Luka 24

1Ba kefɛɛfowee keŋ wↄle tɛɛ kena nebo nebo fuu nɛ, ala baŋ moo ba teeneŋ ofoŋ nyiŋan ŋan bↄↄ gyae see nɛ te be gyuuwↄ yebↄↄ keŋ tɛɛ. 2Be kelii botↄↄ nɛ be naawↄ ŋgba boe keŋ bↄↄ mo tↄ yebↄↄ keŋ nↄↄman nɛ te biliŋi laŋ yenaŋ, 3mena dↄↄ ba gyoowↄ yebↄↄ keŋ man mↄna ba te naa de Gbeŋgyoo Yesu woo ŋon ya. 4Be ka seŋ botↄↄ bɛɛ gyueŋ nombia kɛŋa man nɛ, karatetee dokoloŋ te baala bala baŋ ba doona kegbase wolomɛɛ ŋan ŋɛɛ ŋalakee ŋgba akaralɛɛ nɛ kaa bɛɛwↄ lee be dↄↄ. 5Gyakoloŋ kyaŋa ala baŋ te be gↄŋase ba nyeeya. Keŋte baala baŋ bↄↄse wↄ nyiaa, "Weera dↄↄ te ɛ ne kɛo walaŋ ŋon ↄ delena nɛ woya dɛɛ? 6Ↄ be kyaa kɛbo ya ↄ te fom. Ɛ te wolee nombia ŋan ↄ be yako ŋon debaŋ keŋ ↄ kyaa ɛ gyaŋ Galelia nɛ nyiaa, 7'Kaboena nyi baa lese maŋ Deniwalaŋ Bu ŋon fa nombiakumɛɛyɛɛra, na baa gyↄ maŋ nyeelabia sakaa ↄpaŋdaŋ dↄↄ na maa yeŋ. Mↄna weeya atoorote na Wurubuarɛ waa gyuusu maŋ lee yeŋ man.' " 8Botↄↄ te ala baŋ tↄↄse ↄ nↄↄwoya kɛŋa. 9Be ka lee yebↄↄ keŋ tɛɛ nɛ, ba ke yako nombia kɛŋa pou fa ↄ kpilala kufu daale baŋ na ↄ kaseela akaŋ baŋ pou. 10Mɛɛre Magedala na Gyoana na Gyemisi ↄ naa Mɛɛre, na ala akaŋ baŋ be kpuɛ na wↄ nɛ gyuu la ke yako nombia kɛŋa fa kpilala baŋ. 11Mↄna kpilala baŋ gyueŋwↄ nyi ŋan ala baŋ be yako nɛ pou yɛɛ diyiŋ nombia ŋa, mena dↄↄ ba te lɛɛ wↄ di ya. 12Keŋte Pita ŋon korowↄ yeu gyu yebↄↄ keŋ tɛɛ. Ↄ ke buŋawↄ do ↄ sibii kɛɛ yebↄↄ keŋ man na, ↄ naa akaralɛɛ keŋ bↄↄ mo milii e nɛ kaageŋ doo la. Botↄↄ te ↄ besewↄ gyu dɛɛ na ↄ na gyueŋ nombia ŋan be kↄŋ nɛ man. 13Mena wee kenaŋ nɛ, Yesu kaseela bala baale leewↄ Gyerusalɛm donↄↄ man bee gyu donↄↄbii daale keŋ bɛɛ baake ke nyi Emause nɛ man. Lee botↄↄ gyu Gyerusalɛm donↄↄ man gyae ke yɛɛ ŋgba gbɛɛkemaase nyetooro (kilometase kufu daale) nɛ. 14Na be dↄŋɛɛ bɛɛ yↄↄ nombia ŋan be kↄŋ nɛ afa. 15Ba ke ta bɛɛ yↄↄ afa kɛŋa nɛ, Yesu gbagba kaa bɛɛwↄ lee be dↄↄ. 16Mↄna be ta gyem nyi Yesu ŋonaŋ ya. 17Botↄↄ te Yesu bↄↄse wↄ nyiaa, "Woŋ afa yaa ɛ dↄŋɛɛ ɛ ne yↄↄ mena?" Keŋte be dↄↄwↄ seŋ waraŋase man. 18Te be man ŋolo ŋon bɛɛ baake e nyi Kilopase nɛ bↄↄse Yesu nyiaa, "N yɛɛ ŋↄↄle e Gyerusalɛm donↄↄ man kɛbo, keŋ n ba gyeŋ kpene keŋ be kↄŋ weeya ala kɛŋa yee?" 19Botↄↄ te Yesu bↄↄse wↄ nyiaa "Woŋ nombia kↄŋala?" Keŋte be tiranↄↄ fa e nyiaa, "Yesu Nasarɛte baale ŋon wose man nombia. Balee kei yɛɛ Wurubuarɛ dekpeŋkpeŋgyↄↄre e te ↄ kekolosi na ↄ nombia ŋan ↄ be yɛɛ nɛ, lesewↄ wola nyi Wurubuarɛ kpuɛ na e te balaŋ mↄ lɛɛ e di. 20Wurubuarɛ saese kegyiise na de donↄↄ kegyiise lese na e fa nyi baa ko, te be gyↄↄ e sakaa ↄpaŋdaŋ dↄↄ. 21Mↄna nafↄ ŋon te de loo gyakaa ↄ dↄↄ nyi waa kaa lɛɛ Iseraetena nyee. Gyɛŋ yɛna weeya atoorote ŋgba kɛŋa pou be kↄŋ nɛ. 22Kɛŋa wↄle nɛ, ala baale baŋ be kpuɛ na daa nɛ kↄŋawↄ kaa yako daa gyakoloŋ nombia ŋaale. Be kpa be karatɛɛwↄ gyu yebↄↄ keŋ tɛɛ, 23mↄna ba te naa Yesu woo ŋon ya te ba besewↄ kↄŋ kaa yako nyi, Wurubuarɛ kpilala bala baale kaa lese ba wose wola wↄ, te be yako wↄ nyi Yesu delena. 24De man baale mↄ gyuu yebↄↄ keŋ tɛɛ na, ba ke naa kpene kamasɛ ŋgba mena keŋ ala baŋ be yako nɛ mↄna baŋ mↄ te naa Yesu ŋon ya." 25Botↄↄ te Yesu yako wↄ nyiaa, "O ɛmɛɛ ayiŋtena, weera dↄↄ te ɛ yɛɛ nyoɛnyoɛ na nombia ŋan pou Wurubuarɛ akpeŋkpeŋgyↄↄra baŋ be yako see nɛ ke lɛɛ di mena. 26Tekaboena nyi nyeelɛɛre ŋon Wurubuarɛ be yako see nyi waa kↄŋ nɛ, waa naa diyem kei pɛna waa gyoo ↄ gyoori keŋ man yee?" 27Botↄↄ te Yesu fiasɛɛ ↄ na wola wↄ kpene keŋ bↄↄ ŋmarase Mosesi mmaraase ŋan man, na ŋan Wurubuarɛ akpeŋkpeŋgyↄↄra be yako see lee ↄ wose man nɛ man. 28Be ka benaa donↄↄbii keŋ man bee gyuu nɛ, Yesu yɛɛwↄ ŋgba ↄ ne gbaa waa laŋ nɛ. 29Mↄna be waase e nideli nyi, "Tɛɛ te yuu dↄↄ waa kↄŋ kaa doo be gyaŋ." Mena dↄↄ ↄ gyuuwↄ kekyaa be gyaŋ. 30Ŋon na wↄ ke kyaa baa di nɛ, ↄ moo bodobodo te ↄ fanewↄ do Wurubuarɛ nↄↄ te ↄ kɛrɛɛ ke kpala wↄ. 31Botↄↄ te be sia gyuusuwↄ te ba gyeŋawↄ nyi Yesu ŋonaŋ, keŋte ↄ ŋaalaawↄ be siaman. 32Keŋte be bↄↄse dↄŋa nyiaa, "Debaŋ keŋ ↄ ne kolosi na daa gbɛɛnaa man te ↄ ba lese Wurubuarɛ nombia aŋmaraseŋ see ŋan man wola daa nɛ, de wↄe te lↄ daa yee?" 33Debokenaŋ man te ba korowↄ bileŋ bese gyu Gyerusalɛm donↄↄ man. Botↄↄ te ba ke naa kpilala kufu daale baŋ na balaŋ akaŋ baŋ te yilaa botↄↄ 34na bɛɛ yako nyiaa, "Ampaŋ de Gbeŋgyoo ŋon te fom! Ↄ ta lese ↄ wose wola Simↄn!" 35Botↄↄ te kaseela bala baŋ mↄ yako wↄ kpene keŋ be kↄŋ Emause gbɛɛnaa man nɛ, na mena keŋ Yesu be kɛrɛɛ bodobodo kpala wↄ te bↄↄ gyem nyi ŋon ŋonaŋ nɛ. 36Ba ke gyakaa bee kolosi ↄ wose nombia kɛŋa nɛ, Yesu gbagba kaa seŋawↄ be gyaŋ te ↄ yako wↄ nyiaa, "Wosefɛɛreŋ dɛɛ kyaa ɛ man." 37Be ŋeŋawↄ te gyakoloŋ kyaŋa wↄ, na baŋ gyeŋ nyi woo yaa be naawↄ. 38Keŋte Yesu bↄↄse wↄ nyiaa, "Woŋ dↄↄ te ɛ ne yee yaa woŋ dↄↄ te ɛ ne lɛɛ aŋmaareŋ ɛ nyeeya man? 39Ɛ kɛɛ me nyiŋmaase na me nawↄↄ! Maŋ gbagba ŋonaŋ. Ɛ tina maŋ kɛɛ! Nawolo nyi woo be dana wosenaane na ŋↄↄ ŋgba mena keŋ ɛ ne naa maŋ dana nɛ ya." 40Ↄ kekolosi taŋ nɛ, ↄ moo ↄ nyiŋmaase na ↄ nawↄↄ wola wↄ. 41Nombia ŋan doo be nↄↄ te yɛɛ wↄ gyoŋ gbaa keŋ nyi ba te lɛɛ di ya. Keŋte Yesu bↄↄse wↄ nyiaa, "Ɛ dana weenɛɛ ŋaale kɛbo?" 42Keŋte ba moo kpebii keŋ bↄↄ ŋasee ke nɛ duguŋ fa e. 43Te ↄ lɛɛ ke tao be siaman botↄↄ. 44Keŋte ↄ yako wↄ nyiaa, "Debaŋ keŋ me kyaa ɛ gyaŋ nɛ me yako ŋon nyiaa, nombii kamasɛ keŋ bↄↄ ŋmarase Mosesi mmaraase ŋan man, na ŋan Wurubuarɛ akpeŋkpeŋgyↄↄra be ŋmarase see na ŋan bↄↄ ŋmarase see nↄↄneŋ tↄne man lee ma wose man nɛ, kaboena nyi ŋe dɛɛ kↄŋ mena." 45Botↄↄ te ↄ toro ba agyueŋ na baa nyiŋ nyii Wurubuarɛ nombia aŋmaraseŋ see ŋan man. 46Keŋte Yesu yako wↄ nyiaa, "Be yakowↄ Wurubuarɛ nombia aŋmaraseŋ see ŋan man nyiaa, nyeelɛɛre ŋon Wurubuarɛ be yako see nyi waa kↄŋ nɛ, waa naa diyem na waa yeŋ mↄna ka weeya atoorote keŋ na waa foŋ lee yeŋ man, 47te baa kolosi Wurubuarɛ nombia ↄ yele man fa balaŋ pou tɛɛle kei dↄↄ, na baa kyɛɛkee lee be gbɛɛneŋ kumɛɛ man na baa kↄŋ Wurubuarɛ gyaŋ, na Wurubuarɛ ka mo be nombiakumɛɛ kyɛɛ wↄ. Baa fiasɛɛ lee Gyerusalɛm donↄↄ man, pɛna baa gyu donↄↄse akaŋ ŋan man. 48Ɛmɛɛ yɛna balaŋ baŋ ɛ ke di mena nombia kɛŋa wose man adansɛɛ. 49Maa mo me kya Wurubuarɛ feliŋ ŋon ↄ be yako see nyi waa fa ŋon nɛ kaa do ɛ man. Mↄna ɛ kyaa Gyerusalɛm donↄↄ man kɛbo kelii debaŋ keŋ waa mo mena doŋ kei lee adido kaa do ɛ man." 50Keŋte Yesu moo ↄ kaseela baŋ lee donↄↄ kenaŋ man gyu Bɛtani donↄↄ nↄↄman, botↄↄ te ↄ gyinaa ↄ nyiŋmaase adido te ↄ hiraa ↄ kaseela baŋ. 51Ↄ kee hiraa wↄ nɛ, ↄ tinaa wↄ yela te Wurubuarɛ moo e laŋ adido. 52Keŋte ba som e te ba moo kenyaŋee dinaa bese kↄŋ Gyerusalɛm donↄↄ man, 53te debaŋ kamasɛ na bee gyu ke kyaa Wurubuarɛ ↄsom deni dinaa keŋ man lese Wurubuarɛ yele.

will be added

X\