛɛle kei dↄↄ abↄↄ akaŋ ŋan kegyae da gyoo be man nɛ, na bee yeli baa bee Kristo man ya. 15Abↄↄ bia ŋan be yale tɛɛle kpaakpaa dↄↄ nɛ seŋɛɛ fa balaŋ baŋ bee nyii Wurubuarɛ nombia ŋan, te bɛɛ lɛɛ ŋa do konↄↄ kpaakpaa man, te bɛɛ tela ŋa nideli te bɛɛ yɛɛ kakyeŋ di ŋe dↄↄ kelii debaŋ keŋ nombia ŋan ne yeli bɛɛ yɛɛ abↄↄ kpaakpaa nɛ." 16Yesu besewↄ gyↄ dudu fa wↄ nyiaa, "Ŋolo bɛɛ kyaŋee kanea na waa mo kolo wu ke dↄↄ yaa waa mo ke do mpa ateta ya. Mↄna ↄ na mo ke bo gyakaa kolo dↄↄ adido na kena dekpaŋalaŋ pou, na baŋ bɛɛ kↄŋ na baa nyiŋ naa. 17Kolo ba weesɛɛ keŋ be gyae ka lee debↄↄ ya, te kolo mↄ be wuɛ keŋ nyi be gyae ka lee debↄↄ ya. 18Mena dↄↄ ɛ kɛɛ ɛ wose nideli lee mena keŋ ɛ na mo tei nombia ŋan. Nawolo nyi nyaŋ ŋon n dana kolo na Wurubuarɛ waa kpu neŋ burum, te nyaŋ ŋon n be dana kolo ya na kyomii keŋ n na gyueŋ nyi n dana koraŋ nɛ, Wurubuarɛ waa lɛo ke lee n nyiŋmaa man." 19Yesu ↄ naa na ↄ naabia kↄŋawↄ ↄ gyaŋ, mↄna balaŋ dikpii keŋ dↄↄ be te nyiŋ baa benaa e ya. 20Botↄↄ te ŋolo yako Yesu nyiaa, "N naa na n naabia seŋɛɛ debↄↄ man bɛɛ gyae baa naa neŋ." 21Keŋte Yesu yako wↄ nyiaa, "Me naa na me naabia yɛna baŋ bee nyii Wurubuarɛ nombia ŋan te bee di ŋe dↄↄ nɛ." 22Wee daale nɛ Yesu yako ↄ kaseela baŋ nyiaa, "Ɛ yela dɛɛ toŋ gyu boo keŋ diŋgyiŋ." Mena dↄↄ ba gyoowↄ degbele man te be laŋawↄ. 23Debaŋ keŋ be kyaa degbele keŋ man bee gyu nɛ te dosoroŋ moo Yesu. Keŋte feliŋ dinaa daale korowↄ ne gyↄↄ loŋ keŋ dↄↄ, mena dↄↄ ke gyↄↄ loŋ do degbele keŋ man te Yesu kaseela baŋ sia yɛɛ wↄ nideli. 24Mena dↄↄ Yesu kaseela baŋ gyuuwↄ ke gyuusu e yako e nyiaa, "De Gbeŋgyoo, de Gbeŋgyoo dɛɛ gyae dee munu." Botↄↄ te Yesu korowↄ te ↄ fae feliŋ keŋ na loŋ keŋ pou te ŋe yɛɛwↄ yididi. 25Keŋte Yesu bↄↄse ↄ kaseela baŋ nyiaa, "Weera dↄↄ te ɛ bɛɛ lɛɛ maŋ di ya?" Gyakoloŋ kyaŋa wↄ te ba wose yeŋa wↄ te be bↄↄse dↄŋa nyiaa, "Walaŋ woŋti yɛna kei? Ↄ ne kolosi fa feliŋ na loŋ koraŋ na ŋee nyii e." 26Keŋte Yesu na ↄ kaseela baŋ toŋawↄ gyu Gerasenetena tɛɛle man keŋ kyaa Galelia boo diŋgyiŋ nɛ. 27Yesu ka betaa lee degbele keŋ man pɛ, te baale ŋolo ŋon feliŋkumɛɛ doo ↄ man nɛ leewↄ donↄↄ keŋ man kↄŋ kaa gyaŋee na e. Ↄ te tɛɛ diteŋteli kyare te ↄ bɛɛ kyaa dɛɛ ya. Ↄ kyae amuseese man. 28Debaŋ keŋ ↄ be naa Yesu nɛ ↄ fae yeesa te ↄ leewↄ yala ↄ nawↄↄ tɛɛ, na ↄ ne fae yeesa keŋkeŋ nyiaa, "Yesu Wurubuarɛ Adidote Bu, woŋ te n ne gyae me gyaŋ? Mɛɛ waase neŋ bo, na naase maŋ diyem ya." 29Nawolo nyi na Yesu taŋ ke fae feliŋkum keŋ nyi ke dɛɛ lee ↄ man. Debaŋ kamasɛ na feliŋkum keŋ ne naase e diyem, na ba te kyaŋ e bake e agbaraagbaraase ↄ nyiŋmaase na ↄ nawↄↄ man na balaŋ ne gyee e. Keŋ koraŋ na ↄ ne tirii ŋa, na feliŋkum keŋ ta mo e gyu kefula man. 30Keŋte Yesu bↄↄse e nyiaa, "N yele yɛna sena?" Te balee ŋon tiranↄↄ nyi ma yele yɛna "Dikpii" Ↄ tiranↄↄ mena nawolo nyi feliŋkumɛɛ burum doo ↄ man. 31Botↄↄ te feliŋkumɛɛ ŋan waase Yesu nyi, ↄ na gegi wↄ ka do bↄↄ keŋ betaŋ ↄto ya nɛ man ya. 32Debaŋ kenaŋ na kekuiriise dikpii daale seŋɛɛ bula daale dↄↄ bee dii. Keŋte feliŋkumɛɛ ŋan waase Yesu nyi waa yela be kaa gyoo kekuiriise baŋ man, te Yesu faa wↄ gbɛɛ. 33Mena dↄↄ feliŋkumɛɛ ŋan leewↄ balee ŋon man ka gyoo kekuiriise baŋ man, te ba dikpii keŋ pou yeuwↄ tisi bula kyoloŋkyoloŋ keŋ gyu ka gyoo loŋ keŋ man te be munuwↄ pou. 34Balaŋ baŋ bɛɛ kɛɛ kekuiriise baŋ dↄↄ kena kpene keŋ be kↄŋ nɛ, ba korowↄ yeu gyu ke yako kpene keŋ be kↄŋ nɛ fa balaŋ baŋ be kyaa donↄↄ keŋ man nɛ na akuraase ŋan man pou. 35Keŋte balaŋ yeuwↄ gyu be kaa kɛɛ kpene keŋ be kↄŋ nɛ. Ba ke kↄŋ Yesu gyaŋ nɛ, be naa walaŋ ŋon nafↄ feliŋkumɛɛ doo ↄ man nɛ baŋɛɛ Yesu nawↄↄ tɛɛ, na ↄ wose te fɛɛ e keŋ ↄ doona abↄↄ. Te gyakoloŋ gyoo balaŋ baŋ pou. 36Balaŋ baŋ bↄↄ naa kpene keŋ be kↄŋ nɛ yako baŋ bↄↄ kↄŋ nɛ mena keŋ Yesu be kyↄ balee ŋon kawee. 37Keŋte balaŋ baŋ pou be kyaa Gerasene tɛɛle dↄↄ nɛ waase Yesu nyi waa lee be gyaŋ nawolo nyi gyakoloŋ dinaa ta gyoo wↄ. Mena dↄↄ Yesu gyoowↄ degbele keŋ man te ↄ laŋawↄ. 38Walaŋ ŋon Yesu be gegi feliŋkumɛɛ lee ↄ man nɛ waase Yesu nyi waa sila e. Mↄna Yesu bɛɛwↄ te ↄ yako e nyiaa, 39"Bese gyu n dɛɛ, na n kaa yako kpene keŋ Wurubuarɛ be yɛɛ fa neŋ nɛ fa balaŋ." Mena dↄↄ balee ŋon gyuuwↄ donↄↄ keŋ man ke yako balaŋ pou kpene keŋ Yesu be yɛɛ fa e nɛ. 40Yesu ka bese lee boo keŋ diŋgyiŋ kↄŋ nɛ, balaŋ burum kↄŋawↄ kaa gyaŋee na e. Nawolo nyi na be popou ne kɛɛ ↄ gbɛɛ. 41Botↄↄ te balee ŋolo ŋon bɛɛ baake nyi Gyariose, ŋon ↄ yɛɛ Gyudatena ↄsom deni man kegyia e nɛ kↄŋawↄ kaa buŋ Yesu nawↄↄ tɛɛ sola e nyi waa kↄŋ ↄ dɛɛ. 42Nawolo nyi ↄ bu alebu dokoloŋ kooŋ ŋon ↄ be di kulutooneŋ kufu ala nɛ ne gyae waa yeŋ. Yesu kee gyuu keŋ nɛ na balaŋ baŋ be silana e te yɛɛ nsendee ya, mena dↄↄ na ↄ bee nyiŋ gbɛɛ gba waa besena ↄ wose ya. 43Na alo ŋolo kpuɛ balaŋ burum baŋ be silana Yesu nɛ man keŋ fatabo ne gyↄ e kulutooneŋ kufu ala yaa, mↄna ŋolo te tale kyↄ e ya. 44Alo ŋon moowↄ balaŋ baŋ man ka lee Yesu wↄle te ↄ tinaa ↄ kegba nↄↄbii. Debokenaŋ man te fatabo keŋ ne gyↄ e nɛ karawↄ. 45Botↄↄ te Yesu bↄↄsewↄ nyiaa, "Amↄte tinaa na maŋ?" Balaŋ baŋ pou kebɛɛ nyi be te tina e ya nɛ te Pita yako e nyiaa, "De Gbeŋgyoo, balaŋ burum ke kilisi neŋ gyaŋee te bɛɛ tɛɛse dↄŋa kei na, n ne bↄↄse nyi amↄte tinaa na neŋ?" 46Mↄna Yesu yakowↄ nyiaa, "Ŋolo te tina maŋ. Nawolo nyi ma te naa nyi doŋ daale ta lee me man." 47Alo ŋon kena nyi ↄ be gyae waa tale weese ↄ wose ya nɛ, ↄ moo gyakoloŋ na wose keseree kaa buŋ Yesu nawↄↄ tɛɛ. Botↄↄ te ↄ yako kpene keŋ dↄↄ ↄ be tina Yesu kegba, na mena keŋ ↄ kawee keŋ be taŋ debokenaŋ man nɛ balaŋ baŋ pou siaman. 48Keŋte Yesu yako alo ŋon nyiaa, "Me bu, n kelɛɛ maŋ di dↄↄ te n nyiŋa kawee kekyↄ. Ta wosefɛɛreŋ man." 49Yesu ke gyakaa ↄ ne kolosi nɛ, walaŋ ŋolo lee Gyudatena ↄsom deni man kegyia Gyariose ŋon dɛɛ kaa yako e nyiaa, "N bu alebu ŋon ta yem. Na tekaa naase de Gbeŋgyoo ŋon diyem bela ya." 50Yesu ke nyii nombia kɛŋa nɛ ↄ yako Gyariose nyiaa, "Na yee ya, nyaŋ lɛɛ maŋ di. N bu ŋon waa nyiŋ nyeedoŋ." 51Yesu ke gyu ka gyoo Gyariose dɛɛ nɛ, ↄ te yeli ŋolo ke sila e gyoo deni keŋ man ya. Pita na Gyↄn na Gyemisi na bu ŋon ↄ kya na ↄ naa baageŋ te ↄ moowↄ sila ↄ wose. 52Na balaŋ baŋ bↄↄ yilaa botↄↄ nɛ pou ne wii na bee di walaŋsa. Botↄↄ te Yesu yako wↄ nyiaa, "Ɛ na wii ya, alebu kei ta yeŋa ta ya, ↄ doo dosoroŋ bo." 53Keŋte balaŋ baŋ pou boŋo Yesu, nawolo nyi ba gyeŋ nyi bu ŋon ta yem. 54Keŋte Yesu kyaŋa alebu ŋon nyiŋmaa man te ↄ yakowↄ nyiaa, "Me bu! Koro seŋ." 55Botↄↄ te bu ŋon woo besewↄ kↄŋ kaa gyoo ↄ man te ↄ korowↄ seŋ debokenaŋ man. Keŋte Yesu yako wↄ nyi baa gyae kolo fa bu ŋon na waa di. 56Gyakoloŋ gyoo bu ŋon ↄ kya na ↄ naa, te Yesu tↄↄ wↄ nideli nyi be na yako walaŋ na walaŋ kpene keŋ be kↄŋ nɛ ya.

will be added

X\