Luka 4

1Yesu ka lee Gyↄↄdan boo keŋ man nɛ, na Wurubuarɛ feliŋ doo ↄ man nideli. Te Wurubuarɛ feliŋ ŋon yela Yesu gyuu depampaa dinaa daale man, 2botↄↄ te ↄbↄnsam kaa kɛɛse e weeya sↄŋola. Weeya ŋenaŋ man pou na ↄ ta mo kolo daa ↄ nↄↄ ya. Te weeya ŋenaŋ kesi nɛ, tanam kyaŋa e nideli. 3Botↄↄ te ↄbↄnsam yako e nyiaa, "Akpaa nyaŋ yɛna Wurubuarɛ bu ŋon na, yela boe kei ka bese weenɛɛ." 4Keŋte Yesu tiranↄↄ fa e nyiaa, "Wurubuarɛ nombia aŋmaraseŋ see ne yako daa nyiaa, na weenɛɛ kaageŋ ne gyae la ke fa walaŋ nyeedoŋ ya." 5Botↄↄ te ↄbↄnsam moo Yesu gyu bula dinaa daale nyee dↄↄ, te ↄ lese tɛɛle kei dↄↄ gyoorobiiri pou wola e karatetee dokoloŋ. 6Keŋte ↄ yako Yesu nyiaa, "Maa mo gyoorobiiri na abↄↄ nya anaŋ kɛŋa pou doŋ do n nyiŋmaa man na n ke di ŋe dↄↄ. Nawolo nyi be ta mo ŋe popou fa maŋ, mena dↄↄ maa tale mo ŋa fa walaŋ kamasɛ ŋon mɛɛ gyae. 7Mena dↄↄ nyi akpaa n buŋ me nawↄↄtɛɛ som maŋ na, abↄↄ kɛŋa pou gyae ka bese n wui." 8Keŋte Yesu tiranↄↄ fa e nyiaa, "Wurubuarɛ nombia aŋmaraseŋ see ne yako daa nyiaa, De Gbeŋgyoo Wurubuarɛ waageŋ te kaboena nyi nya buŋ na n ka som e." 9Botↄↄ te ↄbↄnsam moo Yesu gyu Gyerusalɛm donↄↄ man te ↄ mo e gyu Wurubuarɛ ↄsom deni dinaa keŋ nyee man adido adido te ↄ yako e nyiaa, "Akpaa nyaŋ yɛna Wurubuarɛ bu ŋon na, fuŋ n wose lee kɛbo ke lↄ tɛɛle man, 10nawolo nyi Wurubuarɛ nombia aŋmaraseŋ see ŋan ne yako daa nyi, 'Nyaŋ dↄↄ Wurubuarɛ waa kpila ↄ kpilala na be kaa gyee neŋ nideli, 11na baa kↄlee neŋ keŋ nyi, n be gyae n ka mo n nae gyↄ na boe koraŋ gba ya.' " 12Keŋte Yesu tiranↄↄ fa e nyiaa, "Wurubuarɛ nombia aŋmaraseŋ see na bese yako daa nyiaa, 'Na kɛɛse n Gbeŋgyoo Wurubuarɛ ŋon kɛɛ ya.' " 13Debaŋ keŋ ↄbↄnsam be kɛɛse e kina taŋ nɛ, ↄ tinaa Yesu yela pɛ kelii debaŋ keŋ waa bese nyiŋ gbɛɛ wↄle bela. 14Wurubuarɛ feliŋ ŋon yela Yesu besewↄ gyu Galelia tɛɛle man, te ↄ wose man nombia yaaseewↄ tɛɛle kenaŋ pou dↄↄ. 15Yesu tɛɛwↄ wola Gyudatena ↄsom denɛɛ man, te walaŋ kamasɛ kɛlɛɛ e. 16Yesu gyuuwↄ Nasarɛte botↄↄ keŋ bↄↄ kɛɛle e nɛ, te Gyudatena kefɛɛfowee kelii nɛ, ↄ gyuuwↄ Gyudatena ↄsom deni man ŋgba mena keŋ ↄ ne taŋ yɛɛ nɛ. Keŋte ↄ korowↄ seŋ nyi waa kala Wurubuarɛ nombia ŋan, 17botↄↄ te ba moo Wurubuarɛ dekpeŋkpeŋgyↄↄre Yesaya tↄne fa e. Ↄ gyuusu tↄne keŋ te ↄ kala botↄↄ keŋ bↄↄ ŋmarase nyiaa, 18"De Gbeŋgyoo Wurubuarɛ feliŋ doo me man, nawolo nyi ↄ ta lese maŋ see nyi maa kolosi ↄ nombia kpaakpaa ŋan fa ayematena. Ↄ te kpila maŋ nyi maa yako yoo gbeŋa nyi Wurubuarɛ waa lese wↄ lee be gbeŋiri man, na maa yako siayɛlɛɛsatena nyi be sia gyae ke gyuusu, na baŋ mↄ bee wuritii wↄ nɛ ke nyiŋ ba wose, 19na maa yela balaŋ pou ka gyeŋ nyi, debaŋ keŋ de Gbeŋgyoo Wurubuarɛ waa kaa lɛɛ ↄ balaŋ nyee nɛ ta benaa." 20Keŋte Yesu bↄↄ tↄne keŋ te ↄ besena ke fa tobaale ŋon ↄ ba mo ke fa e nɛ, te ↄ tisiwↄ kyaa. Balaŋ baŋ pou be kyaa bↄ ↄsom deni keŋ man nɛ, fɛɛ be sia bɛɛ kɛɛ e nɛ fee. 21Botↄↄ te Yesu yako wↄ nyiaa, "Gyɛŋ wee kei nɛ, Wurubuarɛ nombia ma akalaŋ kɛŋa te kↄŋ mena ɛmɛɛ gbagba ɛ siaman ŋgba mena keŋ ɛ be nyii mↄↄ kale nɛ." 22Nombia kpaakpaa ŋan Yesu be yako nɛ, doo balaŋ baŋ pou bↄↄ gyaŋee botↄↄ nɛ nↄↄ te be kɛlɛɛ e. Keŋte be bↄↄse dↄŋa nyiaa, "Na Gyosɛfo bu ŋon yaa yee?" 23Keŋte Yesu yako wↄ nyiaa, "Ma gyeŋ nyi ɛ ke gyↄ maŋ dudu kei nyi 'Nyaŋ ŋon n ne kyↄ balaŋ nɛ, kyↄ n wose na dɛɛ kɛɛ.' Te ɛ ka bese yako maŋ nyi, 'Gyakoloŋ nombia ŋan dↄↄ nyii n be yɛɛ Kapanum donↄↄ man nɛ, yɛɛ ŋa nyaŋ gbagba n donↄↄ man kɛbo mↄ na dɛɛ kɛɛ.' " 24Yesu besewↄ yako wↄ kpu nyiaa, "Ampaŋ yaa mɛɛ yako ŋon nyi Wurubuarɛ dekpeŋkpeŋgyↄↄre ŋolo be kyaa keŋ bɛɛ lɛɛ e ŋon gbagba ↄ dɛɛ ya." 25Ampaŋ yaa mɛɛ yako ŋon nyi, debaŋ keŋ Wurubuarɛ dekpeŋkpeŋgyↄↄre Elia be kyaa nɛ, na liala burum kyaa Iserae tɛɛle dↄↄ, mↄna debaŋ keŋ ↄga ba sem kulutooneŋ atooro na yaale, te tanam dinaa be yale tɛɛle keŋ pou dↄↄ nɛ, 26Wurubuarɛ te kpila Elia nyi waa gyu ke kyↄ be man ŋolo ya. Ↄ kpila e bo gyu lialo ŋon ↄ te yɛɛ Iserae alo e ya, te ↄ kyaa Sarefate donↄↄ keŋ kyaa Sidↄn tɛɛle man nɛ gyaŋ. 27Wurubuarɛ dekpeŋkpeŋgyↄↄre Elisa mↄ ke kyaa nɛ, na akuŋtuŋtena burum kyaa Iserae tɛɛle dↄↄ mↄna Wurubuarɛ te kyↄ be man ŋolo ya. Siria baale Naaman ŋon waageŋ te ↄ kyↄↄwↄ. 28Balaŋ baŋ pou be kyaa Gyudatena ↄsom deni keŋ man kenyii nombia kɛŋa nɛ, ba gyeŋa baŋ nideli. 29Botↄↄ te balaŋ baŋ korowↄ gyu ke kyaŋ Yesu wↄŋee e lee donↄↄ keŋ man, te ba moo e gyu bula keŋ dↄↄ donↄↄ keŋ gyakaa nɛ nyee man, nyi baa fuŋ e ke lↄ delↄkↄtↄↄ keŋ man. 30Mↄna Yesu moowↄ balaŋ baŋ pou nsana nsana te ↄ laŋawↄ. 31Yesu gyuuwↄ Kapanum donↄↄ keŋ ke kyaa Galelia tɛɛle man nɛ man. Te Gyudatena kefɛɛfowee kelii na, ↄ gyuuwↄ ka wola wↄ Wurubuarɛ nombia. 32Yesu kawola keŋ doo balaŋ baŋ pou nↄↄ, nawolo nyi ↄ ne gyↄ ↄ konↄↄ wola ŋgba walaŋ ŋon ↄ dana doŋ nombia ŋan ↄ na wolo nɛ dↄↄ nɛ. 33Na balee ŋolo kyaa Gyudatena ↄsom deni keŋ man keŋ feliŋkum doo ↄ man. Ↄ fae yeesa keŋkeŋ nyiaa, 34"Nyaŋ Yesu Nasarɛte baale, woŋ yaa n ne gyae de gyaŋ? N kↄŋae n kaa wↄlɛɛ daa? Ma gyeŋ neŋ nyi nyaŋ yɛna Wurubuarɛ walaŋ ŋon ayimɛɛ be doo n man ya nɛ." 35Botↄↄ te Yesu yase ↄ sia yako feliŋkum keŋ nyiaa, "Wu n nↄↄ, na n ka lee ↄ man." Keŋte feliŋkum keŋ fuŋa balee ŋon lↄ balaŋ baŋ pou siaman te ka leewↄ ↄ man laŋ, mↄna balee ŋon te gooli ya. 36Nombii kei doo balaŋ baŋ pou nↄↄ te be bↄↄse dↄŋa nyiaa, "Woŋ kawola yɛna kei? Ↄ na mo doŋ kolosi fa feliŋkumɛɛ na ŋɛɛ lee balaŋ man." 37Keŋte Yesu wose man nombia yaaseewↄ gyu debiise ŋan ŋa benaa na botↄↄ nɛ pou man. 38Yesu ka lee Gyudatena ↄsom deni keŋ man na, te ↄ gyuuwↄ Simↄn dɛɛ. Ↄ ke gyu botↄↄ na Simↄn wa awu doo ↄ na wee kpaŋalaŋ. Keŋte be waase Yesu nyi waa kyↄ e kawee fa wↄ. 39Botↄↄ te ↄ ka seŋawↄ alo ŋon yenaŋ te ↄ fae kpaŋalaŋ keŋ, te ↄ kawee keŋ taŋawↄ. Debokenaŋ man te alo ŋon korowↄ kyaa te ↄ kɛɛ be dↄↄ. 40Kelii balinↄↄ nɛ, balaŋ burum moo kaweesetena baŋ bɛɛ wee kaweese kpookpoo nɛ kↄŋ Yesu gyaŋ, te ↄ moo ↄ nyiŋmaa gyakaa kaweete kamasɛ dↄↄ te ↄ kyↄↄ wↄ. 41Feliŋkumɛɛ mↄ leewↄ balaŋ burum man na ŋɛɛ fae yeesa nyi, "Nyaŋ yɛna Wurubuarɛ bu ŋon." Mↄna ↄ fae ŋa keŋ ↄ te fa ŋa gbɛɛ ŋa ke kolosi ya, nawolo nyi ŋa gyeŋ nyi ŋon yɛna Kristo, nyeelɛɛre ŋon Wurubuarɛ be yako see nyi waa kↄŋ nɛ. 42Tɛɛ kena nɛ, Yesu wↄŋa ↄ wose lee yenaŋ. Botↄↄ na balaŋ baŋ te fiasɛɛ bɛɛ kɛo e. Ba kena e nɛ, ba te fa e gbɛɛ waa lee be gyaŋ ya. 43Mↄna ↄ yako wↄ nyiaa, "Kaboena nyi maa kolosi Wurubuarɛ gyoori keŋ wose man nombia kpaakpaa ŋan fa donↄↄse akaŋ ŋan mↄ, nawolo nyi keŋ dↄↄ te Wurubuarɛ kpila maŋ." 44Mena dↄↄ Yesu tɛɛwↄ kolosi Wurubuarɛ nombia Gyudatena ↄsom denɛɛ man Galelia tɛɛle dↄↄ pou.

will be added

X\