Luka 5

1Wee daale Yesu ka seŋ Genesareti boo nↄↄman nɛ, balaŋ burum kaa yilaawↄ kilisi e bee nyii Wurubuarɛ nombia. 2Keŋte ↄ naa agbelese ala boo keŋ nↄↄman, na kpɛɛ kyaŋara baŋ ta lee bɛɛ faafo ba asawuse. 3Yesu gyoowↄ degbele keŋ daale man, keŋ ke yɛɛ Simↄn wui nɛ. Te ↄ yako e nyi waa tɛɛse e gyu loŋ keŋ man kyomii. Yesu kyaawↄ degbele keŋ man botↄↄ te ↄ wola balaŋ dikpii keŋ Wurubuarɛ nombia. 4Ↄ kekolosi taŋ nɛ, ↄ yako Simↄn nyiaa, "Ɛ saa gyu loŋ keŋ nsana nsana botↄↄ keŋ dana siiliŋ nɛ, na ɛ ke lↄ ya asawuse ŋan na ɛ ke kyaŋ kpɛɛ." 5Botↄↄ te Simↄn tiranↄↄ nyiaa, "De Gbeŋgyoo, da te yɛɛ tom nelim pou da te kyaŋ kolo ya! Mↄna keŋ nyaŋ be yako dↄↄ, dɛɛ lↄ da asawuse." 6Ba ke lↄ ba asawuse ŋan nɛ, be kyaŋa kpɛɛ burum keŋ nyi ba asawuse ŋan ne lɛɛ gbɛɛ ŋe ke tirii. 7Mena dↄↄ be baake be tebia baŋ be doo degbele daale man nɛ nyi be kaa kyↄ wↄ. Ba kekↄŋ nɛ, be kaa lese kpɛɛ wulu agbelese ala ŋan pou keŋ nyi, ŋe lɛɛ gbɛɛ nafↄ ŋe ke munu. 8Simↄn Pita kena kpene keŋ be kↄŋ nɛ, ↄ buŋawↄ ↄ doona dↄↄ Yesu siaman yako e nyiaa, "Lee me gyaŋ, me Gbeŋgyoo! Me yɛɛ nombiakumɛɛyɛɛre e." 9Nawolo nyi lee kpɛɛ burum baŋ bↄↄ kyam nɛ dↄↄ, doo ŋon na ↄ tebia baŋ pou nↄↄ. 10Mena mↄ te doo ↄ tebia Sebedeo bia Gyemisi na Gyↄn baŋ baŋ na wↄ ne yɛɛ tom nɛ nↄↄ. Botↄↄ te Yesu yako Simↄn nyiaa, "Na yee ya, lee gyɛŋ ne gyu nɛ, balaŋ te maa yela n ke kyaŋ." 11Mena dↄↄ ba ke saa ba agbelese ŋan kↄŋ dekeŋkeŋ dↄↄ nɛ, be tinaa kpene kamasɛ yela botↄↄ te be sila Yesu laŋ. 12Yesu kekyaa donↄↄse ŋan daale man nɛ, balee ŋolo kↄŋawↄ keŋ kaweeyayam te di ↄ wose pou. Ↄ kena Yesu nɛ, ↄ kaa buŋawↄ ↄ nawↄↄtɛɛ waase e nyiaa, "Me Gbeŋgyoo, akpaa n ne gyae na nyaŋ ke tale kyↄ maŋ kawee." 13Botↄↄ te Yesu tenee ↄ nyiŋmaa tina e te ↄ yako nyiaa, "Mɛɛ gyae, n kawee dɛɛ taŋ." Debokenaŋ man te balee ŋon kawee taŋawↄ. 14Keŋte Yesu tↄↄ e kiiŋ nyi, "Na yeli walaŋ na walaŋ ke nyii ya, mↄna mo n wose gyu kawola Wurubuarɛ sae ŋon, na n ke deesi ŋgba mena keŋ Mosesi ba wola ŋon nɛ, na kedi adansɛɛ fa walaŋ kamasɛ nyi n kawee te taŋ." 15Mↄna nɛnɛɛ gba te Yesu wose man nombia yaaseewↄ gyu yenaŋ kamasɛ, te balaŋ burum kↄŋawↄ be kaa nyii e na waa kyↄ wↄ be kaweese. 16Mↄna Yesu ne kyaa wↄŋ ↄ wose lee yenaŋ gyu kefane. 17Wee daale Yesu kɛɛ wolo nɛ, na Farasiitena na Gyudatena mmaraa wolala baŋ bↄↄ lee Galelia na Gyudia tɛɛlese man, na Gyerusalɛm donↄↄ man nɛ, baale kyaa botↄↄ. Debaŋ kenaŋ na, de Gbeŋgyoo Wurubuarɛ doŋ doo Yesu man keŋ waa tale mo kyↄ kaweese. 18Te balaŋ baale seele walaŋ ŋon ↄ yenaŋ ba yem nɛ dofoŋoŋ dↄↄ kↄŋ, na bɛɛ gyae gbɛɛ na baa mo e gyoo dekpaŋalaŋ keŋ man ka see Yesu siaman, 19mↄna be te nyiŋ gbɛɛ mo e ta denanↄↄ man ya, nawolo nyi balaŋ boe. Mena dↄↄ ba gyeŋawↄ gyu deni keŋ nyee dↄↄ te be wolee yenaŋ daale, te be tisinaa e na ↄ dofoŋoŋ keŋ pou dɛɛdɛɛ see Yesu siaman balaŋ baŋ nsana nsana. 20Yesu kena mena keŋ bↄↄ lɛɛ e di nɛ, ↄ yako kaweete ŋon nyiaa, "Me gyoo, me ta mo n nombiakumɛɛ pou kyɛɛ neŋ." 21Botↄↄ te Gyudatena mmaraa wolala na Farasiitena baŋ fiasɛɛ bɛɛ bↄↄse dↄŋa nyiaa, "Walaŋ woŋti yaa kei te ↄ na mo ↄ wose kɛɛse na Wurubuarɛ mena? Lee Wurubuarɛ wↄle na amↄ kyaa la keŋ waa tale mo dukum kyɛɛ?" 22Na Yesu gyeŋ kpene keŋ bɛɛ gyueŋ nɛ te ↄ bↄↄse wↄ nyiaa, "Woŋ dↄↄ te ɛ na gyueŋ kɛŋa ɛ nyeeya man? 23Nombia kɛŋa man woŋti woɛla na keyako? 'Me ta mo n dukum kyɛɛ neŋ,' yaa 'Koro seŋ na n ke ta?' 24Mↄna mɛɛ gyae ɛ ka gyeŋ nyi maŋ Deniwalaŋ Bu dana doŋ tɛɛle kei dↄↄ nyi maa mo dukum kyɛɛ. Mena dↄↄ ↄ yako kaweete ŋon nyiaa, Koro seŋ, gate n dofoŋoŋ na n ke ta gyu n dɛɛ!" 25Debokenaŋ man te kaweete ŋon korowↄ seŋ ↄ nawↄↄ dↄↄ be siaman te ↄ gate ↄ dofoŋoŋ keŋ dↄↄ ↄ doo nɛ, te ↄ laŋa ↄ dɛɛ. Ↄ ne gyu na ↄ na lese Wurubuarɛ yele. 26Nombia kɛŋa doo balaŋ baŋ pou nↄↄ nideli te ba lese Wurubuarɛ yele. "Gyakoloŋ gyoo wↄ te be yakowↄ nyiaa, gyɛŋ dↄↄ da te naa nombia ŋan te kↄŋa ta see ya." 27Nombia kɛŋa wↄle nɛ Yesu leewↄ te ↄ ke naa lempoolɛɛre ŋolo ŋon bɛɛ baake e nyi Lewi nɛ, na ↄ kyaa ↄ lempoo delɛe man. Keŋte Yesu yako e nyiaa, "Koro sila maŋ." 28Debokenaŋ man te Lewi tinaa kpene kamasɛ yela te ↄ korowↄ sila Yesu. 29Keŋte Lewi moo Yesu gyu ŋon Lewi dɛɛ te ↄ ke saa e weenɛɛ ampaŋ ampaŋ. Lempoolɛɛra burum na balaŋ yakaa nyibaŋ kↄŋawↄ kaa di bom na wↄ. 30Botↄↄ te Farasiitena na Gyudatena mmaraa wolala baŋ bↄↄ lee Farasiitena dikpii keŋ man nɛ ŋorokoteewↄ bↄↄse Yesu kaseela baŋ nyiaa, "Weera dↄↄ te ɛmɛɛ na lempoolɛɛra na nombiakumɛɛyɛɛra ne dii te ɛ ne nyↄↄ bom?" 31Keŋte Yesu tiranↄↄ fa wↄ nyiaa, "Kaweesetena te kaboena nyi baa kyↄ wↄ kawee. Baŋ bↄↄ na wee ya nɛ dↄↄ, bↄↄ ne hia kawee kekyↄ ya. 32Ma te kↄŋ nyi me kaa baake balaŋ baŋ be gbɛɛneŋ wulaa tenɛɛ Wurubuarɛ siaman nɛ ya, mↄna me kↄŋae me kaa baake nombiakumɛɛyɛɛra na baa kyɛɛkee lee be gbɛɛneŋ kumɛɛ man na baa kↄŋ Wurubuarɛ gyaŋ." 33Keŋte be yako Yesu nyiaa, "Gyↄn Wurubuarɛ loŋsↄↄre ŋon silala ne kyaa bake be nↄↄ fane, te mena mↄ yaa Farasiitena silala mↄ ne yɛɛ. Mↄna nyaŋ wui kɛwↄ dↄↄ bee dii bɛɛ nyↄↄ debaŋ kamasɛ." 34Botↄↄ te Yesu yako wↄ nyiaa, "Ɛ ke tale yela balaŋ baŋ be kyaa alowↄletɛɛ nɛ ke bake be nↄↄ keŋ alowↄle baale kyaa be gyaŋ? 35Mↄna debaŋ daale gyae kekↄŋ keŋ baa mo alowↄle baale ŋon lee be gyaŋ. Mena weeya ŋenaŋ man te baa bake be nↄↄ." 36Keŋte Yesu gyↄↄ wↄ dudu kei nyiaa, "Ŋolo bɛɛ kara kanyaŋ wↄle mo taa kakyeŋgbelaa keŋ ba yem nɛ ya. Akpaa ↄ yɛɛ mena na ↄ te wↄlɛɛ kanyaŋ wↄle keŋ, nawolo nyi kanyaŋ wↄle keŋ be gyae ke kyaa na bene keŋ ya. 37Mena mↄ te ŋolo bɛɛ mo soloŋ wↄle do wonembu tↄne ogele bene man ya. Ↄ yɛɛ mena na soloŋ wↄle keŋ gyae ke tao wonembu tↄne ogele keŋ lii na soloŋ keŋ ke leki, na wonembu tↄne ogele keŋ mↄ ke wↄlɛɛ. 38Mena dↄↄ kaboena bo nyi baa mo soloŋ wↄle do wonembu tↄne ogele wↄle man. 39Te ŋolo be kyaa keŋ nyi ↄ nyↄↄ soloŋ apaesa na, waa yako nyi ↄ ne gyae ntoŋkum waa nyↄↄ bela ya. Nawolo nyi ↄ ne yako nyi apaesate keŋ yɛna kpaakpaate."

will be added

X\